教育王國
標題: 每次親戚問我讀乜都會覺得好煩 [打印本頁]
作者: elbar 時間: 15-12-30 10:49 標題: 每次親戚問我讀乜都會覺得好煩
撰文 : 哲學仔
每逢見到啲親戚，佢地都會問我一個問題：
明仔，你讀緊咩呀？
儘管佢地上一次見面都已經問過我，但係今次唔記得左嘛。問題係，佢地好似有腦退化咁，次次都問我。
雖然我好想問返佢：「咁你又讀咩呀？」但係出於禮貌同為左我阿爸阿媽嘅面，當然只好答：「哲學。」
佢跟住又問：
讀完哲學可以做啲咩？
哲學又讀咩架？
我好想講：「關你X事咩？」但係我忍住，答佢：「讀完哲學出嚟無話要打邊一份工架。」跟住我就睇到佢眼神中嘅睥睨，唯有喺心入面同自己講：
唔似架，喺美國讀哲學好吃香架，可以讀多個Law degree做律師，又可以做banker。
但我深知，呢到係香港呀！
Well……第二個問題睇起嚟好易，Introduction to Philosophy都會教啦，但係其實比第一個更難，因為我根本唔識點對一班喺我眼中同單細胞生物無分別嘅人，用短短十隻字講解哲學係咩。
「哲學其實係用理性思考問題嘅研究方法……」我都未講完，佢就講：
原來係咁……碰！明仔，可唔可以幫我拎杯水嚟？
好，佢已經幫我答埋第一個問題，原來讀哲學可以做waiter。
不過讀廢科都有讀廢科嘅好處，因為親戚問你讀咩科原來都分三個層次，第一個層次當然係我呢啲佢唔知你讀乜啦！
第二個層次，就係佢知你讀乜。
強仔，原來你讀電腦架！我部電腦呢，唔知點解呢排好慢呀，幫我睇下呀！
無錯呀，你用十幾萬讀個學位返嚟，就係幫你個都唔知有幾親嘅親戚免費整電腦，多謝都無句。
遭殃嘅當然唔只電腦啦！
偉仔，你讀中文/英文/數學架，啱啦，我個仔有啲嘢唔識，你教下佢啦！
呢個都未係最慘，最慘嘅係第三個層次，佢以為佢知你讀乜，其實佢識條X。
堅仔，你讀經濟咁叻仔呀！有問啲咩心水股票可以話我知先！
喺呢一刻你當然好想話佢知：
其實我讀嘅係經濟，唔係先知呀！我知要買咩股票，仲使喺到同你條廢柴吹水咩？
但你唔講得，你更加唔可以咁講：「其實我幾好340架！」340係乜？你都唔知，你只係知道你好想睇佢X街。
你只可以話：
你真係識講笑。
其實啲親戚真係咁關心你前途？大多數都話知你死呀！就算你死，佢地都只係關心要畀幾多帛金。咁點解佢地要問你讀咩？一來出於「禮貌」，二來就係睇下有無着數。
作者: TEMPO123 時間: 15-12-30 11:14
本帖最後由 TEMPO123 於 15-12-30 14:12 編輯
elbar 發表於 15-12-30 10:49 
撰文 : 哲學仔
每逢見到啲親戚，佢地都會問我一個問題：
有時又真係幾煩！
可以笑笑口，唔答佢。又唔使講野咁刻薄 , 都係長輩 !
我以前剛結婚, 成日俾人問, 幾時大肚生仔 ? 有左未 ? 
作者: palmchristy 時間: 15-12-30 11:21
左一句"好似有腦退化咁" , 右一句 "喺我眼中同單細胞生物無分別嘅人", "同你條廢柴吹水", "親戚大多數都話知你死"...
感覺上睇到有人自視高, 睇低人, 敵意重, 以己度人, 同埋無乜互相溝通的意思.
其實人每日都會接觸唔同的人, 總有些人對事物一知半解. 係唔係因為咁緣故要睇低人, 同無心機同佢地講解呢? 感覺上, 呢類人好似活在自己世界咁. 將來遇到的老細同事, 更離奇的都有, 係咪又溝通唔到呢? 如果呢啲係而家普遍大學生的思維, 實在有點令人擔心佢地將來點同社會融合.
作者: Jane1983 時間: 15-12-30 12:23
睇完，覺得位仁兄好難搞，吾鍾意咪吾見面lor。
作者: skkeung 時間: 15-12-30 12:24 標題: 引用：+撰文++:++哲學仔+每逢見到啲親戚，佢地都
原帖由 elbar 於 15-12-30 發表
撰文 : 哲學仔
每逢見到啲親戚，佢地都會問我一個問題：
作者: judy 時間: 15-12-30 12:36
我為佢啲親戚難過。
睇完呢篇，感覺上呢位仁兄應是廢廢地縮在一、二角之類。親戚上來，唔show佢又唔好意思，無話找話說，才有以上對白。
至於讀電腦、讀文學嘅煩嘢，一廂惰願啫。拎杯水都覺得似waiter嘅人，邊有人想麻煩？
作者: nintendo 時間: 15-12-30 13:33 標題: 回覆：每次親戚問我讀乜都會覺得好煩
呢個後生仔似乎覺得自己好巴閉。
其實品格比學歷更重要。
作者: Wisleyli 時間: 15-12-30 14:09
提示: 作者被禁止或刪除 內容自動屏蔽
作者: annie40 時間: 15-12-30 21:41
我鄧香港人納稅資助哲學仔讀書而非常非常難過！
作者: annie40 時間: 15-12-30 21:52
親戚是長輩，應該已經納了稅給哲學仔供書教學，回報是被人家當「廢柴」！
似乎哲學仔學了用理性思考問題后，發揮「債仔」惡過「債主」的硏究結果！
| 歡迎光臨 教育王國 (/) |
Powered by Discuz! X1.5 |