教育王國

標題: 正式返PN第一日，就俾老師投訴 [打印本頁]

作者: novelle 時間: 13-9-6 15:37 標題: 正式返PN第一日，就俾老師投訴

囝囝8月返預備班時，老師仲讚佢乖，肯排隊，又主動答問題。昨天正式開學，老師話佢非常曳，包括︰
1. 去洗手時玩水
2. 排隊經過另一間課室，偷看仲想行入去
3. 拉檯，由課室頭拉到課室尾

開始一聽完老師講有啲唔開心，諗應該點教阿囝好，唔想佢成為破壞王。但諗諗下，其實以上行為是否算「非常曳」，因為老師講到幾誇張。

當然我已經教阿囝要聽老師話，但另一方面我又諗，什麼類型的學校適合他，因即將考K1。有冇JM有類似問題，可以分享？謝謝！

作者: twllc 時間: 13-9-6 15:59 標題: 回覆：正式返PN第一日，就俾老師投訴

我兩個仔只試過1，仲係k1果陣tim，但老師都唔會用“曳”黎形容…

作者: 咪臣 時間: 13-9-6 16:06

novelle 發表於 13-9-6 15:37
囝囝8月返預備班時，老師仲讚佢乖，肯排隊，又主動答問題。昨天正式開學，老師話佢非常曳，包括︰
1. 去洗 ...

我阿囝經常都是被老師投訴, 經過一年PN生活已經改善很多, 我相信我們家長就算如何努力也沒用, 子女是要別人去教, 所以老師實在有責任去調教子女, 不應只埋怨/投訴家長, 教不到是老師能力不足, 我們送子女入學就是要他們學習群體生活及規矩, 至於什麼規矩才是達標真是應人而議~

作者: markuskwok 時間: 13-9-6 16:43

我個仔都返緊ＰＮ。。都有做1. 去洗手時玩水　＆ 3. 拉檯，由課室頭拉到課室尾。。。。但ＳＯ　ＦＡＲ老師只係用活躍來形容。。。

作者: Maggiebbchan 時間: 13-9-6 16:43 標題: 回覆：正式返PN第一日，就俾老師投訴

小朋友鍾意玩水、拉枱有何問題？
有創意！

作者: 歐文 時間: 13-9-6 17:13

我就調轉，學校沒有投訴我，是我想問下學校。因為仔仔從前在家不會爬枱及推枱，但返左學半個月之後就開始有，我和老公都懷疑是從同學的行為學回來的，我想問下老師，但又驚老師覺得我怪佢!其實如果真係有小朋友在課室爬上枱上面甚至站起來，是否代表老師的課室管理技巧有問題? pn開學半個月有這些行為是否算正常?

作者: linggo 時間: 13-9-6 17:21

2歲人仔...呢d係小朋友既天性....老師, 家長..一個在校, 一個在家, 小朋友長大, 教教下...就會識得禮貌......要時間架...

# 由BB學抬頭, 轉身, 爬, 企, 行...都係階段...

作者: novelle 時間: 13-9-6 17:35

咪臣發表於 13-9-6 16:06
我阿囝經常都是被老師投訴, 經過一年PN生活已經改善很多, 我相信我們家長就算如何努力也沒用, 子女是要別人 ...

多謝大家分享！小朋友第一次返學，真係好多嘢要學，希望佢遲啲有改善。

作者: maomaofifi 時間: 13-9-6 17:49

novelle 發表於 13-9-6 15:37
囝囝8月返預備班時，老師仲讚佢乖，肯排隊，又主動答問題。昨天正式開學，老師話佢非常曳，包括︰
1. 去洗 ...

我唔會覺得呢D叫曳囉...你間學校係好傳統既學校?

作者: novelle 時間: 13-9-6 18:10

回復 maomaofifi 的帖子

唔算係傳統學校呀，如果要分應該係happy school 類型。
其實如果傳統學校，老師惡啲，阿囝可能唔敢玩，因佢受硬唔受軟，鬧佢仲當你同佢玩...

作者: sai_sai 時間: 13-9-7 00:20 標題: 回覆：正式返PN第一日，就俾老師投訴

小朋友有這些行為好正常。

重點係…在家/父母面前巿冇咁做？
可能老師覺得小朋友在家有咁嘅行為，而大人無阻止教導，所以喺學校同樣咁做。
因而向家長反映。

想改善以上行為，可試吓……
1.每天沖涼時俾佢玩一陣水。
2. 屋企任何地方都可以俾小朋友進入觀察，唔好長期將房門關上。
3. 開飯時，俾小朋友自己搬枱櫈幫手開飯。從而教導……搬枱櫈係要有需要時才做。

作者: Jessy 時間: 13-9-8 14:26

我囝在學校試過1, 但老師已解決左個問題, 亦教了我囝唔可以咁做, 老師只係同我講返件事, 但唔會向我投訴羅.

作者: cymchris 時間: 13-9-8 19:42 標題: 引用：Quote:novelle+發表於+13-9-6+15:37+囝囝8

原帖由咪臣於 13-09-06 發表
我阿囝經常都是被老師投訴, 經過一年PN生活已經改善很多, 我相信我們家長就算如何努力也沒用, 子女是要別人 ...

你錯了，老師唔會有什麼責任和什麼能力去教我地D仔女!係家長要教好自己的仔女去符合學校的標準和要求。若做不到，只會得一個結果，你的仔女唔適合讀這間學校，勸你退學。

作者: DollyCC 時間: 13-9-8 21:01 標題: 回覆：cymchris 的帖子

我覺得無問題，慢慢會改善，成舊飯坐係度你仲驚

作者: sochi81 時間: 13-9-8 23:06

慢慢教。小朋友仲細，要時間學，一生出黎就好教又聽話係好彩。要教好正常。加油

作者: may273815238 時間: 13-9-9 00:05 標題: 回覆：正式返PN第一日，就俾老師投訴

岩翻pn時，我囡囡都有甘既情況，老師只係話距好奇

作者: Jessy 時間: 13-9-9 09:21

BABY_HEBE 你說得很對, 我當時回家後都有同小朋友講唔可以玩水, 佢之後沒再發生過, 老師教得好, 家長又配合就最好!!

作者: macmate 時間: 13-9-9 09:32 標題: 引用：Quote:novelle+發表於+13-9-6+15:37+囝囝8

原帖由咪臣於 13-09-06 發表
我阿囝經常都是被老師投訴, 經過一年PN生活已經改善很多, 我相信我們家長就算如何努力也沒用, 子女是要別人 ...

我唔同意教好小朋友係老師嘅責任。子女係自己嘅，自己都唔教好點可指意其他人教？！但我亦了解有時小朋友係聽外人說話，如老師話乜，小朋友又會識得quote番老師嘅說話。始終家校合作就最好啦！所以同學校理念一致好緊要

作者: novelle 時間: 13-9-9 13:46

Jessy 發表於 13-9-9 09:21
BABY_HEBE 你說得很對, 我當時回家後都有同小朋友講唔可以玩水, 佢之後沒再發生過, 老師教得好, 家長又配合 ...

我都同意家校要合作！

作者: novelle 時間: 13-9-9 13:58

回復 sochi81 的帖子

我都覺得要時間教，畢竟返學共只有三星期。
不過老師已經罰佢企，但似乎阿囝唔知什麼是罰...

作者: Jessy 時間: 13-9-9 17:22

novelle 發表於 13-9-9 13:58
回復 sochi81 的帖子

我都覺得要時間教，畢竟返學共只有三星期。

其實最好罰無得去大肌肉室玩, 咁就會好乖的了.

作者: cheungandrew 時間: 13-9-12 00:45

我仔1歲開始在家1，3任他玩。2歲PN時他不玩了。

作者: lulub612 時間: 13-9-12 08:21 標題: 引用：Quote:novelle+發表於+13-9-6+15:37+囝囝8

原帖由咪臣於 13-09-06 發表
我阿囝經常都是被老師投訴, 經過一年PN生活已經改善很多, 我相信我們家長就算如何努力也沒用, 子女是要別人 ...

好贊同你講既野！

作者: csiusin 時間: 13-9-12 09:09

回復 novelle 的帖子

NOVELLE
唔洗擔心, 我仔上年讀N班老師一星期打黎幾次..我唔知佢係咪投訴啦, 但次次打黎都係講亞仔係學校玩水, 攬同學呀, 就連熱情D都要話, 開頭真係唔開心, 一來佢岩岩開始返學, 自己已經擔心, 同埋都想知佢返學既情況, 但接親電話都係講佢點點點, 我亦不停同身邊既屋企人, 朋友傾, 因為佢地都有仔女, 所以可以聽下人地既意見, 其實好多小朋友岩岩返學都會有咁既情況一來佢地初試群體生活同好多同令小朋友玩一定會開心興奮, 如果老師都投訴根本有時係間學校問題, 再諗, 有些無愛心既老師, 心諗, 打份工梗係做少D好啦, 如果小朋友活躍佢地會多左野做, 其實而家好多老師都會咁, 因為好多岩岩做老師既其實愛心唔係真係有架..所以千其唔好唔開心, 係屋企同亞仔傾下計同佢講係學校要聽老師話, 同埋佢返多一排就會好好多.會定好多架,唔洗擔心呀~

作者: j947 時間: 13-9-12 09:39 標題: 回覆：正式返PN第一日，就俾老師投訴

反而老師打比我我唔會覺得投訴，轉個角度諗，可以比機會我知仔仔有咩做唔好，因為有時佢係唔會係我面前做，仔仔唔怕羞，活躍型。我明白學校家庭教好重要，亦好彩老師有愛心，相反老師唔打比我我仲驚，唔代表小朋友乖，而係老師放棄左佢。
放鬆d啦，當老師指出問題，都係想學校同家長一齊教，咁先有用架。

作者: torunpoland 時間: 13-9-12 09:42 標題: 回覆：咪臣的帖子

對不起，恕我未能認同「子女是要別人教的」觀點。孩子是自己的，尤其幼兒小童，品德行為價值全由父母灌輸教育，老師可以幫忙協助，但責不在校。上到小學中學，仍然是父母為主導，只是知識傳授的責任，大部分交予老師，因為相處時間又增多，孩子也可從老師及同學學好及學壞。教小朋友永遠是父母之責任，萬萬推卸不得。

作者: bonbon1220 時間: 13-9-12 11:53

對 ! 同埋唔好以為老師係萬能 , 佢一堂要照顧咁多學生 , 一定唔會只注專一兩個學生 , 家長一定要配合

作者: novelle 時間: 13-9-12 18:10

今日老師打電話黎，話阿仔冇玩水同拉檯喇。不過老師講咗句︰「佢唔啱我話佢，佢仲係度笑。我知佢係一個開心的小朋友，但唔應該笑架，係咪？」

我唔知點答....

作者: happy.rita 時間: 13-9-12 20:18 標題: 回覆：正式返PN第一日，就俾老師投訴

可能有小朋友天生好易教、聽話，但好多易教、聽話嘅小朋友背後其實家長花咗好多心血。

我從無鬧過或打過我個小朋友，由出世到而家二歲多，唔理佢聽唔聽得明，淨係同佢講道理。佢提出嘅要求，我好少say No，但會是有條件下俾佢做，同時解釋原因，所以好似玩水、推枱等「小玩意」，如樓上jm嘅經驗，一歲多時已玩夠。

情緒一直穩定，而家返PN，從無哭鬧或攻擊其他小朋友，老師覺得佢好獨立、好教，連啲嬸嬸都話我「咁好彩」個小朋友咁叻咁乖，但我真係想講邊有「咁好彩」。我係ftm，但每年都同老公二個去兩、三次幾日的旅行，小朋友就在婆婆家住，每次返嚟都發覺小朋友脾氣大咗、惡咗，之前的好習慣、好行為都會喺短短幾日變成另外一啲壞習慣，可能因為公公婆婆過份遷就、保護（乜都 say no)。

老師教得好個小朋友係家長「好彩」，但家長可以做到的其實好多，只係時間、耐性和方法嘅問題。

作者: beagoodman 時間: 13-9-12 21:56 標題: 回覆：正式返PN第一日，就俾老師投訴

你要清楚自己個仔有無做嗰d行為，有的話，你應該教佢而唔係質疑老師。
至嗰個話自己仔女要別人教，實在怪獸典範！

作者: macmate 時間: 13-9-12 23:27

novelle 發表於 13-9-12 18:10
今日老師打電話黎，話阿仔冇玩水同拉檯喇。不過老師講咗句︰「佢唔啱我話佢，佢仲係度笑。我知佢係一個開心 ...

其實我覺得老師在暗示你返到屋企要教你仔正確嘅觀念，首先係對與錯要點樣

作者: yokeeland 時間: 13-9-13 09:57

得兩歲人仔，未知呢D叫唔守規矩，畀D耐性，佢地見到其他小朋友都坐定定，會慢慢改善，期待他的進步！

作者: meia 時間: 13-9-13 11:25

婉轉的說法, 是好動, 活潑, 有創意

直接的說法, 是不守規矩

我們送孩子上學, 為的是什麼?

其中一項, 應是為了培養孩子成為一個良好的世界公民

會守法, 尊重別人, 為他人設想

如果小朋友可以隨時隨地隨心去做一些他們想做的事

我們為何要送他們上學?

當然, N班是2歲的小人兒

可以慢慢來

讓他們知道right place, right time, right manner 是很重要的

作者: 陳皮爸媽 時間: 13-9-13 18:16 標題: 引用：囝囝8月返預備班時，老師仲讚佢乖，肯排隊

原帖由 novelle 於 13-09-06 發表
囝囝8月返預備班時，老師仲讚佢乖，肯排隊，又主動答問題。昨天正式開學，老師話佢非常曳，包括︰
1. 去洗 ...

好的幼稚園是盡量不會話小孩曳的、是充滿開心同快樂，小孩不是曳就乖架啦，一定有方法教的，佢咁多投訴，不如轉校啦

作者: siufung 時間: 13-9-14 01:18 標題: 引用：Quote:原帖由+novelle+於+13-09-06+發表囝

原帖由 陳皮爸媽 於 13-09-13 發表
好的幼稚園是盡量不會話小孩曳的、是充滿開心同快樂，小孩不是曳就乖架啦，一定有方法教的，佢咁多投訴，不 ...

話小朋友“曳“太負面，但可能只是老師表達不佳，他們希望家長配合，改善一些不當行爲...我覺得可以觀察一下..雖然對pn生來說實在嚴格了一點...我小朋友PN時有次我進校園，有個女生扭得好勁，其他同學在圍圈玩耍。者師叫哭的小朋友站一邊由她哭，一路讓她看著大夥開心的玩，經過那女生時老師笑著跟她說:“不要再哭了，過來一齊玩啦！好開心㗎！“每次轉圈到她身邊也邀請她一次，又叫其他同學勸她不要再哭快來玩。未幾女生真停哭加入大家玩了！我覺得這樣處理小朋友鬧情緒很有效且盡顯愛心耐性！

作者: bb媽0米 時間: 13-9-18 12:38

咪臣發表於 13-9-6 16:06
我阿囝經常都是被老師投訴, 經過一年PN生活已經改善很多, 我相信我們家長就算如何努力也沒用, 子女是要別人 ...

嘩乜原來依家D家長咁諗野架??家長點努力都冇用,小朋友係要俾人教,教唔好就係老師問題.怪獸家長0既邏輯思維,佩服!!

仔女係自己生出黎0既,你自己都唔肯出力去教好佢,仲搵EXCUSE將責任推俾老師,講真,學校老師對得佢幾多時間幾多年??仔女都有畢業0既一日,咁到時又邊個幫你教好佢???不斷將教子女的責任推俾人,你覺得這是做家長應有的心態嗎??即係你0既責任就係負責生,教就唔關你事,如果個個家長都咁諗,香港教育淪陷了!!

另外,教不好係老師能力不足,咁教得好呢??你會唔會同人講我個囝乖係全靠老師教,我冇功勞架,你地去讚老師啦咁呢??

唔好再俾藉口自己啦,教好小朋友係要家校合作,兩方面都要出力,小朋友係自己0既,連自己都唔肯花時間花心機花精神去教好佢,教得唔好自己係最大責任,唔關其他人事架!!

講真,如果諗住生出黎自己冇責任或者冇信心去教0既WO,不如唔好生囉......無謂令呢個社會再多個怪獸家長同港孩麻!!

作者: siufung 時間: 13-9-19 03:19 標題: 回覆：正式返PN第一日，就俾老師投訴

我估呢，那位家長話“小朋友要人教“意思大概是想表達-仔女一般當父母耳邊風，但對老師又言聽計從、馴服百倍....如果一心旨意學校教，做父母咩都唔做就太難以接受了！三字經也有所謂“養不教、父之過；教不嚴、師之惰“，自古以來教養孩子，父母的責任都一定行先過老師啦！

作者: chiwiz 時間: 13-9-19 11:14

其實我睇過d關於小朋友成長既書, 小朋友有喜歡跑動、explore、推拉物件係正常不過既行為, 係體內小肌大肌既發展中訊息, 如果變成學生不當行為問題地處理, 甚至向家長投訢, 我認為(只是個人立場, 不喜勿插), 其實該位老師或許要多看書, 了解多些關於兒童發展會好d! 否則對小孩過份的抑壓, 可能會有反效果呢!返學先一個月唔夠, 家校都有責任, 應合作慢慢教, 家長唔好俾自己太大壓力! 一個得個幾歲既小孩, 你想佢點呢? 都係想佢快快樂樂吧!

作者: matthewconnielo 時間: 13-9-19 15:58

我個囝都係讀緊N 班,

英語及國語老師對佢評語係..... 好動

校長先叻, 話佢...... 有少少頑皮...

其實我真係無唔開心, 反而同幾位老師/校長溝通,

作為家長嘅我, 應該點樣同學校配合一齊教導呢位小朋友.

到目前為止, 學校對囝囝評價已由好動 (少少頑皮) 改為投入,

同埋., 太聰明.........太有主見. (唔係曬POST)

所以, 幾位老師都表示需要好好配合如何教導呢位小朋友!

可能, 你囝囝嘅老師係用詞上比較直接, 會令你有難受感覺.

學校只係一個扶助佢嘅地方, 最大嘅力量係來自家庭教育啊!

各位媽媽們, 努力, 加油啊!

歡迎光臨教育王國 (/)