教育王國

標題: 調查：六成青年用公共空間被「監視」 [打印本頁]

作者: elbar 時間: 15-3-16 14:01 標題: 調查：六成青年用公共空間被「監視」

【明報專訊】香港人近年對公共空間呢個議題愈嚟愈關心，香港基督教服務處舊年6月至12月做咗個「青少年對公共空間的觀感」調查，訪問咗約860名12至24歲青少年，發現有64％受訪者話用緊公共空間時會被管理員「眼望望」或者監視，逾三成半人更會被管理人員勸說離開。

18歲嘅麗花多次喺屋邨公園同朋友玩捉迷藏時，被管理員叫停，因為話公園只供12歲以下兒童使用，亦試過喺籃球場玩閃避球時被管理員訓斥。24歲嘅阿善7年前開始玩結他，最初會喺公園彈，但一有結他聲就被保安叫停，後來見到保安身影就會急急腳走。阿善之後再冇喺公園玩音樂，只能喺朋友屋企或租工作室玩，佢感嘆公共空間不足，壓抑佢哋嘅創作。

服務處話，青少年成日被人標籤做「滋事分子」，成為管理員驅趕嘅目標，促政府改善公共空間嘅使用及修改遊樂場地條例。

發展局長陳茂波噚日亦喺網誌談及有關九龍東嘅改善工程，仲話會研究增加一啲設計靈活嘅公園設施，令年輕人可以跳舞、運動、表演等。希望局長嘅建議最後可以落實，等班後生仔玩音樂或跳舞都有地方落腳吖。

歡迎光臨教育王國 (/)