教育王國

標題: 好難決定,大家幫下忙 [打印本頁]

作者: STH 時間: 11-2-14 15:05 標題: 好難決定,大家幫下忙

囡囡25週出生,好早產,現在已2歲半了!好彩是她沒有大問題,不過發展也比同齡的小朋友慢,經評估後,大肌小肌最差,只有歲半,佢懂行同坐,不過好易跌倒同,當然仲未懂跑,認知就有2歲,最叻就係言語,有2歲幾,平時好鍾意說話,對應都幾叻。現在已在早期訓練中心學習!今年九月要入讀k1了,但係好擔心佢大肌小肌方面的發展,吾可以識應k1。
問題係!九月俾佢入讀S位先,加強佢大肌小肌的Training,有進步後先同佢轉返k1位????定係,俾佢早上上早期訓練,下午俾佢上k1?????

作者: Anpanmama 時間: 11-2-14 20:20

個人提議，入主流幼稚園+E位(早期訓練)
因為佢嘅問題主要係响肌肉、張力方面小朋友嘅言語、認知無大問題嘅話, 怕响S位嘅同學們唔夠互動俾佢，加上課程有時都會睇番其他小朋友而去，可能出番主流小學/幼稚園時, 要幫佢追番！

另外响E位嘅物理治療、職業治療都可以根據小朋友嘅情况調節, 比I位更適合！

附帶提醒： E位輪侯時間一般比IorS位長，等侯期間訓練嘅安排, 不論時間同金錢都係好重要嘅考慮因素！

[ 本帖最後由 Anpanmama 於 11-2-14 20:27 編輯 ]

作者: someoneelse 時間: 11-2-14 21:40

大致認同Anpanmama...

不過，如果排 S位，唔係一齊排埋E位嗎？如果係既話，就照咁排隊囉，反正兩者都有排你排，唔使做任何決定住 (當然要比定K1留位費先喇)！

離9月開學仲有半年時間，期間你對症下藥盡量俾私人訓練囡囡..因為如果無其他問題(例如自傾)影響孩子學習能力既話，要追唔難的...

到8月時，先按囡囡進度再決定去向！

Good luck!

作者: STH 時間: 11-2-15 09:22

多謝大家的回覆!!!
由於佢好早產,所以醫院好早已同佢排在位,現在已一星期返3日,分別有幼兒教授,物理同職業了!私人都同佢返個,不過佢好吾合作,一去達training大肌同小肌就好扭計,所以成效吾大,同米私人真係好貴長遠負擔吾起。
前幾日再次評估,醫生就話佢大肌小肌都可以入S位,但其他方面就吾太差,可以嘗試入普通幼稚園。如果同意俾佢入S位,佢可以9月入度,問題係甘就無機會俾佢嘗試普通幼稚園啦!
但係入S位,有可以加強佢大肌小肌的訓練,希望佢快些追到,之後再同佢轉返出來普通幼稚園!
吾想浪費佢黃金時間!
名位,我的想法對嗎,好驚決定錯誤!!!!!

作者: 路過的人 時間: 11-2-15 16:32

如果選早期，IT 每星期一堂，OT, PT, ST 會按小朋友情況一個月俾一至二次，妳到時可以同早期講要上午或下午，星期幾先方便，佢通常都會就妳，問題係自己要配合時間，因為有時候未必會 IT 同 OT, PT, ST 編埋一齊，有機會一個月要去七次，好晒時間，重有早期主要係敎完之後，主要靠家長返屋企自己同小朋友不時訓練，如果係屋企冇做訓練，進展不大。

如果選 S 位，大肌小肌的訓練一定會好D，問題係自己O既小朋友只係大小肌問題，其他方面就吾太差，最叻重係言語，平時好鍾意說話，不過說話都要有對手先得。

如果真係決定選 S 位，醫生都可能每年評估一次，睇吓可唔可以早走，重有學校見小朋友進展理想，都會建議早走。如果冇聲氣，小朋友的大小肌又冇乜大問題，最多都係讀兩年好啦，係第二年上學期就要 plan 定，早d同學校講讀到學期尾就走，如果冇問題，而小朋友又未滿六歲，學校會同評估中心安排，在三月前落實用舊number再排早期，咁就來年就可以返主流幼稚園再加早期訓練。

[ 本帖最後由路過的人於 11-2-15 23:20 編輯 ]

作者: someoneelse 時間: 11-2-16 00:23

因為難嘛，所以佢扭計囉...你要堅持呀！

我囝(叫做早產32週)，當年未夠2歲開始私人PST & OT ，每次上堂 50分鐘，就喊左30分鐘左右...一路做一路喊...喊到我心都痛埋...又驚對佢心理有不良影響...

響我同導師既堅持下，囝囝3歲時已經情況良好喇！

老實講，政府既係無私人既咁落力的...你唯有偷師，儘量響屋企再做多幾次，期望將勤補拙吧！

加油！

原帖由 STH 於 11-2-15 09:22 發表
多謝大家的回覆!!!
由於佢好早產,所以醫院好早已同佢排在位,現在已一星期返3日,分別有幼兒教授,物理同職業了!私人都同佢返個,不過佢好吾合作,一去達training大肌同小肌就好扭計,所以成效吾大,同米私人真係好貴長遠負 ...

作者: huiaudrey 時間: 11-2-16 11:04

我個仔而家已經八歲,
2歲8個月時診斷為:自閉症+感統失調+語障
5歲時定為: 嚴重語障,佢4歲先開口講野
7歲時定為: 中度至嚴重弱聽
而家係主流小學讀3年班

3歲時,半年內已經係政府排到S位,我放棄左,我選左早期訓練.朝早返正常幼稚園,下午去協康上早期訓練,一星期5天,ST,PT,OT,小組..... 可以告訴你,你要有心理準備,過程好辛苦,但係我無選擇錯

小朋友係3歲至5歲期間,主要從模仿中學習,佢將來要面對社會都係正常人,所以必須要在一個Normal 的環境成長.
而且,早期訓練比較好是因為單對單,比較集中,加上協康既治療師都好專業和有愛心,社工又好好,比好多support 我地呢班家長.

作者: kelvin_hmlau 時間: 11-2-16 12:36

基本上同樓上建議一樣 - 排E位, 再加個別OT. 再看看除了大小肌問題, 有無其他比較虛無縹緲的感統問題, 例如前庭, 本體, 觸覺, 視覺追蹤, 動作計劃, 左右協調等.

如果唔係自閉, 只要努力, 問題應不難解決.

作者: pipi331 時間: 11-2-16 13:14

提示: 作者被禁止或刪除內容自動屏蔽

作者: apple~y 時間: 11-2-16 13:43

原帖由 huiaudrey 於 11-2-16 11:04 發表
我個仔而家已經八歲,
2歲8個月時診斷為:自閉症+感統失調+語障
5歲時定為: 嚴重語障,佢4歲先開口講野
7歲時定為: 中度至嚴重弱聽
而家係主流小學讀3年班

3歲時,半年內已經係政府排到S位,我放棄左,我選左早期訓練.朝 ...

但係0甘講,無形中標籤0左s位係比唔正常小朋友先讀
"小朋友係3歲至5歲期間,主要從模仿中學習,佢將來要面對社會都係正常人,所以必須要在一個Normal 的環境成長."
同我仔仔做訓練個姑娘都話,好多家長好抗拒s位
大致都係有以上諗法,我都聽得多
又聽過人0地難聽D講呢D係傻仔學校
自己去親自了解,其實s位又唔係0甘得人驚
中心內會唔同能力小朋友編去唔同班別
有能力好好編埋同一班,基本同主流小朋友無分別
可以預備出番主流
最重要選一些口啤好,有心培育小朋友番出主流中心

[ 本帖最後由 apple~y 於 11-2-16 13:51 編輯 ]

作者: huiaudrey 時間: 11-2-16 14:51

真係要say sorry, 我唔係有意要標籤S 位既學校, 我意思係因為樓主既小朋友唔係好嚴重,說話流利...
其實我本來想比我個仔讀特殊學校,我係完全接受S位的,係社工覺得如果可以就儘量比佢試讀主流學校.因為佢將來面對都會係正常人,要佢習慣點樣同普通人相處,雖然會經歷好多嘲諷及磨練,但亦是他必須要經過及面對的.這是我的社工給我的意見.
若有得罪之地方,請見諒.

作者: apple~y 時間: 11-2-16 15:17

原帖由 huiaudrey 於 11-2-16 14:51 發表
真係要say sorry, 我唔係有意要標籤S 位既學校, 我意思係因為樓主既小朋友唔係好嚴重,說話流利...
其實我本來想比我個仔讀特殊學校,我係完全接受S位的,係社工覺得如果可以就儘量比佢試讀主流學校.因為佢將來面對都會 ...

真係唔緊要,其實大家都係交流0下
大家都想小朋友健健康康
呢度大家都係同路人,
我0地比一般家長所面對辛苦得多,壓力很大
希望大家小朋友努力一起進步

作者: kelvin_hmlau 時間: 11-2-16 15:38 標題: 回覆 2# huiaudrey 的文章

我相信呢度的家長都無一個"寸"得起 S位小孩, 只有個人喜好和選擇.

不過真係有d 興趣知道自閉兒上小學的情況, 面對的困難, 可否分享一下.

作者: huiaudrey 時間: 11-2-16 16:11 標題: 回覆 1# kelvin_hmlau 的文章

我個仔考左4間私立及直資小學，意料之內，無一間收。攪珠派左一間區內幾好小學，注冊前，約學校社工見面，告訴她我個仔情況，佢叫我唔駛擔心，學校有好多support,而且可以調適，最後決定讀。結果當然兩回事。我同班主任講功課可晤可以少d,考試可唔可比多少少時間我個仔，因為佢大小肌好差，回覆係：會對其他同學唔公平，仲暗示叫我轉校，於是，我立即搵學校，但係，連收生不足既小學都唔收。我無放棄，最後，好多謝信x學校肯收我個仔，一年級下學期插班，讀到而家三年級。

作者: huiaudrey 時間: 11-2-16 17:12 標題: 回覆 2# kelvin_hmlau 的文章

主流小學老師大部份都無接受過專業訓練去處理特殊需要小朋友，加上課程緊迫，期間當然有好多問題，特別係情緒控制及社交，學校生活係社會縮影，我個仔比同學排擠，無同學同佢玩等等。
因為，我個仔唔識表達，我要花好多時間去同老師溝通，學校所有活動我都會出席，但係我又要返工，我知道，我一定要陪個仔一齊行呢條路，為他遮風擋雨。
無數次在街上被途人指指點點，冷嘲熱諷，連親人都對我個仔岐視，淚在心中流。
八歲了，和普通小朋友沒分別，只是多了2隻助聽器。他開始學習獨立，我也慢慢放手，讓他知道路是要他自己行出來。
入得來這版面的，大多是特殊需要小朋友，希望各位家長不要憂心，可能大家都會比其他父母付出更多精神和時間，只要不要放棄，將來會發現，得到的，比其他父母會更多。大家努力呀！

作者: STH 時間: 11-2-16 21:01

真係好感動有你們的回應!其實由佢出生時,好多人都叫我們放棄,include醫生都同我們講,佢之後可能回半身行吾到,不懂回應,要你們一生照顧她,但有邊位父母會放棄呢!!果然神蹟出現,佢本身腦出血都可以自然甘好返。所以我由佢一出院就全職照顧佢,佢真係一日比一日進步!但係可能之前出過血,真係對佢右半有些影響,懂行但行得吾穩定,好易跌,當然前庭, 本體, 觸覺, 視覺追蹤, 動作計劃, 左右協調等都有問題!!!但感恩係,佢真係講野叻,對答好有反應,佢已經可以用句子回應!仲懂博嘴,而認知當然仲未追到!
就係佢發展吾同,所以好難決定!

作者: STH 時間: 11-2-16 21:12

另外,收左囡囡的幼稚園,係區內都算係幾好,所以即使下午班都成25個學生一班,都幾多人!令我擔心照顧的問題,同可否接受囡囡的問題!!!!老公同我都吾會抗拒特殊幼稚園,只要對囡囡發展係好的。最重要係every 小朋友都有佢的優與缺,只要努力,他們都會進步!

作者: STH 時間: 11-2-16 21:17

我們暫時的決定係俾佢返S位,然後俾佢星期六日返Playgroup,俾佢同多些同小朋友互動,這樣好嗎??????

作者: STH 時間: 11-2-16 21:21

想問,點樣可以再深入了解邊間S位好???
除了上網外!!!

作者: pipi331 時間: 11-2-16 22:31

提示: 作者被禁止或刪除內容自動屏蔽

作者: pocoyo123 時間: 11-2-16 23:10

我以前都好擔心亞仔入左S位會無互動, 不過, 又唔係, 佢會因你的小朋友能力分組, 好以我小朋友佢去左一組最高能力, 佢入到去反而在其他同學到學到好多野返來, 我覺得其實如果小朋友大小肌差, 在普通幼稚園K1都仲好D, 但去到K2老師就會比野你聽, 小朋友都跟唔到, 要三思

原帖由 STH 於 11-2-16 21:12 發表
另外,收左囡囡的幼稚園,係區內都算係幾好,所以即使下午班都成25個學生一班,都幾多人!令我擔心照顧的問題,同可否接受囡囡的問題!!!!老公同我都吾會抗拒特殊幼稚園,只要對囡囡發展係好的。最重要係every 小朋友都有佢 ...

作者: STH 時間: 11-2-16 23:24

我好同意你講'在普通幼稚園K1都仲好D, 但去到K2老師就會比野你聽, 小朋友都跟唔到'我就係擔心這一點!!!到時要佢留班,or上左一年普通幼稚園後再轉返S位,那麼就浪費左囡囡的時間!!!
想問下係S位,仲有無個別訓練,定係全部都係小組形式???是不是一定要返全日,不可以半日呢???另外,我睇過我個區,有耀能同協康,邊間好些呢???因為三月就要決定啦,所以好多問題!!!

作者: nokia6300 時間: 11-2-16 23:49

我小朋友都系有delay問題,最大問題系大小肌,大肌最差,19個月先行,加上偏平足同埋感統問題,行路又唔穩又易扑當然加埋唔夠力

語言表達ok但有口肌,其他認知ok

我最後連 i 位收左都放棄轉排 e 位,都系比佢入nursery,比其他小朋友系難d適應,不過至今so far so good,我personally系buy系返normal 既地方比小朋友學習,比人蝦又好,學下讓人分享咩都好,自己再努力汁大小肌問題.

如果你小朋友真系only大小肌,搵間小人d,我好concern 安全問題,因阿仔太輪盡,曾經有朋友同我講我仔大肌差一入s位可以唔同曬,我有consider過都去過睇環境,end up都系覺得阿仔似乎可以系普通kg試下,社工都話,比返更有需要既人

up to now,覺得自己既decision系岩既

作者: overcomer 時間: 11-2-17 00:34

協康的S位各種訓練有小組又有個別訓練。而耀能ST有個別, 其他訓練都係小組, 即係話協康多些個別訓練。所以協康好D。一定係全日, 冇半日, 你有事可向中心請假。

所謂E和S同時排, 那個E位係過渡性的, 即係如E位有先, S位未有位, 就俾你上住E位先, 之後S位有位俾你, 就冇得要E位。

如果係好的S位中心如協康, 咁上一年S位再轉出去普通的幼稚園, 都其實係穩陣做法。S位按能力分組, 佢地都有社交小組, 你自己又可俾佢出去上社交小組補補。其實一般小朋友3歲前都比較自我, 社交都不是很強, 常常都各自玩, 尤其係男仔, 所以唔駛好驚讀S位社交就好差, 你仔又唔係長讀。普通幼稚園K1 課程好淺, 唔怕最唔到, S位都會教學術嘢。將來冇人知你仔讀過S位的, 正如你的同事都唔知你讀邊間幼稚園吧。

作者: Capricorn2521 時間: 11-2-17 11:50

趁佢仲細，先攪好自身問題。S位內的專業設備可日日訓練小朋友大肌肉。既然語言叻更不用擔心，其他任何時間同佢傾計傾返夠數。星期六早上送佢到主流幼稚園暫托半天，星期日早上去教會或同朋友/親戚玩。看你如何安排時間呢!

我小朋友上了半年S位已大有進步，最近老師會帶佢去認識其他言語組別更叻的小朋友，因為他的溝通意慾愈來愈強，超越同組小朋友了，回家後又同我說其他小朋友的名字及同組的誰人沒有上學呢! 我現在打算當天氣回暖後星期六早上送佢到主流幼稚園暫托半天。

祝大家步步高昇!

作者: kelvin_hmlau 時間: 11-2-17 14:33 標題: 回復 11# huiaudrey 的帖子

多謝你的分享, 似乎自閉兒力有不逮情況下選讀程度高的學校係一個問題, 最終你都搵到一間合適的學校.

"連親人都對我個仔岐視...", 真係意想唔到.

作者: STH 時間: 11-2-17 23:11

打左電話啦,會去兩間S位參觀!想問下,有什麼要留意的???同有什麼可以問主任???第一次,什麼都不懂,請大家指教下!!!!

作者: pipi331 時間: 11-2-18 00:49

提示: 作者被禁止或刪除內容自動屏蔽

作者: pocoyo123 時間: 11-2-18 01:18

擇學校都好難講, 讀書講吸收, E,S,I 位各有長短處, 我個小朋友讀I位兩年, 每況愈下, 連親戚朋友都怕左佢,后來轉S位, 打左輸數, 佢要一直都讀特殊, 每日都想哭,有時仲想同佢走去一個無人識的地方死左去, 點知讀左一年后去評估己可出番主流, 現在親戚朋友個個都話佢同正常小朋友無分別,仲人見人愛, 當然, 你同佢相處長時間都會覺得佢有D古怪嗜好,又比同年小朋友天真, ...我只想講, 好多學校唔係家長想唔想小朋友讀, 正確係, 家長要諗係小朋友有無需要讀, 如小朋友有需要但家長又唔想, 咁就會令小朋友無左一個機會轉好

作者: methy 時間: 11-2-18 13:56

原帖由 pocoyo123 於 11-2-18 01:18 發表
擇學校都好難講, 讀書講吸收, E,S,I 位各有長短處, 我個小朋友讀I位兩年, 每況愈下, 連親戚朋友都怕左佢,后來轉S位, 打左輸數, 佢要一直都讀特殊, 每日都想哭,有時仲想同佢走去一個無人識的地方死左去, 點知讀左一 ...家長要諗係小朋友有無需要讀, 如小朋友有需要但家長又唔想, 咁就會令小朋友無左一個機會轉好

講得好好呀~

作者: pinkdoll 時間: 11-2-18 22:06

"好多學校唔係家長想唔想小朋友讀, 正確係, 家長要諗係小朋友有無需要讀, 如小朋友有需要但家長又唔想, 咁就會令小朋友無左一個機會轉好"

好多謝你的提醒

原帖由 pocoyo123 於 11-2-18 01:18 發表
擇學校都好難講, 讀書講吸收, E,S,I 位各有長短處, 我個小朋友讀I位兩年, 每況愈下, 連親戚朋友都怕左佢,后來轉S位, 打左輸數, 佢要一直都讀特殊, 每日都想哭,有時仲想同佢走去一個無人識的地方死左去, 點知讀左一 ...

作者: shuna 時間: 11-2-20 06:48

好同意pocoyo123 既講法, 有D家長其實係唔夠愛自己個仔, 其實愛自己多D, 愛面子多D, 唔能夠愛晒個仔既全部, 如果真係愛佢既全部, 應該選擇最適合佢既學校, 而唔係自欺欺人咁等佢入正常學校, 令佢冇左個轉好既機會,
STH,你個女2.5歲, 大肌小肌差,只有歲半,佢懂行同坐,不過好易跌倒同仲未懂跑, 佢入普通幼稚園最大問題係安全問題, 要自己收拾玩具,功課同食俱, 佢行得唔好, 好易比其他小朋友撞倒, 一班10幾20人,老師唔可以成日睇住佢, 佢上運動堂時, 見到自己差咁多, 會否自卑D? 佢既然智能OK, 就更加要係佢仲細時比佢更多訓練, 追返佢個程度, 入S位通常用智能分班, 同班同學能力差唔多, 一班6人,照顧足, 安全D, 每日有訓練, 進步快D, 如果智能OK, 大小肌肉追近d, 行得穩陣, 出返普通幼稚園都唔會遲,太多家長在普通幼稚園dout dout 轉轉, 浪費時間, 到個仔5歲才因追唔倒入反S位, 後悔已太遲, 不要做令自己後悔的事, 只是建議, 不喜歡勿插!

作者: STH 時間: 11-2-23 15:24

同醫生傾左後,醫生的一番說話去變了我們的決定!!!!

作者: 路過的人 時間: 11-2-23 15:33

有了決定就好了, 可否分享一下?

作者: STH 時間: 11-2-23 21:29

醫生同我們講:不要太放眼在囡囡的大肌上問題,而忽略佢本身的智能發展!!!!!再者,你囡囡的智能在普通幼稚園更能吸收,而大肌可以家長多些在家中鍛鍊。
俾個機會佢嘗試下吧!!!

作者: someoneelse 時間: 11-2-23 22:19

既然有了決定，就跟囡囡一齊全力以赴，做到最好吧！

Good luck!!!

原帖由 STH 於 11-2-23 21:29 發表
醫生同我們講:不要太放眼在囡囡的大肌上問題,而忽略佢本身的智能發展!!!!!再者,你囡囡的智能在普通幼稚園更能吸收,而大肌可以家長多些在家中鍛鍊。
俾個機會佢嘗試下吧!!! ...

作者: STH 時間: 11-2-23 22:42

多謝你!大家都一切努力,為上天給我們的小寶貝努力,即使她們的路有多困難,也有我們支持同努力,一定會有雨後晴朗的一天!!!!!

作者: olima 時間: 11-2-24 10:04

你地覺得點樣訓練小朋友大肌最有效﹖我最近發覺囝囝(快age 6)的大肌問題，部份源自關節感較弱，手腳各部份不能分開控制，以致未能做到壓腿等技巧，跑步的雙手也未能控制得好(90度放)...

原帖由 STH 於 11-2-23 22:42 發表
多謝你!大家都一切努力,為上天給我們的小寶貝努力,即使她們的路有多困難,也有我們支持同努力,一定會有雨後晴朗的一天!!!!!

作者: NgoNgoMa 時間: 11-2-25 03:45

加油!!! 我囝囝24週, 現在K2是早期+主流...早期都是練大小肌為主. 慢半年

如果是全職湊, 醫生又無話是小朋友本身能力問題, 我建議都是早期+主流, 因為你有時間幫囡囡練, 好快就會追到的. 過2年, 又開始煩小學..

作者: STH 時間: 11-2-25 13:01

多謝你的鼓勵!!
你囝囝24週都好早產,一路照顧佢一定好辛苦!我全職照顧囡囡都感都辛苦,佢成日都病,又要幫佢做訓練,成日都好希望佢快些追到同齡的小朋友!
你囝囝係米都身體好易病??
另外,想問下,佢返主流,會吾會難識應??

原帖由 NgoNgoMa 於 11-2-25 03:45 發表
加油!!! 我囝囝24週, 現在K2是早期+主流...早期都是練大小肌為主. 慢半年

如果是全職湊, 醫生又無話是小朋友本身能力問題, 我建議都是早期+主流, 因為你有時間幫囡囡練, 好快就會追到的. 過2年, 又開始煩小學.. ...

作者: NgoNgoMa 時間: 11-3-1 01:40

是呀, 成日病架, 但我覺都唔關早產身體弱問題, 主要都是多左群體時間問題.
我唔係全職湊呀, 婆婆湊, 所以囝囝上完早期,無咩時間在家訓練, 靠星期六日, 所以都好內疚無時間幫佢...唉.
返主流, 我諗佢識應問題都是一般小朋友問題, K1時唔LIKE 返, 要3個月左右才好點, K1多數教佢地自理, 幫佢地介片, 初時我都好擔心,每天留意進度, 半年後已改善.
成日都好希望佢快些追到同齡的小朋友! -- 是, 所有MAMA都希望自己小朋友的進度, 故建議你給囡囡主流, 因主流在大肌,小肌,自理, 社交+ 言語教導都平均D, 小朋友半天上主流習慣返學,半天你在家訓練佢大小肌, 咁
整體對你囡囡發展會平均D.
我囝囝返全日的, 因為婆婆教唔到佢好多, 所以當初揀全日, 但上早期訓練每星期2天+眼科, 兒科等覆診,每月都請假唔少,所以我覺你全職湊,揀半日的學校就夠了, 一來小朋友唔洗咁辛苦, 二來唔洗浪費D學費.
我囝囝間幼稚園K1未教寫字, 每星期功課唔多, 小肌都是比佢練貼紙, 線條, 但K2開始就追, 現在跟其他同學仔寫字進度不同的, 每天都要幫佢練多點, 早前都問學校要唔要比佢讀多年, 學校又話唔使. 唉, 我心諗, 佢由大仔(3月)變細仔(11月), 係唔係真要佢讀上去, 同K1比, 佢又好D, 同K2比,又差D.... 唔上唔落.. 所以你現在煩幼稚園, 佢1年後追到, 由S轉主流,小朋友重新適應時,你又煩小學了, 不如早D定高目標,跟小孩一起努力, 我其實有D後悔, 就個仔太多, 教導錯誤, 因小朋友的能力很難估, 以為要花很長時間, 佢就很快追到, 以為很快, 佢就反而慢...唔好比早產2個字, 局限了給小朋友學習, 早產比其他問題的小朋友已是最小的問題...

作者: hkgqueenie 時間: 11-3-3 15:35

主流幼稚園暫托
洗唔洗話比幼稚園知佢現在讀緊 S 位呢 ?

原帖由 Capricorn2521 於 11-2-17 11:50 發表
趁佢仲細，先攪好自身問題。S位內的專業設備可日日訓練小朋友大肌肉。既然語言叻更不用擔心，其他任何時間同佢傾計傾返夠數。星期六早上送佢到主流幼稚園暫托半天，星期日早上去教會或同朋友/親戚玩。看你如何安排時間呢!
...

作者: Capricorn2521 時間: 11-3-3 17:23

我未開始行動，但如果做時，我會同學校講佢讀緊s位，因為我相信遲早會知，也可能要填form。如果間學校有i 位更好，可順便觀察一下。我見好多同學達標轉i位時都會讀返以前間i位學校。當然自己孩子要train到一定情度先好go ahead，否則，可能礙於人手，至有安全問題....便得不償失了。

原帖由 hkgqueenie 於 11-3-3 15:35 發表
主流幼稚園暫托
洗唔洗話比幼稚園知佢現在讀緊 S 位呢 ?

[ 本帖最後由 Capricorn2521 於 11-3-3 17:40 編輯 ]

作者: STH 時間: 11-3-4 15:04

if repeat K1, repeat果一年係米無得claim學劵????

作者: STH 時間: 11-3-4 15:10

另外,想同大家分享,上個星期囡囡突然懂得爬,仲幾快(有食物時),物理同職業治療帥都話要俾佢多些爬,對佢日後發展(大肌同小肌)都有很大幫助!!!!

歡迎光臨教育王國 (/)