教育王國

標題: 學校瘋狂加費　教局來者不拒（太陽報太一叮） [打印本頁]

作者: elbar 時間: 14-9-6 09:43 標題: 學校瘋狂加費　教局來者不拒（太陽報太一叮）

香港教育愈來愈向錢看，搞到私人及直資學校收費不斷飆升，基層子女只能望門興嘆。最離譜嘅係，教育官僚對學校狂加學費居然來者不拒，有求必應，簡直係誤人子弟，禍港殃民。

嗱，新學年伊始，全港近八成私立及三成三直資小學獲批增加學費，平均加幅近一成，最高達四成三，一個學年閒閒地收學費幾萬元，南區一間名校仲加到每年十五萬元添，問你驚未！

有家長組織炮轟教育局對加價申請係又批，唔係又批，令學費加幅失控。又難怪家長扯火嘅，孔子話齋，有教無類吖嘛，人人都應該有接受教育嘅平等機會，用依家嘅講法就係唔可以輸喺起跑線上，可惜事實啱啱相反，香港教育分為唔同等級，基層子女想入讀私人或直資學校，簡直難過登天。當然喇，學校加學費嘅理由好多，譬如業主加租、維修校舍、教師加人工等等，但無論點都好，都唔能夠予取予求o架。教育局作為監管者，任由學校獅子開大口，任由家長任人宰割，唔係失職又係乜？

話時話，香港教育淨係識講錢，商業味道愈來愈濃厚，早就備受詬病。多年來，教育資源分配不公，加上政策混亂，五時花六時變，搞到學校及家長無所適從。而最令人莫名其妙嘅係，當局開放綠燈，傳統名校紛紛轉為直資，大搞貴族教育，連幼稚園亦唔例外，多數基層子弟被拒於門外，根本冇公平教育可言。

本來呢，世界上冇絕對公平呢樣嘢，提倡教育多元化係無可厚非嘅，弊在港產官僚眼高手低，監管甩漏，直資學校好似無王管咁，為所欲為，烏煙瘴氣。呢，審計署曾發表報告踢爆全港七十幾間直資學校中，約九成存在管理混亂、帳目不清等問題，有啲亂加學費、有啲違規買樓炒股、有啲收受供應商捐獻、有啲獎助學金備而不用，五花八門，無奇不有。教育局事後亡羊補牢，煞有介事成立工作小組檢討一番，並提出二十幾項改善建議，可惜事過境遷，當局關人個關，呢啲建議究竟有冇落實，根本冇人知。

正如有人話齋，教育不公係最大嘅不公。香港教育亂象叢生，直資學校放任自流，已經成為民怨焦點。難為前朝貪曾政府仲話要發展乜嘢教育產業，將教書育人當成一盤生意，搞到學校紛紛向錢看，你話係咪添煩添亂吖，叮！

歡迎光臨教育王國 (/)