教育王國

標題: 元朗中學 [打印本頁]

作者: 扁 時間: 16-8-31 11:21 標題: 元朗中學

今年小五, 開始擇中學, 學校係南元朗官立小學, 成績中上, 學校有聯繫中學, - 鄉議局, 趙聿修都係比較好的學校, 入呢兩間應該有八九成, 但最近聽D朋友講呢兩間學校很多學生要外出再補習, 補習不是重點問題, 聽聞係老師教的HEA, 因為D學生一定外出再補, 係老師無心教. 而我本人鍾意另一間天主教學校, 第一志願應該點填好呢?
1. 鄉議局 2. 天主教學校 OR　１天主教學校　２。鄉議局

作者: 妹妹頭 時間: 16-8-31 11:34

回覆扁的帖子

HEA 唔 HEA 係好主觀的, 可能學校出發點係想學生自由學習, 自由發展, 但往往都給人描述成教書好HEA. 所以, 最好都係問一問學兄, 學姐, 前幾年派入刻校既師兄姐, 看看他們的看法, 再等開放日, 親自到學校了解, 就更加清楚了

作者: 王家爸爸 時間: 16-8-31 11:36

扁發表於 16-8-31 11:21
今年小五, 開始擇中學, 學校係南元朗官立小學, 成績中上, 學校有聯繫中學, - 鄉議局, 趙聿修都係比較好的學 ...

邊間天主教學校？如果係講緊元天，咁兩間差好遠。

作者: 扁 時間: 16-8-31 11:42

回覆王家爸爸的帖子

如果係講緊元天，咁兩間差好遠
我講洪水橋果間, 你意思係好定吾好?

作者: 王家爸爸 時間: 16-8-31 13:09

扁發表於 16-8-31 11:42
回覆王家爸爸的帖子

如果係講緊元天，咁兩間差好遠

如果係祟德，當然好啦，但係同鄉議局比較差異唔大。

作者: 王家爸爸 時間: 16-8-31 13:16

元朗天主教學校既校址其實就係當年既祟德舊址。祟德搬咗之後，舊址就變成元天。

作者: JJDBB 時間: 16-8-31 14:10 標題: 引用：今年小五,+開始擇中學,+學校係南元朗官立小

原帖由扁於 16-08-31 發表
今年小五, 開始擇中學, 學校係南元朗官立小學, 成績中上, 學校有聯繫中學, - 鄉議局, 趙聿修都係比較好的學 ...

如果想去洪水橋崇德，睇下有幾多派到入去？一個起两個止，更有可能冇。你小孩子全級考咩位置？小五可以去各中学开始參觀，睇下那間適合。

作者: silvia_ng 時間: 16-8-31 14:45

崇德同天天有聯繫，反之你唔要自己個聯繫又好似蝕底左D。

但我會VOTE FOR崇德

作者: 妹妹頭 時間: 16-8-31 14:52

回覆 silvia_ng 的帖子

今年天天都好似有40個入祟德

作者: 妹妹頭 時間: 16-8-31 15:18

回覆 silvia_ng 的帖子

It is also my dream school

作者: bobo98 時間: 16-8-31 19:47

2015-16年度南元小冇人入崇德，而鄉中就有33人，趙中12人，天官13人。

作者: JJDBB 時間: 16-8-31 21:55 標題: 引用：2015-16年度南元小冇人入崇德，而鄉中就有3

原帖由 bobo98 於 16-08-31 發表
2015-16年度南元小冇人入崇德，而鄉中就有33人，趙中12人，天官13人。

因為大多數会選聯系中學，机会大好多！可以自行intervirw 去崇德。崇德系個個都有得見，只要你入表。

作者: 小皮優 時間: 16-9-1 08:30

鄉議局, 趙聿修<<<<官校，公務員，梗係懶到出汁。

之前朋友細路讀過元朗公立，個生物科老師仲教錯野

作者: 妹妹頭 時間: 16-9-1 08:44

回覆 JJDBB 的帖子

但祟德會睇成績, 最好成績表可以靚DD, 咁機會會大好多

作者: bobo98 時間: 16-9-1 09:27

其實在自行階段只收三十幾四十人左右，崇德都只係會收band1頭的學生，除非個別學生有其他特別出色，早兩年我都有幫囡囡揀崇德，不過放自行二，當年小學老師話級十五名內都大機會入（囡囡間小學係區內一線小學）。

作者: RalphYuki 時間: 16-9-1 10:49

bobo98 發表於 16-9-1 09:27
其實在自行階段只收三十幾四十人左右，崇德都只係會收band1頭的學生，除非個別學生有其他特別出色，早兩年 ...

咁請問你囡囡是否派崇德?

自行二放崇德, 咁大抽獎怎放?

作者: JJDBB 時間: 16-9-1 11:21 標題: 引用：回覆+JJDBB+的帖子但祟德會睇成績,+最好

原帖由 妹妹頭 於 16-09-01 發表
回覆 JJDBB 的帖子

但祟德會睇成績, 最好成績表可以靚DD, 咁機會會大好多

成績表靚固然要，但是，中学拎到成績次第，得三，四十人(第一輪)，個成績次第一定要好好。不過，可以去interview ，因為試左有個機會，唔試連機會都無。

作者: bobo98 時間: 16-9-1 16:47

本帖最後由 bobo98 於 16-9-1 16:50 編輯

回覆 RalphYuki 的帖子

我幫囡囡自行一和大抽獎都係揀信義，大抽獎冇揀崇德，最後我囡囡入了信義。

作者: JJDBB 時間: 16-9-1 17:36 標題: 引用：Quote:原帖由+妹妹頭+於+16-09-01+發表回覆

原帖由 JJDBB 於 16-09-01 發表
成績表靚固然要，但是，中学拎到成績次第，得三，四十人(第一輪)，個成績次第一定要好好。不過，可以去inte ...

樓主，你可以在黎緊這兩三个月去參觀学校。帶小朋友一起去。小五參觀完，可能未有決定，到考完第一个呈分，小朋友之間会互相講，想去边間等等，到時再睇下成績，小朋友意願(畢竟小朋友讀，也要尊重了解下)，大人意願(大人分析小朋友適合边間)，察略(每間学校派位的联系啦，小朋友会否被学校推薦啦…………)。所有這些必須要考慮同清析嘅。不過，說什麼都是其次，考到次第成績好，那怕無校收，到時就你話事機會大了。

作者: sammag 時間: 16-9-2 01:07 標題: 引用：+本帖最後由+bobo98+於+16-9-1+16:50+編輯+

原帖由 bobo98 於 16-09-01 發表
本帖最後由 bobo98 於 16-9-1 16:50 編輯

回覆 RalphYuki 的帖子

請問可唔可以分享下當時點解決定揀信義一，崇德二？

我兒子今年揀學校了，撇開未決定揀唔揀跨區，如本區，都應該係信義和崇德，想知道多一點兩間應該點排位。

作者: bobo98 時間: 16-9-2 09:36

回覆 sammag 的帖子

我揀崇德原因係該校英文好（應全元朗最好），而學校多收最叻的學生，所以入讀後壓力較大，去聽簡介會學校話冇得叩門（若派得唔好，連叩門機會都冇），而信義英文氛圍亦相當好，去聽簡介會時學校話唔識可以唔洗出去補習學校會教到識為止（大概係咁意思，唔係好記得校長真正的演繹），信義有叩門位，而信義好少元朗最叻的學生會揀（最叻一係跨區，一係揀鄉中，崇德），相對壓力冇咁大，但DSE出來的成績和入大學率又與鄉崇差唔係好多（可入學校網頁睇下），地點方面崇德隔離係band3學校，信義隔離係band2學校，交通方面崇德只得輕鐵，還有小巴（但個站距家很遠），信義可搭西鐵，輕鐵，或巴士k73,k74（家住元朗），我囡囡係元朗一線小學讀，一向成績級五至十名上落（全級130人左右），入到信義都係考級十至二十名左右（全級160人），起碼都算前列位置，她讀得有自信我覺得最緊要，若她入鄉崇競爭大啲，未必可以考到第一班成績（因為聽好多小學時級頭十名入到鄉崇都係考到六，七十，令學生冇晒自信，因為小學時成績叻，被重視），而且到中三選科時考得越前越著數，所以種種理由之下我揀信義第一，而崇德第二，純粹個人意見，崇德支持者不喜勿插（因為這裏太多崇德的支持者）。

作者: cacachow 時間: 16-9-2 11:18

想請教點找元朗中學開放日日期資料?

作者: bobo98 時間: 16-9-2 15:54

回覆 cacachow 的帖子

11至12月左右到你想揀的學校網頁睇睇，通常都係網頁有公布。

作者: cacachow 時間: 16-9-2 15:55

回覆 bobo98 的帖子

thanks a lot

作者: happyfeet 時間: 16-9-19 13:22

回覆 bobo98 的帖子

請問您對元朗商中的看法如何？
謝謝！

作者: bobo98 時間: 16-9-19 15:34

回覆 happyfeet 的帖子

商中係一間頗為神秘的學校，沒有簡介會，校網又很少透露公開試成績，但他的位置十分好，該校十分重視奧數，若奧數叻，機會較大，元朗最叻的學生都係好少以他為首選，商中和信義都係開五班，收生人數多啲，機會亦自然大啲。

作者: 肥仔豬 時間: 16-9-19 17:06 標題: 引用：回覆+happyfeet+的帖子商中係一間頗為神

原帖由 bobo98 於 16-09-19 發表
回覆 happyfeet 的帖子

商中係一間頗為神秘的學校，沒有簡介會，校網又很少透露公開試成績，但他的位置十 ...

原來商中冇簡介會，我一直唔知道添

R
不過阿囡下個月會去商中參觀，佢話全班得4個同學可以去，而且應該係成績好至可以去，所以我估呢個參觀可能已經當係簡介會

作者: bobo98 時間: 16-9-19 19:55

回覆肥仔豬的帖子

我囡囡早兩年都有去過兩次商中舉辦的活動,好似係關於科學的活動,而家長係冇得去的,所以先比我感覺該校十分神秘。不過我有朋友的囝囝係該校畢業,他入了中大,聽他說該校叻嘅學生都好叻㗎。

作者: 肥仔豬 時間: 16-9-19 20:09 標題: 回覆：bobo98 的帖子

係呀，阿女就係參加呢個科學活動嘞

其實我有親戚讀商中的，我遲D都會問下佢意見，不過你好好人，成日都好樂意答我地，多謝哂你

作者: happyfeet 時間: 16-9-20 13:07

回覆 bobo98 的帖子

謝謝您的回覆。
我小朋友數學成績不太好，最好的是英文。
估不到商中校舍咁細，可以容納到五個班。

作者: happyfeet 時間: 16-9-20 13:28

唔好意思！
另想問問，如成績不好，是否填甲一及二的學校都不會跟小朋友面試？

作者: 妹妹頭 時間: 16-9-20 13:31

回覆 happyfeet 的帖子

甲部係大抽獎, 係唔會面試, 用隨機no. 抽籤

作者: bobo98 時間: 16-9-20 16:34

回覆 happyfeet 的帖子

自行一，二先有得面試，大約在1月開始交表，3月先開始面試，而商中係揀人面試，所以交表唔係一定有得面試。但大抽獎時，商中收五班，而且冇聯繫位，所以機會較大。如果你個小朋友英文叻，可考慮崇德，崇德應全元朗英文最好，而且該校係全部人都有得面試，而崇德係用英文成績來分精英班的（聽朋友講的），但大抽獎時崇德有聯繫位留比天天。

作者: happyfeet 時間: 16-9-21 13:03

回覆 bobo98 的帖子

謝謝您耐心的回答。

如崇德每人都有面試機會，我會嘗試。
我知商中會甄選後，才安排面試，所以未必有面試機會。

作者: bobo98 時間: 16-9-21 13:58

回覆 happyfeet 的帖子

其實係按次第名單的先後次序揀約180人面試。鄉中，信義，商中都係揀人面試，而崇德，趙中就全部人都有面試機會。信義，商中就開五班，鄉中，祟德，趙中就開四班。信義，商中冇聯繫小學，鄉中，祟德，趙中就有聯繫小學。在大抽獎而言，信義和商中的機會率就大啲，十二月各校都會舉行簡介會（商中除外），到時帶埋小朋友去聽下，睇下他自己想讀那間，才決定吧！

作者: happyfeet 時間: 16-9-22 12:51

回覆 bobo98 的帖子

什麼是次第名單，是不是教育署提供的考試名次？
雖然今年尚未，但家長間已開始討論升中情況，有點壓力

作者: BBHAPPY2004 時間: 16-9-23 00:06 標題: 回覆：bobo98 的帖子

崇徳不是用英文成繢分精英班，今年中—已沒有精英班，中二開始先分精英班。

作者: bobo98 時間: 16-9-23 06:53

回覆 BBHAPPY2004 的帖子

我朋友個仔讀中二，他說用英文成績來分精英班，而唔係用級名次。

作者: BBHAPPY2004 時間: 16-9-23 11:00 標題: 回覆：bobo98 的帖子

一定係級名次，級頭６６名入精英班，每班３３人，我仔今年中三

作者: BBHAPPY2004 時間: 16-9-23 11:02 標題: 回覆：BBHAPPY2004 的帖子

英文好吾代表其他科讀得好，中學太多科。

作者: bobo98 時間: 16-9-23 18:28

回覆 BBHAPPY2004 的帖子

其實我都覺得好奇怪，如果真的只用英文一科來分精英班，有啲唔公平，因為如果得英文一科特別叻，其他只是一般，而另一個科科都好平均的，總合起來是後者叻啲，又入唔到精英班，咁就對後者唔公平。我聽完朋友咁講，我仲以為崇德著重英文到這個程度，我真的誤會了。

作者: BBHAPPY2004 時間: 16-9-23 23:58 標題: 回覆：bobo98 的帖子

崇德係著重英文，學校會為中—學生安排好多英文活動，如每一，二星期小息就會有英文活動，每位学生都要參加。每星期约要睇一本英文圖書及movie,再做報告，英文老師會提同学英文尾音及文法，每當同學講错，就會立即教番，所以一堂英文堂老師會教番同學十幾廿次，所以同学好快就吾怕英文，半年後佢地個個講英文都會一定有尾音，重有好多好多接觸英文既機會。學校真係做得好好。

作者: sammag 時間: 16-9-24 01:32 標題: 引用：崇德係著重英文，學校會為中—學生安排好多

原帖由 BBHAPPY2004 於 16-09-23 發表
崇德係著重英文，學校會為中—學生安排好多英文活動，如每一，二星期小息就會有英文活動，每位学生都要參加 ...

謝謝你的詳細解釋。
我想請問其他科目又教得如何呢？
如升中後，成績不太好，學校會有措施幫學生補底嗎？
崇德的課後活動多嗎？學生通常留校到幾點走呢？

作者: BBHAPPY2004 時間: 16-9-24 12:46 標題: 回覆：sammag 的帖子

對於中一來説，英文課其實文法已經學過晒，所以問題吾大，最難就係作文和説話，一般來説好多都緊緊合格，一年過後就有進步，不用擔心。數學就要睇自己既數學底有幾多，有人２０分，也有９９分。其他科只要肯讀肯背，可以取９Ｘ分也有人１ｘ分，睇你付出幾多。不過中文科就係最難既—科，亦係全彶平均分最底既—科．中文科默書吾合格，老師—定吾會放過你，默到合格為止＇所以有Ｄ班，早上要早番，放學要留堂，都係默書，有Ｄ同學真係成年都要留堂，老師不會放過你，同時崇徳老師真係太好，付出，，自己時間都係為學生。

崇德課外活動都係同其他学校差不多，有團隊，有球類，楽器等，中一中二＇一定要參加中三可自行選擇。
放学最遲５点鐘，班房要鎖門，個别取外。
補底班係有，中英數最差约２０位，放学有補底班。
最後我想講如果真係考慮入崇德，小朋友真係要努力讀書，學校比到你想要既野你。如果入到不努力，真係可以排到很後，會無自信。家長亦有機會經常收到老師電話。有位同學二年都升吾到班，１４歳人地升中三，佢亦然中一，最後都係校。還有如果名次不好＇中四真係選吾倒你想入既科，真係有好多同學好比心機讀書，小心。
我打左甘大篇野，希望幫到想入崇德的同學，家長。

作者: sammag 時間: 16-9-24 15:15 標題: 引用：對於中一來説，英文課其實文法已經學過晒，

原帖由 BBHAPPY2004 於 16-09-24 發表
對於中一來説，英文課其實文法已經學過晒，所以問題吾大，最難就係作文和説話，一般來説好多都緊緊合格，一 ...

謝謝你！
請問每科有沒有小測？隔幾耐測一次？
每科最差果20個先有補底班？那麼中下游成績的，學校會有類似加強班嗎？定要自己出去搵補習？

作者: BBHAPPY2004 時間: 16-9-24 15:37 標題: 回覆：sammag 的帖子

每科都會有小測，约一，兩星期一次，所以每曰教完就好温習，才會有好成績。如果小朋友自律就可應付到，否則都幾大壓力。中下游同學學校應該無幫忙，好多都要補習。但如果真係肯努力讀書，上堂絕對可以明白，不須外求。我仔没有任何補習，全级頭十名，只要學生有心讀書，—定得。

歡迎光臨教育王國 (/)