教育王國

標題: 工人唔願意揍自閉小朋友 [打印本頁]

作者: BKVIP 時間: 11-8-1 15:30 標題: 工人唔願意揍自閉小朋友

自舊工人走後，一直不停搵工人。問一個快完約的工人為何不和前僱主續約，佢話因為唔想揍個自閉小朋友，我一聽個心真係好唔舒服，我話我份工唔岩你，因為我個仔都係自閉。

因為佢一句話，我心中的確很介懷。有這些小朋友的家庭，除了面對孩子的問題，還要苦惱無工人願意做。

作者: BeBe媽媽 時間: 11-8-1 20:59

我好明白你心情.
但老實講,人人搵工,有得選擇都會盡量搵份合適既.
我估佢地唔係果種"奇"視吧!?
好過你請左佢,佢要走....又搞一輪丫.
放心,實會搵到一個arm既!

作者: pipi331 時間: 11-8-1 22:57

提示: 作者被禁止或刪除內容自動屏蔽

作者: BeBe媽媽 時間: 11-8-1 23:59

係囉....
我身邊有D媽咪,更加對住自己個百厭仔態度好差呢...個亞媽/爸對住自己個仔喎!(個小朋友應該都係百厭,無話有什麼問題)
即係如果要對住我地既小朋友,大家都要有更高既EQ先搞得掂呀!
只好祝樓主好快搵到個有耐性有愛心既工人啦!

作者: fishh322 時間: 11-8-2 09:40

提示: 作者被禁止或刪除內容自動屏蔽

作者: BKVIP 時間: 11-8-2 12:19

多謝大家嘅支持。其實個姐姐一開始唔知我個仔嘅事，只係用呢個理由我覺得几特別，或者佢係一個好姐姐，只係有緣無份。

其實我小朋友自閉的情況不算差吧(我覺得 =.=)，佢會對住我地笑得好甜，仲會玩到卡卡聲笑，對細佬佢都好好，有時會走黎鍚bb一啖，只係佢皮氣差，最近成日大叫，同埋好固執。如果我唔同姐姐講佢係自傾，我諗佢未必會知，只係個刻佢咁講，我個心好唔舒服，即時拒絕左佢，可能佢之前照顧個個小朋友嚴重d，佢話好辛苦。

作者: muimui5 時間: 11-8-2 16:16

工人剛續了約，希望依兩年個女識講嘢同冇咁Hyper，otherwise都怕到時姐姐走人，又請唔番。

作者: owl_2046 時間: 11-8-3 17:58

我都係剛同工人續了約.
有時請工人都講緣份.
我姐姐就好錫我個仔, 好enjoy 湊佢.
呢度都有好多媽咪請到好工人.
GOD bless you!

作者: BeBe媽媽 時間: 11-8-4 01:06

講開工人!我親眼/親身見有個賓姐,佢超級鍚個讀緊I位既3YRS幾妹妹,個小朋友係言語遲(讀左成年I位,現在能講單字)及開學時行路好唔"搵",但而家都行得OK....唔知點解派左I?我只知已轉排S...等緊.
個姐姐好鬼鍚佢架(小朋友還有一個家姐讀緊小學),賓姐已響呢個顧主做左6年!
有次見佢比亞小妹攞"姐",落緊雨,但個賓姐竟然可以勁彎身就佢(比我撞見)...又每次小妹發皮氣坐響地/瞓響地,亞賓姐就抱住佢一齊坐"啖"佢....仲有亞小妹每星期2-3次針(呢個係另一媽咪帶仔針時見到),小妹&賓姐一齊CRY....
亞賓姐好似鍚緊自己個女咁,比好多媽咪有耐性&愛心!
可惜我唔識佢顧主,其實我好想同佢顧主講!(但我估佢都知既!)....我見過佢N次,又同過賓姐間中傾下計,所以知
(真羡慕)

作者: Letter_lalaland 時間: 12-6-10 23:50

有個錫小朋友 + 有耐性嘅 helper, 對小朋友嘅學習有好大幫助。

工作需要，我經常有機會同小朋友嘅 helper 溝通，
大家都知要照顧有特殊需要嘅小朋友，如果少啲精神同愛心都唔掂。
好多時候，佢哋一方面要顧及小朋友安全；
又要照顧僱主一家嘅起居，
重有幫忙落實小朋友嘅訓練計劃；

一個人有幾多對手？
朝早五點幾起身（小朋友睏得唔好，早起），凌晨先有得上床。

大部分嘅 helper 都好錫小朋友，
好多時令佢哋考慮離職係因為僱主嘅不諒解。

大家都係想個小朋友進步；
俾多啲支持、鼓勵、同關懷屋企哦個離鄉別井去照顧你屋企家人嘅 helper,
互相尊重，係挽留一位好幫手/人材嘅好方法。

作者: YingYin 時間: 12-6-11 09:17

有無好Agent介紹呀, PM我,

感謝

作者: Capricorn2521 時間: 12-6-11 09:54

係呀，我家姐姐都好踢我個仔。記得亞仔1歲時，係姐姐提我不可以比個仔咁吾聽話，佢有經驗，覺得吾妥。

仲有，上年我成日係S位學校出出入入，都見到好多好好嘅工人姐姐，帶小朋友放學後去做其他治療。

放心，吾係個個係咁嘅。

作者: why-me 時間: 12-6-11 12:15

我都有個好姐姐湊亞仔, 佢地FRIEND到不得了, 好錫我個仔, 我好感恩, 感謝主, 雖然錫比我一個SPECIAL BOY, 但亞仔身邊每一個人都好鍚佢及愛護佢.

作者: PandaVV 時間: 12-6-11 13:15

我個大囝都有自閉症, 3月份才請了菲菲工人, 她40多歲, 有仔女.
我個仔成日都哭, 走來走去, 個工人很喜歡跟大囝一起玩.

唔一定個個工人都唔喜歡自閉症既小朋友.

我2個工人都係同一個AGENT幫手, 佢真係會按您既情況幫您去搵工人.
如果您需要, pm 我. 我比個AGENT資料您.

作者: SKB 時間: 12-6-11 13:40

我都好担心姐姐出年3月唔續約，我個仔ARM ARM 4歲，而家返緊正常幼稚園,排緊I位,姐姐由出世湊佢到而家，中間離開4個月，又返黎做，同你個仔一樣,我個仔仔又係皮氣差(對住我特別差)，少少野唔跟佢意思就狂叫狂喊發難渣，拳打腳踢,好CRAZY，同埋好固執，總之見我唔到就好地地，有我既存在佢就不斷試我底線，呢半年情況好嚴重。9月妹妹就出世，仔仔會轉讀全日，希望姐姐輕鬆D，姐姐好錫大仔，所以佢講/玩電話/電腦我都隻眼開，隻眼閉，清潔只做門面功夫我都唔MIND，最繄要佢幫到我手照顧大A仔，我都真係好辛好辛苦，大家加油吧。

作者: BKVIP 時間: 12-6-13 17:35 標題: 回覆：工人唔願意揍自閉小朋友

我依家已經搵到新姐姐，仲做左9個月啦。佢唔知我大仔係a仔，但我估佢唔會介意，因佢單親，佢個仔聽障同講唔到嘢，好慘。佢對我對仔都好錫，我大仔仲成日用佢名唱歌，佢話好好笑。

作者: 我係女仔 時間: 12-6-14 22:16

我都想知有無AGENT介紹呀, 可唔可以PM埋我呀, 唔該

作者: psv 時間: 12-6-14 23:50

Can u also pm to me please? Thanks!

歡迎光臨教育王國 (/)