教育王國

標題: 直資學校多水浸　教育何曾有平等（東方功夫茶） [打印本頁]

作者: elbar 時間: 16-12-2 14:28 標題: 直資學校多水浸　教育何曾有平等（東方功夫茶）

本帖最後由 elbar 於 16-12-2 14:31 編輯

古人話︰天之道損有餘而補不足，人之道損不足以奉有餘，睇吓今時今日香港地教育資源分配幾咁不均，「跨代貧窮」嘅情況幾咁嚴重，就知道呢句說話珍珠都冇咁真嘅嘞！

呢，教育局尋日公布全港直資中小學最新財政狀況數據，結果發現約六十間直資中小學裏面，有九間營運儲備接近教育局要求上限，雖然未至於好似特區政府財政儲備夠應付幾十個月開支咁誇張，但好多都接近一年水平；至於直資小學亦有唔少「悶聲發大財」，儲備差唔多夠使一年。唔好忘記，直資學校仲有基金以及捐款等「小金庫」，佢哋實際上到底幾有米，真係冇人話得埋。

直資學校一方面庫房水浸，另一方面加學費毫不手軟，有小學短短四年間學費足足加咗八成，一年學費閒閒哋貴過大學，問你怕未。你知喇，直資學校一般嚟講師資同教學質素較佳，家長們趨之若鶩，直資學校出手咁重，等於設立一道無形嘅高牆，變相將清貧子弟拒之門外。直資學校話就話有為清貧子弟設立獎學金，其實有幾多人可以受惠，唔使問都知喇。

同私立學校完全自費唔同，直資學校左手接受教育局資助，右手收取昂貴學費，事關納稅人及公帑，教育局係咪應該加強監管？唔講猶自可，一講把幾火。正因為當局對直資學校放任自流，先至搞到亂象叢生，醜聞多多，特別係部分直資學校被指帳目混亂，財政透明度不足，幾年前審計署已經批評過，點知教育官僚闊佬懶理，情況始終未見改善。

話時話，名校之所以熱衷轉直資，除咗吸收優質生源，主要係貪教學上有較大自主性，唔使聽嗰班教育官僚老點。你知喇，教育官僚冇嘢叻，最鍾意阿茂整餅，冇嗰樣整嗰樣，一時TSA，一時母語教學，一時語言微調，五時花六時變，受害嘅都係津校及官校嘅家長同學生。講句難聽啲，鬼叫你窮，讀唔起私立同直資學校，咪惟有乖乖「陪玩」，做「吳得掂」局長嘅白老鼠囉。

諗落都幾悲哀，香港由九年免費教育擴展到十二年免費教育，表面上人人有書讀，個個有學返，實際上係教育愈來愈貴族化，清貧子弟一早就輸喺起跑線上。之前有團體調查發現，富有家庭子女入讀大學嘅機會，相對生活喺貧窮線下嘅學童，由二十年前高出一點二倍，二十年後擴大至接近四倍，呢啲咪學者所講嘅「教育鴻溝」囉！

始終都係嗰句，教育不公平係最大嘅不公平。當基層子弟被剝奪接受優質教育嘅機會，上流愈來愈難，怨氣愈來愈深，社會想唔亂都幾難！

作者: elbar 時間: 16-12-2 14:30

3直資校2014年財務不達標

【明報專訊】直資學校須於11月底前將學校報告上載網頁，本報翻查多所直資中學最新上載的報告，當中慕光英文中學及孔聖堂中學在2014學年完結時，累計儲備分別僅相等於0.1及0.37個月營運開支，但兩校分別稱現時財政狀况已達標及回復正常；蘇淅公學該學年完結時，營運儲備僅相等於0.94個月營運開支，本報昨未能聯絡上校方回應。

兩間仍處過渡期

教局規定直資校要有相等於兩個月營運開支作儲備，局方表示2014學年共有3間學校未達標，2間仍處於過渡期，5年過渡期後學校須確保營運儲備達標，否則局方會跟進。

慕光﹕盈餘已達標孔聖堂﹕已復常

慕光校長李逸樵說，學校未過轉直資後的5年過渡期，毋須達儲備要求，但該校在2015學年盈餘已達標，只是報告下年才上載。2011學年轉直資的孔聖堂，副校長周榮耀稱該校2014學年大增海外交流活動，致支出增加，學校已向教局報告情况，現時營運儲備亦已回復正常。1993年轉直資的蘇淅公學儲備亦不達標，惟該校並非處於渡期內。

所有學校獎助學金達標

教局亦要求直資校每年撥一成學費收入為獎助學金，局方表示所有直資學校均已達標。協恩中學在2014學年完結時，累積營運儲備剛剛達2個月開支，該校承諾每年撥出三成學費作獎助學金，根據其報告，該校2014學年撥出7%總支出，作為學業成績優異學費全免獎學金、來年學費獎學金及文化體藝活動優秀學生獎學金等。

聖保羅16%學費作獎助學金

其餘傳統名校，聖士提反書院、拔萃男書院及拔萃女書院等，全部均按教局提供的表格，簡單列明2014學年獎助學金比率已達標。中一每年學費為5.5萬元的聖保羅男女中學則詳列帳目，可見該校該學年將16%學費收入作為獎助學金。

歡迎光臨教育王國 (/)