教育王國

標題: 請問有無小朋友會突然在小二小三發力? [打印本頁]

作者: mclook 時間: 16-2-26 10:15 標題: 請問有無小朋友會突然在小二小三發力?

我亞仔今年二年級，雖然好乖，但係唔鍾意睇書，雖然叫佢溫習做練習都好合作，但係成績都係麻麻同無記性唔小心...... 其實有無小朋友真係會突然在小二小三發力? 我對住係開始覺得無迷茫同唔知點幫佢進步...... 我都想有真實經驗分享鼓勵O下......

作者: COE1205 時間: 16-2-26 10:29

好難講,我仔今年小三, 但同學之間明顯進步同明顯退步都大有人在

作者: jaycee_mami 時間: 16-2-26 11:19

我仔仔今年小三, 這三年top 10來來去去都是同一班人.

作者: Yanamami 時間: 16-2-26 11:31

唔好期望一教瞓醒就会自然变左叧—个人啊……係要家長鍥而不捨由小—小二提点、鼓勵、軟硬兼施……希望上到小三小四有dd收成咋~專心、時间管理、責任心、自理力係可以訓練既~成績好除左資質外，以上特質同建立一个reasonable target係同样重要既~毎天—小步既進步，日子有功就唔少㗎嘞~

作者: simonwan 時間: 16-2-26 16:36

跑馬拉松的在頭一公里就發力多數會輸。
我希望孩子初小用四成力讀書，高小五成，初中六成，高中七成，大學本科八成，研究院才發十成力！
其中考DSE或用九至十成力衝九個月就可。

作者: babywoman 時間: 16-2-26 16:57

本帖最後由 babywoman 於 16-2-26 17:05 編輯

我仔小一小二成績都麻麻。但我唔擔心，因為我知佢係識及不斷進步，只是唔小心為多。

今年小三期考，中英數平時考試測驗嘅唔小心突然冇咗9成，所以成績大躍進

男仔，我估要俾多啲時間，以及多觀察其心態的不斷變化，我仔以前樣樣都好似唔care,但今次派成績表前一周，佢突然同我講，有小小期待今次的成績名次，因為佢覺得佢今次第一次咁認真溫書

，小四會分精英班，現任班主任好嚴厲，全班同學都怕佢，所以，我就同仔講，這個班主任在家長會講咗，到時可能會教非精英班，于是，佢努力溫書

還有家長的期望是如何？小朋友內心是否有壓力會來自家長？我晨早同仔講，只要入band1學校就唔理band1 a/b/c。因為本區極少band2學校，所以，我唔駛至top，保持到現在咁就可以。
我相信我仔要到中學先真正發力，小學就由佢hea 下

作者: MASAYA 時間: 16-2-26 17:11

simonwan 發表於 16-2-26 16:36
跑馬拉松的在頭一公里就發力多數會輸。
我希望孩子初小用四成力讀書，高小五成，初中六成，高中七成，大學 ...

以跑馬拉松黎比喻，一場冇得跑兩次既比賽，我會選擇畀佢開頭係摸索自己節奏、比賽環境、對手質素，順道欣賞下周圍環境，到關鍵時期先去發力，一開始就全速跑唔知可以跑幾耐

作者: babywoman 時間: 16-2-26 17:19

我諗只有家長才知小朋友的弱處在哪？逐個找出及擊破。
如我仔，佢識好多形容詞及四字成語，但經常寫不出，執筆忘字，識講識睇唔識寫。所以中文作文就多數寫得差，功課還可以查下詞典，考試就差。于是家長日，我同班主任（中文科）講，到時希望佢可以叫亞仔寫周記，因為我覺得我叫，佢一定推搪。
果然，這一項任務昨日班主任下發了

，每個星期交一篇文給班主任

作者: mclook 時間: 16-2-26 18:22

多謝你地o既分享

我最初唔知小一原來咁深咁多野讀，無乜幫佢，亞仔因為分數太低望住份卷同我講對唔住同喊，自此之後就成日覺得自己無其他小朋友咁好無乜鬥心，加上我個仔係周星馳電影o既好朋友，份人開心，非常carefree

我希望佢會為自己的學業認真，希望佢會o係學業上得到小小自信，想幫佢所以試過瘋狂買練習俾佢做以為實得，點知都係咁，到突然有小進步而為亞仔高興，到發現小二又變番麻麻同無記性，我自己都唔知點幫佢

我知道讀書如同長跑，但長時間都未有果效，唔好話細路仔，我係大人都有d迷茫點樣先會進步

作者: MASAYA 時間: 16-2-26 18:34

mclook 發表於 16-2-26 18:22
多謝你地o既分享

我最初唔知小一原來咁深咁多野讀，無乜幫佢，亞仔因為分數太低望住份卷同我講對唔住同喊 ...

小二都仲好細，如果你小五小六仲搵緊方向就難搞
而家初小要學既係多，難唔難好大程度係視乎語文能力，如果讀中文小學，中文能力唔得，幾乎科科都唔掂，首先睇下中文能力夠唔夠。如果中文認讀冇問題，就睇下理解能力，理解同表達能力其實平時交談已經睇得到。基本能力冇問題，就睇學習同解難能力，肯唔肯嘗試或思考解決問題既方法。呢d能力冇問題先睇學科問題，又係逐樣去睇，中英數常逐樣解決，如果見到分數低就去補習或做練習，就算分數提升到，都可能只係短暫性質

佢對自己成績感到不滿，已經係有責任感，比起對成績完全不關心既好架喇，逐樣改善去重拾信心，慢慢就會進步

作者: babywoman 時間: 16-2-26 20:54

我仔學校中文科，我覺得深。而且初接觸普通話，小一中文科都好低分。我就俾佢日日睇普通話卡通，小一上學期，放學去圖書館做功課及睇書，于是喜歡上睇書，最初睇漫畫，之後就睇多字嘅書，不過前段時間我俾佢睇英文短片，少左睇書

英文就串字搞咗好耐，于是另外學phonics，但都學得唔好，及完全冇興趣，去返英文堂的時間慘過擔泥

，大半年左右cut咗。小一時對英文有少少抗拒，可能因為去咗學沉悶的phonics, cut咗後，我俾佢試下外籍老師的堂（主力提高興趣及練oral)，經過幾個月，對英文的興趣大咗，記憶好似都好埋，成績亦隨之上.

數學就一直冇大問題。主要唔小心。

我仔試過小一時，英文默書低分被同學笑，我同仔講，人地幼稚園做嘅嘢，你現在才開始做，會有一定差距，我地一齊努力就得。之後該同學英文科多數低過我仔，我問仔有冇笑人地，我仔話冇，我話good boy

再分享下，我仔同班同學在小二已在外學分數，佢話可以教我仔，我仔話：學咁快做乜？到時老師會教

作者: rean_chau 時間: 16-2-26 23:37 標題: 回覆：請問有無小朋友會突然在小二小三發力

我仔小一全班尾七，二年級尾十七，今年三年級第一個學期暫時提升左三名。但之前兩年真係落左好多心機同苦功，唔係突然開左竅。最成功既地方係教會左佢閱讀，所以佢中文宜家比較輕鬆(一年級時中文只係四五十分)。英文就開始表現理想，都係多得以前成日同佢睇書，有啲野沉澱左落黎，宜家開始有反影。但三年級下學期數學開始深，佢最弱呢科，我要諗方法令佢學習解決問題。

作者: lvsating 時間: 16-2-27 10:16

提示: 作者被禁止或刪除內容自動屏蔽

作者: kkhon 時間: 16-2-29 11:35

本帖最後由 kkhon 於 16-2-29 11:40 編輯

想請教下大家係咪到左五年级成績係点已經定左呢？仔今年P.5，小—時考7x/160，之後我同佢都好努力温習丶操練，二年級到依家每次考大約3x-50左右。今次五年級期考退步左好多，老師話佢聰明依家仲喺band1內但可以再前d，我好担心之後的呈分！仔好聽話合作好肯温書同做練習。我吾知仲可以点樣幫佢，定係已成定局資質有限点谷都係咁上下？定要等佢自己開hill ?

作者: MASAYA 時間: 16-2-29 11:43

kkhon 發表於 16-2-29 11:35
想請教下大家係咪到左五年级成績係点已經定左呢？仔今年P.5，小—考7x/160，之後我同佢都好努力温習丶操練 ...

名次係相對既，除左睇自己讀成點，仲要睇對手，我小朋友學校有個早幾年都級前三，小五第一次考試即跌晒watt，第二次考試發力就上返第一。朋友個小朋友情況一樣，之前年年前三，小五第一次考試跌到級十，暫時未知第二次考試係點，小五個個發力係會執位，不過底子最緊要，有能力就會上返應有位置

作者: maggie789 時間: 16-2-29 11:46

有呀,人地!

不過唔係小三,係小四下學期開始左右!跟住小五小六名次keep 得好穩定好前!

作者: HCbb 時間: 16-2-29 15:23

我個仔都係小二, 明顯係未開竅, 和家姐好大分別.......
不過學校小三先開始考試, 希望佢到時望到成績, 會識得要開始發力

作者: sososu 時間: 16-3-5 12:31

發力就無 ,

退步添

保持到都好彩

作者: scyauchris 時間: 16-3-7 10:46

係阿媽發力不停提佢温書就有

作者: grandview 時間: 16-3-7 11:47

提示: 作者被禁止或刪除內容自動屏蔽

作者: MASAYA 時間: 16-3-7 12:08

scyauchris 發表於 16-3-7 10:46
係阿媽發力不停提佢温書就有

阿媽不停發力鞭個細路

作者: scyauchris 時間: 16-3-7 14:06

回覆 MASAYA 的帖子

完全正確, 係阿媽企硬考試一定要温書。發力係家長, 那有細路會發力。

作者: 小時了了 時間: 16-3-7 14:27

本帖最後由小時了了於 16-3-7 14:49 編輯

我嗰個小二下學期開始發力開始追, 由B2尾B3頭追至B1尾B2頭, 尚算 keep 至依家小五, 因為小二上學期家長日班主任口不留情當住我兩公婆面前狂"炳"阿女成績差接近5分鐘, 嗰日下午開始我"的"起心肝去書局買書自學教女, 又買小量補充俾女做, , 從此以後阿女每晚開始溫習生涯, 小二下學期仲攞飛躍進步獎 (因以前幼稚園至小二上學期每晚是不用溫書, 我兩公婆同阿女玩棋玩UNO

) 要阿女成績見得人, 我卻要犠牲咗我認為阿女愉快童年

如果時光可以倒流的話, 我諗我小一選校時會選二線鄉村小學 (無睇錯, 係偏僻鄉村小學,因為我當年都係讀鄉村小學, 依家我嘅童年回憶係非常開心, 極之愉快, 唔會再選地區一線小學

, 谷到死下死下咁)

作者: MASAYA 時間: 16-3-7 14:33

小時了了發表於 16-3-7 14:27
我嗰個小二下學期開始發力開始追, 由B2尾B3頭追至B1尾B2頭, 嘗算 keep 至依家小五, 因為小二上學期家長日班 ...

我諗妳自己呢幾年成長左，有得行多次，應該係一線小學都可以愉快學習同時保持到成績既，睇妳既分享就知道妳得既，來，生多個印證下~

作者: little_yolky 時間: 16-3-7 14:51

小時了了發表於 16-3-7 14:27
我嗰個小二下學期開始發力開始追, 由B2尾B3頭追至B1尾B2頭, 嘗算 keep 至依家小五, 因為小二上學期家長日班 ...

細女剛剛小一派成績表, 11X人佢居然可以考5X！我真係暈得一陣陣。

但細心睇落, 成績其實唔係咁差, 同家姐小一時平均分只差1.4分, 但名次居然可以差25名！！！！！可見隔咗兩年, 同學們(的家長)是多麼的進取。

不過, 呢間學校好係好在無乜俾家長壓力, 家長日時讚阿細好聰明, 上堂好留心, 不過好易受其他人影響。所以, 學校無俾壓力, 咁我又無壓力了。心諗, 好彩有間B2聯繫啫, 如果聯繫學校係B1就大鑊鳥。

作者: MASAYA 時間: 16-3-7 15:44

little_yolky 發表於 16-3-7 14:51
細女剛剛小一派成績表, 11X人佢居然可以考5X！我真係暈得一陣陣。

但細心睇落, 成績其實唔係咁差, 同家姐 ...

妳自己都進取左啦，差家姐少少，但妳派成績表前妳覺得細女同家姐表現差天共地

作者: little_yolky 時間: 16-3-7 15:56

MASAYA 發表於 16-3-7 15:44
妳自己都進取左啦，差家姐少少，但妳派成績表前妳覺得細女同家姐表現差天共地 ...

佢純粹係lucky好唔好。
中文5頁紙, 佢居然有2頁唔識, 靠撞就撞咗86分返嚟, 中文書法寫到打風咁, 老師都俾A, 英文平時功課默書次次唔識, 無端端考試又識答, 撞咗個91, 佢只有數學係實力而已。

作者: MASAYA 時間: 16-3-7 15:58

little_yolky 發表於 16-3-7 15:56
佢純粹係lucky好唔好。
中文5頁紙, 佢居然有2頁唔識, 靠撞就撞咗86分返嚟, 中文書法寫到打風咁, 老師都俾A, ...

細女心諗：咁下次考返媽媽預期就可以了

作者: 81545 時間: 16-3-7 18:22

回覆 mclook 的帖子

我亞女今年小三，考試跳升到級前20，喜出望外。小二只是40-60.
考試分數跟去年差不多，可能其他同學失準 / 不适應小三的進度才令亞女進步（相對地）。
下學期大家適應了便會發力，成績又會打兜亂。
所以我提醒雅女不要自滿，繼續努力，尋找學習方法。

作者: MrBeast 時間: 16-3-7 18:48

不嬲都覺得追人係動力，被追係壓力

作者: MASAYA 時間: 16-3-7 18:54

MrBeast 發表於 16-3-7 18:48
不嬲都覺得追人係動力，被追係壓力

所以良性競爭係有利成長，無論動力定壓力可以令人成長，只係處理過程導致方向同結果變壞

作者: MrBeast 時間: 16-3-8 06:25

本帖最後由 MrBeast 於 16-3-8 06:47 編輯

MASAYA 發表於 16-3-7 18:54
所以良性競爭係有利成長，無論動力定壓力可以令人成長，只係處理過程導致方向同結果變壞 ...

是的，身邊一些例子，kg 時小朋友出色，入了程度高／一綫的小學，原本諗住平步青雲，點知事與願違，一部份家長能夠come to terms，他們孩子重拾笑容，有些堅持不到黃河心不死，苦了孩子。
可能我較阿Q，其實初小階段要被迫埋頭苦幹而得到成績好又如何，若不是一心想跳船，為乜，whos going to care a few yrs later

歡迎光臨教育王國 (/)