教育王國

標題: 忍唔住啦, 有無父母/老師/社工可以俾意見我地? [打印本頁]

作者: natzuki 時間: 12-5-22 12:14 標題: 忍唔住啦, 有無父母/老師/社工可以俾意見我地?

我第一次喺EK開post, 因為我要求救!!

我同老公同佢前妻生嘅女一齊生活, 個女讀中四, 我地都好錫佢, 只可惜以前佢單親期間始終欠缺一個正常嘅家庭環境, daddy又錫佢, 乜都幫佢做哂, 變咗佢唔識得照顧自己, 同埋好懶散.

佢本性係乖, 但讀書永遠只是馬馬虎虎, 中四開始更加心野, 成日想去街, 之前2次考試都衰, 第2次仲考第尾添, 嚟緊最後一次考試, 我同佢daddy都唔想放棄, 只係要求佢升到班, 我地都知佢讀唔成大學, 但只望佢中學畢到業, 要hea都hea完個中六呀大佬, 唔係將來點生活, daddy同我分別軟硬兼施都試過, 佢偏偏就係死到臨頭都唔知驚.

呢排已經晚晚捉住佢溫書(中四仲要人捉?!), 點知突然尋晚話眼瞓, 唔溫, 我講佢唔掂, daddy鬧咗佢一鑊, 點知仲硬頸, 今朝直情唔肯番學添. 我地做父母嘅究竟可以點做呀, 我同佢傾過計, 我知佢對學業無自信 (佢唔係蠢, 只係懶惰, 根本都無努力過), 但又唔知自己將來想做乜(曾經講過想入演藝界, 但又無乜專長), 我話你想讀演藝唔緊要, 我支持你, 但係你都要中學畢到業人地先收你架, 有咩辦法改變佢嘅學習態度同人生態度呢? 我地真係好想幫佢, 唔想放棄佢

作者: KH 時間: 12-5-22 13:48

佢冇目標理想, 而外邊的目標太高, 佢冇自信達標, 自然想出街, 瞓覺逃避, 愈想出去, 瞓得愈多, 表示佢壓力愈大, 又呢個年紀真係唔鬧得, 講兩句佢地就會覺得好嚴重, 加上宜加唔係鬧人的時候, 解決佢的問題重要過, 點都要好聲好氣叫佢返來讀書, 同佢一起了解邊個部份出問題, 係唔係有滴課程唔明, 又唔知點解決, 有時問人係要勇氣, 愈多唔識就愈唔想識, 唔想影響大家的關係, 就揾人對住佢, 總之書本的問題解決咗, 心理的問題就可以解決, 有咗自信, 佢一定會想讀番書, 前邊兩次考試衰咗就唔好再提, 淨係針對來緊的考試當目標, 進步咗信心番來, 自然就會改變態度, 有心真係唔怕遲, 唔好放棄啊

作者: natzuki 時間: 12-5-22 15:00

KH 發表於 12-5-22 13:48
佢冇目標理想, 而外邊的目標太高, 佢冇自信達標, 自然想出街, 瞓覺逃避, 愈想出去, 瞓得愈多, 表示佢壓力 ...

多謝你嘅回覆呀, 好彩今日daddy喺屋企, 可以睇住佢, daddy叫佢一齊出街散吓心, 唸住同佢傾吓計, 佢都唔去. 我今晚返去唔知會唔會連我都唔睬, 好聲好氣唔難, 但要佢領情至得, 同埋要知道我地係為佢好. 我都會試吓嘅, 做得幾多得幾多啦.

我無宗教信仰, 但我會為佢祈求上天, 希望佢肯去改變自己嘅命運, 努力咗, 就算佢考第尾留班都唔緊要, 至少我地知佢盡咗努力.

作者: annie40 時間: 12-5-22 17:41

十五六岁的孩子不易教, 他们还在寻找自己, 发完爸妈脾气, 自己还未知想点.  不知如何寻找快乐, 未准备就绪, 却快要投入社会了, 无书读, 理所当然要工作吧! 这问题是千方家长的烦恼.

老实说, 您的处境很不容易, 太辛苦, 就跟朋友通电, 谈天, 把无法即时解决的问题暂时放下, 今天下班加点菜肴, 一家人吃过痛快.

星期天的节目, 可考虑去长洲吃海鲜, 或去西贡行山, 总之做些有益身心的改变, 出身汗, 情绪会好点儿, 一家人感情好, 必会多点谅解和包容的.

其实已经考包尾, 升到级都可能是骗自己, 放松点, 当正她有机会留班, 跟她开门见山讨论, 作最坏打算, 熬得过, 明年重新振作.

虽然每个家庭生活有差异, 希望你们一家还是考虑参加教会, 参与运动.  如果朋友群组是绩极乐观的, 彼此更能发挥互助互动.

Good luck!

annie

作者: natzuki 時間: 12-5-23 09:22

annie40 發表於 12-5-22 17:41
十五六岁的孩子不易教, 他们还在寻找自己, 发完爸妈脾气, 自己还未知想点. 不知如何寻找快乐, 未准备就绪, ...

多謝你, 尋晚大家不再為此嘈, 開開心心地吃了一頓晚飯, 今早女兒又乖乖的去上學. 不過我有機會會同佢講番尋日逃學係非常錯嘅做法.

作者: nintendo 時間: 12-5-23 09:53

做人媽媽難，做 step mom 更難
你的愛，女兒一定知
差唔多暑假，其實可以改變的難，要留班其實未必係壞事，可以打好基礎
遲 d 暑假，同佢去玩下，多 d 傾計，慢慢啟發佢去努力讀書：唔讀書，真係想一世做勞動階層？入唔到大學，讀 ive 都好，學門手藝
男人都係火爆，年輕人鬧唔得架喇，可能越鬧越走，有時寧願先搞好關係，讀書慢慢算，個女走了去，就真係乜都冇

作者: rhizoid 時間: 12-5-23 10:59

本帖最後由 rhizoid 於 12-5-23 11:06 編輯

natzuki 發表於 12-5-23 09:22
多謝你, 尋晚大家不再為此嘈, 開開心心地吃了一頓晚飯, 今早女兒又乖乖的去上學. 不過我有機會會同佢講番 ...

首先要防止逃學這種情況再次出現，因為開得個頭，就好容易變成常態，到最後"二進制"都未必挨到中六畢業。

或許社工/心理醫生能幫助她，但最起碼我可以肯定，長期逃避現實（逃學，成日出街都係逃避既表現）的話，社工/心理醫生能做既會唔多，因為治療既阻力好大。

我諗佢阿爸的確太過溺愛（作補償吧），付出過多物質／精神安慰，但佢懶散並非佢阿爸乜都幫佢做晒，而係佢既背景加上阿爸既溺愛封住左，搞到自己都認為自己唔正常（好比裂左既牆無補過只係不斷批盪），心理不健康。

daddy鬧咗佢一鑊

咁樣好比係牆出面去刮個層批盪

佢阿爸同佢既關係應該好似以前咁，唔需要特別補償
好在佢本性乖，如果唔係的話佢以後會變本加厲，覺得全世界欠左佢

你同佢既關係係最難搞的，最尷尬的，咁亦都好自然，因為佢對你會有天生既敵意
雖然唔清楚你地相處時間同情況點樣，但個女點都需要時間

〔網上資料〕專家認為可以做既，先俾佢認識你，等佢對你有少少好感，最起碼無反感，然後多d撩佢傾計（既然佢咁懶，自己會多d時間），你盡量少出聲，多做一個聆聽者，如果佢錯的話（好似今次逃學咁），我諗佢咁乖自己都有思考過呢個問題，如果你真係想同佢講既，都係要佢思考返，免得你自己直接講佢錯，搞到關係太僵就唔好

同意樓上所講既，要俾佢有返讀書既心思，並且保證佢唔去逃避，哪怕有幾名既進步已經係成功既開始，咁佢先有所寄托。
你可以聽下佢讀書方面有咩難處，有乜幫到既盡量幫佢啦

作者: bobbycheung 時間: 12-5-23 13:14

在這危急關頭, 我覺得家庭及親情比學業重要. 首要係小心佢群埋D壞朋友學壞. 讀書叻緊係最好, 但讀書唔成並非世界末曰. 只要佢行正路, 話唔定將來一樣有個美好的人生. 佢唔係蠢, 但她考第尾. 這說明她完全無出過半點力去温習. 這樣的成績是急不來的. (我明白因為我都係考包尾嗰幾個). 我並非專家,但以我所見, 好多時都係要重大事情先能令她改變. 例如屋企出現經濟問題 (另她發奮), 又或者佢出外讀書(另她可以重新由淺D程度開始)等等. 無論如何, 只要她一日唔學壞, 她將來總有機會找到自己喜歡的科目或工作.

作者: annie40 時間: 12-5-23 13:42

回復 natzuki 的帖子

nazuki,
这里朋友分享的是'人间有情', 罗马不是一天能建成的, 要继续努力, 继续忍耐啊! 加把劲!

作者: cy101 時間: 12-5-23 15:13

既然DADDY 做咗衰人呢個角色, 妳千萬要做好人呀, 咪有咩事, 佢真係唔會同你地講!!你做佢地2個個橋樑!

另外有D人真係要比別人行多一點路, 先找到自己方向! 最緊要品行無偏離, 情況未必係你地想咁差!!!

歡迎光臨教育王國 (/)