教育王國

標題: 港人教育子女花$100萬　開支冠全球 [打印本頁]

作者: elbar 時間: 17-6-30 15:02 標題: 港人教育子女花$100萬　開支冠全球

調查顯示，88％受訪香港家長會讓子女補習，學者指這是華人社會的趨勢，認為成績好就是成功的起點。（iStock）

不少父母花盡心思栽培子女成材，有調查顯示，香港家長投放在子女的教育開支冠全球，由小學至大學本科平均支出逾100萬元，是全球平均水平的2倍。學者指，家長盼子女練得「周身刀」，不惜成本報讀各種補習班、興趣班，相信實際教育開支遠超過100萬元。

滙豐在全球15個國家及地區訪問了8,481名家長，顯示全球家長用於子女的教育開支，包括學費、教育書籍、交通及住宿等，由小學至大學本科平均為44,221美元（約34萬港元）。而本港家長的子女教育開支，平均花費132,161美元（約103萬港元），排名第一。阿聯酋及新加坡，依次序排行第二及三，平均開支為99,378美元及70,939美元，即78萬及55萬港元。

私人補習費全球第3

調查亦發現88％本港家長表示正在或曾為子女支付私人補習費，全球排行第3。教大課程與教學學系助理教授許景輝稱，不少父母認為子女要嬴在起跑綫，便需練得「周身刀張張利」，報讀各式各樣的補習班及興趣班。他舉例一般的課後託管每月收費約2,000元，一年即2.4萬元；書簿費每年至少3,000元，未計生活費、興趣班、補習班等，相信教育開支絕不止100萬元，「今年最平的4日STEM教育暑期班收費為4,000起，甚至有5日課程收費逾萬元，而新加坡類似的暑期班，5日只需500至600坡元，即3,000至3,600港元」。

學者：教育開支多未必好

兒子即將赴英國升讀高中的藝人森美表示，每年的學費及生活費約需50萬元，讀至大學畢業合共約需350萬元，他坦言曾問兒子：「若留港讀書，大學畢業後就有350萬元，可以用來做生意或買樓」，但兒子最終決定到海外增廣見聞，森美說：「錢不是父母考慮的因素。」

而3名子女均就讀國際學校的導演張堅庭則指，國際學校每年學費20萬元，由小學至中學12年已花240萬元，但他說從不讓子女上補習班，認為過分催谷，反會令孩子失去學習興趣。

中大商學院助理院長李兆波稱，若要到海外留學，「學費夠買起半層樓」，直言社會風氣鼓吹「貴就等於好」，認為教育開支的多與少，與子女的學習質素未必成正比。

張堅庭認為本港的補習文化過盛，反會影響子女的學習興趣。

作者: elbar 時間: 17-6-30 15:18

香港教育太畸形　快樂童年何處尋（東方功夫茶）

香港教育制度畸形，已經去到病態嘅地步，否則又點會贏喺起跑線前都唔夠，仲要贏在射精前吖。咁都未算喎，家長為咗催谷子女無所不用其極，花費之巨冠絕全球，呢勻直情贏在世界前喇。

冇誇張o架，有銀行喺全球十五個國家及地區進行調查，結果發現由小學至大學階段，香港家長用於子女教育嘅總開支超過十三萬美元，折合港紙過百萬元，比排第二嘅阿聯酋多逾二十萬港元，更多過排第三嘅新加坡近倍，至於英美呢啲港人留學勝地直情不入流，只能望香港嘅項背咋。

大嗱嗱「一球」認真唔嘢小，到底啲錢用喺邊呢？原來除咗交學費、買書簿，好大筆用於子女補習。嗱，多達八成八家長曾經或現正為子女支付私人補習費；五成家長為支付子女嘅教育開支而節衣縮食，犧牲其他開支亦在所不計，呢啲咪叫可憐天下父母心囉。

冇計啦，香港社會競爭激烈，教育貴族化，孩子冇十八般武藝傍身，想入名校幾乎唔使旨意，家長望子成龍心切，紛紛變身虎爸虎媽，其實都係為勢所逼嘅咋。唔係咩，大學沙紙愈來愈唔馨香，無論係走出校門首份人工定係入息中位數，二十年來不升反跌，大學生已經咁唔值錢，萬一子女連大學門檻都擠唔上，將來搵食只會更艱難，父母唔操心就假。

最慘係本港教育制度朝令夕改，一時母語教學，一時語言微調，五時花六時變，學生慘成白老鼠，家長亦無所適從，淨係TSA已經搞到天怒人怨，家陣改頭換面變成BCA，咪又係換湯不換藥。難為吳得掂局長仲大義凜然話取消好容易，但就對唔住學生同家長喎。講到咁偉大，咁點解釋包括吳局長在內嘅高官權貴子女爭相去海外留學，都唔留低接受咁優質嘅香港教育呢？

講番轉頭吖，養兒一百歲，長憂九十九，父母着緊子女學業完全可以理解，之但係過度催谷，揠苗助長，隨時愛佢變成害佢。好似前幾日先有一單青年疑不堪海外升學壓力而自尋短見嘅新聞，睇到個心都實晒。所以話，家長與其一味將主觀願望投放喺子女身上，令子女失去自由發展嘅機會，不如畀子女一個快樂童年仲好喇。

講到尾，都係港府無能惹嘅禍。如果港府真係可以將產業做大做闊，處處有機會，年輕人又使乜擔心冇出路喎？如果教育制度真係求學不是求分數，又點會連幼稚園學生都話要補習喎？新政府上任後將增撥五十億元作為教育經常開支，係就係夠晒大手筆嘞，最怕又係用於評估呢樣、考核嗰樣，咁就盞嘥氣嘅咋。

歡迎光臨教育王國 (/)