教育王國

標題: 中文找補習/練習心得 [打印本頁]

作者: anna525 時間: 13-7-24 21:59 標題: 中文找補習/練習心得

本帖最後由 anna525 於 13-7-25 12:03 編輯

太多家長PM我了，我一次過回覆。為方便大家閱讀，我打口語。
1) 邊本練習適合孩子?
每個孩子程度不同，不能一概而論，亦唔想賣廣告，大家可以問返小朋友學校老師，一個負責任的老師會知你小朋友的需要。我的原則﹕一個唔識畫畫的人，畫一百次幅畫都係醜架，所以做練習的用途有限，中學唔同小學，係考你思考能力、分析能力，舉一反三能力，唔練好基本功根本唔會有進步。最重要係小朋友知道自己點解錯，點去改。

2) 補習社介紹
我唔識各區補習社，亦唔鼓勵自己學生去補習社，十居其九都係無用。每個學生水平唔同，問題唔同，一堆人一齊補習，只對幾種人有用。一係很聰明，領悟力高，但唔識考試技巧。二係很自律、很有上進心，識自己分析個問題問返老師。三係純粹搵人教做功課或托兒。
一般補習社點請人? 去勞工處出廣告或貼街招，請中六畢業、大學生補，呢種補習社同托兒所無分別。
咁有冇好的補習社呢? 有，但唔係我話俾你知，而係搵你小朋友同校的家長收風，去學校討論區或幫到你。

找補習社﹕注意師資(唔係考得好就教得好)、注意班內人數(超過五個人已經太多)、注意班內同學水平(BAND1同BAND3一齊補，一定係托兒所)，注意口碑。唔好信廣告、唔好貪方便。

中學生找私補﹕
1) 目的係搵人教小朋友做功課﹕一般高中、大學生
2) 小朋友科科唔得，科科都要補﹕一般高中、大學生
3) 想提升個別科目程度，但俾唔到太高學費﹕找個對口學系的大學二年級或以上學生補習，如果你住三大大學區附近，你會有好多選擇。(去學校網頁登免費廣告，大把你揀)
PS﹕除了找教普通話/英文口語外，千萬不要找內地/外地生，要找考本地試入U的學生。
4) 一定要試堂，看看老師的表達能力、識見、態度、方法是否適合你的孩子。

3) 我個小朋友升中一，做咩練習好?
中學中文同小學中文完全唔同，每間學校的取向不一樣，有些考課文、有些不考課文、有些有得讀，有些無得讀，所以我介紹唔到練習俾大家。各位好媽媽，等小朋友升上中學後，睇清楚學校的中文課程教咩，先買練習啦，唔好操之過急。
PS﹕一、不過，一般考返課文的學校學生較勤力，因為學生上課會聽書。
二、中學中文好難攞高分，七十幾分已經好叻架啦，唔好用小學分數的眼光看中學分數。
三、相信我，你小朋友見到自己成績差而要求補習，效果俾你迫佢好一百倍。

作者: anna525 時間: 13-7-25 12:04

請各位家長PM前參考此帖，謝謝。

作者: cc_2012 時間: 13-7-25 12:29

回復 anna525 的帖子

中肯及非常好的建議,已被我列入精讀之內

作者: Betty媽咪 時間: 13-7-26 08:57 標題: 回覆：anna525 的帖子

謝謝分享。我剛 pm 左你。(因pm 了才發現此帖。)但是若想針對文言文解讀，有冇邊本參考書好用？先謝謝你意見！

作者: kinling 時間: 13-7-26 23:21 標題: 回覆：中文找補習/練習心得

多謝你的文章！

作者: Feimum 時間: 13-8-1 22:04

回復 anna525 的帖子

謝分享，很用心分析。

作者: vincher 時間: 13-8-3 06:20

很好的分享！实用！

作者: pooh仔 時間: 13-8-3 11:15 標題: 回覆：中文找補習/練習心得

作者: 嵐嵐21 時間: 13-8-28 22:53

多謝分享

歡迎光臨教育王國 (/)