教育王國

標題: 醫學院搶尖子　似美容促銷 [打印本頁]

作者: elbar 時間: 16-7-19 13:49 標題: 醫學院搶尖子　似美容促銷

中學文憑試上星期放榜，當好多學生仲為學位四處張羅之際，本港兩間大學嘅醫學院已經暗地裏開始尖子爭奪戰。中大醫學院院長陳家亮尋日透露，有朋友嘅兒子就讀國際文憑課程（IB），喺IB放榜前一日收到某大學嘅電話，邀請兒子帶同家人出席一個「特別安排」嘅會面，仲採用人盯人策略不斷游說兒子應承入讀該學系，可惜最後適得其反。雖然陳家亮並無指名道姓，但明眼人都睇得出佢講緊嘅係港大醫學院。只係估唔到院校爭尖子嘅伎倆，已經淪落到同美容院促銷手法無異。

陳家亮撰文暗諷對手

兩大醫學院明爭暗鬥幾十年，自兩位年輕院長陳家亮同梁卓偉上場後，鬥爭更趨白熱化。舊年中大醫學院宣布推出「跳級制」，容許部分「尖子中嘅尖子」直接入讀醫學學士二年級，變相將六年制嘅醫科課程縮短做五年，此舉隨即惹嚟對手港大醫學院不滿。梁卓偉其後公開質疑中大做法有如「走捷徑」同「相煎何太急」，陳家亮就反駁「跳級制」做法符合國際標準，唔存在「走捷徑」同「濃縮版」嘅問題。最終醫委會決定重新審視課程，中大焗住暫緩執行「跳級制」，港大就盡攬七名應屆狀元入讀醫學院課程，小勝一仗。

事隔一年，陳家亮再次發功，撰文透露朋友一家喺IB放榜前一日獲邀出席某大學嘅會面，一家人一去就大半日，佢又引述朋友指該院校阿頭喺會面中多番數落其他院校嘅水平，話只有自己先係一流，其他只係二、三線。而最令朋友反感嘅係，會面用人盯人方式催促兒子答應入讀該學系。朋友兒子當晚亦話無諗過大學教授會咁講嘢，大嘆「聞名不如見面」同好失望。

陳家亮篇文句句有骨，末段再補一腳，話類似嘅故事曾經聽聞，仲話為人師表要以身作則，做榜樣畀學生睇喎。

學額增狀元減粥多僧少

其實兩大院校爭尖子爭得咁激烈唔係無原因，事關今年兩間大學學額增加，但無論狀元同考生數目都大減，今屆狀元數目更創出新低，兩間大學惟有各出奇謀，睇嚟又會有一番龍爭虎鬥。

作者: wong2233 時間: 16-7-19 17:10

中大醫學院對無論DSE 或IB 都勁玩人釘人，而且玩咗好幾年；唔怪得中大自己啲學生都話佢個院長「賊喊捉賊」！

作者: 梁太2010 時間: 16-7-19 17:29

提示: 作者被禁止或刪除內容自動屏蔽

作者: ANChan59 時間: 16-7-19 19:55 標題: 引用：回覆+wong2233+的帖子中大+???

原帖由 梁太2010 於 16-07-19 發表
回覆 wong2233 的帖子

中大 ???

New member !!!

歡迎光臨教育王國 (/)