教育王國

標題: 【短片】皇仁老波牛鬥踢西瓜波 [打印本頁]

作者: elbar 時間: 15-3-16 16:55 標題: 【短片】皇仁老波牛鬥踢西瓜波

【短片】皇仁「仔」踢40年西瓜波　食埋西瓜笑呵呵

■盧寵茂（左）噚日出席皇仁舊生會康樂日踢西瓜波，同老鬼一齊劈西瓜。

噚日係皇仁書院年度康樂日，梗係邀請一眾老鬼返母校作賽，踢下西瓜波，除咗隊賽仲有高難度射龍門比賽，將藤圈掛喺龍門中間，挑戰射手腳法。老鬼「波牛」盧寵茂（1973—1980就讀）施展腳法，喺射龍門比賽中射中一球，未致老貓燒鬚。

搵勻全港都唔夠波

為籌備皇仁呢個西瓜波大賽，舊生會舊年十一月起喺全港多個舊區搵波，但去完港九新界只搵到十五個，不足以打一場比賽，因為通常一場爆幾個波，於是只好返大陸整咗一百個，希望夠未來兩年用。

原來西瓜波大賽係一九七六年由皇仁體育老師、現任香港業餘田徑總會名譽副會長李志榮引入，至今已三十九年。李sir話七十年代，皇仁傳統以升大學為目標，校訓以「勤有功」提醒學生「戲無益」，校長下令「禁波」，但當年學生哥好鍾意踢波，於是在試後活動日，由高年班負責搞班際西瓜波比賽，並未經校長同意下，開始咗西瓜波大賽。既然是西瓜波大賽，梗係有西瓜助興，勝出隊可以食西瓜，曾經有空手道學生用手將西瓜劈開。李sir同八方講，當年波牛除咗有盧寵茂之外，仲有財經事務及庫務局副秘書長（庫務）楊德強、同局嘅副秘書長（財經事務）何宗基等。

李八方

歡迎光臨教育王國 (/)