教育王國
標題: 分享我仔呢一年嘅進步,正能量!(比較長) [打印本頁]
作者: 聽雨聲 時間: 14-12-1 00:08 標題: 分享我仔呢一年嘅進步,正能量!(比較長)
本帖最後由 聽雨聲 於 14-12-1 00:11 編輯
我仔舊年5月cac評估自傾,排i位,舊年十月先開始做關愛基金的幼儿導師訓練，同時也有參加一間私人訓練,媽咪陪埋一起上堂學技巧的。當時我仔係講外星話，鸚鹉學舌,唔識手指指,唔識跳,唔聽指令,做感統時樣樣都唔識,要捉住佢做,唔識筆飯食,完全坐唔定,大小便都未戒片,眼神接觸好差,我對佢嚟講係可有可無的,唔識家中成員。去in幼稚園間間都唔收,其中一間我排嘅i位學校校长話我仔適合s位,關愛基金嘅導師也建議轉排s位,我個心好灰,前途黑暗,掙扎了两三個月终於决定轉s位,我放低要求,我只想佢以後能基本照顧自己就好,入主流就隨缘吧。今年九月入讀s位,經過一年嘅努力,我仔而家識自己食飯，眼神接觸改善好多,成日手指指,識跳仲可跳两呎遠，扶住可單腳跳幾下,識踩單車,識聽指令,可坐定十分鍾左右(仍需努力),大小便都識表逹,夜片未戒到。可以簡單表逹到自己想要或描述别人的行為,開始很依赖我了，識搵人幫手啦。不過依然社交好弱(呢樣我真係唔識教),但識超多中文字,英文都識唔少。不過佢小肌比較弱,揸筆無咩力,油顔色就油出界,但開始識連两點,也識配對。治療師話因為佢手臂無力所以影響小肌,而家係要加强練小肌。而家我愈来愈了解佢，也開始知點佢需要做邊啲訓練，。我不是基督徒但我一直感恩,我仔遇到嘅都係好老師。btw 我仔而家三歲十個月,而我係單親媽咪，各位媽咪不要灰心!再難都會過去的,努力係有回報的，但謹記我地小朋友係十分耕耘一分收获的。
作者: coffeeyu 時間: 14-12-1 08:18
真系進步好快，恭喜晒
作者: 東東公主 時間: 14-12-1 15:07 標題: 回覆：聽雨聲 的帖子
👏👏👏
可否分享如何改善眼神及大小肌！已上社交班及私人感統，但沒有很大的進步！
作者: 聽雨聲 時間: 14-12-1 18:21
回覆 東東公主 的帖子
眼神方面,我就同佢玩額頭對額頭，鼻鼻對鼻鼻,要開心地玩講,咁做一定會望到眼。大肌就可以行多啲同上落樓梯,抛接波,舉400毫升嘅水(最近先開始做),放零食在手心,
揸實拳頭要佢用手挖開,有零食有動力。用夾隱形眼鏡個夾夾珠仔。在墙上貼包書膠俾
佢用黑板筆 劃。其實我仔大小肌都弱,不過一直都有進步,但仲需要努力!最近用圖卡
加老師幫手學着襪。下一目標係學擦牙。
作者: 聽雨聲 時間: 14-12-1 18:33
回覆 東東公主 的帖子
我没有上過社交班,但感統對大小肌係無咩幫助嘅，我覺得感統會令佢情緒好啲，專注力好啲學嘢快啲。
作者: pinkdoll 時間: 14-12-1 18:33
聽雨聲 發表於 14-12-1 00:08 
我仔舊年5月cac評估自傾,排i位,舊年十月先開始做關愛基金的幼儿導師訓練，同時也有參加一間私人訓練,媽咪陪 ...
戥你很開心, 努力加油. 其實, 講到尾最重要是和小朋友持續不斷地做家居訓練.
作者: 聽雨聲 時間: 14-12-1 19:26
回覆 pinkdoll 的帖子
多謝!家居訓練係十分重要
作者: sshoney 時間: 14-12-1 19:55 標題: 回覆：聽雨聲 的帖子
相信媽媽負出嘅係會有回報，大家一定要互相勉勵下，你嘅分享另帶比我地希望。
作者: 東東公主 時間: 14-12-1 20:20 標題: 回覆：聽雨聲 的帖子
多謝你的分享！佢會望屋企人，只是不望其他人！有冇其他方法？
作者: 聽雨聲 時間: 14-12-1 21:04
回覆 sshoney 的帖子
係呀，有時會懒唔想做訓練,但我覺得同啲同路人傾下又會有返動力去做
作者: 聽雨聲 時間: 14-12-1 21:16
回覆 東東公主 的帖子
主要係老師親朋戚友幫手,每次見佢打招呼都用手定住個頭要佢望住,老師會識做,對啲親戚朋友就係我用手定逼佢望,要好有耐性做,因佢一定掙扎,慢慢佢適應咗之後我叫佢望住講，佢都會望一望叫人,但都唔會望得耐。咁我都收貨唔敢要求高啦
作者: 東東公主 時間: 14-12-1 22:02 標題: 回覆：聽雨聲 的帖子
多謝你！
作者: conniekit 時間: 14-12-2 12:39 標題: 回覆：分享我仔呢一年嘅進步,正能量!(比較長)
謝謝你分享丫，我仔現在4歲，情況同你差唔多，不過我係今年5月辭咗份工自己湊、然後仔仔進步好多，尤其是言語表達，不過有時湊得太投入都好勞氣，但同時見到有少少進步又好開心滿足！ 各位媽媽爸爸，不要放棄不要灰心，加油努力啊！！
作者: 聽雨聲 時間: 14-12-2 13:42
回覆 conniekit 的帖子
咁你仔讀緊咩幼稚園?自己凑係好好多,了解佢有咩弱就加强訓練。你有無同佢上緊咩訓練?
作者: conniekit 時間: 14-12-2 23:41 標題: 回覆：分享我仔呢一年嘅進步,正能量!(比較長)
啱啱9月入學校兼收位，但冇感統訓練，外間私人的感統好貴，以前兩個人揾錢就應付到，現在1個人揾3個人洗真係覺得太貴喇！！
作者: 聽雨聲 時間: 14-12-3 07:40
回覆 conniekit 的帖子
係呀，私人個啲全部嘢都貴，我而家都無出去做訓練，都係跟學校啲功課做已經好忙,日日返嚟都要做個幾鍾。你仔上i位上成點?學校支援如何?小朋友跟到嗎?我而家對我仔有信心入返主流,想睇下你仔情况差不多上得如何?我而家每日幫佢刷身三次,覺得佢情緒真係好咗,做功課又無咁抗拒
作者: sshoney 時間: 14-12-3 23:02 標題: 回覆：聽雨聲 的帖子
請問讀 S位係咪幫助好大，因為我仔半年前兩歲係私家做左評估，醫生建議讀 S位，我就跟左排緊，今日係政府醫院做評估，醫生話可以轉返I位，叫我地再諗下。
作者: 聽雨聲 時間: 14-12-4 09:01
回覆 sshoney 的帖子
其實睇你運氣,入到間學校有好嘅治療師,好嘅老師,但我都覺得如果父母接受到,s比i位肯定多服務,因我聽i位學校校长講佢地支援其實好少,又有另一位i位老師話佢地有時要兼顧其它嘢，对小朋友都未必照顧得多。當然如果你小朋友已追返大部分而你又有足够時間幫佢做家居訓練,咁都可以讀i位。因為s位對社交真係無幫助,無其它小朋友刺激下。不過昨日我搵到間有i位幼稚園收我仔星期六返去暫托半日,搵咗好幾間都唔收。我諗住俾佢去學下同其它小朋友相處，我覺得呢個方法好好,效果如何要遲啲先知。我仔幸好跟到個好老師，pt好好,ot一般般，st就無言了。不過如果可以日日跟足功課去做已好吃力,都係靠自己。因跟老師時間係最多,老師好 所以我仔進步都好明顯。所以你多問幾個幫你小朋友做訓練嘅老師或治療師意見,自己再觀察佢同同龄小朋友嘅差距。我入咗s位先知有一半小朋友都係幾叻,有好多個溝通認知都好但行為情緒有問題,s位嘅學生無想象中咁差。我仔分在倒数第二的差班添呀，仲有两班比佢叻。
作者: 聽雨聲 時間: 14-12-4 09:06
回覆 sshoney 的帖子
政府醫生唔好盡信,當初我仔两歲四個月評估認知遲一年半,理解同表逹遲一年三個月,竟然叫排i位!!之後關愛基金導師一寫信就即刻轉返s位仲批埋傷殘金。如果你要轉就三月前要轉好啦。
作者: 聽雨聲 時間: 14-12-4 09:46
回覆 sshoney 的帖子
啱啱諗起有两個媽咪都話入咗一年進步唔大,可能都係睇返個人啦
作者: conniekit 時間: 14-12-5 16:44 標題: 引用：回覆+sshoney+的帖子
其實睇你運氣,入到間
原帖由 聽雨聲 於 14-12-04 發表
回覆 sshoney 的帖子
其實睇你運氣,入到間學校有好嘅治療師,好嘅老師,但我都覺得如果父母接受到,s比i位肯 ...
作者: Vichang 時間: 14-12-5 19:24 標題: 引用：請問讀+S位係咪幫助好大，因為我仔半年前兩
原帖由 sshoney 於 14-12-03 發表
請問讀 S位係咪幫助好大，因為我仔半年前兩歲係私家做左評估，醫生建議讀 S位，我就跟左排緊，今日係政府醫 ...
作者: Vichang 時間: 14-12-5 19:29 標題: 引用：回覆+sshoney+的帖子 其實睇你運氣,入到間
原帖由 聽雨聲 於 14-12-04 發表
回覆 sshoney 的帖子
其實睇你運氣,入到間學校有好嘅治療師,好嘅老師,但我都覺得如果父母接受到,s比i位肯 ...
其實，a 仔係幾叻㗎。
作者: 聽雨聲 時間: 14-12-5 20:08
回覆 Vichang 的帖子
Agree!入到去先知佢地咁叻,令我更多動力去做training追,希望升班
作者: sshoney 時間: 14-12-6 23:59 標題: 回覆：聽雨聲 的帖子
政府今日又有社工問我轉唔轉返I位，佢話 S位排得耐過I位，我心想讀S，但C6想I，咁我係今年6月開始排，唔知出年有無機會讀到 S？你排左幾耐先排到？
作者: 聽雨聲 時間: 14-12-7 10:38
回覆 sshoney 的帖子
睇你排邊幾間，你打去問出年有幾多人口畢業,又睇返你排個區有幾多人排,大概心中有数。我係舊年5月尾排,今年5,6月收到通知有位,咁啱今年多人畢業,我見我排嘅两間都收到六七月排嘅。你自己安排好同睇運氣,因無人知得唔得咖。就算你排i位都要問清楚學校,因為有時咁啱個一年佢無人畢業所以無位咖
作者: 聽雨聲 時間: 14-12-7 11:12
回覆 sshoney 的帖子
無論你排咩位都好,都要打去排緊嘅學校問佢出年有幾多人畢業,又睇返你排個區有幾多人排緊，越早問越好。咁你自己心中有個大概。我好彩舊年五月排今年九月入學,我打去問個時佢地都話我無咁快排到(i位s位都有問)。但今年多人畢業所以多位,所以入到。所以你要問清楚安排好,你仲有時間考慮。我都知男人係比較難接受,不過睇返你小朋友嘅需要吧，唔好因為大人嘅面子令佢錯失黄金期。好好溝通,家人支持也很重要。你有無參加私人訓練?啲導師點講?
作者: Mar9b 時間: 14-12-12 22:20
本帖最後由 Mar9b 於 14-12-12 22:35 編輯
我仔歲半私人評估，情況非常差，之後在一間不太出名機構做訓練，二歲零系政府評估認知只差幾個月，因排到耀X密集，讀左一年，今年8月入左協XS位，但我覺得仔仔依家仲停留系二歲零，進步好小好小，S位頭兩個月，我覺得仔仔情緒方面改善左好多，固執行為少左，之後兩個月上小組不投入，而且s位ot,st個人堂都系隔周先有。我非常認同要遇到一個好老師先會有進步的。中心st好好,nice又樂意解答家長問題，可惜阿仔欺善怕惡。我擔心姑娘溫柔未能食得住佢。ot真是無言了。私人一直隔周St,也正在排ot,pt有參加小組，可惜進步小到幾乎唔多覺有。現在3歲9個月了。
作者: Aydenmama 時間: 14-12-13 03:42 標題: 回覆：聽雨聲 的帖子
媽媽你好努力！加油！祝福你仔仔聽話健康！你也要保持心情開朗！天父會保佑你們ar
作者: 聽雨聲 時間: 14-12-13 21:26
回覆 Mar9b 的帖子
我已覆咗你我仔邊間讀。其實邊間都好,最緊要老師好自己本身又努力做訓練,仲要小朋友有少少潜質。我都好明白媽媽嘅擔心。舊年我都仲好驚要一世照顧我仔，因當時佢真係咩都唔識。我仔比你小朋友大两個月,佢出年一月尾就四歲啦。即係我仔仲可以讀两年幾s位。已經有好多個同學仔媽咪都話我仔叻,可以讀返主流。其實佢得唔得,媽咪係最清楚,佢仲有好多嘢要追。眾所周知協康s位係最好喔，可能你個仔唔夾,又或者仲未搵到啱嘅方法。其實你可以同老師多溝通,問下老師意見，小朋友有進步就贊下老師，有邊方面弱就請教老師應點做。老師都係人,都需要人贊賞和認同尊重。你同佢關係好咗,自然會對小朋友留心啲。你講多咗佢亦了解小朋友多啲。有咩方法對你仔有效都要同老師講。我都覺得治療師要有氣場先可以令小朋友合作,溫柔對我地啲小朋友係唔得嘅，反而會被佢控制咗主導權。多同老師治療師溝通,自己同小朋友相處時多用生活上嘅嘢教佢,多問小朋友問題逼佢講嘢同認嘢,随時随地都可以填鸭式地逼佢地學，當佢係普通小朋友咁教,其實佢地有能力咖，只不過佢地需要更多時間重复地教先可以入腦。你唔教佢永遠都唔識，你不停地教佢就遲早都會識。
作者: 聽雨聲 時間: 14-12-13 21:32
回覆 Aydenmama 的帖子
多謝！我會努力啦
作者: 聽雨聲 時間: 14-12-13 21:40
本帖最後由 聽雨聲 於 14-12-13 21:41 編輯
今日同我仔經過摩士公園見到一個鐵馬上面寫信MPN4,我仔突然指住話morse park no.4 ,實在令我驚喜萬分,無教過佢short form。
作者: Mar9b 時間: 14-12-14 12:29
回覆 聽雨聲 的帖子
多謝你回覆，你的意見我都好認同。
作者: catmervin 時間: 14-12-15 16:23
sshoney 發表於 14-12-3 23:02
請問讀 S位係咪幫助好大，因為我仔半年前兩歲係私家做左評估，醫生建議讀 S位，我就跟左排緊，今日係政府醫 ...
事實上,我排咗i位,等咗一年有位,而家讀緊,間學校係大仔讀開(佢係i位畢業,今年小一),學校老師我好信任,但細仔跟唔到,成日周圍走,融入唔到普通小組中,只有在個別訓練時才可專注下來。現在排了2月見學校的心理學家,可能又要轉排S位,因為呢個教育心理學家當初見我大仔,都話佢要轉排S位,但我大仔唔係真係咁差,連政府都話情況輕微,醫生不再跟進,由職業治療師跟。
我細仔主要的問題係坐唔定,好自我,唔聽指令,脾氣差(因為語言表達差)。因為融入唔到小朋友中,所以進步係比大仔慢,唔知應唔應該轉排S位。
作者: Vichang 時間: 14-12-15 17:18 標題: 引用：Quote:sshoney+發表於+14-12-3+23:02+請問
原帖由 catmervin 於 14-12-15 發表
我細仔都係咁,兩歲時私人評排S位,隔幾日洩到位政府評,就排i位。我直接問政府醫生，佢話，私人評估，２歲評 ...
作者: Vichang 時間: 14-12-15 17:21 標題: 引用：+本帖最後由+Mar9b+於+14-12-12+22:35+編輯
原帖由 Mar9b 於 14-12-12 發表
本帖最後由 Mar9b 於 14-12-12 22:35 編輯
我仔歲半私人評估，情況非常差，之後在一間不太出名機構做訓 ...
作者: catmervin 時間: 14-12-15 21:04
Vichang 發表於 14-12-15 17:18
我個仔都好自我，有時覺得佢識聽我地大人講嘢但偏唔聽！唉....
作者: 聽雨聲 時間: 14-12-15 22:08
回覆 catmervin 的帖子
其實小朋友係點樣,媽咪係最清楚,如果真係融入唔到就不如轉s位啦。本身i位老師點講?有無咩建議?i位本身就係俾好輕微嘅小朋友讀。我今日同學校社工傾，佢主動俾咗三間主流小學我參考.叫我得閑可以做下reserch學校老師校風好唔好。又講入主流睇三大元素,一係能安坐,二係專注力ok,三係聽得明老師指令。即係要朝呢個方向訓練。我都好開心因為以前問過佢,佢都推 話遲啲先講,叫我唔好心急。而家佢肯同我讀即係我仔有機會入主流啦。不過安坐已經係一個死穴
作者: catmervin 時間: 14-12-16 14:33
聽雨聲 發表於 14-12-15 22:08
回覆 catmervin 的帖子
其實小朋友係點樣,媽咪係最清楚,如果真係融入唔到就不如轉s位啦。本身i位老師點講? ...
現在佢已經在私人做緊感統+社交言語,仲有一星期一次個別訓練(一小時),呢D佢都上得幾好。佢係好鐘意返學,返咗學講嘢同自理都有進步,我好想佢繼續在呢間學校(因為哥哥都在這間學校兼收畢業,又同校長相熟),但又怕如果真係要轉S位,又要再適應過,又怕唔轉排S位,好似抹煞咗一個機會咁。好矛盾!精神壓力好大!
作者: 聽雨聲 時間: 14-12-17 21:16
回覆 catmervin 的帖子
咁即係i位老師都搞佢唔掂,佢有無建議你轉s位?就算係两兄弟情况都會唔同咖,哥哥做到細佬未必得。你個細仔係咪剛三歲?你可以見埋心理學家先睇下佢點講,呢段時間再觀察下同訓練佢安坐,我都未搵到方法,我仔又係坐唔定。個間學校在外面可以睇到裏面上課情形嗎?你平時可以去睇佢上課係點樣。你要學識放鬆，多同屋企商量,搵朋友傾下減壓。你大仔讀緊咩呀?都明白你凑两個小朋友係好辛苦,多啲上來呻下咯！
作者: 尚臻mam 時間: 14-12-17 22:30 標題: 回覆：聽雨聲 的帖子
你真係好好心機唧媽咪.我仔剛剛3歲上個月睇佐私家評估.確定有言語遲缓！社交障礙.排緊D言語治療堂.因為個仔冇眼神交流.唔識表達.溝通真係好辛苦.依家上緊k1整日被老師投訴坐唔定！唔聽指令！鹦鹉学舌.....搞到我壓力好大精神緊張！😭😭
作者: catmervin 時間: 14-12-19 23:21
聽雨聲 發表於 14-12-17 21:16
回覆 catmervin 的帖子
咁即係i位老師都搞佢唔掂,佢有無建議你轉s位?就算係两兄弟情况都會唔同咖,哥哥做到 ...
作者: longlongchen 時間: 14-12-19 23:40 標題: 回覆：尚臻mam 的帖子
好無愛心嘅老師，我個仔都係今年讀k1,言語整體發展遲緩，加踩界，但d老師好好，搵我傾，同埋支持我，間學校好好
作者: Olympian 時間: 14-12-20 09:59 標題: 引用：+本帖最後由+聽雨聲+於+14-12-1+00:11+編輯
原帖由 聽雨聲 於 14-12-01 發表
本帖最後由 聽雨聲 於 14-12-1 00:11 編輯
我仔舊年5月cac評估自傾,排i位,舊年十月先開始做關愛基金的幼 ...
作者: 聽雨聲 時間: 14-12-20 20:34
回覆 尚臻mam 的帖子
咁你個小朋友有無做緊咩訓練或者排緊咩位?遇到個唔好嘅老師的确令人難受,我仔之前都無學校收添呀,不過如果老師唔好我寧愿自己凑加出外面訓練,因為返得辛苦又學唔到嘢。不過你再同學校傾下睇有無得改善啦。平時自己多問小朋友問題逼佢講嘢，我仔老師昨日剛教我點訓練我仔安坐同專注,佢話我仔最多得十分鍾專注,叫我開始俾佢做佢中意做嘅桌面訓練,例如拼圖。每次做完一定要奖賞，慢慢再加另一樣訓練，令安坐時間同專注加長。我之前忽略咗練安坐,同我仔係好超心急嘅人,老師話訓練時要常提佢要慢啲，連我平時同佢一起時嘅步伐都要慢啲。
作者: 聽雨聲 時間: 14-12-20 20:46
回覆 catmervin 的帖子
你係二月頭定尾去評估?如要轉就趁派位前轉呀，你問返醫務社工最遲幾時要轉。咁你就好大機會出年可以轉到啦。因為佢老師咁講都好似有啲提示咁
作者: 聽雨聲 時間: 14-12-20 22:07
今日學校去西貢玩,第一次見到個仔肯拖住小朋友只手行,拖得好實又行咗好耐
作者: 尚臻mam 時間: 14-12-22 23:18 標題: 回覆：聽雨聲 的帖子
D位冇排！！（私家醫生同老師暫時冇建議我排）训练排紧私家.言语治疗.等下月底上堂！话逢星期六一堂！觉得好少！好多謝你唧分享..我仔專注力都系好差.在加上坐唔定⋯.你響邊家訓練上堂可否pm我？
作者: 尚臻mam 時間: 14-12-22 23:18 標題: 回覆：聽雨聲 的帖子
叻佐！加油!!！努力＂
作者: 聽雨聲 時間: 14-12-23 00:31
回覆 尚臻mam 的帖子
暫時無去私家做訓練,不過都打算俾佢每星期加一堂感統,希望對安坐有幫助。就算幼稚園可以包容,都要幫小朋友練返好打好個底上小學，如果唔係到時大家都辛苦
作者: 聽雨聲 時間: 14-12-23 00:35
其實你應該排下e位,見你講個啲問題都有需要排呀，點解醫生無建議?e位訓練便宜好多又有針對性
作者: 聽雨聲 時間: 15-1-22 20:57
本帖最後由 聽雨聲 於 15-1-22 20:59 編輯
前幾日嚮Aeon買咗本反覆描寫練習本俾佢學寫大小英文字母同數字,進步好好,練咗幾日就識1237810，俾啲字母佢玩串字,而家已識串超三十個字。昨日一見個生日蛋糕,即時拼咗個cake出嚟!
而且而家可安坐三十分鍾左右做功課,又會自動拿本運筆練習自己跟住劃，雖然劃到無咩力,講嘢又未得但已感满足!越嚟越有信心出主流!
作者: DENNIS201 時間: 15-1-22 23:47
聽雨聲 想問你小朋友當時歲半 or 兩歲既情況係點架 ?
作者: 聽雨聲 時間: 15-1-23 00:16
回覆 DENNIS201 的帖子
到两歲都唔識講嘢,又唔睬人,無手指指,只玩車輪,完全無表示餓,口渴。俾佢食就食飲就飲,唔俾佢佢又唔會扭要食或飲。俾嘢佢食要喂到埋口,放嚮面前都唔識拿嚟食。俾個包佢拿住食就丢落地。對手完全唔肯拿嘢。但佢坐爬行同普通小朋友識嘅時間一樣,但出街一定用bb車,因佢亂跑唔會理我有無跟住佢。係認知好差,當時28個月去cac評醫生話我仔只不過當我係幫佢做嘢嘅工具,當時我聽到好傷心。佢只識拖我手去拿嘢。評個時佢識講五個詞左右。睡眠好差,夜晚要起身飲两三次奶,差不多三歲才戒了夜奶可以一覺到天光!玩千秋喊,sir滑梯係趴著sir。暫時記得係咁多。
作者: 聽雨聲 時間: 15-1-23 06:55
本帖最後由 聽雨聲 於 15-1-23 06:56 編輯
唔記得講佢最中意玩開關門，櫃門櫃桶可以玩個幾鍾,中意睇lift門開關，平時行街見到啲門就行埋去睇,睇門隙睇線，以前睇到唔肯走,而家可以一叫就走。未戒到呢個行為，而家進化到會用書、盒、玩具扮門開關,仲發埋聲,嘀嘀嘀,扮地鐵聲,校車聲,巴士。唉…我無强行制止,無咩傷害,而家就由得佢扮,俾佢當抒發壓力吧。出街就盡量唔俾佢去睇咯,昨日發現佢學識劃两個長方形扮門
作者: 聽雨聲 時間: 15-1-23 08:38
仲有斜視墙邊跑,自轉等。唔好意思,我記起一啲就寫一啲。
作者: DENNIS201 時間: 15-1-23 10:16
好詳細...我仔好多野似會自己解決,如去拿野食,開蓋等,如做唔到佢唔會做
開唔到蓋會拎去我隻手度叫我開
作者: 聽雨聲 時間: 15-1-23 10:49
比我仔叻好多,以前佢真係咩都唔識,係完全無意識要去做嘢。我當時超驚佢嚴重弱智
作者: DENNIS201 時間: 15-1-24 00:03
本帖最後由 DENNIS201 於 15-1-24 01:02 編輯
咁你仔幾歲識有意識咁講野 ?
例如要水水咁
作者: DENNIS201 時間: 15-1-24 00:03
現時1歲8個月
特徵：
叫佢名唔理,除非連續叫多次或用其他野利誘佢
少說話,要求野時會叫媽媽/間中叫爸爸但唔準確,同餅餅包包等要求性字
唔比佢想要的野佢(例如餅),唔會指但會泵地,耐左都唔比,佢會繼續發脾氣,最後走開
間中開心自轉-唔比佢做會做其他野,唔會發脾氣好似無左件事
撞頭-會撞窗門,唔比佢做會停
腳尖行-見過一次但唔多
尖叫-唔算多但可以叫得停
訓教會用同一個表面較涼的枕頭,否則好耐先訓到
反轉架車玩車輪
鍾意玩可以轉的野(家中玩具/公園玩井字過三關/會所)
喜愛iPad,似會自己入想玩的app(ABC果類)/睇電視(幼時見到特別電視位會喊)
手指指野唔太得-除非準備搭lift遠遠「出定手指」去按
爸爸媽媽入屋會好興奮衝埋去,爺爺麻麻亦係,間中會叫爺爺,如少見的叔叔入來會喊但好快停之後同佢玩
無排列過車可能屋企無乜車仔
講街街/沖涼/餅餅會聽得明,立即衝去
極愛揭書,例如數字書或字母書.對音樂敏感
目光交流同父母算不錯,同媽媽爸爸玩時會望你眼好幾秒,出街會週圍望,唔太怕人(會同看更/陌生人玩),唔太怕環境轉變,可能在不同餐廳食野多或成日去街
鍾意周圍跑/爬,例如係餐廳坐唔定,除非有野食/手機睇卡通片
BYEBYE飛吻可以,但似背左咁
喜歡食薯條,例如將一條薯條與及包皮扮薯條,左右移動亂擺位都會拎到薯條準確放入口
單手叉野食可以,匙就未算準確.較偏食,如提子乾
歲多識行,現識扶野上樓梯,落就未算得,未見過跳
去公園玩會用背向方式用腳先落玩滑梯,千秋都喜歡
去會所玩會周圍跑同叫,如有年齡相若或較大兒童(無論主動行去或被動行埋身)可以一齊玩手上件玩具但欠眼神交流,覺沒趣會走,不會反應過激
歲多教佢套圈圈可以,入籃可以但唔識射波,會準確入銀入錢箱
作者: 聽雨聲 時間: 15-1-24 09:51
我覺得你小朋友認知問題不大,係情緒同啲行為問題,呢啲都可以訓練番,唔使咁擔心。而家仲細可以好快追番
作者: DENNIS201 時間: 15-1-24 20:39 標題: 回覆：分享我仔呢一年嘅進步,正能量!(比較長)
聽雨聲可以私下傾傾嗎？個人好亂
作者: 聽雨聲 時間: 15-1-25 06:09
可以啊
作者: DENNIS201 時間: 15-1-25 16:57
我反而覺得我個仔唔太識認野
例如「橙橙」「波波」呢 d 我都唔知佢識唔識
已經日日一路玩一路講
但從未試過拎「波波」呢 d 野比我
拎件開唔到的包裝食物去我手就會
作者: 聽雨聲 時間: 15-1-25 20:16
其實你不停輸入,有朝一日佢會突然爆番出嚟,暫時唔使逼得咁緊!
作者: DENNIS201 時間: 15-1-25 20:31
我仔最強係自己叉野食,自己用匙筆飯入口
但其他野如做指令拎野,講野等就好弱
作者: 聽雨聲 時間: 15-1-25 20:48
評估後做訓練會進步的。不用擔心
作者: DENNIS201 時間: 15-1-25 20:57
做訓練係指中心果 d?
自己都會做
作者: 聽雨聲 時間: 15-1-26 09:00
出面自己都要做,始終都要搵專業睇你仔需要咩瞓練,之後最好係自己學方法在生活中教,
作者: DENNIS201 時間: 15-1-26 10:09
完全明白,兩公婆會盡全力的了
作者: DENNIS201 時間: 15-1-26 17:44 標題: 回覆：分享我仔呢一年嘅進步,正能量!(比較長)
始終開始好難
作者: 聽雨聲 時間: 15-1-26 18:02
萬事起頭難,加油!
作者: 聽雨聲 時間: 15-3-30 23:44
係時候update下我仔嘅情况啦。過完生日又過埋年,已經四歲啦，雖然語言上進步唔大,不過大肌,模仿力,玩lego同寫字都進步好大。物理治療師放完産假番嚟勁讚佢叻咗,治療師做乜動作,佢都可以跟住做,不過手眼恊調就唔得,未來方向就訓練呢樣。玩lego除咗學人砌之外自己都有砌唔同形狀。進步最快係寫字,數字,英文字母大細楷都識寫，中文識寫十幾個簡單嘅,自己名都可以寫到,當然寫得唔靚。所以而家要上言語治療加強佢理解力同表逹能力。期望追多一年可出番主流!
作者: DENNIS201 時間: 15-3-31 17:21
進步左好多呀！
手眼恊調係乜?拋波接波?
作者: 聽雨聲 時間: 15-3-31 22:27
回覆 DENNIS201 的帖子
例如要掟中目標
作者: DENNIS201 時間: 15-3-31 23:36
言語情況係點?
識答簡單問題嗎?
仲有無擰頭自轉呢d行為?
我仔出街多左擰頭呢d古怪野
作者: wypooh 時間: 15-4-1 00:12 標題: 回覆：分享我仔呢一年嘅進步,正能量!(比較長)
我仔2yrs7mths同你仔之前所講的特徵一模一樣，我也怕他是弱智.....排緊cac6月評估....佢又係口渴都不會去飲水，對學習，玩具零興趣.....
作者: 聽雨聲 時間: 15-4-1 07:48
回覆 DENNIS201 的帖子
佢已經無自我刺激行為暫時,因呢類小朋友一段段時間咖，有啲嘢改善咗另一啲衰嘢又出番嚟。要自己觀察,有就搵方法阻止。佢暫時都係識答yes or no question,有教過佢死記到嘅就識講。學校個st好唔掂,而家剛嚮出面開始咗言語治療,都係覺得佢理解力差,唔明人問乜所以唔識答。希望上一段時間有改善啦。
作者: 聽雨聲 時間: 15-4-1 07:52
回覆 wypooh 的帖子
咁你有無带佢去私人訓練?做感統幫助好大,平時多去公園玩千秋sir滑梯氹氹轉,都係對腦部刺激好。如你有去訓練多問治療師學方法自己教
作者: wypooh 時間: 15-4-1 16:45 標題: 回覆：分享我仔呢一年嘅進步,正能量!(比較長)
公園就日日去，佢like swings,sir滑梯興趣不大
作者: wypooh 時間: 15-4-1 16:46 標題: 回覆：分享我仔呢一年嘅進步,正能量!(比較長)
感統未做，有冇介紹?
thx
作者: 聽雨聲 時間: 15-4-1 17:07
回覆 wypooh 的帖子
不過又要注意唔好玩得過多,太多又唔好,要睇佢情况。幫佢刷身,要叫治療師教
| 歡迎光臨 教育王國 (/) |
Powered by Discuz! X1.5 |