教育王國

標題: 聖保羅中一面試　問點沖阿華田藉此了解學生探究科學態度 [打印本頁]

作者: 王家爸爸 時間: 15-11-9 09:41 標題: 聖保羅中一面試　問點沖阿華田藉此了解學生探究科學態度

【本報訊】名校對中一面試題目向來守口如瓶，要考齊中英數及理科知識的直資聖保羅男女中學，校方指問題圍繞學生一般生活範疇，而非需操練才懂得回答的問題，舉例曾問如何沖阿華田可以「沖得好啲」，以了解學生思維及對科學的探究態度。有小學校長指學生若能以學術角度說明溶液飽和度概念，可顯示其學科知識超前。
記者：倪清江

聖保羅男女中學昨舉行中一入學講座，家長學生坐滿禮堂，校方稱有約1,300人出席。該校約90個學額公開招生，本月20日截止報名。
校長陳黃麗娟料將如往年吸引約1,200人報讀，校方將篩選約450人在明年2月27日面試。她稱篩選時看重小五及小六成績表所表達資料，不止限於成績，「譬如係咪全面參加課外活動，我哋唔係睇佢攞幾多cup（獎盃），而係睇佢係咪掛住讀書，又或玩得太多冇求知慾」。她稱也重視教師及校長對學生評價。
面試佔時學生要單獨面對教師考核，過程約45分鐘，不面見家長。題目包含中英數及理科四大範疇，陳校長稱主要是考核語文能力，以及數學基礎及科學常識；她強調也注重學生品德，但不會安排教師暗中觀察評分。

校長：題目不會翻炒

該校列明要考理科常識，陳校長稱不會考學生未見過、未聽過和未遇過的問題，也不會考一些需家長付費栽培才懂回答的問題。副校長沈幼文透露，曾問及如何沖粉劑飲料如阿華田，「問吓溶解過程，需要點沖先沖得好啲」。陳指這是基本物理原理，答案沒有對錯，從而了解其好奇心、思考過程和對科學探究態度，題目不會翻炒。多名出席的小六生講座後接受記者考驗，回答如何沖阿華田，都答用熱水再攪動。
沖阿華田涉及溶質（solute）加溶劑（solvent）變成溶液（solution）的概念，屬中學物理科內容。浸信會天虹小學校長朱子穎指，小四至小六只講解水的3種型態，學生只要解釋熱水和攪動可幫助溶解阿華田粉已算回應問題；若學生能以學術角度說明溶液飽和度概念，學校就知道該學生在學科知識超前，認為問題不算過份深奧刁鑽。

Source: http://hk.apple.nextmedia.com/news/art/20151108/19364673

作者: 王家爸爸 時間: 15-11-9 09:42

大家點睇天虹小學朱校長既答案？

作者: 王家爸爸 時間: 15-11-9 10:48

「沖阿華田涉及溶質（solute）加溶劑（solvent）變成溶液（solution）的概念，屬中學物理科內容。」這答案有問題。如果咁回答，基本上一線學校未必收貨。

原因係阿華田飲料並不是溶液（Solution），所以沖阿華田不涉及溶質（solute）、溶劑（solvent）、溶液（solution）等概念。其實阿華田顆粒（Particles）不溶於水，它們只係懸浮（Suspend）在水中。
如果想穩入一線學校，需要知道溶解同懸浮（Suspend）係好唔同既概念。

作者: hkpapa852 時間: 15-11-9 11:01

本帖最後由 hkpapa852 於 15-11-9 11:02 編輯

王家爸爸發表於 15-11-9 10:48
「沖阿華田涉及溶質（solute）加溶劑（solvent）變成溶液（solution）的概念，屬中學物理科內容。」這答案 ...

依家沖阿華田, 有幾種喎!

傳統係阿華田粉+水+奶(淡奶或煉奶)+糖(或不加), 沖完要攪勻

現今有D即沖包裝(只需加水), 或水溶片, 沖法簡單咗好多

與其講乜物理理論(未到中一就咁叻, 咁駛乜入去讀呀?), 不如講下自己有幾瞭解阿華田, 講下佢既發展史 (由水沖飲品, 到即沖包裝, 再開發雪糕, 類似麥皮既健康飲品), 或者同佢既競爭對手比較.

只要講得好, 好過你講一大堆理論.

作者: like_travel 時間: 15-11-9 11:07

hkpapa852 發表於 15-11-9 11:01
依家沖阿華田, 有幾種喎!

傳統係阿華田粉+水+奶(淡奶或煉奶)+糖(或不加), 沖完要攪勻

100% agree with u

作者: like_travel 時間: 15-11-9 11:08

回覆 hkpapa852 的帖子

只要講得好, 好過你講一大堆理論.

impressed me

作者: 王家爸爸 時間: 15-11-9 11:08

hkpapa852 發表於 15-11-9 11:01
依家沖阿華田, 有幾種喎!

傳統係阿華田粉+水+奶(淡奶或煉奶)+糖(或不加), 沖完要攪勻

如果想入到，需要先回答點沖阿華田：

將阿華田粉倒入杯中，加熱水，用匙羹攪勻，直到阿華田粉完全「溶解」係水入面。

當講到「溶解」時，做個特首夫人既龍蝦手勢，吸引老師問秒個問題。

當被問到點解阿華田溶係水到，或者被問到點解你覺得「溶解」唔係好貼切時，你可以用簡單英文回答：

Ovaltine drink is not a solution. Ovaltine particles do notdissolve in water. They only suspend in water.

目的係等老師知道你概念清晰，有潛力被教得更好。

其實升中面試，離唔開啲小五、小六常識同基本概念既深入理解。

作者: little_yolky 時間: 15-11-12 09:54

本帖最後由 little_yolky 於 15-11-12 09:56 編輯

王家爸爸發表於 15-11-9 10:48
「沖阿華田涉及溶質（solute）加溶劑（solvent）變成溶液（solution）的概念，屬中學物理科內容。」這答案 ...

咁死啦, 點會答到溶液飽和既問題。沖嘢飲緊係依指示, 6匙阿華田加一杯水, 點會加阿華田加到變飽和飽和溶液

如果小朋友好老實以為佢討論緊烹調就大劑了。我睇完新聞問阿女識唔識沖阿華田, 佢答我唔識沖, 不過我識煮番茄炒蛋。

作者: 王家爸爸 時間: 15-11-12 10:09

little_yolky 發表於 15-11-12 09:54
咁死啦, 點會答到溶液飽和既問題。沖嘢飲緊係依指示, 6匙阿華田加一杯水, 點會加阿華田加到變飽和飽和溶液 ...

溶液飽和既問題只適用於可以溶解既物資，例如鹽可以溶解成Na+同Cl-離子。唔太適合用來解釋沖奶粉之類既飲品。

所以想留好印象，需要比面試老師知道，你明白我哋平時所講既「溶解」只係約定續成既慣用講法，同科學所講既溶解唔同。

作者: mch411 時間: 15-11-12 11:48

跟餐包熱飲, 凍飲加兩蚊, 用鮮奶沖加8蚊
千奇唔好散叫, 好唔抵

作者: tintinlam 時間: 15-11-12 12:12

王家爸爸發表於 15-11-9 09:41
【本報訊】名校對中一面試題目向來守口如瓶，要考齊中英數及理科知識的直資聖保羅男女中學，校方指問題圍繞 ...

我問左我細仔, 佢既答案好C9

, 首先要睇下飲既人既口味, 落份量, 再睇下杯既大細落水, 因容量唔同. 當然要係熱水, 因熱水比較容易溶解D粉.

果然唔係讀名校既材料, 科學態度冇咩, 有既就係了解佢阿媽既口味.

作者: chesswin 時間: 15-11-12 12:33

我阿女答, 落粉, 落水, 攪均, ----> 完成
我重覆問題重點:『點先令杯野好飲』
答:『睇下落幾多水』
如果去考就死得............

作者: ydoris 時間: 15-11-12 12:37

生活智慧姐,點解要咁煩去考究?我吾落糖既,吾通答案吾對咩?如果答我吾鐘意飲,吾飲架WOR,點知點先好飲.咁係未要簽紙放棄報讀.又話姐被認為吾LIKE飲就吾係叻人?

作者: 王家爸爸 時間: 15-11-12 12:59

tintinlam 發表於 15-11-12 12:12
我問左我細仔, 佢既答案好C9, 首先要睇下飲既人既口味, 落份量, 再睇下杯既大細落水, 因容量唔同. ...

又未必唔好，識得睇人既口味、睇杯既大細，可能係可做之才。

作者: ydoris 時間: 15-11-12 14:48

ydoris 發表於 15-11-12 12:37
生活智慧姐,點解要咁煩去考究?我吾落糖既,吾通答案吾對咩?如果答我吾鐘意飲,吾飲架WOR,點知點先好飲.咁係未 ...

我係第二類人,收我啦...

作者: 1010mum 時間: 15-11-12 14:50

mch411 發表於 15-11-12 11:48
跟餐包熱飲, 凍飲加兩蚊, 用鮮奶沖加8蚊
千奇唔好散叫, 好唔抵

我估我們大寶會咁答，佢對錢的概念深刻啲。

作者: 王家爸爸 時間: 15-11-12 15:45

ydoris 發表於 15-11-12 14:48
我係第二類人,收我啦...

其實有無諗過，呢個問題係小學三年級常識科既內容？

根據教育局，水的循環（Wonderful Water）既 Activity Plans ，小學三年級小朋友喺常識科，係需要討論「水能溶解某些物質」。

所以其實小朋友如果可以深入了解小學常識科既內容，應該可以答到啲神校問題。

作者: www 時間: 15-11-12 21:13

tintinlam 發表於 15-11-12 12:12
我問左我細仔, 佢既答案好C9, 首先要睇下飲既人既口味, 落份量, 再睇下杯既大細落水, 因容量唔同. ...

好細心，適合讀家政。

作者: aeiou_drm 時間: 15-11-12 21:20 標題: 回覆：聖保羅中一面試　問點沖阿華田藉此了解學生探究科學態度

又或者喜愛閱讀有關科學書藉的小孩會看過。

我仔話我知某一期兒童的科學有講過這個原理，所以佢都識個概念。仲摷返本習誌比我睇。

作者: 786 時間: 15-11-13 04:53 標題: 回覆：聖保羅中一面試　問點沖阿華田藉此了解學生探究科學態度

認真就輸了。校長只係用比喻去講下d題目。真正題目形式無看起來咁易。不過的確係呢類題目，答得要比較有邏輯。

作者: hkpapa852 時間: 15-11-13 09:32

回覆 little_yolky 的帖子

little_yolky 你估好似你咁講,有無分俾呢?

除非學校面試時講明一定要以科學方度去討論, 否則點解唔可以?

如果一間學校只著重學術理論而忽略一個人既其它能力, 咁佢唔會係我杯茶

作者: vickilau 時間: 15-11-13 10:26

tintinlam 發表於 15-11-12 12:12
我問左我細仔, 佢既答案好C9, 首先要睇下飲既人既口味, 落份量, 再睇下杯既大細落水, 因容量唔同. ...

我鍾意呢個答案，夠細心，又唔會好簡單咁答用熱水開

作者: Sinku 時間: 15-11-15 18:59 標題: 引用：跟餐包熱飲,+凍飲加兩蚊,+用鮮奶沖加8蚊千

原帖由 mch411 於 15-11-12 發表
跟餐包熱飲, 凍飲加兩蚊, 用鮮奶沖加8蚊
千奇唔好散叫, 好唔抵

歡迎光臨教育王國 (/)