教育王國

標題: 下星期去政府評估, 有啲野想問問 [打印本頁]

作者: fishcowcow 時間: 13-1-2 15:33 標題: 下星期去政府評估, 有啲野想問問

估唔到咁快排到, 9月尾排, 下星期二做評估, 不過我以為要排好耐, 所以11月頭巳去協康做自閉評估, 個時心理醫生話佢有啲points唔中佢個表, 所以評左唔係自閉, 不過我仍然覺得囝囝行為有啲古怪的, 想問下如果我向政府係排"自閉評估", 如果到時唔係自閉, 係其他野(例如發展遲緩, 言語遲緩等...), 醫生會唔會講? 可唔可以排服務? 定係做"自閉評估", 就淨係會評"自閉"或"唔係自閉"?

作者: cat1028 時間: 13-1-3 00:31

係全面評估，包括大小肌肉，我囝有驗耳。

作者: maggie38 時間: 13-1-3 09:56

政府cac係全面評估，咩都會check,
但係好似評估結果唔入殘障個list,係冇殘障金拎，
但服務都會有！唔好期望太高！政府服務就係一個字(等)

作者: jjcow 時間: 13-1-3 11:59

fishcowcow 發表於 13-1-2 15:33
估唔到咁快排到, 9月尾排, 下星期二做評估, 不過我以為要排好耐, 所以11月頭巳去協康做自閉評估, 個時心理 ...

其實我唔係想嚇你，但真係我親身經歷。

你第一次去 CAC 見姑娘時應該填咗疊問卷。可能醫生根據你填嘅野，睇到啲野，所以咁早叫你返去。
我個陣都係等咗唔夠三個月就見醫生。我仲以為有人取消有位攝，點知醫生話係睇番姑娘嘅評語同你答份問卷嘅野嚟排期，唔係先到先得。

咁政府嘅服務又唔係淨係俾自閉嘅。如果小朋友發展上有遲緩，都會俾服務。

作者: Stone媽媽 時間: 13-1-3 12:47

回復 fishcowcow 的帖子

各位好呀~~
我下星期囝囝都係去做評估, 想問醫生係會即時test曬小朋友既問題 e.g. 語言/發展/心理/專注/自閉/聽力/大小肌肉/過度活躍/智力....., 定係只test 一d就評估到係咩問題然後即時排服務/學位? 醫生會唔會講明唔評估d咩叫我自己出去評? (因為如果醫生唔包評估智力/心理, 我想盡快搵私人機構做評估)

謝謝!

作者: fishcowcow 時間: 13-1-3 12:53

我都有諗過係睇嚴重情況而排快期, 但係姑娘未見過我個囝的, 因為而家第一次去排淨係家長去填問卷, 唔駛帶小朋友去, 唔通係睇左份問卷覺得問題嚴重?

作者: jjcow 時間: 13-1-3 13:12

本帖最後由 jjcow 於 13-1-3 13:25 編輯

fishcowcow 發表於 13-1-3 12:53
我都有諗過係睇嚴重情況而排快期, 但係姑娘未見過我個囝的, 因為而家第一次去排淨係家長去填問卷, 唔駛帶小 ...

你係邊間 CAC？照計第一次見係見姑娘 + 填問卷。我記得份問卷好大疊，好多，填咗我成個鐘呀！
不過我是兩年前做的評估了。聽聞越嚟越多小朋友需要評估，可能方式又改了。

作者: fishcowcow 時間: 13-1-3 16:29

我係中九龍, 我都有問第一次唔係要帶小朋友見姑娘? 佢答我而家改左, skip左小朋友見姑娘呢part, 淨係我上去cac度填問卷, 份問卷都有好多題, 主要係問小朋友有無某啲表現/情況, 要圈經常/間中/從不...

作者: fishcowcow 時間: 13-1-3 16:30

jjcow, 恕我多口問句, 你都算快排左三個月左右就見醫生, 咁最後評估結果係?

作者: jjcow 時間: 13-1-3 17:09 標題: 引用：jjcow,+恕我多口問句,+你都算快排左三個月

原帖由 fishcowcow 於 13-01-03 發表
jjcow, 恕我多口問句, 你都算快排左三個月左右就見醫生, 咁最後評估結果係?

唉，咪就係自閉囉，嚟得呢個forum，都無咩第二樣。見姑娘前我仔開始有單字，當時佢都未夠兩歲，我仲一心諗住最多同我講係發展遲緩

作者: Vichang 時間: 13-1-3 20:40 標題: 回覆：fishcowcow 的帖子

我11月尾都做左問卷，不過我都有帶囝去見姑娘。

請問您小朋友幾大？

作者: fandd 時間: 13-1-3 21:37

回復 fishcowcow 的帖子

其實你去過協康，心理學家應該有提及你囝囝在邊方面是較需關注的，right？如果你已知囝囝的問題，而自己又負擔得起，就應盡快向私人訓練中心求助，唔好等政府啦！因為等政府既要排長龍，即使等到有質素亦未必好。加上2-3歲是治療黄金期，要同囝囝爭取時間呀！

作者: fishcowcow 時間: 13-1-3 22:19

Vichang, 我囝而家2歲5個月

作者: fishcowcow 時間: 13-1-3 22:24

jjcow, 咁可否知道醫生話你囝囝有咩最主要既徵狀, 令佢被評為自閉?
因為我囝眼神係有的, 而家就黎2歲半都有短句, 有手指指, 但係就有古怪行為囉, 例如細個時會自轉, 喜歡轉既東西, 喜歡關門...

作者: fishcowcow 時間: 13-1-3 22:30

fandd,
協康評我囝唔係自閉, 心理醫生只係話唔夠足夠徵狀評佢自閉/自傾, 佢話佢都覺得我囝有啲古怪/固執行為, 但佢覺得呢啲可能係我囝性格, 所以基本上佢suggest唔到我上咩training, 我而家只係向協康報左社交playgroup

作者: jjcow 時間: 13-1-3 22:50 標題: 引用：jjcow,+咁可否知道醫生話你囝囝有咩最主要

原帖由 fishcowcow 於 13-01-03 發表
jjcow, 咁可否知道醫生話你囝囝有咩最主要既徵狀, 令佢被評為自閉?
因為我囝眼神係有的, 而家就黎2歲半都有 ...

一來，我仔發展的確係遲緩咗，二來，醫生問我：你有有發覺評估呢兩個鐘，你個仔無搵過你地？(我們沒有分開，係同一間房內)。醫生仲指出咗一樣好中嘅野，佢問我：你係咪覺得咁耐以嚟，你一直唔能夠同個仔好親密？聽到呢度，我真係喊咗出嚟。其實我一直都覺得同個仔好似無咗母子間嘅聯繫，無人提出，我就呃自己無野。到正式由醫生把口講出嚟，我知我唔可以再否認

作者: fandd 時間: 13-1-3 23:13

回復 fishcowcow 的帖子

如果依你所說，嗰位心理醫生既做法真是值得商確。心理醫生為小朋友作自閉症評估，通常會使用一些評估工具。按評估後的結果，即使「話唔夠足夠徵狀評佢自閉/自傾」，都應能分辨出小朋友存在的問題，然後給予些改善建議。

此外，縱觀不同個案，有被評為嚴重自閉的小朋友，經數年觀察及訓練後，最後發展至與同年小朋友無異。相反，有被評為輕度自閉/自傾的小朋友，幾年後發現原來情況是較嚴重。因此，建議你不要著意問題的程度(嚴重或輕度)，盡快找出囝囝的問題，及早給予治療。如有疑問，不妨再帶囝囝到其他私人作評估。

P.S. 即使到CAC評估，你也要有心理準備，那處的醫護人員也大都不會給予你一個「明確」的程度。

作者: Vichang 時間: 13-1-3 23:22 標題: 回覆：fandd 的帖子

Agree your last sentence... 我去左CAC 見姑娘，佢4都唔肯講佢對我囝囝睇法。不過我心裏有數law.

作者: Vichang 時間: 13-1-3 23:25 標題: 回覆：fishcowcow 的帖子

我下星期去私人心理評估，囝囝19.5 mths...協康話太細唔肯同我囝做。

我囝而家咩都唔講，又唔識手指指，仲中意玩關門.....唉。

作者: jjcow 時間: 13-1-3 23:42

fandd 發表於 13-1-3 23:13
回復 fishcowcow 的帖子

如果依你所說，嗰位心理醫生既做法真是值得商確。心理醫生為小朋友作自閉症評估， ...

係呀，個陣醫生同我講，自閉就係自閉，無分，因為小兒兩歲未夠，佢話２～３歲變化可以好大。叫我接受現實，盡早排服務同裝備好自己。

作者: fandd 時間: 13-1-3 23:49

回復 Vichang 的帖子

我囝囝兩歲前同你囝囝的行為相似……但請放心！盡快去做訓練吧！如果情況不是太嚴重，定有明顯既改善。

作者: llam1210 時間: 13-1-3 23:50 標題: 回覆：下星期去政府評估, 有啲野想問問

我想問佢地幾耐打電話比你話下星期二評估？我十月中去cac中九龍見姑娘的。當時填完問卷個姑娘話要排到四月，但佢又話不過呢d case可能會一月有位就打比我。唔通我填完form佢覺得我女有問題比我地打尖？唉，好擔心！要評估兩個鐘？佢地同私人的評估會唔會大同小異？

作者: fandd 時間: 13-1-3 23:55

一定無私人中心咁詳細!
如果想CAC講多就D,就要主動問喇!

作者: fishcowcow 時間: 13-1-4 00:02

llam1210,
中九龍係2號打俾我, 叫我8號去的, 個時姑娘無話快期慢期, 佢淨係話要等半年左右, 我填完問卷就叫我走, 佢都無詳細睇份問卷, 所以姑娘都無講啲咩

作者: Vichang 時間: 13-1-4 00:04 標題: 引用：回復+Vichang+的帖子我囝囝兩歲前同你囝

原帖由 fandd 於 13-01-03 發表
回復 Vichang 的帖子

我囝囝兩歲前同你囝囝的行為相似……但請放心！盡快去做訓練吧！如果情況不是太嚴重 ...

謝謝你啊，其實而家囝囝成日變，我自己好乖好積極面對! 下星期要大拿拿比一舊$見心理學家，要做成2.5 小時呢！

以你囝經驗，佢最初先上個別訓練先嗎？

作者: fishcowcow 時間: 13-1-4 00:07

fandd,
我個次去協康個女醫生都幾年青的, 可能比較紙上談兵卦? 佢就係攞住韋氏個表一路睇一路tick, 佢話個表一定要每個part都中起碼2 items先會評為自閉, 所以無評我囝係自閉, 佢覺得我囝鍾意轉野/關門個啲係興趣, 佢話每個小朋友都有唔同興趣喎, 同埋我囝對醫生有互動, 眼神, 佢話唔似佢之前見到其他自閉既小朋友情況

作者: fishcowcow 時間: 13-1-4 00:09

我今次去中九龍唔至兩個鐘呀, 係四個鐘, 因為佢幫我book左物理治療師及兒科醫生, 各要見2hrs, 即係total 4hrs

作者: jjcow 時間: 13-1-4 00:10

llam1210 發表於 13-1-3 23:50
我想問佢地幾耐打電話比你話下星期二評估？我十月中去cac中九龍見姑娘的。當時填完問卷個姑娘話要排到四月 ...

我係做足兩個鐘呀，如果加埋醫生安慰我嘅時間，咁就兩個幾鐘。
其實我好感恩可以係政府遇到個好醫生。佢俾我感覺好有經驗，我見佢嘻嘻哈哈咁氹我仔做野，原來當中佢一路睇咗好多野。

可惜到我最近再見醫生，得知佢已出咗去私家醫院做喇。

作者: jjcow 時間: 13-1-4 00:13

fishcowcow 發表於 13-1-4 00:07
fandd,
我個次去協康個女醫生都幾年青的, 可能比較紙上談兵卦? 佢就係攞住韋氏個表一路睇一路tick, 佢話個 ...

興趣？你要睇下呢種興趣維持幾耐喎？如果係持續嘅，我唔認為呢啲係正常興趣囉。

作者: jjcow 時間: 13-1-4 00:14

fishcowcow 發表於 13-1-4 00:09
我今次去中九龍唔至兩個鐘呀, 係四個鐘, 因為佢幫我book左物理治療師及兒科醫生, 各要見2hrs, 即係total 4h ...

咁依家真係好密集同快手，我個陣係先見完兒科，斷咗症，再由醫生決定另外安排 OT / ST 評估，再另外做聽力 test。

作者: fishcowcow 時間: 13-1-4 00:44

佢呢啲興趣會維持一段時間, 例如佢以前鍾意睇salon出面條轉轉, 隔左排就無睇; 自轉又係玩左一輪, 近排巳好少轉; 玩眼又玩左一排, 而家無玩; 呢排就係鍾意關門囉, 所以希望下星期去cac都能夠遇到好醫生, 希望聽多啲專家意見

作者: twobirds 時間: 13-1-4 10:04

我個仔2years 返健康院, 我主動同姑娘講, 仔應該係自閉, 21個月時己有私家醫生做評估懷疑自閉, 我要求見醫生, 姑娘唔俾, 好冷淡咁話你既己評估及訓練, 就唔駛再見醫生, 見完醫生都係都呢d訓練.
我又偒心又激氣, 我話真唔識判斷亞仔而加的發展進度, 以及需要針對那些方面加強訓練, 好怕行錯路, 哂時間.... 最後先肯俾我約期, 仲要等2個月才能見健康院醫生. 哎.....
這段時間, 我報左好多唔同的訓練課程, 有小組密集, 有個別訓練, 有言語治療, 一時覺得亞仔有進步, 一時又覺得某方面有問題, 好多疑問. 個人心理都好大壓力. 希望如你地咁, 係cac都能夠遇到個好醫生, 聽多d專家意見

作者: jjcow 時間: 13-1-4 10:32

twobirds 發表於 13-1-4 10:04
我個仔2years 返健康院, 我主動同姑娘講, 仔應該係自閉, 21個月時己有私家醫生做評估懷疑自閉, 我要求見醫 ...

唔駛等健康院醫生，你叫兒科寫紙你自己直接去 CAC 約期。
我當日係繞過健康院的。我仔歲半乜 test 都唔 past，仲話我好同其他BB比較。又話叫我兩歲再睇情況點。好在我個兒科醒啫。

作者: jjcow 時間: 13-1-4 10:33

twobirds 發表於 13-1-4 10:04
我個仔2years 返健康院, 我主動同姑娘講, 仔應該係自閉, 21個月時己有私家醫生做評估懷疑自閉, 我要求見醫 ...

不過你做定訓練都啱架喇，去CAC 主要係為咗排服務啫。

作者: fandd 時間: 13-1-4 12:54

回復 Vichang 的帖子

「一舊$」？係咪打錯字呢?

不過你真係要有心理準備，係協助小朋友既過程中，呢度比D，嗰度又比D，真要有D倒水咁倒既感覺……但只要理性咁「應使則使」，有效咁幫到囝囝，使幾多都係值得既！

由於每位小朋友既情況都唔同，由哪類訓練模式開始也不相同，建議你多與訓練導師或心理醫生保持聯絡，以了解囝囝最急切既需要！

作者: fandd 時間: 13-1-4 13:03

雖然知道呢度有好多父母希望子女可以遇到好既醫護人員(CAC)及導師(訓練中心)，但理性D諗，佢哋每日要照顧超多既小朋友，點可以維持有好既質素……希望大家都預先有心理準備!

作者: fandd 時間: 13-1-4 13:10

我亦唔會怪佢哋！要怪既就怪政府，歷年喺特殊教育方面所投放既資源實在係嚴重不足，令好多小朋友未能喺「醫治黃金期」獲得有效治療，影響日後發展。

作者: wilyun 時間: 13-1-4 15:45

回復 fishcowcow 的帖子

我個仔係自傾, 但因為果陣醫生話佢仲細, 所以評佢都係發展遲緩. 佢當時幫我排左兼收位~

作者: wilyun 時間: 13-1-4 15:54

回復 jjcow 的帖子

但我個仔係要去到兒童精神科, DR先評估話佢自傾, 佢又話佢唔係嚴重, 我個仔果次評估入到房係周圍攪野, 但反而個DR話係我個仔係因為去到新環境唔適應而有呢個行為... 其實我心諗, 咁入到一間新房間, 要有乜野反應先叫做正常? 如果個小朋友就咁坐定定, 望住DR, 咁先叫做正常嗎? 其實我覺得我地有得REFERRAL去見DR, 佢地係咪都當左一定有問題, (我一直都無否應過我個仔唔係A仔架!!) 但就唔好好似好求其咁, 評估左唔夠十分鐘就話佢係囉... 我個仔兩歲, 我覺得鐘意襟野都好正常啫...好似我地大人咁, 我見到有D掣都鐘意襟下喇~

不過咁, 如果唔係兒童精神科DR寫左佢係自傾, 我都無得排埋政府醫院的服務, 而且在我心中, 我個仔係咪A仔都好, 我都係一樣會咁愛佢同照顧佢! ^^

作者: wilyun 時間: 13-1-4 16:00

回復 jjcow 的帖子

我都係呀, 但我歲半果陣堅持健康院DR寫紙我排CAC, 因我一直都覺得個仔係有D問題架喇~ 所以我好早已經有晒心理準備, QUIT左份工, 幫佢報定D小組訓練等, 同埋做埋針灸~ 哈哈! 現在兩歲兩個月, 基本上除左講野唔得之外, 佢都肯聽下人講野, 同埋開始樂於與人溝通! 我覺得呢D真係越細發覺越好, 起碼早D開始訓練, 個效果好好多架~

作者: yauman76 時間: 13-1-4 16:54

fishcowcow 發表於 13-1-4 00:44
佢呢啲興趣會維持一段時間, 例如佢以前鍾意睇salon出面條轉轉, 隔左排就無睇; 自轉又係玩左一輪, 近排巳好 ...

我個A囝同你個囝嘅"興趣"差唔多, 又係玩一排會唔玩, 但係冇玩一排之後又突然玩返.

作者: jjcow 時間: 13-1-5 01:25

本帖最後由 jjcow 於 13-1-5 02:19 編輯

fandd 發表於 13-1-4 13:03
雖然知道呢度有好多父母希望子女可以遇到好既醫護人員(CAC)及導師(訓練中心)，但理性D諗，佢哋每日要照顧超 ...

係呀，政府裡面好的醫護人員真係買少見少。
前年我好快咁排到那打素 OT，一開始俾個一級治療師我。個姑娘好好架，好專業，好有辦法，又好細心。

初時都維持到兩星期一次，仲可以跟番呢個姑娘，點知唔夠兩個月開始變一個月一次，之後變個半月一次，仲變咗係二級治療師跟

不過我都好俾心機帶阿仔去，一來想俾阿仔有多啲訓練，二來，年輕治療師都要儲經驗架。不過希望呢啲治療師他朝有日出去，唔會返轉頭以專業人士身份，自己狂踩政府服務啦。要呻嘅都等我地自己家長呻，唔該顧下我地無乜能力做咁多私人訓練嘅家長感受... 哎呀，隻船撐遠咗添

歡迎光臨教育王國 (/)