教育王國

標題: [討論] 讀邊間幼稚園同升小學的關係.... [打印本頁]

作者: spmok1999    時間: 12-6-21 15:04     標題: [討論] 讀邊間幼稚園同升小學的關係....

本帖最後由 spmok1999 於 12-6-21 15:24 編輯

在 EK 間唔中就會睇到有D人會問 "你小朋友讀邊間幼稚園?", 尤其係考到直資/私立的名小學以及能派到名官津小學的, 你話如果係考到直資/私立的名小學就話可能同讀邊間幼稚園有關, 但能派到名官津小學的似乎跟讀邊間幼稚園係冇咩關係的...是否能派到名官津小學主要係靠運氣及選校策略, 唔好講話讀屋邨幼稚園, 甚至唔讀幼稚園都可以參加統一派位呢個講求運氣的大抽獎遊戲, 今次我並唔係想討論"選校策略", 因為之前已有提題及過... http://www.edu-kingdom.com/forum.php?mod=viewthread&tid=2403522...今次我想討論o既係 "讀邊間幼稚園同升小學的關係", 先講考到直資/私立的名小學, 因為除了靠運氣之外還需要講求實力及面試的表現, 比你讀名幼又如何, 面試時冇反應怕羞唔出聲咪一樣得個桔...問題就在這裡, EK 常討論乜乜名幼有幾多個小朋友派到男拔/女拔, 冇錯單睇數字考到幾多個位確實唔算少, 但實際上有幾多失敗考唔到o既數字又有幾多呢? 就某九龍塘名幼為例, 一級收有好多人, 到考小一時差不多九成以上o既小朋友都會考直資/私小, 咁咁多人去考就梗係會有一定數量的小朋友能考到名小,若按比例計可能就唔算多呢! 考唔到名小的反而佔大部份, 俗語有話:結婚唔係包生仔, 所以話就算讀名幼唔擔保能考到名小,但不知為何仍然有很多人在不太了解實際的情況下盲目追求名幼, 與其讀名幼倒不如搬去名校網大抽獎搏抽到名官津小學還實際...又講下統一派位, 有D家長好開心咁上o黎EK報喜話派到第一志願, 又話中o左甲一跨區乙一咁呀… 又有好多家長恭喜佢地, 咁當然有人歡喜有人愁, 繼而叩門帖紛紛出籠… 另外有D家長又會問 (可能係統計?): 你小朋友讀邊間幼稚園o架? 咁..開心o既家長當然好樂意回覆你: 讀某某幼稚園o羅, 的人睇睇埋埋表面上就覺得讀某某幼稚園好大機會派到某某名官津小學, 之前都講過統一派位係唔關讀邊間幼稚園事,係跟你報的住址在該區抽的, 某幼稚園多數派某間小學其實係家長們的選校排序有關,咁第二間幼稚園少家長揀某間小學就梗係派得少啦! 咁並唔代表該幼稚園派位同呢間o個間幼稚園比冇咁好, 另…若不是住本區就算你讀九龍塘名幼亦只能在甲部跨區去抽很少量的學位,機會只得一次, 但住本區的話便有機會抽兩次(甲部及乙部), 所以話讀名幼倒不如搬去心宜學校的區住抽中機會還要大很多…另外又有人用讀邊間邊幼稚園去比較, 又話呢幼稚園程度高D, 第時考其小一容易D, 冇錯係考對直資/私小有D幫助, 但問題係咪靠晒幼稚園就可以坐定粒六升上名小呢? 但可能家長本身同小朋友o既付出仲多過幼稚園好多好多, 但如果係一心諗住小一派位話知你讀國際幼稚園定係沙頭角幼稚園都係跟住址派o架啦!若果有阿哥家姐讀緊官津名小的話直頭幼稚園唔讀都仲可以, 因為在自行分配學位階段已經係必收生… 

*以上純屬個人意見,不喜勿插!



作者: lyhv    時間: 12-6-21 15:12

本帖最後由 lyhv 於 12-6-21 15:13 編輯

同意, 尤其是話唔係靠晒名幼稚園就可以坐定粒六升上名小, 家長本身同小朋友o既付出都好重要!  

題外話, 樓主我知你打依篇野嘅辛苦同苦心, 但我覺得啲字比較多同密, 建議可否分段, 咁睇落會舒服D, thank you!
作者: winnietingting    時間: 12-6-21 15:26     標題: 引用:+本帖最後由+lyhv+於+12-6-21+15:13+編輯+\

原帖由 lyhv 於 12-06-21 發表
本帖最後由 lyhv 於 12-6-21 15:13 編輯

同意, 尤其是話唔係靠晒名幼稚園就可以坐定粒六升上名小, 家長 ...
我聽老師講sc/kv叩門有著數。唔知係咪呢?




作者: mymarigold    時間: 12-6-21 15:49

本帖最後由 mymarigold 於 12-6-21 15:50 編輯

幼稚園派位同讀邊間幼稚園係無咩關係~~~

不過第一輪計分, 如果幾個學生相同分數, 有學校會拎去比教育局抽籤, 有學校會自己抽籤, 但亦有學校會睇學生來自邊間幼稚園(交表時要寫明讀邊間幼稚園)而揀出o黎...

另外, 如果叩門, 即使小朋友當日表現未夠好, 某 d 幼稚園會依然係著數 d , 雖然好似唔合常理 (正常都揀個表現好 d), 不過有學校真係咁樣睇...



作者: winnietingting    時間: 12-6-21 15:54     標題: 引用:+本帖最後由+mymarigold+於+12-6-21+15:50+

原帖由 mymarigold 於 12-06-21 發表
本帖最後由 mymarigold 於 12-6-21 15:50 編輯

幼稚園派位同讀邊間幼稚園係無咩關係~~~
「不過第一輪計分, 如果幾個學生相同分數, 有學校會拎去比教育局抽籤, 有學校會自己抽籤, 但亦有學校會睇學生來自邊間幼稚園(交表時要寫明讀邊間幼稚園)而揀出o黎...」

唔係碼?!咁唔公平。好驚喎




作者: marcuscyrus    時間: 12-6-21 16:01

不過所謂名幼,一般課程比較全面d,或者能提供良好語言環境,為孩子學習打好基礎,免卻一部份適應小一的問題
當然呢d 家長都可以自己做到,但我比較傾向由學校代勞

作者: silvia_ng    時間: 12-6-21 16:06

認同! 每間名幼總有人考得好, 有人考唔好。家長應該反問自己點解人地得而自己唔得, 而唔好期望入左呢間幼稚園, 就一定入到名幼。自己都要努力呀!

至於大抽獎話某某名幼會抽得靚d...真係笑大人個口....

正如去士丹利街買六合彩係咪中硬先? 又或者個number真係靚d先?!
作者: lyhv    時間: 12-6-21 16:12

silvia_ng 發表於 12-6-21 16:06
認同! 每間名幼總有人考得好, 有人考唔好。家長應該反問自己點解人地得而自己唔得, 而唔好期望入左呢間幼稚 ...
士丹利街喺斜路, 人地話風水好呀, 買六合彩 ~~你今日買左未~~

作者: iluvchun    時間: 12-6-21 16:22

如果只係講官小/津小, 理論上幼稚園與升小係冇關係
但事實上係如果你在你提供給小學既資料上係有小朋友所就讀既幼稚園, 呢一項已經足以成為考慮因素之一
唔係話名校一定好, 等於在一般人心目中, 都會覺得名牌產品quality有保證
作者: sukitelfold    時間: 12-6-21 16:37     標題: 引用:不過所謂名幼,一般課程比較全面d,或者能

原帖由 marcuscyrus 於 12-06-21 發表
不過所謂名幼,一般課程比較全面d,或者能提供良好語言環境,為孩子學習打好基礎,免卻一部份適應小一的問 ...
同意,語言環境名幼好D,但也要睇返學車程時間,小女也是在學卷邨校讀,但落樓兩分鐘就返到學,慳返D錢同時間搵咗英、普老師上門補,同埋可以上多兩樣興趣班,最後亞囡嗰班只有四人報直資/私小,四個都有入咗目標直資/私小,計比率100%成功率,好過好多名幼,比我再揀我都會揀返呢條路。(但相對難行D)




作者: sandy1234    時間: 12-6-21 16:57

完全同意! 我覺得現在大部分香港的家長,有能力負擔的也會送小朋友入名幼, 唔入好似會”輸在起跑點”, 讀屋村幼稚園已被標籤為”無希望”的一群.
我就曾被一個自稱教育顧問的, 問做 ‘mud’ 比個女讀屋企附近的幼稚園, 幼稚園是傳統的屋村幼稚園, 課程不深, 跟足教育局要求, K1 不用寫字, 老師好有愛心, 個女都讀得好開心. 無其他名幼咁谷, 當然就無識咁多字啦, 但我覺得ok, 上小一都會教, 駛唔駛什麼都要學早一步?
現在個個都要入名校, 由幼稚園開始, 入唔到名幼=入唔到名小=入唔到好中學=入唔到大學加無出息 (雖然誇張少少), 連鎖反應, 究竟我們活在一個什麼世界?

作者: lyhv    時間: 12-6-21 17:04

其實名幼都未必一定係會早谷小朋友!  
作者: 小曳人    時間: 12-6-21 20:43

本帖最後由 小曳人 於 12-6-21 20:48 編輯

上次我話名KG入名小無特別優越,佢地成績好係應份,因為學校收生時已經揀過d叻仔叻女,講到底都係靠面試表現
即刻俾人圍呀...


其實人各有志,你鍾意嘅嘢~我唔覺得啱我,都唔駛插人架~
可能我水平唔夠

作者: sukitelfold    時間: 12-6-21 21:28     標題: 回覆:小曳人 的帖子

其實名幼都有優勢,無論老師及家長對小朋友都有要求,老師之間因要維持入名小之數字,家長之間的目標一致,在兩方面良性競爭下,小朋友的狀態必逹高峯去面試名小,勝負取決在小朋友的資質及名小鐘意那類的學生而矣。




作者: baekdoosan    時間: 12-6-21 21:29

有錢人選擇較多, 有更多資源栽培小朋友, 可以負擔學費較貴學校, 有了私校backup, 便可較進取地填表抽獎, 理論上抽中心儀學校機會, 較基層學生為高.
作者: sukitelfold    時間: 12-6-21 21:39     標題: 回覆:baekdoosan 的帖子

申利:我係無錢人,只不過係將D資源左撥右調,鎖定一間私校後亦無參加抽獎,亦見不得有私校backup嘅朋友抽獎抽到好嘅津/官小學。




作者: Charlotte_mom    時間: 12-6-21 21:50

其實d家長又有無唸過, 有d幼稚園o係收生時已經計算埋小朋友"成材"機會? 寶x就係其中俵俵者, 校長都明言, 2歲細路有咩好in, 睇下家長成就已經可以project到家長將來點努力栽培(所以佢收既學生, 家長唔係黎自名流世家, 就係家長出自某某名校, 又或者家長係年輕才俊), 有咁既父母家底, 入名校, 有幾難?
我小朋友細個都in過d所謂名幼稚園, 明明係星期日, 家姐哥哥著埋名校校服去陪in, 為咩, 心照啦!
所以當家長覺得某某幼稚園可以入名校時, 有無唸過, 小朋友憑咩入去? 有幾多入聖xx係完全百無丫, 我認幾多舊生家長, 早幾年已經搭路搵定d校咩校咩食飯, 都仲驚唔入呀(上咩班讀咩幼稚園, 自然更加一早預備啦)

當然, 唔可以排除, 有d幼稚園校長真係外交手腕一流, 就憑佢本事可以"保送"畢業生入某d小學, 俗語有云: 識人好過識字, 呢d又的確值得一個"勁"字
作者: marcuscyrus    時間: 12-6-21 22:49

本帖最後由 marcuscyrus 於 12-6-21 22:53 編輯

spmok1999  咁要睇下自己點先覺得係全面o羅! 要足夠應付小一面試? 或是能教到小朋友有良好唔格便足夠? 又或是學校對小朋友照顧夠全面?  

我又反而會比較希望有能力應付小一課程,我感覺孩子要適應新環境之余,如果學習上同幼稚園相差太遠(例如幼稚園時期唔駛點做功課,一上小一就一大堆),好似一時之間有太多野要兼顧咁,做到呢樣野,唔一定要較得特別深,我覺得適量o既功課都可以做到呢點,咁有朋友可能會話,咁選一d 唔谷o既小學就得啦,唔..我個人都是比較保守,偏向傳統較學先,呢d全部都係自家感覺

我家細佬考幼稚園時,我只係考英普班的(共4間),當中包括屋企樓下o個間,諗住考唔到哥哥o個間,讀樓下o既英普班都ok,點知......樓下英普仲貴
另外,我覺得名幼>名小,參考價值唔太高,正如樓主講當大家著眼於幾多人入到某名小,但又有冇人留意到當中全軍覆沒都大有人在?


作者: spmok1999    時間: 12-6-21 23:01

本帖最後由 spmok1999 於 12-6-21 23:02 編輯
marcuscyrus 發表於 12-6-21 22:49
spmok1999  咁要睇下自己點先覺得係全面o羅! 要足夠應付小一面試? 或是能教到小朋友有良好唔格便足夠? 又或 ...

sorry! 我打錯字, 係 "品格"...
我阿女雖然係讀有學劵o已幼稚園, 工課我相信應該算少, 但係每日返到屋企都會另外比練習佢做, 亦都要讀下書串下生字, 我相信讀任何一間幼稚園始終都係唔足夠o既, 因為在學校始終學到o既o野都係覺得唔夠, 所以讀有學劵o既幼稚園都唔係話可以乜都放鬆晒...




作者: marcuscyrus    時間: 12-6-21 23:07

本帖最後由 marcuscyrus 於 12-6-21 23:09 編輯
spmok1999 發表於 12-6-21 23:01
sorry! 我打錯字, 係 "品格"...
我阿女雖然係讀有學劵o已幼稚園, 工課我相信應該算少, 但係每日返到屋企都 ...

我的做法有少少不同我兩個仔,功課算多,所以做好功課就唔會有規定的額外學術野做,我唔需要佢地做最top o個d,所以平時見佢地做功課handle 到,我理解為佢地已掌握,然後都係到評估先溫習啦
哥哥(現k3)d時間大多用在練樂器
細佬(現k1)d時間大多用在畫畫,間唔中佢問起就教佢少少數
哥哥考小一結果一半半,但ok啦,o岩佢讀始終我覺得考小學都只是其中一步,成個人的成長/知識才是重點
有時諗,如果我d細路根本都冇咁o既料子,因為學校/父母o既包裝而比佢有機會入左"名校",到頭來讀唔上咪又係攞苦黎辛

作者: spmok1999    時間: 12-6-21 23:57

本帖最後由 spmok1999 於 12-6-22 00:34 編輯
marcuscyrus 發表於 12-6-21 23:07
我的做法有少少不同我兩個仔,功課算多,所以做好功課就唔會有規定的額外學術野做,我唔需要佢地做最top o ...

認同, 我都唔想阿女要最 top, 但起碼上小一都唔洗追得咁辛苦, 有時d學習係可以用遊戲形式來進行, 如果真係一味靠死記死背我阿女實抗拒, 唯有自已想下辦法睇下點啟發下佢啦! 我就覺得讀書叻唔叻主要係靠天份, 小朋友始終都仲有好多可能性, 我阿女性格比較懶散, 要軟硬兼施先至叫得佢郁, 有時都會對佢發脾氣, 但事後又會覺得對佢唔住, 比咁大壓力佢, 其實做家長有邊個唔對自己小朋友好o丫! 只不過呢個世界越來越難生存, 唔到自己唔緊張...

作者: marcuscyrus    時間: 12-6-22 00:04

spmok1999 發表於 12-6-21 23:57
認同, 我都唔想阿女要最 top, 但起碼上小一都唔洗追得咁辛苦, 有時d學習係可以用遊戲形式來進行, 如果真係 ...

一起加油!
我兩個性格完全不同,好在大o個個係努力不懈型,細佬雖然天性係練精學懶,但跟住哥哥總算唔衰得去邊


作者: marcuscyrus    時間: 12-6-22 00:12

因應你個topic我又想講多少少^_^
認識一部份家長,從孩子一出世就已經有哂讀邊間學校的目標
其實我唔太明白,孩子仲係一舊飯團,你又點知佢一定得/一定o岩?

作者: tsangnamnam    時間: 12-6-22 00:21

如果信kg嘅"名氣"好大作用,唉。。。真係會後悔架。
今年見到朋友女兒"名幼"出身,但都幾唔好彩,kg個名,幫唔到佢幾多。
不過朋友就話, 讀哩間kg嗰三年,女女好開心,已經足夠。
作者: wing    時間: 12-6-22 03:24

去到叩門階段, 由學校/校長話事收生, 我相信讀咩KG有唔多唔小既影響既

我女叩咗6間, 有最小3間係鐘意收某兩間名KG既學生. 你去考試/interview, 小朋友既表現或者筆試既成績, 永遠都唔會知, 只靠小朋友講番出黎, 好難知考得好定唔好. 但偌若大家同分, 我覺得人地一定會睇KG名先.
作者: 786    時間: 12-6-22 06:51     標題: 回覆:[討論] 讀邊間幼稚園同升小學的關係....

事實上,學校間的確有「交怡」關係:
九龍塘迦南->九龍塘官小
九龍城迦南、九龍城裡的幼稚園->新舊華德
基華幼稚園->基華九龍塘
協恩幼稚園->協恩、女拔
天主教的幼稚園->天主教的小學
聖公會的幼稚園->聖公會的小學




作者: 小曳人    時間: 12-6-22 07:04

marcuscyrus 發表於 12-6-22 00:12
因應你個topic我又想講多少少^_^
認識一部份家長,從孩子一出世就已經有哂讀邊間學校的目標
其實我唔太明白 ...
其實諗定無問題,但要睇佢之後會唔會執生!如果家長無好好觀察個小朋友而做adjustment,咁就...

作者: CrabPincers    時間: 12-6-22 08:02

Charlotte_mom 發表於 12-6-21 21:50
其實d家長又有無唸過, 有d幼稚園o係收生時已經計算埋小朋友"成材"機會? 寶x就係其中俵俵者, 校長都明言, 2 ...
你講跑馬地果間?
作者: Charlotte_mom    時間: 12-6-22 08:06     標題: 引用:Quote:Charlotte_mom+發表於+12-6-21+21:50

原帖由 CrabPincers 於 12-06-22 發表
你講跑馬地果間?
最貴最難入果間呀!




作者: marcuscyrus    時間: 12-6-22 09:52

小曳人 發表於 12-6-22 07:04
其實諗定無問題,但要睇佢之後會唔會執生!如果家長無好好觀察個小朋友而做adjustment,咁就...
...
我見o個d就係目標明確,唔會理個小朋友發展係點囉冇o個種特質就特訓到佢有


作者: CoffeeCake    時間: 12-6-22 10:15

同意學校會睇家長.
當然唔係睇你係咪有錢人,而係你到底係咪會"抛個波比我"就算?
將心比心,你如果是老師,你想有個同你合作教小朋友既家庭,還是咩都賴學校既家長?
在明顯2個家庭都唔似會有父母COMMIT既情況下,點解富有D既會有著數?因為學校覺得最壞打算,呢個FAMILY都會用錢去解決事情(比錢出去比人補習)
所以,名校,以我愚見,有3大類人:
1. 苦讀生/有特異功能人仕 (屋企唔有錢,但靠自己都誇啦啦)
2. 超級有錢人/名人 (凡事有錢可以解決事情,大不了請10個補習老師)
3. 中上階層普通人 = 學校隱形人 (每樣野都不過不失,但唔夠時,父母都總有財力幫補下, 最後出去同其他人比,都會比人好少少)
作者: baekdoosan    時間: 12-6-22 10:25

某程度上, 入名幼是為了家長自己心安理得, 對得住小朋友. 如果能入讀心儀小學當然最好(一切辛酸立即拋諸腦後) 但當小一全軍覆沒, 我便會質疑是否因為幼稚園名氣不夠? 是否因為自己interview表現差害了小朋友? 因為自己不是全職母親? 沒有考五級樂器? portfolio做得不夠好? cert.不夠多? 沒有捐錢? ... 等等鑽牛角尖.

這只是個人意見分享, 不代表所有家長均這樣想.
作者: Gagagogo    時間: 12-6-22 10:47

名幼不一定考到好直資或私校,但她們有track record,入讀小一後,小朋友學習動機及成績ok, 所以某些小學在扣門時都心裡有數,面試時兩個成績一樣的小朋友,你估老師/校長會否有preference?

再者,真的唔好看輕3年的幼稚園生活,小朋友在6歲前,是其小腦袋黃金開發期、啓發期,老師的引導及peer group influence 不可忽視,小朋友能否學習到"主動學習、發問"較為重要,某些名幼或許就做到,既能令小孩發展平均,乖能能令家長安心,函接小一,••••••kinder 出奇蛋,同時間滿足n個要求。

我想我的著眼點,不是名幼能否令小孩考到Top 直資,而是能否給孩子有一個solid foundation

作者: sandy1234    時間: 12-6-22 11:48

回復 marcuscyrus 的帖子

同意呀! 自己做番自己覺得啱嘅嘢囉, 個個父母都想自己的小朋友好, 將來條路易行啲.

我覺得成績固然重要, 但品德培養及溝通能力等亦不可缺, 都唔係個個名校畢業生做到成功人士喇. 最緊要小朋友健健康康, 開心快樂成長!

作者: HaYi    時間: 12-6-22 12:04

其實有幾多名幼的家長會以為自己讀名幼, 一定會自動波入一線小學 ?  不要以為個個名幼家長都是發春秋大夢之輩,  自己身邊此種家長可以說是 "冇" .   .

有樣真的是名幼家長通常是對小學是旱已有目標的, 但個目標不一定是一級如DB 個幾間, 亦可能是如TSL , CKY 個些比較不同的學校, 入名幼只是家長自已覺得在能力範圍之內可以做到的, 提供多一個選擇俾自己的小朋友. 像直資私立一樣.   

小學校prefer 收名幼, 可能是學校估計一般名幼生都會有多些資源, 又有track record, 之前師兄師姐的表現可有參考. 小學亦怕過多錯配浪費人力物力. 當大家都差不多時, 學校有一些東西可以參考總好過冇. .








歡迎光臨 教育王國 (/) Powered by Discuz! X1.5