教育王國

標題: 好想二年班放手, 應如何處理? [打印本頁]

作者: Jessy 時間: 14-6-18 17:57 標題: 好想二年班放手, 應如何處理?

兒子小一生, 成績中間, 考試默書跟到足, 每天功課唔識先問, 但做晒我會對一次有無做錯, 錯的會教返佢正確答案是什麼, 而且要確保佢明白點解錯.

但我知咁樣落去都唔係辦法, 好想二年級開始放手了, 但應該點放? 先放默書? 買個錄音機叫佢自己默?

咁功課呢? 完全唔同佢對? 錯左返來佢都唔明先教佢? 定係都唔教佢叫佢自己問老師?

考試呢? 叫佢自己溫? 我依家係會比d試卷/補充/自己出d問題(當然知佢唔識或唔熟o個d)比佢做, 做完幫佢改, 錯就教返佢, 咁考試點放? 佢自己點溫? 好迷網!!!!

我最怕放手後, 攪到佢二年級既野全部唔明, 到三年級更難追, 會不會呢?

兒子性格: 上堂成日發夢唔聽老師講野, 耐唔耐都會攪攪震比老師罰, 放學後都貪玩, 但都叫做有責任心會完成功課, 默書溫書呢d就要吹下哦下佢咁羅, 佢唔多願但最後都會溫既.

作者: icecream1222 時間: 14-6-18 19:37 標題: 回覆：好想二年班放手, 應如何處理

提示: 作者被禁止或刪除內容自動屏蔽

作者: momama 時間: 14-6-18 23:13 標題: 回覆：好想二年班放手, 應如何處理?

你跟到咁足，而家開始同佢傾計，放完暑假逐樣放，先放功課，跟住默書測驗考試。預咗會跌，但要死忍，因為小二先放係有d遲。

作者: scyauchris 時間: 14-6-19 04:55

功課不用對齊有沒有完成，因為老師會同她們講。不過一定要睇吓他功課有乜改正，要他們一定要自己double check 一次功課，其實功課已反映到他考試分數。小二放手不會太遲，我好多朋友都未放手包括功課方面。不過我只是唔知到小五小六要否自己跟反她考試測試，不過這樣做是退回原位。

作者: scyauchris 時間: 14-6-19 05:04

不過記住每個小朋友都不同，所以用的方法也唔同。最重要是培養正確的學習態度及比信心小朋友。

作者: edith208 時間: 14-6-19 10:04

Jessy 發表於 14-6-18 17:57
兒子小一生, 成績中間, 考試默書跟到足, 每天功課唔識先問, 但做晒我會對一次有無做錯, 錯的會教返佢正確答 ...

大女二年班時, 我生阿三, 已預告他要自己管理好自己的家課, 溫習, 好高興那年的三個學期考試成績都在最高水平, 發揮了他的小宇宙

只要小朋友自知責任, 又是他能力範圍的事情, 有自覺的孩子會有進步

作者: 圖書寶寶 時間: 14-6-19 11:44

回覆 Jessy 的帖子

你個仔性格咁貪玩, 如果你放左手, 我怕係斷左線的風爭, 到時成績仲一落千丈. 我家姐個仔就係咁. 家姐主張放手, 認為佢係讀書自然就會讀. 迫吾倒. 咁我都信有人做到, 但吾係個個得囉! 到最後姨甥仔入左間band 3 學校. 上到中學有幾科吾合格, 應該無得猛lu . 細路仔有啲思想比較成熟嗰批可能得, 貪玩加自理能力吾高嗰啲要看緊些. 我阿女係E 種性格, 佢小學時我跟得好足, 希望打好個底. 到小五下學期時開始識得諗, 知道要考呈分試. 叫我係咁買練習比佢做. 佢怕去到一間吾好的中學, 今年中一差不多完結. 我從未看過佢一樣功課, 佢亦都未問過我地一樣功課上的問題. 問親佢功課有無問題, 佢只會答: 得啦! 你吾駛理我啦, 我會攪掂架啦! 佢寧願問師姐. 真係好奇怪! 我成個人 "幢" 係到. 你吾問係都要問師姐們. 可能佢地有自己的解決法, 所以去到中學你想理都無得理.

作者: Seaboat 時間: 14-6-19 12:05

回覆圖書寶寶的帖子

完全同意。我都一直跟,直至5年級。大女非常獨立,中學完全放手，初初我都有些驚。如果小二放手,相信得不到今天的成績。

作者: Jessy 時間: 14-6-19 12:16

icecream1222 發表於 14-6-18 19:37
我同你的case差不到，默書測驗考試跟到足，但功課只對齊不齊，好想放手，因為孩子做野很不上心，成日發夢， ...

功課只對齊不齊, 不怕他有地方不明白嗎? 一年級數學科, 我剩係教佢睇時鐘都教左2-3星期.

作者: Jessy 時間: 14-6-19 12:18

momama 發表於 14-6-18 23:13
你跟到咁足，而家開始同佢傾計，放完暑假逐樣放，先放功課，跟住默書測驗考試。預咗會跌，但要死忍，因為小 ...

小二放都遲呀?? 一年級佢仲烏下烏下咁樣, 係呢幾個月先叫好d.....

作者: Jessy 時間: 14-6-19 12:19

edith208 發表於 14-6-19 10:04
大女二年班時, 我生阿三, 已預告他要自己管理好自己的家課, 溫習, 好高興那年的三個學期考試成績都在最高水 ...

佢算係有責任的小朋友, 可惜不自覺呢.....

作者: little_yolky 時間: 14-6-19 12:54

Jessy 發表於 14-6-19 12:18
小二放都遲呀?? 一年級佢仲烏下烏下咁樣, 係呢幾個月先叫好d.....

所以, 要自己輕鬆啲, 幼稚園就要plan定, 我揀咗一間學術麻麻, 但自理超強幼稚園俾佢, 出到嚟既小朋友都有番咁上下。(自理方面)

不過, 唔知係咪女仔會好啲, 我小一上學期初已經放手了, 佢又okay喎, 緊係唔可以名列前茅啦, 不過都中規中矩。下學期時, 我問過佢架, 阿囡駛唔駛阿媽發功? 阿媽發功你可能可以考第一喎。不過呢, 因為媽咪有幫你, 所以考到既成績要有30%計番俾媽咪, 即係你攞100分, 有30分係媽咪, 70分係你既, 好唔好呀? 佢就話媽咪唔駛喇, 我自己搞掂得喇。

其實慢慢來, 一步一步放手, 一定得既。你唔幫佢佢讀band 3, 你幫佢, 佢都可能係band 3, 但起碼唔會依賴人, 讀既全部係自己攞番嚟既。

至於話唔跟緊啲怕基礎唔好, 我既方法係, 俾好多書佢睇, 有時又陪佢睇, 依家開始爬完文, 得各前輩JM啟發, 製定咗個暑期學習大作戰, 每天有半日睇中英文書同寫作, 下半日就free time, 仲同佢玩交換日記, 啱啱同爸爸去買咗本frozen日記喇, 開心到佢呢。書目亦比較有系統。眼見一年過去, 今日啱啱派成績, 成績好理想, 所以各位媽咪, 放心慢慢放手吧。

作者: little_yolky 時間: 14-6-19 12:55

Jessy 發表於 14-6-19 12:16
功課只對齊不齊, 不怕他有地方不明白嗎? 一年級數學科, 我剩係教佢睇時鐘都教左2-3星期. ...

係, 時鐘教極都唔識, 今日派試卷, 又係錯時鐘。

我同佢講, 你要買公主手錶, 學識睇鐘先啦。

作者: 王家爸爸 時間: 14-6-19 12:55

Jessy 發表於 14-6-19 12:18
小二放都遲呀?? 一年級佢仲烏下烏下咁樣, 係呢幾個月先叫好d.....

很多男孩子小二都仲可以烏下烏下...

作者: Jessy 時間: 14-6-19 12:57

圖書寶寶發表於 14-6-19 11:44
回覆 Jessy 的帖子

你個仔性格咁貪玩, 如果你放左手, 我怕係斷左線的風爭, 到時成績仲一落千丈. 我家姐個 ...

你都講得有道理, 我同我同事講左你家姐個case, 同事叫我先放默書, 睇下佢默成點先喎.

功課方面, 其實我真係唔想check佢做齊晒未, 因為我想佢自己有責任心, 但我想睇下佢有無做錯, 從而得知佢邊方面跟本唔識, 如果發現佢做錯左, 出唔出聲教返佢?

作者: blueroselam 時間: 14-6-19 13:02 標題: 回覆：icecream1222 的帖子

我都和你一樣，好辛苦! 唔理佢，佢一定追不上

作者: Jessy 時間: 14-6-19 13:08

little_yolky 發表於 14-6-19 12:54
所以, 要自己輕鬆啲, 幼稚園就要plan定, 我揀咗一間學術麻麻, 但自理超強幼稚園俾佢, 出到嚟既小朋友都有番 ...

我囝都係讀自理強的全日制幼兒院, 佢呢方面都算係咁架喇, 係擔心讀書羅, 我都開始同佢去圖書館借d書來睇, 不過佢只借漫畫, 佢認得的字不多, 我培養左佢鍾意睇書先.

我教佢睇鐘教到我顛咁滯, 教足兩星期, 又買埋教學鐘, 晚晚係咁教, 都係攪唔清, 到學校已經開始教"星期"和"月曆", 我真係沒時間再教佢"時間"了, 咪由佢先, 放低左成個星期後再問返佢"時間", 佢突然"丁"一聲咁自己識晒, 我都R晒頭.

仲有D英文我都好驚呀, 學校既野越來越深啦, 再多幾個tenses真係連阿媽都攪唔掂架喇, 我真係想像唔到佢點分得清.

作者: Jessy 時間: 14-6-19 13:13

scyauchris 發表於 14-6-19 04:55
功課不用對齊有沒有完成，因為老師會同她們講。不過一定要睇吓他功課有乜改正，要他們一定要自己double che ...

我都打算唔對功課做齊未, 如佢漏左比人寫幾次手冊就應該會上心吧, 係真係怕佢上堂教既野唔明羅.

唉, 我叫佢double check佢實係話check左check左但其實無check架, 不過由佢比人寫下手冊啦.

作者: little_yolky 時間: 14-6-19 13:16

Jessy 發表於 14-6-19 13:08
我囝都係讀自理強的全日制幼兒院, 佢呢方面都算係咁架喇, 係擔心讀書羅, 我都開始同佢去圖書館借d書來睇, ...

一句講晒, 睇書、睇書、同埋睇書, 中文英文都係睇書, 中文唔識字又係睇書, 英文tenses多都係睇書。

如果係小一都唔認得幾多字都真係好麻煩下, 我個女唔係叻果種都睇咗大半本《一年班鮮事多了》, 要好好利用暑假了, 漫畫唔好睇咁多, 睇唔到上文下理, 句法, 同埋眼仔好衰會去咗睇公仔。小朋友鐘意媽媽陪佢一齊睇, 好似我大囡雖然自己識睇書, 我同細女講故仔時, 佢都會走埋嚟聽的。

你陪佢讀, 就係最好既閱讀習慣培養既開始了。
注：可惜我囡囡仲未 "丁" 一聲, 考試仲係錯時鐘。

作者: chymama2 時間: 14-6-19 13:23 標題: 回覆：好想二年班放手, 應如何處理

其實除咗你家長，換個位置，自己都孩子既老師，就知點樣做

作者: Jessy 時間: 14-6-19 13:26

little_yolky 發表於 14-6-19 13:16
一句講晒, 睇書、睇書、同埋睇書, 中文英文都係睇書, 中文唔識字又係睇書, 英文tenses多都係睇書。

如果係 ...

我同個囝行入去個圖書館度, 咁鬼大真係唔知點楝同借d乜, 有咩好介紹?

作者: Jessy 時間: 14-6-19 13:27

chymama2 發表於 14-6-19 13:23
其實除咗你家長，換個位置，自己都孩子既老師，就知點樣做

唔好意思, 真係完全唔明白, 可否具體一點說明?

作者: little_yolky 時間: 14-6-19 13:40

Jessy 發表於 14-6-19 13:26
我同個囝行入去個圖書館度, 咁鬼大真係唔知點楝同借d乜, 有咩好介紹?

我鐘意買書, 因為圖書館書放得好亂, 成日搵唔到。你阿仔鐘唔鐘意西遊記, 都幾好故事性, 一頁係公仔, 另一頁鬼咁多字果本。你可以讀俾佢聽, 要陪養咗佢興趣先。仲有雜誌《紅蘋果》都唔錯, 佢聽得故仔多, 有興趣會自己攞嚟睇, 因為你讀過, 佢有印象, 咁又睇下又估下, 佢自己識睇就會有成功感。我屋企仲有好多書, 好大隻仔一頁句, 圖畫好大好靚果啲, 佢哋細細個習慣行過就攞一本嚟睇, 响屋企書架多過衫, 緊有一個响左緊, 睇書好方便。

仲有, 夜晚可以講下成語故事故仔, 廿四孝等等, 仲有一套一系列講中國古文化節慶的叢書, 好有趣的。

至於英文, 都係例牌oxford reading trees, 我仲訂咗雜誌Story box, 有CD, 可以聽部份故仔, 可以聽多幾次叫仔仔練埋speaking。

作者: 圖書寶寶 時間: 14-6-19 14:25

其實我無check阿女啲功課有無做錯, 只是check 有無做齊. 但佢每次派番功課和練習(尤其數學) . 一定會睇佢錯咩野. 要佢up番出黎點解會做錯. 是否有地方不明白. 到測驗考試我出番佢做錯的題目. 如果佢再錯. 會重新教多佢一次. 睇吓佢明吾明白. 在小學時. 英文佢成日吾知點用past perfect tense. 我會比好多example佢睇. 跟住就tense 炒雜菜. 一篇文章用上好多不同tense. 睇吓佢識吾識囉! 重有我會攞其他勁學校的quiz 同 exam paper 比佢做. 做完睇吓佢的分數去到咩位置. 你仔仔小二. 可以睇吓新雅啲書. 都幾好睇. 例如, 金銀島, 鐘檈駝俠, 鐵面王子, 三十六孝, 仲有世界少年文學名著. 三劍客, 秘密花園, 小樹苗的書都好好睇, 中國神話故事, 安徒生的書都好好睇, 我自己都睇, 我細個時都無書睇. 而家睇番哂lu. 做個小圖書館比佢. 佢會好開心架, 一悶就攞書睇. 後來佢啲中文作文好好.

作者: Jessy 時間: 14-6-19 15:43

little_yolky 發表於 14-6-19 13:40
我鐘意買書, 因為圖書館書放得好亂, 成日搵唔到。你阿仔鐘唔鐘意西遊記, 都幾好故事性, 一頁係公仔, 另一頁 ...

因為我屋企好細, 所以擺唔到咁多書, 我有百零本淘寶買回來的oxford reading tree, 但中文書都係盡量借回來, 因沒地方放.

我的確好怕"讀"故事比佢聽, 我把聲比較沈, 讀得好辛苦, 好似就黎斷氣咁.

作者: wongay123123 時間: 14-6-19 15:54

回覆 little_yolky 的帖子

想問下係邊到訂Story box雜誌有CD, 幾錢呀? 有冇網址呀? 謝謝!

作者: MrBeast 時間: 14-6-19 16:13

本帖最後由 MrBeast 於 14-6-19 16:16 編輯

我都是放手初哥，大家交流下。我做法是首先放孩子做到的項目，如一些jm mentioned, chk 改正。孩子覺得難的，不放住，放左唔識做，倒不如幫下佢等佢feel better 好過，otherwise 放手變放棄就...
默書6低比佢自己溫都ok ga, 初初當玩新玩意咁，不抗拒，當然錯左的要幫佢溫返

作者: kangaroo1101 時間: 14-6-19 16:26

回覆 MrBeast 的帖子

唔好意思要借樓主呢個post多謝你..

我仔中文唔好...之前你提議每日叫佢寫一句句子..同埋陪佢睇書....呢兩樣我都做左..

咁中文都有慢慢的進步..句子結構方面都豐富左..

有時佢寫學校D野我地仲可以交流下...真係好Good呀...

作者: little_yolky 時間: 14-6-19 16:28

Jessy 發表於 14-6-19 15:43
因為我屋企好細, 所以擺唔到咁多書, 我有百零本淘寶買回來的oxford reading tree, 但中文書都係盡量借回來 ...

但係小朋友好鐘意媽咪講故仔嫁, 真係講到口水乾兼喉嚨痛嫁, 無法啦。鬼叫佢哋鐘意咩。
把聲幾難聽都唔夠張栢芝難聽吧, 對自己有信心！

作者: kangaroo1101 時間: 14-6-19 16:31

講番放手...

個仔升小二之後無耐就唔想我同佢對功課..咁所以功課方面我順勢放左手...只放剩英文...怕佢有慣性錯誤大左難改..

默書因為每星期中英各一次..太密所以唔敢放..

第二次考試都放左...結果出左事...

之後第三, 第四次都有同佢溫番考試...

個人覺得, 考試難放D..

作者: little_yolky 時間: 14-6-19 16:35

MrBeast 發表於 14-6-19 16:13
我都是放手初哥，大家交流下。我做法是首先放孩子做到的項目，如一些jm mentioned, chk 改正。孩子覺得難的 ...

我就比較狠, 一升小一就全部放手, 默書都唔理佢。佢話要讀至可以默, 我就話：我唔得閑, 你自己背咗佢啦。英文就難啲, 我都有小小幫佢, 例如有10句sentences, 就group埋意思有關連既俾佢, 又係果句：你自己背咗佢啦。有啲問題, 我就話：你自己諗辦法啦。不過, 功課唔識如佢主動問都會教佢的。

佢只會蝦爸爸, 爸爸响屋企就成日要爸爸幫佢搵嘢, 爸爸出咗差, 我就同佢講：阿囡, 你都知道媽咪搵唔到嘢啦。要佢自己搞掂。

細囡爸爸响屋企時, 就叫起身、刷牙到換衫, 都係合埋眼仔瞓緊的。但只有我响度, 就乜都自己做, 夜晚連涼都要自己沖。
所以, 我啲囡囡都係浴血火鳳凰。

作者: Jessy 時間: 14-6-19 17:46

MrBeast 發表於 14-6-19 16:13
我都是放手初哥，大家交流下。我做法是首先放孩子做到的項目，如一些jm mentioned, chk 改正。孩子覺得難的 ...

你話講鬼故o個度我自己都笑左!!!

你講得岩, 放都要放佢有信心的, 一於呢個暑假買支錄音筆, 我打算叫佢自己錄自己默, 佢好鍾意新玩意初時應該ok, 唔知可否持之而恆.

另外你提另一位jm叫佢個囝每日作一句句子, 我覺得幾好, 我都要試下呢個方法先.

作者: Jessy 時間: 14-6-19 17:49

little_yolky 發表於 14-6-19 16:28
但係小朋友好鐘意媽咪講故仔嫁, 真係講到口水乾兼喉嚨痛嫁, 無法啦。鬼叫佢哋鐘意咩。
把聲幾難聽都唔夠張 ...

我係自己讀得好鬼辛苦, 唔知點解一讀就抖唔到氣咁, 但講野我可以講好耐無問題.

我依家一星期讀一本, 就係我囡每星期五幼稚園借返來o個本羅, 讀一次兩個一齊聽.

作者: Jessy 時間: 14-6-19 17:50

little_yolky 發表於 14-6-19 16:28
但係小朋友好鐘意媽咪講故仔嫁, 真係講到口水乾兼喉嚨痛嫁, 無法啦。鬼叫佢哋鐘意咩。
把聲幾難聽都唔夠張 ...

衰鬼, 你點知我把聲就係張柏芝咁樣難聽法架!!!!

作者: Jessy 時間: 14-6-19 17:55

kangaroo1101 發表於 14-6-19 16:31
講番放手...

個仔升小二之後無耐就唔想我同佢對功課..咁所以功課方面我順勢放左手...只放剩英文...怕佢有 ...

考試梗係難放啦, 依家d卷咁鬼深, 唔係d家長預計埋最大可能出d咩難題目, 又狂操o個類野, 隨時唔合格都似羅, 如果唔係咁樣操佢去答呢d題目, 我唔覺得溫完本教科書會識羅.

作者: 王家爸爸 時間: 14-6-19 17:59

Jessy 發表於 14-6-19 17:50
衰鬼, 你點知我把聲就係張柏芝咁樣難聽法架!!!!

你唔怕呢度有張柏芝的粉絲

作者: Jessy 時間: 14-6-19 18:16

王家爸爸發表於 14-6-19 17:59
你唔怕呢度有張柏芝的粉絲

怕呀，一陣佢pm我話日日都要聽下我把聲咪死！！

張小姐都是兩子之母，相信佢講故事時都一樣咁辛苦

作者: MrBeast 時間: 14-6-19 20:32

kangaroo1101 發表於 14-6-19 16:26
回覆 MrBeast 的帖子

唔好意思要借樓主呢個post多謝你..

聽到你孩子有進步我都開心埋一份，e加d中文好鬼深，原本作句是free style, 但之前考試升班壓力下我都要要求小孩試用老師教過的句式和多用些形容詞，xx地，yy 的，又ok wor. 大家繼續加油！

作者: MrBeast 時間: 14-6-19 20:57

Jessy 發表於 14-6-19 17:46
你話講鬼故o個度我自己都笑左!!!

你講得岩, 放都要放佢有信心的, 一於呢個暑假買支錄音筆, 我打 ...

都驚你會介意ga, 好彩你冇。
每個小孩性格都不同，磨合下便找到right style 和approach. 我自己就用ipad 錄，對小孩似game 多d（當然小孩要有自制能力唔會變左打機），又可試下佢錄你默，特登錯一兩個字等佢開心下，之前有另一位爸爸分享過similar方法。

作者: 瑩瑩老豆 時間: 14-6-19 22:35

Jessy 發表於 14-6-19 12:57
你都講得有道理, 我同我同事講左你家姐個case, 同事叫我先放默書, 睇下佢默成點先喎.

功課方面, 其實我真 ...

咪唔好一下子放晒手, 我囡小一小二時跟得緊D, 怕個底唔好, 小三開始放, 到小五六只跟下考試.

作者: scyauchris 時間: 14-6-20 09:27

我女今期考試，她全部科都大跌除左英文。我今次真係勁丙她，之前叫極都唔温。希望佢小二温書態度會變，真係認真温書。我同佢講左盡左力媽媽是不會丙的，個問題是你温都唔温或者事但望兩眼！我今次終於可以丙到佢

作者: little_yolky 時間: 14-6-20 09:50

王家爸爸發表於 14-6-19 17:59
你唔怕呢度有張柏芝的粉絲

張柏芝把聲難聽, 但個樣靚丫嘛 (即刻dull番先)

作者: 王家爸爸 時間: 14-6-20 09:59

scyauchris 發表於 14-6-20 09:27
我女今期考試，她全部科都大跌除左英文。我今次真係勁丙她，之前叫極都唔温。希望佢小二温書態度會變，真 ...

我也覺得小朋友做錯事一定要勁丙，等待他們記住。但更重要的是需要讓他們知道被丙不是因為成績跌，只是因為沒有盡力做到最好。

作者: little_yolky 時間: 14-6-20 10:10

王家爸爸發表於 14-6-20 09:59
我也覺得小朋友做錯事一定要勁丙，等待他們記住。但更重要的是需要讓他們知道被丙不是因為成績跌，只是因為 ...

係, 我囡囡第二次數學測驗時, 前一晚叫極都唔早啲瞓, 第二日無精神, 得64分。我無鬧佢, 係黑咗一晚面, 佢當然知死。事後隔幾日, 當我無咁嬲時, 同佢賽後檢討, 同佢講佢咁聰明(雖然唔係事實, 但細路仔講講下就會變聰明了), 點解咁既題目都做錯, 佢話因為好眼瞓, 所以無心機做, 咁我就話：你知下次點做啦。

不過, 佢數學一向都真係差啲的, 教時間同金錢兌換真係無晒辦法。借位減數全部錯晒。細路仔, 隔一排, 佢自己就突然會通了(希望)。

作者: flower9 時間: 14-6-20 11:31

提示: 作者被禁止或刪除內容自動屏蔽

作者: bbli2006 時間: 14-6-20 23:46

MrBeast 發表於 14-6-19 20:57
都驚你會介意ga, 好彩你冇。
每個小孩性格都不同，磨合下便找到right style 和approach. 我自己就用ipad ...

想請問下怎樣用IPAD錄音呢? 我都想叫呀仔自己錄完, 自己默書, 謝謝

作者: hadwinboy 時間: 14-6-21 01:19 標題: 引用：Quote:Jessy+發表於+14-6-19+12:16+功課只

原帖由 little_yolky 於 14-06-19 發表
係, 時鐘教極都唔識, 今日派試卷, 又係錯時鐘。

我同佢講, 你要買公主手錶, 學識睇鐘先啦。

我個仔今次期考也是錯時鐘，但他看真的鐘看手表冇問題，梗係試卷上的鐘就看錯. 可能男仔要3D 4D 不喜歡2D

作者: MrBeast 時間: 14-6-21 05:46

bbli2006 發表於 14-6-20 23:46
想請問下怎樣用IPAD錄音呢? 我都想叫呀仔自己錄完, 自己默書, 謝謝

Iphone 有個voice memo app，可錄音，但ipad 冇跟，要另外download, 我用garageband , 是買iphone 時送的，其他free Apps的就麻麻地好用，不過都ok 的。

作者: rean_chau 時間: 14-6-21 17:11 標題: 引用：Quote:王家爸爸+發表於+14-6-20+09:59+我也

原帖由 little_yolky 於 14-06-20 發表
係, 我囡囡第二次數學測驗時, 前一晚叫極都唔早啲瞓, 第二日無精神, 得64分。我無鬧佢, 係黑咗一晚面, 佢當 ...

講起貨幣同時間，我個仔同你個囡一樣，講到牙血都出都仲係錯，好鬼激氣。但就係突然叮咁，有一晚識左，所以考試順利過關。比字應用題又係，教到我痴左線都仲係十下十下咁，加減分唔到，卒之最後狂操列式，做左三十幾題，終於開左腦。有時真係奈佢地唔何，等佢開hill好似等運到咁。

作者: little_yolky 時間: 14-6-23 09:42

rean_chau 發表於 14-6-21 17:11
講起貨幣同時間，我個仔同你個囡一樣，講到牙血都出都仲係錯，好鬼激氣。但就係突然叮咁，有一晚識左，所以 ...

講得好, 真係好似等運到。我忍唔住問佢到底上堂老師有無教書的, 因為見有啲JM講, 有啲數學老師真係唔教書, 靠細路自己預習, 然後上堂做下例題就落堂。但佢又話老師有教。唉！可能小一細B係差一啲, 數理邏輯唔到年紀可能真係唔明白, 我唯有咁安慰自己。

作者: kangaroo1101 時間: 14-6-23 11:27

回覆 little_yolky 的帖子

我個係小二細仔B...only追中文都追到氣咳架..佢小一時真係同一個文盲無分別..單單一個"這"字, 一課補充出現左15次佢都認唔到...第16次佢一喊我就知道自己太迫佢喇...放左手...讀多D..再慢慢等..會一路路進步架..

中文唔好亦都影響埋常識同數學文字題...不過努力係會有回報架..只係成績會好似過山車咁......進10步又退3-4步.....當為自己的心臟做多D運動啦..

小二數學最難會係時間加減...方向..同埋重量(即係比完一輪問你邊個重D果種)..你可以參考下..早作準備..

作者: little_yolky 時間: 14-6-23 12:43 標題: 引用：回覆+little_yolky+的帖子我個係小二細仔

原帖由 kangaroo1101 於 14-06-23 發表
回覆 little_yolky 的帖子

我個係小二細仔B...only追中文都追到氣咳架..佢小一時真係同一個文盲無分別..單 ...

我想死了，小二仲有時間

作者: Jessy 時間: 14-6-23 12:52

kangaroo1101 發表於 14-6-23 11:27
回覆 little_yolky 的帖子

我個係小二細仔B...only追中文都追到氣咳架..佢小一時真係同一個文盲無分別..單 ...

我囝都係勁認唔到個"這"字, 學左好多次了啦, 不過依家應該認到了, 佢仲要係大囝, 真係激死.

不過咁講我囝由初初升一年級時, 成條題目只係識3-4個字, 但現在學期尾佢成條題目讀得出來, 我已經覺得佢識多左好多字了啦, 不過點都追唔切學校的中文課程羅.

作者: Jessy 時間: 14-6-23 12:54

little_yolky 發表於 14-6-23 09:42
講得好, 真係好似等運到。我忍唔住問佢到底上堂老師有無教書的, 因為見有啲JM講, 有啲數學老師真係唔教書, ...

我囝都話有教, 不過d課程真係好急好趕, 有時一樣野教2-3天又教新野了, 舊野都未吸收晒點接收到咁多.

我呢個summer打算叫佢背定乘數表, 大家有無好方法提供? 點樣可以令佢明白左乘數係d咩先呢?

作者: yeeyeey2k 時間: 14-6-23 13:46 標題: 回覆：好想二年班放手, 應如何處理

我黎呢度偷下師先，學下點放手，我真係好想大仔獨立啲，俾多啲時間我教細佬同妹妹。個仔黎緊升小一，由K3開始已由得佢做功課，做完我只會檢查完成未，對錯由佢，老師派返黎佢自然會知自己邊度需要多啲時間去研究下。由K3下學期開始，逢星期五學校要佢哋寫一篇簡短週記，呢part真係難啲，啲字認得未必寫到，佢叫晒救命，唯有出下手啦，叫佢響讀過果啲書搵返呢啲字跟住寫，算係解決左，不過查書搵字變相浪費左好多時間，睇黎真係要學識普通話拼音黎查字典會更有效率。自理方面，自己更換衣褲鞋襪、沖涼、洗餐具、抹枱、抹地、洗底衫褲同襪等已逐步做得好好。近期開始俾張shopping list佢，叫佢自己去執貨同俾錢，當然我哋大人會響門口等佢，暫時都算做得幾好，搵唔到嘢都會問下其他人幫手。雖然離完全放手仍有一段距離，但相信逐步黎大人細路都會適應得開心啲。

作者: yeeyeey2k 時間: 14-6-23 13:50 標題: 引用：Quote:little_yolky+發表於+14-6-23+09:42+

原帖由 Jessy 於 14-06-23 發表
我囝都話有教, 不過d課程真係好急好趕, 有時一樣野教2-3天又教新野了, 舊野都未吸收晒點接收到咁多.

我呢 ...

我k3上學期每朝送佢哋返學時念下，每星期念9個，例如第一星期: 1，1如1；1，2如2……1，9如9，熟左再諗2，3，4 ，5，6，7，8，9，輕輕鬆鬆，無壓力下，佢哋當兒歌，好快記熟。

作者: yeeyeey2k 時間: 14-6-23 13:55 標題: 引用：回覆+little_yolky+的帖子我個係小二細仔

原帖由 kangaroo1101 於 14-06-23 發表
回覆 little_yolky 的帖子

我個係小二細仔B...only追中文都追到氣咳架..佢小一時真係同一個文盲無分別..單 ...

如中文基本功弱，建議媽媽借基礎漢字500同我自己會讀，我會讀呢幾套書，由最基本第一本開始睇，應好快可以追到，大家試下，因呢幾套書對我2個小朋友幾有用(次女K1，已可自行閱讀我自己會讀及我會讀系列)，誠意向大家推薦。

作者: kingkingxoxo 時間: 14-6-23 14:16 標題: 引用：你跟到咁足，而家開始同佢傾計，放完暑假逐

原帖由 momama 於 14-06-18 發表
你跟到咁足，而家開始同佢傾計，放完暑假逐樣放，先放功課，跟住默書測驗考試。預咗會跌，但要死忍，因為小 ...

係喎，我從來都唔跟貼，做功課係佢責任。

我兒子K2已經係咁

作者: Jessy 時間: 14-6-23 14:53

yeeyeey2k 發表於 14-6-23 13:46
我黎呢度偷下師先，學下點放手，我真係好想大仔獨立啲，俾多啲時間我教細佬同妹妹。個仔黎緊升小一，由K3開 ...

你個囝已經好獨立啦, 超勁!!!

作者: Jessy 時間: 14-6-23 14:54

yeeyeey2k 發表於 14-6-23 13:50
我k3上學期每朝送佢哋返學時念下，每星期念9個，例如第一星期: 1，1如1；1，2如2……1，9如9，熟左再諗2，3 ...

咁我都會分開慢慢背, 之但係我想佢明白左個concept先, 我個囝學野好慢, 要解釋到佢明呢樣至難.

作者: 魚兒小寶貝 時間: 14-6-23 14:55

請問在小學，欠交功課的話，學校會怎樣? 例如罰留堂？記缺點?

作者: Jessy 時間: 14-6-23 14:55

kingkingxoxo 發表於 14-6-23 14:16
係喎，我從來都唔跟貼，做功課係佢責任。

我兒子K2已經係咁

你地d小朋友好勁, 幼稚園的功課如果唔跟我個囝真係唔會識做羅, 連題目都唔識睇跟本連要做乜都唔知.

作者: Jessy 時間: 14-6-23 14:56

魚兒小寶貝發表於 14-6-23 14:55
請問在小學，欠交功課的話，學校會怎樣? 例如罰留堂？記缺點?

間間唔同喎, 我o個間寫手冊第日補交返就ok了.

作者: kingkingxoxo 時間: 14-6-23 15:12 標題: 引用：Quote:kingkingxoxo+發表於+14-6-23+14:16+

原帖由 Jessy 於 14-06-23 發表
你地d小朋友好勁, 幼稚園的功課如果唔跟我個囝真係唔會識做羅, 連題目都唔識睇跟本連要做乜都唔知. ...

老師一定有講點做，佢哋會有概念

作者: Jessy 時間: 14-6-23 15:16

kingkingxoxo 發表於 14-6-23 15:12
老師一定有講點做，佢哋會有概念

因為我囝上堂發夢.

作者: yeeyeey2k 時間: 14-6-23 15:49 標題: 引用：Quote:yeeyeey2k+發表於+14-6-23+13:50+我k

原帖由 Jessy 於 14-06-23 發表
咁我都會分開慢慢背, 之但係我想佢明白左個concept先, 我個囝學野好慢, 要解釋到佢明呢樣至難. ...

首先要佢哋明白倍數概念，幼稚園其實有教2，5，10既倍數，佢哋up到下，你再用啲具體例子教下，佢會明白多啲。

作者: kangaroo1101 時間: 14-6-23 15:51

回覆 Jessy 的帖子

無錯係架...追到字之後...又到理解力有問題...

但求佢地有進步就算好了...如果要追到...可能要再花多好多心力..咁大人同小朋友都會好大壓力了..

作者: kingkingxoxo 時間: 14-6-23 15:53 標題: 引用：回覆+Jessy+的帖子無錯係架...追到字之後

原帖由 kangaroo1101 於 14-06-23 發表
回覆 Jessy 的帖子

無錯係架...追到字之後...又到理解力有問題...

試下從生活中學習，帶佢去超市買餸

作者: kingkingxoxo 時間: 14-6-23 15:54 標題: 引用：回覆+Jessy+的帖子無錯係架...追到字之後

原帖由 kangaroo1101 於 14-06-23 發表
回覆 Jessy 的帖子

無錯係架...追到字之後...又到理解力有問題...

試下從生活中學習，帶佢去超市買餸

作者: kingkingxoxo 時間: 14-6-23 15:54 標題: 引用：回覆+Jessy+的帖子無錯係架...追到字之後

原帖由 kangaroo1101 於 14-06-23 發表
回覆 Jessy 的帖子

無錯係架...追到字之後...又到理解力有問題...

試下從生活中學習，帶佢去超市買餸

作者: kingkingxoxo 時間: 14-6-23 15:54 標題: 引用：回覆+Jessy+的帖子無錯係架...追到字之後

原帖由 kangaroo1101 於 14-06-23 發表
回覆 Jessy 的帖子

無錯係架...追到字之後...又到理解力有問題...

試下從生活中學習，帶佢去超市買餸

作者: kangaroo1101 時間: 14-6-23 15:56

回覆魚兒小寶貝的帖子

一間間唔同..

第一次多數寫手冊...小息去一個central地方做番

我仔果間如果一星期有5次欠交...記缺點..

作者: yeeyeey2k 時間: 14-6-23 16:06 標題: 引用：Quote:原帖由+Jessy+於+14-06-23+發表你地d

原帖由 kingkingxoxo 於 14-06-23 發表
老師一定有講點做，佢哋會有概念

冇錯，有聽書多數識做，同埋題目來來去去都係果啲字詞，睇得多會記得。或者有啲小朋友解題會有啲問題，如下次再遇上呢類問題，家長可先問下佢點做，如發現佢理解錯左，可藉住呢個機會教下佢。

作者: yeeyeey2k 時間: 14-6-23 16:09 標題: 引用：回覆+魚兒小寶貝+的帖子一間間唔同..第一

原帖由 kangaroo1101 於 14-06-23 發表
回覆魚兒小寶貝的帖子

一間間唔同..

我前上年放手俾小二既侄仔自己做，結果一個學期欠交15次…，第2個學期1次都冇，仲攞埋勤交功課獎。

作者: Jessy 時間: 14-6-23 16:19

yeeyeey2k 發表於 14-6-23 15:49
首先要佢哋明白倍數概念，幼稚園其實有教2，5，10既倍數，佢哋up到下，你再用啲具體例子教下，佢會明白多啲 ...

你囝間幼稚園程度咁深既, 我地一年級才學, 不過你都講得岩, 2同5既乘數應該易明D.

作者: Jessy 時間: 14-6-23 16:22

本帖最後由 Jessy 於 14-6-23 16:24 編輯

kangaroo1101 發表於 14-6-23 15:51
回覆 Jessy 的帖子

無錯係架...追到字之後...又到理解力有問題...

係呀, 不過我見岩岩考完試, 咪每日比一篇閱讀理解佢做羅, 同埋諗住呢個暑假同佢記返一年級中文科同常識科佢唔記得的生字, 希望我講得出做得到啦.......

我唔想逼得太緊, 係咁多算了, 其他順其自然.

呀...仲有同佢去圖書館借左D書回家睇羅, 不過佢暫時都剩係借漫畫書.

作者: yeeyeey2k 時間: 14-6-23 17:12 標題: 引用：+本帖最後由+Jessy+於+14-6-23+16:24+編輯+

原帖由 Jessy 於 14-06-23 發表
本帖最後由 Jessy 於 14-6-23 16:24 編輯

試下引導佢睇啲短篇故事，漫畫類書籍對學習文法同文章結構方面冇咩好處。或者試下適當引入獎勵計劃，例如每完成幾多篇/本就可以得到獎勵，可獎去公園/沙灘等地方玩，如佢鍾意實物，獎佢鍾意既禮物，記住要限定幾多錢。我小朋友既獎勵係實物，阿仔當日完成5本書，獎一個印仔，10本書就2個印仔，達唔到獎勵既數量就冇印仔，儲齊10個印仔可自行選購$100內禮物一份，20個就$200內禮物，如此類推，希望藉此教到小朋友儲蓄同努力睇書。至於睇邊啲書，由我去挑選，我會盡量揀佢會有興趣既中英文書籍。

作者: kangaroo1101 時間: 14-6-23 17:14

回覆 Jessy 的帖子

之前有JM提過我...個仔認字有困難其實睇書太多字唔識會好有錯敗感..

所以我依家揀書都揀得好小心架..

之前買左"屁屁超人"系列..男仔好多都like..不過我自己覺得個仔都係投入唔到..

依家佢反面睇緊"小樹苗"的"依"索寓言...可能係字少D..圖畫多D..又投入到少少..

之前比佢睇喜羊羊...不過依家慢慢介緊...希望佢理解力好D..

仲為左唔好比佢依賴我讀書佢聽..依家睇書時間係佢睇一本, 我睇一本咁..每日半小時...希望浸到D成績啦..

作者: yeeyeey2k 時間: 14-6-23 17:19 標題: 引用：回覆+Jessy+的帖子之前有JM提過我...個仔

原帖由 kangaroo1101 於 14-06-23 發表
回覆 Jessy 的帖子

之前有JM提過我...個仔認字有困難其實睇書太多字唔識會好有錯敗感..

屁屁超人係講咩ga？單本定套裝書？

作者: kangaroo1101 時間: 14-6-23 17:31 標題: 回覆：yeeyeey2k 的帖子

套書

圖片附件: myphoto.jpg (14-6-23 17:31, 96.68 KB) / 下載次數 37
/forum.php?mod=attachment&aid=MjUzMDV8YzQwYmIwZDN8MTc3MTY1MTEyM3ww

作者: rean_chau 時間: 14-6-23 20:05 標題: 引用：Quote:kangaroo1101+發表於+14-6-23+11:27+

原帖由 Jessy 於 14-06-23 發表
我囝都係勁認唔到個"這"字, 學左好多次了啦, 不過依家應該認到了, 佢仲要係大囝, 真係激死.

不過咁講我 ...

我個仔都有過呢個階段，真係好沮喪。我自己就用左半年時間去搞認字。由每晚集中認三四個字到後來佢自己識認部首偏旁。到考試前個零月開始可以自行閱讀每頁有兩三行既圖書，去到考試有九成字識。
我參考左呢度一個媽媽既方法，就係每日讀課本，作業，工作紙至少十五分鐘，初初佢都投訴讀到口乾，但慣左就得。其實朗讀好重要，特別係對語文基礎唔好既小朋友，眼睇口讀耳聽，幾方面訓練。

作者: Jessy 時間: 14-6-23 21:55

yeeyeey2k 發表於 14-6-23 17:12
試下引導佢睇啲短篇故事，漫畫類書籍對學習文法同文章結構方面冇咩好處。或者試下適當引入獎勵計劃，例如每 ...

因為認識的字不多所以睇唔到短篇，佢沒興趣，漫畫書是剛開始睇咋，對文章結構係沒幫助，不過書內的字都是白話文不是口語，口語一定不會比佢睇，佢有時都會來問下我d字點讀。
你囝一日睇五本書好厲害

作者: Jessy 時間: 14-6-23 21:55

本帖最後由 Jessy 於 14-6-23 21:58 編輯

作者: Jessy 時間: 14-6-23 22:01

kangaroo1101 發表於 14-6-23 17:14
回覆 Jessy 的帖子

之前有JM提過我...個仔認字有困難其實睇書太多字唔識會好有錯敗感..

屁屁超人內文的字有幾深？睇個封面好似幾攪笑，260元有幾多本？

作者: Jessy 時間: 14-6-23 22:07

rean_chau 發表於 14-6-23 20:05
我個仔都有過呢個階段，真係好沮喪。我自己就用左半年時間去搞認字。由每晚集中認三四個字到後來佢自己識認 ...

我都覺得讀出聲的幫助很大，但我就唔係晚晚讀，假期或考試前一次過讀。
二年級我地將會更少時間，我囝要學樂器，到時又要練

作者: yeeyeey2k 時間: 14-6-23 22:16 標題: 引用：Quote:rean_chau+發表於+14-6-23+20:05+我

原帖由 Jessy 於 14-06-23 發表
我都覺得讀出聲的幫助很大，但我就唔係晚晚讀，假期或考試前一次過讀。
二年級我地將會更少時間，我囝要學 ...

我都要求仔讀出聲，起碼我要肯定佢識讀果啲字。其實小朋友為左獎品真係可以好努力，睇得最多書果日，佢共睇左12本ort stage 8同4本奇先生妙小姐，因佢欠3個印仔先可以買到禮物，咁啱間舖響酒樓隔離，佢食飯前後把握時間狂讀。

作者: rean_chau 時間: 14-6-24 01:07 標題: 引用：Quote:原帖由+Jessy+於+14-06-23+發表我都

原帖由 yeeyeey2k 於 14-06-23 發表
我都要求仔讀出聲，起碼我要肯定佢識讀果啲字。其實小朋友為左獎品真係可以好努力，睇得最多書果日，佢共睇 ...

一樣啦，考完試大家都無動力温書，但又想keep住佢睇書，所以買左一份佢好想要既lego, 儲到一百張貼紙先可以開，其實佢配合到每日中英圖書各一本加習作，好快就攞到。明顯見到佢好努力爭取，順便要佢背埋乘數表，佢背得甘心情願，我又輕鬆啲。

作者: yeeyeey2k 時間: 14-6-24 07:19 標題: 引用：Quote:原帖由+yeeyeey2k+於+14-06-23+發表

原帖由 rean_chau 於 14-06-24 發表
一樣啦，考完試大家都無動力温書，但又想keep住佢睇書，所以買左一份佢好想要既lego, 儲到一百張貼紙先可以 ...

小朋友真係好天真，尤其是佢成功得到份禮物會好開心講俾大家知份禮物係靠佢自己既努力得返黎，佢哋好有成功感同好自豪。

作者: momama 時間: 14-6-24 07:37 標題: 回覆：好想二年班放手, 應如何處理

作為一個鍾意睇書嘅人，如阿媽要我讀出聲，我會好反感。

作者: MrBeast 時間: 14-6-24 08:13

momama 發表於 14-6-24 07:37
作為一個鍾意睇書嘅人，如阿媽要我讀出聲，我會好反感。

Agree, 我end up 都是用了聰明仔爸的做法，和希望培養閱讀為hobby。不過小孩需要引導一下to get them a kick start都無可厚非

作者: Jessy 時間: 14-6-24 10:31

momama 發表於 14-6-24 07:37
作為一個鍾意睇書嘅人，如阿媽要我讀出聲，我會好反感。

我是講"讀中文書和常識書"的課文, 圖書沒有要求讀出聲.

作者: rean_chau 時間: 14-6-24 11:27

momama 發表於 14-6-24 07:37
作為一個鍾意睇書嘅人，如阿媽要我讀出聲，我會好反感。

如果佢可以自行閱讀, 唔讀出聲無問題,但係伴讀過渡自行閱讀呢個階段, 我會要求佢讀出聲. 讀完目標(中英各一本), 佢可以自己睇,我唔理佢睇圖定睇字.

作者: little_yolky 時間: 14-6-24 15:08

yeeyeey2k 發表於 14-6-23 13:55
如中文基本功弱，建議媽媽借基礎漢字500同我自己會讀，我會讀呢幾套書，由最基本第一本開始睇，應好快可以 ...

噚晚同阿細讀其中一本《分果果》, 佢讀咗10次都唔識「芒果」, 張圖又衰, 個芒果唔知點解要油綠色, 佢成日讀「木瓜」, 差啲心臟病發, 佢就話：媽咪, 我無食過芒果, 咪唔識讀囉。真係激死。

作者: MASAYA 時間: 14-6-24 16:04

little_yolky 發表於 14-6-24 15:08
噚晚同阿細讀其中一本《分果果》, 佢讀咗10次都唔識「芒果」, 張圖又衰, 個芒果唔知點解要油綠色, 佢成日讀 ...

佢唔係唔識讀芒果，係好清楚張圖唔係芒果

作者: little_yolky 時間: 14-6-24 16:05

MASAYA 發表於 14-6-24 16:04
佢唔係唔識讀芒果，係好清楚張圖唔係芒果

好, 今晚買個芒果佢食先。

作者: yeeyeey2k 時間: 14-6-25 01:36 標題: 引用：作為一個鍾意睇書嘅人，如阿媽要我讀出聲，

原帖由 momama 於 14-06-24 發表
作為一個鍾意睇書嘅人，如阿媽要我讀出聲，我會好反感。

我仔剛幼稚園畢業，如佢能力範圍內自己完成到而又唔多生字，我容許佢唔讀聲。不過可能佢已慣讀出聲，所以凡有對白果啲，更加讀得起勁，最近朋友借左套英文版伊索寓言，比較簡淺，全對白形式，仔好鍾意，讀得更加大聲，興起時仲拉住要我同佢玩角色扮演，兩母子演演下有時笑到肚痛

作者: yeeyeey2k 時間: 14-6-25 01:39 標題: 引用：Quote:yeeyeey2k+發表於+14-6-23+13:55+如

原帖由 little_yolky 於 14-06-24 發表
噚晚同阿細讀其中一本《分果果》, 佢讀咗10次都唔識「芒果」, 張圖又衰, 個芒果唔知點解要油綠色, 佢成日讀 ...

我次女又係咁固執，啲圖同字唔多夾，佢叫我印一張啱既落去

作者: little_yolky 時間: 14-6-25 09:27

yeeyeey2k 發表於 14-6-25 01:39
我次女又係咁固執，啲圖同字唔多夾，佢叫我印一張啱既落去

噚晚放工買咗個芒果俾佢食, 佢好開心(因為濕熱, 所以從來無俾佢食過)。然後, 食完再囉本書出嚟, 問佢個字點讀, 佢即刻話：芒果, mango

原來, 無益嘢都真係起碼要食一次。

作者: MASAYA 時間: 14-6-25 13:16

本帖最後由 MASAYA 於 14-6-25 13:16 編輯

little_yolky 發表於 14-6-25 09:27
噚晚放工買咗個芒果俾佢食, 佢好開心(因為濕熱, 所以從來無俾佢食過)。然後, 食完再囉本書出嚟, 問佢個字點 ...

係呀，汽水呢d冇益野，你畀支難飲既佢飲，以後都唔會話要飲呀

作者: little_yolky 時間: 14-6-25 13:37

MASAYA 發表於 14-6-25 13:16
係呀，汽水呢d冇益野，你畀支難飲既佢飲，以後都唔會話要飲呀

邊度有難飲既汽水丫　

佢最鐘意飲可樂, 因為啲氣好勁, 飲一啖, 對眼會標眼水, 佢覺得好得意, 成日叫我睇下佢對眼仔。

歡迎光臨教育王國 (/)