教育王國

標題: 我囡囡...達標啦...各位媽咪加油 [打印本頁]

作者: Freak 時間: 10-9-1 10:34 標題: 我囡囡...達標啦...各位媽咪加油

各位媽咪,

我好開心, 我一直都有睇呢度的題目, 因自己囡囡都係當中一員, 今日好想同你地分享一下我個囡囡的事, 亦希望大家繼續加油呀.

我囡囡歲半時, 我覺有點不妥, 佢同人無乜眼神接觸, 抱佢時仲會推開我, 我放工回來佢眼尾都唔望我, 那時我好擔心...因佢與' 自閉症' 的徵狀都幾吻合, 於是經健康院推介去政府評估, 兩歲時佢一個字都唔識, 又唔會手指指...可以話成日好似眼光光, 無乜反應, 又唔多會笑...又唔明我地講野, 於是被評為' 語言及社交遲緩, 約九個月, 有自閉徵狀' ...我同各位媽咪的反應一樣,..好傷心..好難過.

喊過痛過後, 都係要面對

於是一邊排政府, 一邊搵協康會幫手, 又排基督教服務處心橋..又睇多些書, 希望幫到佢...但我係一位在職媽咪, 對佢的時間真的有限, 所以當時真的好擔心..

佢兩歲兩個月先第一次講一個有意思的字-----' 媽' .我開心到流眼淚...現時仍記得那刻的感覺..

今日佢三歲八個月, 再去評估, ...
結果佢語言的表達及理解竟有四歲幾, 認知也有四歲..

我真的好開心...佢終於追到
各位媽咪, 大家努力. ...加油...為我地的囝囝囡囡都打打氣呀...

作者: IwanBB 時間: 10-9-1 11:25

Congratulation! 實在太好喇!!

祝你一家永遠開開心心,健健康康!!

原帖由 Freak 於 10-9-1 10:34 發表
各位媽咪,

我好開心, 我一直都有睇呢度的題目, 因自己囡囡都係當中一員, 今日好想同你地分享一下我個囡囡的事, 亦希望大家繼續加油呀.

我囡囡歲半時, 我覺有點不妥, 佢同人無乜眼神接觸, 抱佢時仲會推開我, 我放 ...

作者: pipi331 時間: 10-9-1 13:03

提示: 作者被禁止或刪除內容自動屏蔽

作者: mybabynbaby 時間: 10-9-1 13:41

嘩, 真係好開心呀~~我都想呀女快0的有呢一刻...^^

作者: Freak 時間: 10-9-3 11:08

其實當佢歲半時, 我覺得有點問題後, 就一邊係政府及其他私營機構排隊, 一邊自己多些同佢做家居訓練, 兩歲見佢仲未識講一個字, 本來想同佢報語言訓練, 但協康會姑娘同我講, 佢仲細, 未定..不如報' 幼兒導師' , 咁我報左一兩個月, 好貴, 要$450左右一堂, 上堂時佢又唔多合作, 於是上左幾堂, 學左老師的一些方法, 就自己在家教佢,

一定要不厭其煩的去同佢講, 雖然那時佢唔識講, 但其實入緊腦...就算佢無乜反應, 我都會自言自語咁講,

且自己在網上print一些圖案, 好似花呀, 草呀, 樹呀, 太陽咁...初時好似字咭咁教佢認, 一邊睇一邊形容, 好似' 花' , 會講埋' 花有好多種, 好多顏色的呀...且有香味的喎..呢d就係花葉..花莖' 出到街見到又即時指俾佢睇..

又或將一些圖案一分為二, 叫佢砌返出來..
又或將一些圖案大大小小咁print出來, 教佢排大小, 長短

每次訓練都唔可以太長, 否則佢地就覺悶, 下次就唔想玩, 要俾佢地覺得係一個' 遊戲中學習 ' , 係開心的事

另外, 我個囡對音樂比較敏感, 好鍾意聽歌, 於是我成日抱住佢唱歌, 尤其係慢歌, 又或在playgroup,時佢一坐唔定.我就抱住佢係耳邊唱下歌...佢會望實我, 呢個時間就最多' 眼神接觸' (醫生之前話佢比正常小朋友少眼神接觸),

後期我仲自己用佢個名作下歌詞, 等佢多點反應.....

真的' 投其所好' ...

最後一點就係就係多些擁抱同讚美, 我相當各位媽咪都會, 都識 , 真的要多用呀...

現時好多時我放工時佢會叫爸爸打俾我同我講, ' 媽咪, 你係邊呀, 我好掛住你, 我好想攬住你呀'...真的聽到我由心度笑出來呀..

作者: mybabynbaby 時間: 10-9-3 13:48

"幼兒導師"係咩黎呀??係唔係家長上呀??

作者: Freak 時間: 10-9-3 14:06

不, 是小朋友上的, 係協康會的課程之一, 當時我想報讀' 語言治療' , 價錢約 $600, 而姑娘同我傾時, 話小朋友未坐定, 其實效果不大, 而' 幼兒導師' 的課程, 可以訓練佢地的專注力, 認知, 理解等, 較適合三歲以下的小朋友, ...後來我發覺..真的如此..因我現時大囡有些發音不正, 都上緊語言治療, 佢五歲啦..要知道乜野係' 上堂' , 要跟老師的指示去學習讀音...我諗若當時只有兩歲的細囡去學時, 一定成堂都學唔到野..

作者: urme1997 時間: 10-9-3 14:13

freak

請問你囡囡番去做評做, 有d乜野要佢做架?

例如...呢?

作者: jacquelineip 時間: 10-9-3 14:56

恭喜恭喜! 希望你囡囡的言語發展更好更快!

作者: jessiebox 時間: 10-9-3 16:24

提示: 作者被禁止或刪除內容自動屏蔽

作者: Freak 時間: 10-9-3 17:21

urme1997,

你係咪指最近我細囡做乜評估, 令我知道佢己達標呀..
佢現時剛開始讀兼收, 所以由學校的兼收老師, 外派的語言治療師, 職業治療師同物理治療師同佢先做一次評估..再去訓練.但估唔到語言同認知都己沒問題了呀..實在令我太開心, 不過老師話佢的專注力仍不足, 社交能力仍較弱...呢幾項要加強培訓

至於評估內容是甚麼, 我就不知, 因當時我不在場呀

作者: owl_2046 時間: 10-9-3 21:17

真係替你開心, 相信呢度每一位父母都希望有你呢一日.
繼續努力, 永不放棄!

作者: BeBe媽媽 時間: 10-9-3 23:48

好鄧你開心呀!加油呀!

作者: bonnieysc 時間: 10-9-7 16:34

恭喜你們一家！

你的留言真的令人好感動呀！

作者: MuiMuiQQ 時間: 10-9-7 16:53

原帖由 Freak 於 10-9-1 10:34 發表
各位媽咪,

我好開心, 我一直都有睇呢度的題目, 因自己囡囡都係當中一員, 今日好想同你地分享一下我個囡囡的事, 亦希望大家繼續加油呀.

我囡囡歲半時, 我覺有點不妥, 佢同人無乜眼神接觸, 抱佢時仲會推開我, 我放 ...

睇到我好感動、好想喊 ... 真係好戥妳開心呀

我好希望我囡囡6 歲前, 都可以達標... 有特呀 :loveliness:

大家加油 !!!

作者: angels'mom 時間: 10-9-8 17:29

freak,

聽到都戥你開心，恭喜恭喜，亦多謝你的分享，相信是其他家長的強心針。

歡迎光臨教育王國 (/)