教育王國
標題: 禁打機不如陪小朋友打機（葉偉麟） [打印本頁]
作者: elbar 時間: 17-3-2 10:40 標題: 禁打機不如陪小朋友打機（葉偉麟）
八歲男童，就讀本地名牌小學，每日花近6小時玩遊戲機。 學業成績中上，脾氣暴躁，父母擔心長此下去，會嚴重影響小孩心智健康及成績。
家長：
一放學就打機，可以唔食飯唔沖涼，叫親佢停都話：得啦得啦，得個拖字！搞到半夜先肯熄機，第日仲邊度有精神返學啦！
我：
咁佢學業應付到嗎？
家長：
中遊份子囉。佢如果將打機時間用嚟讀書，肯定好好多。
我：
佢願意花咁多時間打機，喺Game 入面一定搵到啲好重要嘅嘢，可以證明到自己。而且仲覺得比考試考得好更有成就感。
家長：
咁即係點呀？唔通繼續鼓勵佢玩，唔使佢溫習功課？
我：
呢個係我哋家長嘅期望，同仔仔現時嘅需要似乎有段距離。你知唔知仔仔而家玩緊邊隻game？
家長：
吓？⋯⋯都係嗰啲打打殺殺，殺喪屍嗰啲掛？
我：
肯定？不如我哋去證實吓先作定論啦。
後來男孩來到治療室接受治療，他透露了最喜歡的Game 叫 Minecraft 。當中的角色，就是不斷在建耩屬於自己的國土，擴大領域。其實是一個具有策略性及有野心的計劃隱藏在背後的。如果他真的喜歡這個game ，理論上他對自己學業成績絕對是個有要求的人。
我：
呢個 Game 咁 Hit， 我諗一定係好好玩。
男孩在我面前示範了解10分鐘如何完美的策略。
男孩：
幾勁，see？！
我：
唔怪得停唔到落嚟啦。我都好想玩......
男孩忽然停頓下來說：
其實呢度間房啲嘢郁唔郁架？我哋不如試吓自己設計個現實嘅war battle 啦！我要同你鬥！
我：
好提議呀！想點玩法？
男孩：
跟我嚟！
於是我們就把遊戲室的枱，燈，裝飾，全部重新調動位置，造成各種障礙及難關，務求更有趣味性。這全都是由他們設計的。
這同時亦即是一場真人角色扮演遊戲。
我們各自持有武器槍支，電筒，求生工具，把自己全程投入一場非理性的大冒險當中。
我們把燈關上，情況有如野外求生一樣在追逐攻擊。
男孩不停逃跑，躲藏，突擊，偷運武器，最後我落荒而逃全軍覆沒。
我：
你識得穩守突擊，擁有完美策略及急才，用最少嘅彈藥打敗我，就證明你係一個做大事嘅人。
而我是落難受害者，說穿了，我演繹了他內心的「恐懼」。打敗了我，同時亦強化了的他的解難能力。
然後他每次來治療室，都會設計出不同類型的對戰陣型，而他都能夠運用完美策略取得勝利。他對自己的能力掌握及自信體驗爆炸性提升了。
有一次孩子：
其實我次次你搞到呢度七國咁亂，你會唔會唔歡迎我？
我：
如果你需要咁樣先表達到，咁點解唔可以亂啲呢？我哋呢度又唔係學禮貌D班。
男孩微笑，感受到被重視。然後歡天喜地開始執拾好混亂的場面。
三個月之後家長對我說：
佢而家乖左好多。每日只打1個鐘頭機，變得自動自覺，有時會吸下塵，讀書成績又好咗，你哋到底喺裏面發生左咩事？
我：
繼續打機，而且訓哂身全程投入去打機㖭！
其實，要改變一個行為，首先就要容許這個行為不用改變。我哋唯一可以做嘅就係陪佢一齊經歷同長大。
作者: skkeung 時間: 17-3-2 18:31
elbar 發表於 17-3-2 10:40 
八歲男童，就讀本地名牌小學，每日花近6小時玩遊戲機。 學業成績中上，脾氣暴躁，父母擔心長此下去， ...
吸毒，是否一起吸？
作者: Jane1983 時間: 17-3-2 18:56
睇呢d專業人士的分享，真心驚。
作者: ABC-DAD 時間: 17-3-2 19:27
什麼是兒童行為情緒治療師？
作者: planetearth 時間: 17-3-2 19:55 標題: 回覆樓主:
打機又點同吸毒？
有些美國大學好重視打機。遊戲機已成為重要的經濟產業。遊戲機有很強的 邏輯推理. 好多鐘意打機的"人才"都成為發展AI及VR的專業人專。當然，每樣野 過份沉迷都係唔好. 好多先進西方國家都好重視coding。 設計遊戲用的Coding，與設計人工智能同一 邏輯。
作者: himching 時間: 17-3-3 17:04
elbar 發表於 17-3-2 10:40
八歲男童，就讀本地名牌小學，每日花近6小時玩遊戲機。 學業成績中上，脾氣暴躁，父母擔心長此下去， ...
作者: himching 時間: 17-3-3 17:17
skkeung 發表於 17-3-2 18:31
吸毒，是否一起吸？
禁毒不如陪小朋友吸毒;
禁嫖不如陪小朋友去嫖;
禁[ X ]不如陪小朋友[X ];
從緊貼題目方面考慮, "吸毒，是否一起吸？", 答案係應該一起吸的!
又從大家一般認知"打機"係唔好嘅行為之下, 吸毒係唔好嘅行為, 所以毒係應該一起吸的!
結論, 小朋友要生, 家長都應一齊生, 如果死, 當然一齊死.
樓主, 請問我嘅答案, 應該攞晒100分啦.
作者: planetearth 時間: 17-3-3 17:31
himching 發表於 17-3-3 17:17
禁打機不如陪小朋友打機;
禁毒不如陪小朋友吸毒;
禁嫖不如陪小朋友去嫖;
吸毒系犯法，打機是嗎？無必要咁偏激。
作者: Cheeselover 時間: 17-3-3 17:47
是否認同樓主做法前請先回答以下幾個問題，1. 有多少個案採納此方法而達致雙贏局面？2. 若遊戲方式只是一般打打殺殺，效果是否一樣？3. 基於什麼理論小孩會減少打機時間？既然有人認同，正確的事應該多做。4. 花三個月甩掉是這個個案，其他案例又如何？我不知道這個方法是否有效，但如果樓主給我以上問題的數據，我們會更清楚，數字是不會騙人的。
作者: awah112 時間: 17-3-3 18:57
提示: 作者被禁止或刪除 內容自動屏蔽
作者: planetearth 時間: 17-3-3 20:43
Cheeselover 發表於 17-3-3 17:47
是否認同樓主做法前請先回答以下幾個問題，1. 有多少個案採納此方法而達致雙贏局面？2. 若遊戲方式只是一般 ...
小兒喜歡打機，我要求他如果他能有self-control, 我就不會禁止他打機。另一方面，我誘導他對科學及數學產生興趣，他對科學知識的追求及熱愛多過打機。讓孩子發展一些比打機更有趣的興趣。男孩子天生喜歡challenge刺激。平時的功課練習太沈悶。如果孩子能樂趣學習，事半功倍。現今很多遊戲都含有大量知識。用得宜可作教育工具。minecraft是不錯的遊戲。好的遊戲訓練 邏輯思考 , 手眼協調. 兒子喜歡看youtuber教打機，從中學得一口流利英語，因為興趣的推動力好大。樂趣地學英語。當他遇到不懂的東西，會上網自己查，從中又學懂更廣知識。由於玩遊戲，我又讓他學習coding. 讓他知道遊戲是如何制造。coding將會成為世界新語言，這是西方國家領導人說的。遊戲的 邏輯與數學有共通點，小兒的數學也不錯，有玩奧數，而且是自己有興趣去玩。
作者: Cheeselover 時間: 17-3-4 09:10
planetearth 發表於 17-3-3 20:43
小兒喜歡打機，我要求他如果他能有self-control, 我就不會禁止他打機。另一方面，我誘導他對科學及數學產 ...
成功例子必然有，筆者年少亦打機，後發覺還是讀書重要，這視乎孩子自身能力，或許孩子日後成績(成就)與現時有沒有花時間在打機上根本沒有關係，成者永遠懂得及時抽身，失者可能永遠沉淪，如此，我們現在也跳進龍潭，是拯救他們？還是浪費時間，？反正他們也懂得選擇。我會選擇誘導孩子在其它事情上，因我不反對讓孩子接觸電子科技，但先要訂下底線(規條)，讓他們明白尊重，自控和責任，小女也愛看YouTube，但她不會每天嚷，叫停也不費勁，怕是一些父母，自不能為又卻強人所為。
作者: planetearth 時間: 17-3-4 10:26
Cheeselover 發表於 17-3-4 09:10
成功例子必然有，筆者年少亦打機，後發覺還是讀書重要，這視乎孩子自身能力，或許孩子日後成績(成就)與現 ...
女孩子跟男孩子有點，我暫時未見過女孩子會沈迷打機，但在男孩子在日常話題很多都是圍繞打機，有點”人在江湖，身不由已”。有些小時管得好嚴的都不得不放手。孩子們不想被孤立。然而學習自制能力是最重要的。把男孩子愛刺激的追求放在其他方面，例如科學的知識趣無窮無盡. 數學的解難趣味很強，多帶他們户外outing, 一到户外，他們就方了打機，因為有很多事物比打機更有趣。父母要適當引導。 不能只怪責孩子不聽話，孩子們 很想得到父母的尊重. 他們覺得受尊重了, 就會聽話。 當然當中的過程是經過很多練歷，不是 講咁容易, 父母要有超級耐性。
作者: planetearth 時間: 17-3-4 10:27
planetearth 發表於 17-3-4 10:26
女孩子跟男孩子有點，我暫時未見過女孩子會沈迷打機，但在男孩子在日常話題很多都是圍繞打機，有點”人在 ...
女孩子跟男孩子性格上有點不同 女孩子很少會沉迷打機.
作者: fion6406 時間: 17-3-7 13:46
Minecraft 係好嘢來，有瑞典學校用 Minecraft 為課程、英國測量師學會有 Land Surveyor用 Minecraft 整咗個英國地圖嘅 Map ( Minecraft 遊戲場景)。
Minecraft 有點似電腦 Lego ，砌出想像世界，用來做 adventure game 也可以，戰鬥又得。
我都如大部分女性一樣，唔鍾意打機，陪打機就唔好嘞，但了解個 game 係乜嘢來、點解阿仔鍾意，呢樣我覺得就是做父母最起碼要做嘅功課，一刀切話「打機就等如吸毒，要戒！」，我覺得呢種父母偷懶咗D....。
作者: mandywongmandy 時間: 17-3-8 01:49
提示: 作者被禁止或刪除 內容自動屏蔽
作者: himching 時間: 17-3-17 10:03
planetearth 發表於 17-3-3 17:31
吸毒系犯法，打機是嗎？無必要咁偏激。
作者: celialing 時間: 17-3-17 10:06
其實打機唔一定係唔好,不過要控制時間, 的確有好多遊戲係可以訓練到小朋友的思考,事實上你越唔玩,只會另佢更想玩,一有得玩,更加唔想停
作者: laughingbengor 時間: 17-3-17 12:21
himching 發表於 17-3-3 17:17
禁打機不如陪小朋友打機;
禁毒不如陪小朋友吸毒;
禁嫖不如陪小朋友去嫖;
明白你曲線. 因為太多人以為咁樣就係協助小朋友發展.
作者: wan_sosin 時間: 17-3-19 09:36 標題: 回覆樓主:
呢位葉XX,唔多信得過！似乎左抄右抄扮專業！唔單只打機呢件事，佢講到小朋友行為樣樣都好簡單就能解決。
什麼叫"兒童行為治療師",佢攞住嘅係什麼資格？唔通佢勁過CP?
作者: Jane1983 時間: 17-3-19 11:00
回覆 wan_sosin 的帖子
同意，佢講到好易、好簡單，係父母唔願放下身段，陪仔女玩咁。但有見過沉迷打機，六親不認的細路，就知道唔係咁樣的一回事。
作者: Cara2006 時間: 17-3-19 12:56
planetearth 發表於 17-3-3 17:31
吸毒系犯法，打機是嗎？無必要咁偏激。
在香港，吸毒這個行為本身好似冇犯法
作者: Cara2006 時間: 17-3-19 13:01
planetearth 發表於 17-3-2 19:55
打機又點同吸毒？
有些美國大學好重視打機。遊戲機已成為重要的經濟產業。遊戲機有很強的 邏輯推理. 好多鐘 ...
突然想到網路紅人 "達哥"
作者: planetearth 時間: 17-3-19 20:03
Cara2006 發表於 17-3-19 12:56
在香港，吸毒這個行為本身好似冇犯法
吓？！吸毒唔係犯法? 唔好亂噏啦！
作者: dativebond 時間: 17-3-31 00:35
planetearth 發表於 17-3-19 20:03
吓？！吸毒唔係犯法? 唔好亂噏啦！
其實吸毒本身係無犯法，犯法係possession，類似攜帶或藏有咁既意思。背後邏輯係如果吸毒係犯法，就唔會有人去尋求戒毒協助，因為你搵得戒毒即係同時要話自己有吸毒，咁同話自己犯法無分別，點會有人承認自己犯法呢？因此，吸毒唔係犯法，退而求其次，攜有先係犯法。
作者: palmchristy 時間: 17-3-31 11:47
我覺得文章唔係話要透過三個月陪打機的個案去帶出這是萬試萬靈的好方法.
而是係想帶出與其父母高高在上的禁止他們打機, 換來"你都唔了解我, 我點解要聽你講" 呢種反彈, 倒不如嘗試走進他們的世界, 了解並欣賞他們, 以此建立關係, 令他們脫下防衛, 最後自發收歛同接受父母的想法.
如果父母能放下身段, 花時間接觸孩子的世界, 嘗試理解, 假以時日, 既能修補關係, 也得到孩子認同, 一舉兩得.
作者: palmchristy 時間: 17-3-31 11:56
palmchristy 發表於 17-3-31 11:47
我覺得文章唔係話要透過三個月陪打機的個案去帶出這是萬試萬靈的好方法.
而是係想帶出與其父母高高在上的 ...
呢樣野, 我地兩公婆都做緊, 裝左一個孩子們經常玩的遊戲, 爸爸仲睇埋套相關的卡通片.
暫時結果係, 孩子話: 估唔到你地真係會裝呢個遊戲, 真係好開心.
依家無論響個遊戲同卡通上, 基本上溝通到, 佢地仲不時走埋黎話一齊玩.
關係方面, 依家係比較容易叫得郁佢地, 一叫就會收歛, 唔再拖拉, 唔駛發晒火.
作者: MrBeast 時間: 17-4-4 07:29
以毒攻毒，點解唔得
作者: ABC-DAD 時間: 17-4-4 10:43
以毒攻毒？總給我一種需要專業知識技能嘅感覺，一擊即中，同百發百都唔易掌握噃
| 歡迎光臨 教育王國 (/) |
Powered by Discuz! X1.5 |