教育王國
標題: 北島給孩子的詩（左丁山） [打印本頁]
作者: elbar 時間: 14-12-29 09:21 標題: 北島給孩子的詩（左丁山）
潮流興講：「不要輸在起跑線」，於是有啲二三歲小孩一日讀兩間幼稚園，上午讀「國際式」（即用英語、普通話教學，學費由五六千元起），下午就攞學券讀本地幼稚園（扣除學券後，學費大概係由一兩百蚊至一千蚊一個月），咁樣做法，等於全日托兒，但中午時佢要換校服，轉校車，細路仔好辛苦箒。
有一次碰到沙田著名幼稚園（樂基，在駿景園及碧濤花園，一共兩間）嘅司徒校長，問佢點睇學生一日讀兩間幼稚園，司徒校長話：「我唔贊成嘅，如此做法，平日最辛苦嘅就係學童，咁細個，最好日間有啲時間俾佢睡覺休息，趕得太緊要，對小孩子健康與學習情緒都可能構成障礙。」
小孩子應該輕鬆學習嘅，唔好逼得佢地太緊張咁趕喉趕命。在家輕鬆學習尤其重要，左丁山小時候跟父親念「牀前明月光，疑是地上霜」，又或者「上大人，孔乙己」，「天地玄黃、宇宙洪荒」等等根本唔知念乜，哈，十幾歲之後竟然仍然記得，自覺中文不差噃。呢日收到中文大學出版社出版嘅一本新書，叫做「給孩子的詩」，北島編著，北島係著名中國詩人，現於中大中文系任教。仲以為係佢嘅作品集㖭，打開一睇，原來唔係，裏面有好多首詩係外文繙譯過嚟嘅，亦有一啲係北島原作。
點解會有呢本書？北島在序言話佢小時候，父親要佢背誦古詩詞，多不解其意，但也會領略到音韻節奏，例如杜甫嘅：「舍南舍北皆春水，但見群鷗日日來」，就心情愉快。到北島兒子在港上學嘞，準備參加小學普通話朗誦比賽，要朗誦一首新詩「假如我是粉筆」，北島一讀之下，大吃一驚，即刻叫孩子退出比賽，下定決心，花了兩三年工夫，選編成一本給孩子朗誦的詩集，由中大出版社出版，內有外文詩70首，漢語新詩31首，總共101首。專門給孩子念的詩集，十分罕有，幾有意思，培養家中小孩子的中文不輸在起跑線嘅家長，應該買一本在家，得閒就與孩子一齊朗誦，例如等孩子睇完Frozen，唱完Let it Go之後，就教佢讀也斯的「城市風景」：「總有霓紅的燈色，那裏有隱藏的訊息，只可惜你戴起了口罩，聽不清楚是不是你在說話……」或紀弦的「你的名字」：「用了世界上最輕最輕的聲音，輕輕地喚你的名字每夜每夜。寫你的名字，畫你的名字，而夢見的是你的發光的名字……」孩子熟讀此書，一定贏在起跑線！
左丁山
作者: MC1128 時間: 14-12-29 17:57
elbar 發表於 14-12-29 09:21 
潮流興講：「不要輸在起跑線」，於是有啲二三歲小孩一日讀兩間幼稚園，上午讀「國際式」（即用英語、普通話 ...
左先生的文章,最後一句最敗筆,本來想買,都變咗唔敢買
作者: goodenough 時間: 14-12-29 19:36
本帖最後由 goodenough 於 14-12-29 19:37 編輯
MC1128 發表於 14-12-29 17:57
孩子熟讀此書，一定贏在起跑線！
我估你不是唔敢買，係唔想買！
整篇文章似一篇膳稿多些，重點不在介紹讀詩和書中的詩篇，而在介紹讀完此書後就可以贏在起跑線，或要培養家中小孩子的中文不輸在起跑線嘅家長，應該買一本在家。左丁山將書和人都神化了，睇完之後，宗教科一定贏在起跑線！
作者: Unclejt 時間: 14-12-29 20:13
左先生的文章，重點就是某位仁兄或某一事情和中大有關。
ps. 絕不是針對中大，只是覺得左丁山有點過猶不及。
作者: ANChan59 時間: 14-12-29 21:44 標題: 引用：左先生的文章，重點就是某位仁兄或某一事情
原帖由 Unclejt 於 14-12-29 發表
左先生的文章，重點就是某位仁兄或某一事情和中大有關。
ps. 絕不是針對中大，只是覺得左丁山有點過猶不及 ...
作者: Cheeselover 時間: 14-12-30 09:17 標題: 引用：左先生的文章，重點就是某位仁兄或某一事情
原帖由 Unclejt 於 14-12-29 發表
左先生的文章，重點就是某位仁兄或某一事情和中大有關。
ps. 絕不是針對中大，只是覺得左丁山有點過猶不及 ...
作者: torunpoland 時間: 14-12-30 11:06 標題: 回覆：elbar 的帖子
何必因人廢書？好書不怕買。到書局翻一翻書頁，好看實用便買。哪怕是梁振英推介？
作者: elbar 時間: 14-12-31 09:07
把地球交給孩子
北島選編的「給孩子的詩」（中文大學出版社出版）選詩101首原意是給孩子看的，至於孩子係邊個年齡，北島冇講明，但佢在「代序」講明：「讓孩子天生的直覺和悟性，開啟詩歌之門，越年輕越好。」因此可以推斷，呢本「給孩子的詩」裏面嘅新詩，應該係好適合小學生讀、朗誦，與學習嘅。
但小孩子讀詩，未必識得領略其中要義，相信北島選詩嘅大原則，係首先注重詞句之美與音節，等孩子熟讀咗咯，到大個仔、大個女之後，仍然記得詩句，到時對詩意及內涵又有一番新體會，就好似我地舊陣時讀「天子重賢豪，文章教爾曹」咁，初初邊度可以真正領略呀，只係當作學習認識一千個中文字啫。
隨手翻開「給孩子的詩」，第18頁有秦戈爾之《仿佛》：「我不記得我的母親，只是當我從卧室的窗裏外望悠遠的藍天，我仿佛覺得我母親凝住在我臉上的眼光，佈滿了整個天空。」呢首係懷念母親嘅詩，當然係好易讀，但今日香港一個四十歲母親教一個十歲孩子讀呢首詩，母親大概唔想讀，孩子讀了亦唔會明。
第19頁有葉慈嘅《當你老了》。記得中學時老師在英詩堂教過，全班學生冇人明白、領略。今日唔同世界咯，YouTube就可以聽到愛爾蘭演員Colin Farrell朗誦愛爾蘭二十世紀大詩人William Butler Yeats嘅"When you are old"：
"When you are old and grey and full of sleep. And nodding by the fire, take down this book."
「當你老了，頭白了，睡意昏沉，爐火旁打盹，請取下這本詩歌……（袁可嘉譯）。」小孩子讀呢首詩，叫佢背誦就得，明白其意喎，不必強求，人到六七十歲咯，想起追唔到嘅舊情人，唉，佢都六七十歲咯，先至會真正明白詩嘅意境。不過，此書亦有好多詩適合小孩子嘅，北島選咗兩首日本詩人谷川俊太郎嘅「河流」、「小鳥在天空消失的日子」帶有童真，母親讀俾孩子聽，叫孩子誦讀，輕鬆愉快，還有土耳其詩人Hikmet希克姆特嘅「無題」，佔中之後，最啱孩子讀：「把地球交給孩子吧，哪怕僅只一天，如同一隻色彩斑斕的氣球，孩子和星星們邊玩邊唱，把地球交給孩子吧，好比一隻大蘋果，一團溫暖的麵包，哪怕就玩一天，讓他們不再飢餓……（劉禾譯）。」
左丁山
作者: bookreader 時間: 15-1-1 20:03
提示: 作者被禁止或刪除 內容自動屏蔽
作者: goodenough 時間: 15-1-2 00:03
左丁山自己都有講，我們小時，背的是佳作仁，可知禮也的「上大人，孔乙己」，又或者係關於思想行為的「天子重賢豪，文章教爾曹」，唐詩則貪其押韻易上口，每一樣都有其特質。
假若要背誦「總有霓紅的燈色，那裏有隱藏的訊息，只可惜你戴起了口罩，聽不清楚是不是你在說話……」或紀弦的「你的名字」：「用了世界上最輕最輕的聲音，輕輕地喚你的名字每夜每夜。寫你的名字，畫你的名字，而夢見的是你的發光的名字……」，除了難上口，只會找到乏味！
若要孩子熟讀此書，一定變成討厭讀書！與其要贏在起跑線，不如市儈一點，給孩子背「富貴必從勤苦得，男兒須讀五車書」，希望佢越跑越起勁！
作者: csy_ma 時間: 15-1-5 19:33
基本資料都錯：北島以前係中大翻譯系講座教授，不過今年退休了。佢以為北島既以中文寫作著名，梗係響中文系。呢個係傳統傳媒人既托大。
| 歡迎光臨 教育王國 (/) |
Powered by Discuz! X1.5 |