教育王國

標題: 【短片】網上測試嚇親人　港人英文差過日韓？ [打印本頁]

作者: elbar 時間: 14-11-14 10:32 標題: 【短片】網上測試嚇親人　港人英文差過日韓？

【短片】港人雞腸屎過台日韓　多謝Tree Gun哥

秋意濃濃，最適合去日本或韓國賞紅葉。八方同好多香港人一樣，最頭痛係當地言語不通，有時講句英文都雞同鴨講。但有間私人教育機構噚日發表「英語能力指標」報告，聲稱調查全球63個國家、75萬名成年人嘅英語能力，香港排名31，仲低過韓國（24）、日本（26）同台灣（30）。八方聽見個結果巧驚驚，唔通個個香港人都變咗Tree根鍾樹根？I don't think so囉！

負責呢個調查嘅機構叫英孚教育（EF Education First），齋睇結果都幾嚇人，香港人嘅英語能力唔單止渣斗過日、韓，報告仲話上海嘅評分更首次超越香港，中國一線城市地位被邊緣化。EF港澳區總監趙崇基話，喺香港至少收集咗一萬人嘅英語水平測試數據，評估項目包括語法、詞彙、閱讀和聽力。聽落好有信服力，之不過，呢一萬人係點抽樣出嚟呢？

原來個調查係自願性質，任何人上佢哋個網站都可以免費做英文測試，數據就喺呢度嚟。八方有理由相信，Tree根肯肯定做過呢個測試，聽佢左一句「dreaming on your office」，右一句「I don't think so囉」，曲線拉低港人評分都唔出奇。

田二少請人寧要普通話好

唔止八方詫異，連獲邀出席發佈會嘅田北辰都話，測試係自願性，代表性存疑，「有少少偏見」；若講日本人、韓國人嘅英語能力好過香港人，「我相信好多人都唔同意」，結果不能盡信。佢仲話香港背靠中國，自爆旗下時裝連鎖店，請人寧願普通話好都唔要英語好喎。但補飛講句，香港唔可以放棄國際市場，但現時教育制度只重考試，令學生冇乜推動力學好英文。

教育局回應話，接受測試嘅人係自選自薦，未必可靠反映參與國家或地區嘅整體英語水平，而測試只喺網上進行，冇得上網就冇得做，認為指標測試嘅結果不具代表性。

李八方

作者: elbar 時間: 14-11-14 10:49

本帖最後由 elbar 於 14-11-14 10:51 編輯

搵食多講普通話　港人英文變差

港人英語水平下降，與「搵食」需要有關。人力資源顧問指，近年對普通話有要求的職位由以往三成增至七成。

有調查指香港英文水平比台灣及日韓差，中原人力資源顧問有限公司董事總經理周綺萍坦言，本港僱員傾向學普通話，以職位看，以往請人一至三成職位要求普通話，現時增至六至七成，面對國內的工作就要求更高。她又指，香港人現實，面向大陸，識普通話更易搵食；要進修都是學普通話。

周指在多個行業中，以律師行對英語「精準」的要求最高，「文法錯或用字錯可能影響單官司」。但近年入行的「律師仔」，公開試英文沒A的佔多，法律文件錯漏百出，上司要大改，但又要顧年輕人感受，不敢用紅筆又不可改太多，「慘過自己寫。」

「要進修都揀普通話」

見習律師陳小姐（化名）表示，事務律師的英文水平則較參差、「比較生疏」，加上本港港式英語氾濫，有個別律師仍會犯「基本錯誤」，她曾見有大律師被法官當庭批評「用字不精準」，亦曾在法律文件上看到「Me and my family」（正確為：My family and I）。

身兼立法會議員及縱橫二千集團主席田北辰以其集團為例，指聘請一名銷售員，會要求普通話好，因服務對象主要以內地人為主；但他指長遠英語仍重要，因不少跨國公司仍要透過香港進入內地。

英文排名低過日韓

私人教育集團EF Education First及EF English昨公布《EF英語能力指標2014》，綜合全球63個國家、75萬名應試者的英語水平測試。結果丹麥為全球之冠，亞洲區以馬來西亞及新加玻排名最高，分列12及13，香港跌至31，是07年以來最低，較位列30的台灣還差。

EF Education First港澳區總監趙崇基指，測試是在網站上免費開放，任何人士均可進行；測試包括文法、詞彙、閱讀及聆聽部分。

立法會議員田北辰質疑測試只有聽及閱讀，並無口語不可靠。中原人力資源顧問有限公司董事總經理周綺萍亦指，「差過台灣已匪夷所思，差過日、韓更是無可能，港人英文程度未去到咁差，好似唔識英文咁！」

立法會議員田北辰

歡迎光臨教育王國 (/)