教育王國

標題: 停課，點算？ [打印本頁]

作者: hcshiu 時間: 09-6-14 05:40 標題: 停課，點算？

停課開始了，對於半日班的學生，我想影響不大，因為平日都有人照顧在家的半天，停課只是多留在家半天。但我女是全日班，原意就是多讓她有群體生活，不想她給家裡的傭工照顧到個女無哂自顧能力，而家停課，如果我自己不理，就會要傭工來照顧，所以我又要自己來照顧女，帶她周圍去參觀，雖然很開心，而我的工作可以讓我這樣做，但總不能日日都係咁。

我覺得短期內其實有機會不斷停課下去，今天發現在社區爆發，所以停課，但兩個星期後，我不知道有什麼事會令到社區爆發停止，似乎情況只會越來越差（更多人中招，政府已說有機會有人會因此死亡），咁無理由到時反而會復課，所以可以預見，有機會會不斷停下去，就當是開始放暑假。有報導說三個月後可能有疫苗，可能到時政府便會覺得有得預防，不用再停課。但亦有說這次流感大爆發可能會攪一兩年，唔通要停到爆發完為止？

大家有什麼安排給你們的孩子呢？有沒有家長帶孩子回校？學校又有什麼安排給學生呢？

作者: wongpsv 時間: 09-6-15 16:35

我女係讀半日班架,正如你所講e+由99揍囉...不過就係成日睇電視...

我原本都想佢返學架..一來學校有清潔,二來學校有老師唔多唔少都應有d野學,不過...原來冇得坐校車,又有野食...所以...為有係屋企浪費時間啦...另我都估會一直停課架啦...唔知家長日又會點安排呢...
最後希望你攪個家教會成功啦...

原帖由 hcshiu 於 09-6-14 05:40 發表
停課開始了，對於半日班的學生，我想影響不大，因為平日都有人照顧在家的半天，停課只是多留在家半天。但我女是全日班，原意就是多讓她有群體生活，不想她給家裡的傭工照顧到個女無哂自顧能力，而家停課，如果我自己不理，就會要傭工來 ...

作者: hcshiu 時間: 09-6-15 18:01

我今日下午打過電話回學校，到現在為止，沒有學生回校要學校托管，學校的老師則輪流放假，所以就算回到學校，都不是由自己老師來照顧，課室則在清潔，所以學生回到學校，會安排在校務處內，讓學生做下功課，看圖書。學校保證如果有學生在，一定會有老師看管。正如你所說，學校沒有午饍，所以學生要自備；學生也有地方可以午睡。

因為我自己在學校附近工作，所以我都在考慮自己上班前帶女兒回校，到中午帶午餐到學校，可以的話在校內和女兒一同吃，不能的話，就讓女兒在校內自己吃。下午女兒午睡後，我便回到學校接她。其實如果我不帶女兒回校，我可能都要帶女兒回到自己辦公室，比張枱女兒自己看書，畫下畫，寫下字等等，但她多多少少會來找我玩，所以帶回學校讓老師托管也有好處，另外，我上星期五和今天都有帶她去玩，其實如果要中招，交通上更易，所以讓女兒回到學校，人少少的在那裡看書，學校地方又大，又有專人清潔，其實也算是好事。

班主任停課前最後一天打過電話來，說家長日照常，但強調不要帶孩子回校。

我相信大部份家長都從沒有想過停學要怎樣照顧孩子，這是一個悠長的暑假，天氣熱，有流感，不放心外出，在家，功課也沒有那麼多來做，到最後，還是只得看電視為主，尤其由老人家來照顧。他們平日小孩子不在家，可能他們都是看電視打發時間，現在就算有小孩子，也不能期望他們能怎樣照顧孩子，便又只是看電視，長此下去，真的是浪費時間。

其實如果鄰居有相熟的家庭，尤其各自有傭工的，其實可以試下幾個家庭，輪流請假來照顧所有家庭的孩子，例如有三個家庭，每個星期由其中一個家庭的媽咪，帶領著三個家庭的傭工來照顧三個家庭的孩子，負責的媽咪便可以設計一些工作，勞作，遊戲等來讓三個家庭的孩子參與，好過所有孩子都在看電視。每個媽咪請一個星期假，便可以攪掂三個星期，如此類推，也算是個可行的方法。

原帖由 wongpsv 於 09-6-15 16:35 發表
我女係讀半日班架,正如你所講e+由99揍囉...不過就係成日睇電視... 我原本都想佢返學架..一來學校有清潔,二來學校有老師唔多唔少都應有d野學,不過...原來冇得坐校車,又有野食...所以...為有係屋企浪費時間啦... ...

作者: hcshiu 時間: 09-6-15 18:16

忘了交代家長會的事，現階段很難說會否攪得成。最重要的是是否大部份家長認同需要有類似家長會這個組織，我很明白每個家長都很重視自己的孩子，就算沒有家長會這類組織，總之學校會跟進自己個孩子的事便心滿意足，而且大部份家長暫時也看不到家長會可以發揮的功能，但卻自覺沒有空間去參與。另外，學校又未必認同家長會有其必要性，對於溝通，他們覺得也有其他途徑，所以我只能再次向校方提建議，看看他們會不會接受，他們接受，我才能走出來繼續召集有興趣的家長來參與，否則，我只能在其他途徑，尤其是網上，讓家長有多一個途徑來收集和反映意見。

其實在這些特別時候，家長會便可以發揮功能，收集家長意見，反映給學校去跟進，又或在停課前後和校方溝通，反映家長的意向和想法，看家長和學校能在這段時間如何繼續合作教導和照顧孩子。現在沒有家長會，則要靠每位家長自己打電話回校去反映，去得到最新資訊了。

原帖由 hcshiu 於 09-6-15 18:01 發表
我今日下午打過電話回學校，到現在為止，沒有學生回校要學校托管，學校的老師則輪流放假，所以就算回到學校，都不是由自己老師來照顧，課室則在清潔，所以學生回到學校，會安排在校務處內，讓學生做下功課，看圖書。學校保證如果有學生在 ...

作者: tym327 時間: 09-6-15 23:31

我囝囝係全日班,正煩緊停課期間搵人照顧的問題, 睇到hcshiu的內容, 即可以帶小朋友返學校比老師照顧是嗎?
照顧時間是由幾點至幾點呢?
是否平常返學時間咋?
但無午餐提供又係我另一個要煩的問題, 我公司又唔近學校, 點算好????

作者: hcshiu 時間: 09-6-16 01:46

學生可以照番學係政府講明可以咁做，但係其實除非學校係樓下，或有校車，否則其實家長好難比學生回校。多人番又同唔停課無分別，有中招危險，整件事就好多問題比家長去諗。

我問學校，學校話可以由上午九時照顧到下午三點，可能同學校講你既難處，可以照顧到四點，但係幾點都好，都要自己回到學校自己接孩子。至於午餐，如果你唔係係附近，唯有用保溫飯盒準備午餐由孩子帶回學校中午自己食。

全日班理應八月開學，仲有個幾月，而如果停到九月所有學生開學才復課，仲有兩個幾月，就算有老人家或傭工睇著孩子，放暑假就話當係比孩子放假，在家放鬆下，而家停咁耐，如果政府，學校或家長唔好好去安排，都唔知點打發時間，都無可能比孩子日日煲電視架！

原帖由 tym327 於 09-6-15 23:31 發表
我囝囝係全日班,正煩緊停課期間搵人照顧的問題, 睇到hcshiu的內容, 即可以帶小朋友返學校比老師照顧是嗎?
照顧時間是由幾點至幾點呢?
是否平常返學時間咋?
但無午餐提供又係我另一個要煩的問題, 我公司又唔近學校, ...

作者: bearbear2003 時間: 09-6-16 10:59

my boy is also quite boring at home. Have to arrange extra activity for him as well.

作者: ffeeii 時間: 09-6-16 13:33

萬一停到9月,咁学費有冇得退

作者: YYML 時間: 09-6-16 13:49

如果家長真有需要, 應可要求開校車, 我有兩同事就是這樣, 一個是小學, 一個是幼稚園。

全日班的安排真是不知如何是好, 難道要9月先返﹖

作者: hcshiu 時間: 09-6-16 14:49

今天早上我帶了女兒回學校，學校要求要寫封信，我也照寫了一封信給校長，說要讓女兒在學校托管。女兒入學校後，因為只得她一個學生，所以在校務處，其他的職員則繼續工作，女兒則自己看書，畫畫等等，女兒說有電視看，她跟我說我也不知道是什麼，應該合孩子看吧。女兒的班主任沒有回校，我相信其他老師見到我女兒也會談一兩句吧，她們自己都有工作要做，所以沒有特地和她玩。中午的時候我便帶了她離校去吃午餐。因學生得她一個，安排尚算沒有問題。

其實停課很快出現的問題，便是家長會想應不應該交學費，從家長角度，成個月沒有回校，理應不要交學費，但從學校角度，學費是一年來計的，所以停了覺也要交學費。同樣校巴也有這個問題，沒有乘過校巴，家長也會想，不用交校巴錢吧。

停這麼久真的很難照顧，尤其是全日班。他們的暑假只是一個星期，但現在一停課，時間已比暑假長了，全日班的家長又何來安排那麼多活動給他們呢？

原帖由 YYML 於 09-6-16 13:49 發表
如果家長真有需要, 應可要求開校車, 我有兩同事就是這樣, 一個是小學, 一個是幼稚園。

全日班的安排真是不知如何是好, 難道要9月先返﹖

作者: YYML 時間: 09-6-16 17:24

坊間仍有很多活動和興趣班正常, 但一來全日班的停課安排未知, 二來停課就是不想小朋友聚集, 若停了課卻不斷去報活動, 又好似不太好, 真是兩難!

當然學費和車費的問題也是值得關心的!車費是按月提供服務而收費, 如果全月停課, 真是較難說服家長交費, 另一情況是若7月只返半或更少日子, 又是否要交足一個月呢? 學費方面, 我覺得7月要交都無可厚非, 因是一整學年去計, (當然不用交更好!), 但8月就真的是很難說, 當然理性地想亦可以又話是全年攤開, 但感情上總是覺得$$$$, 太浪費了!!!

可能想得太多了, 不如希望疫情快些受控, 小朋友又可開開心心上學去!!

作者: hcshiu 時間: 09-6-16 17:45

其實講到尾，家長都係想盡辦法，令到孩子在這個不知何時完結的假期，能既安全又善用時間地渡過。我自己的做法，也許便是自己有時間便自己找地方和女兒去，去郊遊又好，去參觀又好，如果無時間，便可能帶回學校代為托管一會。希望這段時間快點過去。

原帖由 YYML 於 09-6-16 17:24 發表
坊間仍有很多活動和興趣班正常, 但一來全日班的停課安排未知, 二來停課就是不想小朋友聚集, 若停了課卻不斷去報活動, 又好似不太好, 真是兩難!

當然學費和車費的問題也是值得關心的!車費是按月提供服務而收費, 如果 ...

作者: joaneschan 時間: 09-6-18 21:59 標題: 又一村停課安排離晒普！

我個小朋友就讀全日班K1，上星期四問老師安排事宜時，佢哋已經話活動範圍只限辦事處。我都以為可能要咁樣安排；但係我從電視同朋友口中得知，學校可安排幾個小朋友響課室活動；或者在操場走動。我完全唔明白呢間學校點安排。原本兩星期我都諗住忍吓，但係而家可能要好耐。我忍無可忍聽日返學校問清楚。我覺得校巴都要有，馬叔都要食飯啦。至於午膳幾個小朋友都煮唔到有無攪錯。我唔係第一次返學校嘈，唔係想個小朋友又要適應過，驚佢心理出問題真係想轉校。大家等我消息啦！

作者: hcshiu 時間: 09-6-19 06:55

其實我好明白你既意見，我女之前番去托管了半日，都係留係校務處。今日報紙頭條係停課幼稚園學生跟著媽咪開工，突然衝出馬路被車撞到身亡。我唔係話責任全部係停課呢件事上，但反映很多家長在停課期間係有托管需要。

學校告訴我停課期間，老師們輪流放假，我其實諗，唔通學校要老師放無薪假期，還是而家放左假，預左將來要老師在星期六補番堂？呢Ｄ安排，其實學校都要同家長溝通下。

我其實好想學校可以做到比家長預先通知學校那一日或那一段日子，家長想孩子回校托管，學校就定停課期間，每個課室可以照顧幾多個學生，學校就可以預番開幾多個課室，又可以將同級既學生集合在同一個班房，比一Ｄ手工勞作，工作紙比佢地做，可能每一個課室一個老師已經足够。

衛生方面，入門消毒手，量體溫，帶口罩，平日已有做，停課期間甚至可以要求換鞋，登記學生回校記錄，學生在課室內分開坐，例如每個課室四個學生，就坐四個角落頭，唔會交換用具，唔會有身體接觸，午睡分開很遠來睡，咁家長就可以好放心。

至於午饍方面，學校因為預先知道有幾多學生番黎，可以預定飯盒之類，又或要求學生自備飯盒，到中午幫學生「叮」番熱。校巴都可以預先通知，如果有學生要番學校托管，理論上都應該開既（尤其所有家長都比足校巴錢）。

我覺得而家學校係跟足政府個指引來做，無可厚非，但係從家長角度，學校可以打開方便之門，讓有需要既家長，比學生番去一個衛生安全既校園裡面，渡過有義意既時間。

以上只是建議，如果學校可以同家長合作，真的是幫了家長同學生很多。

正如我之前所說，如果有個組織讓家長互相溝通，就可以將所有家長既意見集合，同學校溝通，而唔洗個別家長同學校慢慢傾。

原帖由 joaneschan 於 09-6-18 21:59 發表
我個小朋友就讀全日班K1，上星期四問老師安排事宜時，佢哋已經話活動範圍只限辦事處。我都以為可能要咁樣安排；但係我從電視同朋友口中得知，學校可安排幾個小朋友響課室活動；或者在操場走動。我完全唔明白呢間學校點安排。原 ...

作者: wongpsv 時間: 09-6-19 11:50

其實我都有諗過停課前老師都有向每個家長通電,話如果停課26號家長日唔好帶小朋友返學...咁如果老師E+亦同每位家長聯絡,問問小朋友係屋企點呀,有冇人照顧到呀...搵到人代揍當然好啦...仲要唔好要另外俾錢TIM WOW...因6月已俾學費...現停課搵人揍又要再俾...起不是仲傷

所以你又講得岩學費又俾左,校車又俾左...所以學校都應該為有需要既家長安排下...

原帖由 hcshiu 於 09-6-19 06:55 發表
其實我好明白你既意見，我女之前番去托管了半日，都係留係校務處。今日報紙頭條係停課幼稚園學生跟著媽咪開工，突然衝出馬路被車撞到身亡。我唔係話責任全部係停課呢件事上，但反映很多家長在停課期間係有托管需要。

學校告 ...

作者: joaneschan 時間: 09-6-19 14:01 標題: 回應停課安排

我今日返咗學校了解情况，佢哋得一個老師同候生返咗學校。我問老師停課期間嘅情况，同點解咁樣安排。佢話：
一)因為學校要全面清潔，所以未能安排課室。但今因已經可以安排因停課影響而無人照顧嘅同學在課室活動。(又會咁啱上嚟問，點解咁安排就清潔完------我心諗)
二)停課期間有幾多老師同小朋友返學?佢話前幾日都有四五位老師返學；同呢個期間得一位小朋友返咗學校。點解今日得一個老師返學，無嬸嬸同工友?佢話因為之前要清潔學校，校長體會老師同員工嘅辛苦，所以安排放假等佢哋休息吓。(又會咁啱上嚟問就得一位老師同員工返工------我心諗)................再下幾千字同解釋。
但最後我講咗意見畀老師，佢話會同校長講盡快安排好。包括停課期間嘅校巴同膳食安排，佢話星期一前覆我。我個小朋友係全日班嘅，我都同老師講希望安排可以通知其他全日班嘅同學。因為我都唔想返去得我一個小朋友，亦希望真係有需要先返去。有流感病徵就唔好返啦，要有公德心。希望學校有好消息啦，我星期二都會要我個小朋友返學啦！

作者: YYML 時間: 09-6-19 14:11

我有同事, 一是小學, 一是幼稚園, 學校都有校車給他們回校的小朋友, 都是一車得小朋友一個. 當然這都是他們"爭取"回來的, 有需要的家長應可同學校"商量".

不過, 我同事的幼稚園囡囡, 返完很不開心, 決定不返了, 其實我同事是有工人的, 他是心痛d學費才要個囡返, 我覺得何必要這樣呢!

但如果你真是有需要, 我認為絕對可爭取較好的安排, 校車和午餐這些問題的我相信只在乎學校是否願意安排, 可能學方驚安排得太妥善, 會"吸引"太多學生回校.

作者: teacherkg 時間: 09-6-19 16:14

有些問題相信我可以提供一些意見,因為現在很多幼稚園都會這樣做:

1. 學校現在安掛老師放假,並非無薪假,只是將暑假的假期提前到現在放,因大家都不知道何時復課,如果7月才復課學校便有可能將半日班的暑假延後,那麼老師在7月便不能放假了,所以學校只是將老師在7月的假期提前現在去放,7月便不可放假了!

2. 至於午膳問題,其實學校真的處於兩難的局面,學校當然可以單單為幾位回校的小朋友去預備,不過這便牽涉到公平的問題,因為有些沒有帶小朋友回校的家長會覺得蝕底了(之前此校的確有家長投訴過!),他們會覺得我沒有帶小朋友回校就享受不到學校的午餐,但我有交午膳費的呀,這不是不公平嗎?

又如果學校真的為小朋友煮午餐的話,可能真的有家長本著"不要蝕底"的理念回校的,那變相是吸引了很多小朋友回校,加上並非所有家長都是有公德心的麻,小朋友病了感冒咳嗽都會照樣帶返校,那豈不是令學校很容易變成了流感疫區?

當然學校可以請小朋友自己帶飯盒回校,但我印象中學校是沒有微波爐此設施的!因為老師和小朋友平時的午餐都是學校自家廚房煮的,學校根本不需要用微波爐呀!

又或者家長肯讓小朋友停課期間每天都吃微波爐飯盒嗎?相信又有一部份家長不滿的了!所以學校究竟怎樣做才可以滿足所有回校與不回校的家長的要求呢?

3. 這次停課其實時間上真的比較突然,上星期四還要上學,星期五便即宣佈停課了,學校又怎能在短短的一天內統計有多少學生於停課期間會回校呢?而且並非所有家長有預先計畫,有些可能都是臨時或即興的!

所以,學校有些安排可能真的並非很完善,我認為此問題其他學校都一樣有,只是家長不知道罷了!我覺得大家可以和學校多些溝通,有不滿可以反映,但請保持禮貌,不要下下都返去嘈!學校自有其難處,大家要互相體諒,多些溝通呀!

[ 本帖最後由 teacherkg 於 09-6-19 16:25 編輯 ]

作者: hcshiu 時間: 09-6-19 17:09

因為我個女係全日班，而由我自己去照顧，所以個女同埋我自己每日既生活，學校就佔有一個好大部份，囡囡其他課外活動都係附加在學校生活之上，而家囡囡無學番，有Ｄ課外活動又暫停，所以我就要用更多時間照顧囡囡，所以我就要用埋自己工作既時間來陪囡囡，自己既工作就無咁多時間，對我既工作影響都幾大。如果囡囡可以番番學校，我就可以容易Ｄ來平衡工作同照顧囡囡。

我既工作地點係又一村學校附近，所以我唔介意自己如常帶女兒上學放學，就算自己要中午帶午餐都無所謂。

對於點解要帶囡囡回校，原因係我唔想佢留係屋企無所事事，生活習慣會改變，又唔想留囡囡在家比傭工照顧，因為我覺得傭工唔識照顧囡囡，要找老人家親人照顧，又唔想打攪佢地，所以如果可以番學，在安全既情況下，我都想囡囡番。睇番呢幾日，我都有自己帶囡囡出出入入，乘車多兩轉，反而仲易中招。

我希望學校方面可以同有需要既家長傾下點樣照顧學生，等學生又開心，又唔無無謂。

原帖由 teacherkg 於 09-6-19 16:14 發表
有些問題相信我可以提供一些意見,因為現在很多幼稚園都會這樣做:

1. 學校現在安掛老師放假,並非無薪假,只是將暑假的假期提前到現在放,因大家都不知道何時復課,如果7月才復課學校便有可能將半日班的暑假延後,那麼老 ...

作者: teacherkg 時間: 09-6-19 18:22

原帖由 hcshiu 於 09-6-19 17:09 發表
因為我個女係全日班，而由我自己去照顧，所以個女同埋我自己每日既生活，學校就佔有一個好大部份，囡囡其他課外活動都係附加在學校生活之上，而家囡囡無學番，有Ｄ課外活動又暫停，所以我就要用更多時間照顧囡囡，所以我就要用埋自己工 ...

校車方面我覺得學校能力範圍之下,是可以安排接送的,但因為要同校車公司方面商量,看看兩者時間上是否可以配合,始終現在回校的小朋友並不多,加上每位小朋友住處都不同,可能一個住九龍一個住新界,學校便不能集中在一起接送了!

如果一個小朋友安排一架校車接送,若4個小朋友的住處是分佈於港九新界各區,那豈不是要安排4架校車獨立接送?

午餐方面不是所有家長都能親自送去的,那怎麼辦?

其實學校和家長兩方面都各有難處,所以大家要好好溝通一下,有商有量找出解決的方法,不要覺得自己交了學費便要學校全盤服務自己,迎合自己的所有要求,一有不滿便立即返學校嘈!學校和家長的關係不是主僕,學校不是用來serve家長的,家長和學校的關係如果不好,受苦的只會是自己的小朋友!

作者: hcshiu 時間: 09-6-20 01:14

我很同意teacherkg所講，唔好當學校是一個提供服務機構而家長同學生就係客，咁樣好多野就只會睇見眼前，凡事都以錢作衡量，咁樣學校同家長又點可以合作教好孩子呢？

對於停課方面，我相信已經停了一個星期，我建議學校的班主任打電話比每一個學生家長，問一問家長停課以來有無問題，有無野要幫，跟著將大部份學生都面對既問題同期望，同其他同老師和校長商量；希望學校能更幫到家長同學生。

而家政府以乎要說提是放暑假，學校便要預先假設在八月，九月復課，跟著向家長提出學校在不同情況下的應變方法，等家長可以放心Ｄ，更容易計劃。

原帖由 teacherkg 於 09-6-19 18:22 發表

校車方面我覺得學校能力範圍之下,是可以安排接送的,但因為要同校車公司方面商量,看看兩者時間上是否可以配合,始終現在回校的小朋友並不多,加上每位小朋友住處都不同,可能一個住九龍一個住新界,學校便不能集中在一 ...

作者: teacherkg 時間: 09-6-20 14:20

原帖由 hcshiu 於 09-6-20 01:14 發表
我很同意teacherkg所講，唔好當學校是一個提供服務機構而家長同學生就係客，咁樣好多野就只會睇見眼前，凡事都以錢作衡量，咁樣學校同家長又點可以合作教好孩子呢？

對於停課方面，我相信已經停了一個星期，我建議學校的班主任打 ...

相信現在很多老師都仍是放假中,我想當老師放完假便會開始打電話給各家長關心一下吧!又一村學校的老師都很盡責的,所以我覺得學校在可能的情況下,都會提供一些方便給家長!

停課時期方面真的很難估計,如果很好運地近幾天都沒有太多個案時,政府會否復課呢?又或者延遲至7月才復課?其實一些小學都未考完試,會否小學可以返學,幼稚園繼續停課呢?

作者: hcshiu 時間: 09-6-22 04:43

其實我很信任又一村的老師是盡責的，但是學校在停課期間的安排，則沒有詳細向家長溝通，令到部份家長，要自行打電話回去，甚至要親自回去問，我倒覺得，如果學校可以在停課初期向家長溝通，令家長知道學校在這段期間會做什麼，有什麼事可以幫到家長，我相信家長一定會很放心。

這和之前和校長談時的情況一樣，校長會說如果家長有意見，可以打電話回學校跟班主任說，甚至跟校長說，所以學校可能也會覺得家長可以打電話回校，學校會詳細說明會有什麼停課安排。學校心想的和家長期望的其實有分別，所以如果停課安排如果能首先資詢家長意見，我相信定能更幫到家長，家長亦更放心。

到現在，幾個問題還是沒有公報學校如何去做，例如在學校網頁上公報，要家長打電話回學校問。例如畢業禮的安排，學校在停課期間，如果有學生回校，學校會有什麼照顧，可以容納多少學生，午饍校巴的安排等等。希望不要留到家長日才跟家長說，否則，家長日就會用左好多時間來講關於停課既事，如果學校在家長日之前做好資詢，家長日便可以向家長公佈，也會少點在家長日才回到學校訴苦的家長。至於會否因為學校安排太好，而令到很多學生回到學校，我相信家長會根據學校的安排，看看自己是否會讓孩子回到學校去。

對於全日班七八月的安排，我真的有點擔心，如果政府說要停課，則這兩個月的學費，從家長角度，是白交的，我相信很多家長明白是要交，但心理上還是會覺得不願意，另外，學費交了，反而又要在外面找暑期活動給孩子，兩面都要比錢，家長就更難克服自己去交這兩個月學費。我已聽到有家長說，沒有回校便不交學費，我說學校要照開，老師又要出糧，對方則說，老師不如就放無薪假，我則說，無理由這些天災要由老師來背負這個損失，再者，學校還是有其他支出，如水電租等等，都要由學費中支持。我們的政府是個弱勢政府，唔知當很多家長說停課不交學費，會不會由政府來代支呢？因為市民已有概念是，香港如果因有天災有損失，理應由政府來負擔，不應由學校，由家長來負。

學校（我指一般幼稚園）一方面想家長照交學費，一方面不想學生回到學校去，真的很矛盾。所以我寧願又一村高調一點走出來告訴家長學校有什麼安排，讓家長覺得學校是在盡力幫家長照顧學生，學生回到學校，學校又用最安全的方法，減少學生間的傳染。現在每班二十到三十個學生，如果每班有一到兩成學生回校，即每班最多有四個到六個學生，現在看這個豬流感的情況，只要小心做好個人衛生，一個這樣大的班房，兩個班主任加上最多六個學生，應該很安全，我自己則覺得，除非學生不出門口，除非每個家人都做好個人衛生，否則只要家人在外面工作染病，孩子還是會中招。如果孩子會出街，參加暑期班，到公園會所玩等等，其實中招的機會，比在回學校要消毒手，帶口罩等等，機會還要大。

看到香港越來越多人中招，但政府所做的反而越來越鬆，我倒不知道會否最後反而會說，中學只有那些有確診的才停十四日，其他的中學不停，跟著小學如是，最後幼稚園也是這樣。這個豬流感已在香港成風土病，其實看來和一般流感一樣，市民倒不能為此而影響日常生活，反而提醒每個人做好個人衛生。

我不是醫生，不敢說香港應否如美國一般，當做無事。但現在看來，停課對所有家長來說，影響真的不少，也打亂了很多安排。

原帖由 teacherkg 於 09-6-20 14:20 發表

相信現在很多老師都仍是放假中,我想當老師放完假便會開始打電話給各家長關心一下吧!又一村學校的老師都很盡責的,所以我覺得學校在可能的情況下,都會提供一些方便給家長!

停課時期方面真的很難估計,如果很好運地近 ...

作者: babababy 時間: 09-6-22 17:33

我也是又一村學校K1的家長,我本來是要返工的,雖然返半天,但這是一份很難得的工作(可以兼顧仔仔,家庭,工作).結果,現在不得不停工在家,他也很無聊,我的時間也很難過,更慘的是,不知還要停課到什麼時候,本來公司的工作影響已經很大,這樣一來,老闆可能要重新請人,我隨時連份工都失去!

作者: teacherkg 時間: 09-6-22 17:34

原帖由 hcshiu 於 09-6-22 04:43 發表
其實我很信任又一村的老師是盡責的，但是學校在停課期間的安排，則沒有詳細向家長溝通，令到部份家長，要自行打電話回去，甚至要親自回去問，我倒覺得，如果學校可以在停課初期向家長溝通，令家長知道學校在這段期間會做什麼，有什麼事 ...

相信很多家長和小學,幼稚園等都不願意停課,首先今次停課在時間上已很突然,大家都很難預計政府會突然宣佈即刻停課的,此舉真的打亂了所有家長和學校的安排,雖然學校在事前已討論過一旦停課應如何做,但突然停課又的確令學校有些措手不及!

其次今次的停課,時間上又很接近暑假,相信很多學校都未完成下學期的課程,有些小學更未考完試,不上不下的真教學校十分難做呢!

不過站在政府的立場,始終以sars作為借鑑,以安全為至上,如果不停課令很多小朋友受感染的話,政府可不想背上這個罪名!現在可好了,所有責任便推在學校和家長身上,政府已勸阻家長帶小朋友出街的了,家長要帶他們去玩,最後不幸染病是家長的責任,罪不在政府!

可是最近天氣這麼熱,不是每個家庭都如香港那些高官般有幾千尺屋住,冷氣長開,有工人差遣吧?小朋友屈在炎熱的蝸居內如何渡過這個加長版的暑假?當然這又是你們自己的事,關政府什麼事呢?

作者: joaneschan 時間: 09-6-22 23:21 標題: 停課回應K1學生

我上星期五回校了解後，學校回覆一樣三幅屁。今日直上學校同校長對話。佢話校巴服務一定停；佢哋嘅解釋我都好接受(因為校巴公司早上為學校服務完，中間時間有其他工作；可能有其他人會乘搭，所以消毒車廂工作未必做得到。)所以自己帶回校及接放學。不過我返工地點響油麻地而且返8:45，所以學校可以畀我小朋友8:00或8:15返去。至於膳食我叫學校幫我小朋友叫外賣，佢哋話有乜問題自已負責。OK啦無嘢係十全十美嘅，小朋友一餐半餐外賣對我嚟講OK啦。而小朋友活動範圍己經唔在只限Office，因為大部份課室而清潔及消毒好；所以可以入課室活動。一個課室只限十位小朋友，當然都係玩吓玩具睇吓VCD唔會教小朋友其他嘢。
我聽日會畀我小朋友返學，因為我個小朋友係全日班；我再放唔到假啦。不過希望大家真係要有公德心，有病真係唔好返，同你肯定自已有需要囉，唔好因為怕蝕抵。
最後我最嬲係，校長話呢段停課期間只有我一位家長返學校嘈。我唔明點解你哋淨係識得響度講唔返學校理論呢？我估一個人嘅力量畀起幾廿人嘅力量好囉。請大家自我反醒！

作者: hcshiu 時間: 09-6-23 03:44

我好明白又要照顧孩子，又可以做番半日工，幫補下又好，Keep住同個社會有接觸又好，係一件好事，但就真係好難找到呢類既工作，所以如果你現在做緊，真的要好好珍惜。跟學校溝通一下吧，看看你會否讓你的孩子回去番下學，玩下。

原帖由 babababy 於 09-6-22 17:33 發表
我也是又一村學校K1的家長,我本來是要返工的,雖然返半天,但這是一份很難得的工作(可以兼顧仔仔,家庭,工作).結果,現在不得不停工在家,他也很無聊,我的時間也很難過,更慘的是,不知還要停課到什麼時候,本來公司的工作影 ...

作者: hcshiu 時間: 09-6-23 04:18

其實可以說，幼稚園就應該會當開始放暑假，對於全日班既家長，原本暑假都係得一兩個星期，家長就只會預要那段時間安排同請假，但停課到而家，已經可以說差不多等如放暑假咁長。我相信家長想孩子讀全日班既其中一個原因，就係因為自己要工作，想孩子在學校活動，總比較好。而家無了期停課，這個需要性必定不斷增加。

我由停課到而家，都有打電話回校同學校溝通，也將消息在這裡同大家講，而我個女就真係曾經番過學校，由學校托管，只不過她當日只能留在校務處，同在操場玩了一會車仔，其他老師和職員都有自己野做，所以係無一個人特登陪佢玩。所以而家我問囡囡番唔番學校，佢就話唔想，但如果可以到課室去，她就肯。我昨天都有打電話番去，應該係伍姑娘同我講既，佢話如果得一個學生番，就會留係校務處，我都理解，如果唔係，一個老師加一個學生在課室，老師行開行埋，學生都要跟著。

至於衛生方面，我就覺得學校平日都已經做得很好，我反而覺得，學生在學校習慣帶口罩，餐前餐後洗手，應該做到足，而家我在家還有每日量體溫，如果每位家長都有咁做，一定知道當天孩子有沒有發燒，才會讓孩子回到學校去，否則也應讓孩子留在家，多點休息，如以番的學生，番到學校，學校又會再量多一次（至少正常番學會咁做），所以我很放心，如果學校比學生留在學校，一定睇過學生沒有流感既病徵，又帶哂口罩，應該很安全。

我覺得大家應該反省的是，家長同學校因為沒有一個比較formal既組織，可以一開始停課就同學校溝通，跟著學校或這個組織，可以向所有家長發佈家長想知道既資信，我相信個別家長打電話回去，又或自己回去問校長，感覺就唔一樣，由學校主動發佈，家長會覺得學校較關心家長和學生在停課期間的安排，而由家長主動打電話或自己回去問，則感到學校比較被動，伙伴的感覺也低一點。所以如果可以停課一早便有家長代表同學校溝通，跟著將安排公佈，所有家長都會因此而受惠。感覺也好得多。

原帖由 joaneschan 於 09-6-22 23:21 發表
我上星期五回校了解後，學校回覆一樣三幅屁。今日直上學校同校長對話。佢話校巴服務一定停；佢哋嘅解釋我都好接受(因為校巴公司早上為學校服務完，中間時間有其他工作；可能有其他人會乘搭，所以消毒車廂工作未必做得到。)所以 ...

作者: ChongChong28 時間: 09-6-23 20:03

救命呀...提早暑假~~~對一般交10個月學費的半日制幼稚園學生,可能有D影嚮,但我個女K1全日制(要交近三千元的學費)

點算好!!!!!!!!!!!!??????????? 六月返了9天,七月八月又要勁蝕,兼無所事事,浪費時光,我心理生理都不能平衡!!!!!

學校可有更妥善的安排嗎????

作者: hcshiu 時間: 09-6-23 20:56

首先我地要考慮的是，究竟全日班既暑假包唔包八月。以學年來說，全日班的暑假原本只有七月尾個星期，八月己經是零九至一零年學年。我地根本唔知政府心目中係唔係八月就可以復課，就算而家話係八月開新學年，當時既情況又唔可以開學。呢Ｄ大家都未知。

我想學校同家長都要有幾手準備，八月開學？九月開學？還是連九月都仲未開學？我都會跟學校溝通下，有消息跟大家說。

原帖由 ChongChong28 於 09-6-23 20:03 發表
救命呀...提早暑假~~~對一般交10個月學費的半日制幼稚園學生,可能有D影嚮,但我個女K1全日制(要交近三千元的學費) 點算好!!!!!!!!!!!!??????????? 六月返了9天,七月八月又要勁蝕,兼無所事事,浪費時光,我心理生 ...

作者: joaneschan 時間: 09-6-23 21:35 標題: 停課

我個小朋友都係全日班，今日返咗學校。OK啦，因為我個仔話有兩個小朋友返，我問過老師；一個全日班另一個下午班加埋我個仔，3個小朋友。我唔會齋問老師，我個仔話響課室活動同出咗操場玩車。佢開心喎！膳食我叫外賣囉。之後安排我估會跟校曆表一樣。

作者: ChongChong28 時間: 09-6-23 22:08

我都想孩子回校,但希望校方會妥善安排活動,午膳及有意義的學習,希望hcshiu能跟校長反映溝通,我真不想孩子浪費美好的學習時光!!

[ 本帖最後由 ChongChong28 於 09-6-23 23:08 編輯 ]

作者: teacherkg 時間: 09-6-23 23:21

這段期間學校是很難安排什麼活動的,因為不可以教書,否則對沒有回校的學生不公平,所以學校只可以和小朋友玩玩,畫畫,又或講故事等非常規的東西,其實這也沒有辦法呢!

作者: hcshiu 時間: 09-6-24 00:19

原來唔只一個小朋友番，咁我就放心比我個女在某些我自己真的沒有辦法照顧時，帶佢番學校玩下，咁我又會更放心去番工。我很明白學校不能教書，因為會有家長覺得唔公平，同學費但學不同既野，這個我理解，而且又好像要鼓勵家長帶學生回校。

另外，我都明白家長在這段期間真的很頭痛，很想好好利用這段期間去教好孩子，至少不致於虚渡這段曰子。自己教是可以，但是何來教材？出去上堂，又怕中招，孩子不外出，少運動，又睡晏左，可能又會增肥，這麼長的停課，到復課能否適應呢？很多這些問題很快便會浮現吧。

我想我會帶女兒到學校時，找校長談一談這個問題，帶孩子回校的想有好的照顧，不要在學校無無謂謂，至於不能帶孩子回校的，又想學校對他們的孩子有支援。

有消息會跟大家談吧。

原帖由 teacherkg 於 09-6-23 23:21 發表
這段期間學校是很難安排什麼活動的,因為不可以教書,否則對沒有回校的學生不公平,所以學校只可以和小朋友玩玩,畫畫,又或講故事等非常規的東西,其實這也沒有辦法呢! ...

作者: kabobo 時間: 09-6-24 07:04

joaneschan

我很同意你將困難向學校反映，有事大家有商有量，老師又能夠靈活咁同你就時間照顧你返工，幾好吖！唔錯！大家坦誠溝通是雙贏的，好過轉轉折折靠D組織，D嗰又喺社會上好多家長嘅問題，應該比D時間人哋安排吓先講啦，幾乎做埋人哋頂頭老細咁去質問人、教人點做，咁就唔喺咁好嘅！

作者: hcshiu 時間: 09-6-24 10:56

我都好同意，個別家長有特別的情況，絕對係應該可以直接同學校商量。至於是否要經任何組織，我則覺得不需要。但係對於整體性既問題，例如有無停課期間回校既指引，停課期間在校內的安排，停課期間留在家中學生既支援，是否仲要日日量體溫復課時交，停課時餘下課本是否要完成，呢Ｄ問題，我相信學校係會為家長好好著想，但係學校在研究過程中，也許要些家長意見，咁學校自己找家長，又可能會顧此失彼。

所以我始終係果句，如果有個比較Formal既組織，例如家長會，學校要問家長意見，可以透過個會，至少有幾個核心聯絡人，做得家長會，又有義務同其他家長溝通。其實係可以減少學校既工作。但唔係話每一件事都要經一經家長，永遠都不會這樣。

而家K2既家長好想找K3家長問下升小學揀小學既意見，但係個別家長又點可以找到K3既家長來問呢？如果有類似家長會既組織，一年接一年，至少可以找到家長會內K3既成員，再由這些家長找其他K3家長，跟著用家長會既名義向學校借個課室來攪個分享會。又例如如果可以找到一些講者，可以來講下點教孩子，點揀學校，佢地唔一定要收錢，但係就一定要有個名義去請他們來，同埋要有地方，咁有個會又可以這樣做。很多類似既事，如果個別家長想做，係好難做既，有個會，家長之間同埋與學校之間多些溝通，好多事做起來都方便Ｄ。全部由學校來辦，只會令老師更多工作，所以很難做到，也不能期望她們去做。

至於有個組織會唔會比學校好大壓力，我又唔會咁諗，學校唔係話要所有野都要問過家長會，家長會只會做到資詢既角色，家長會又唔會日日有個人在學校睇著間學校點運作，反而當學校更能清楚家長既意見，又或可以向家長預先解釋某些項目既前因後果，可以大大改善溝通。

講番轉頭，我今日都有比囡囡回到學校，回到學校已有另一個同學番到，跟著我囡囡就跟伍姑娘入了課室，地下近樓梯的那一個課室。所以就算一個學生回校，學校都會開個課室比佢地入去玩，另外，今日打電話回去，才知道要穿校服，上次我囡囡回去沒有這樣要求，這不要緊，如果明天再番去，便穿校服吧。午餐我會自己帶食物去給囡囡吃，而另一位學生，聽說自己已帶了午餐。

原帖由 kabobo 於 09-6-24 07:04 發表
joaneschan

我很同意你將困難向學校反映，有事大家有商有量，老師又能夠靈活咁同你就時間照顧你返工，幾好吖！唔錯！大家坦誠溝通是雙贏的，好過轉轉折折靠D組織，D嗰又喺社會上好多家長嘅問題，應該比D時間人哋安排吓先講啦 ...

作者: Sailo 時間: 09-6-24 12:15

很高興有這麼有心的家長, 很難得, 因為, 義務工作, 真的需要有很大的熱誠及那份心!

我很同意, 亦見得您的意見很全面及絕對關顧學生及家長層面出法! 這是理想的! 有些學校, 真的提供正如您所講的支援給予學生及家長, 我會留意得到, 他們本身學校都有著不同具規模的支援, 所謂規模, 如有小學部或者教會的支援, 所以, 無疑他們會較有能力, 在這方面較有優勢, 這是事實及可見的. 對於又一村, 以他們辦學的歷史以及現有規模下對學生家長的溝通表現，可算做得很好了. 至於能否更跨進, 這點, 的確受制於本身的規模!

家長會對學生及學校來講是正面的. 成立將會是長遠性, 如何確保他的延續性, 真的有懶家長的熱誠及學校的支持. 有些事, 到達了成熟程度, 每每應運而生!

個人認為, 學校絕對知道家長的需要, 以數十年辦學經驗, 怎會不知呢? 問題是, 現在人人也講透明到高, 訊息傳達要快, 如學校能做到以上兩點, 的確會令家長得到最快的安心.

要明白, 安排每每不能完美地達至人人所想, 如果學校做到一些增值的支援, 我會非常驚喜同欣賞. 可能自己個要求set得比較基本。如本身有疑問, 第一身致電學校, 以3年相處的經驗, 每次都會給予快而安心的回應及安排!

Anyway, 真的好欣賞一班有心家長!

原帖由 hcshiu 於 09-6-24 10:56 發表
我都好同意，個別家長有特別的情況，絕對係應該可以直接同學校商量。至於是否要經任何組織，我則覺得不需要。但係對於整體性既問題，例如有無停課期間回校既指引，停課期間在校內的安排，停課期間留在家中學生既支援，是否仲要日日 ...

作者: hcshiu 時間: 09-6-24 14:53

其實在我心目中，想組織家長會之類的組織，不單是為了和學校多溝通，還有家長間的溝通。和學校的溝通最多是三年，家長間的溝通卻可以是很長遠。教養孩子這條路真的不易行，如果能有同途人互相支持，互相幫助，有傾有講，孩子間的友誼可以維持下去，其實是一件很好的事。

由我跟校長談家長會，到現在，在不同的途徑，和學校，和家長談了很多，感到是，學校不太明白為什麼要有，現在的溝通已很好，家長一有事便可以打電話回學校，可能老師又怕家長會會給她們更多的壓力，部份家長的意見是，現在我可以自己打電話回校，談什麼也可以，為什麼要經一經一個組織，又或家長感到照顧自己孩子已不容易，為何還要參加一些組織，怕會應付不來，他們的著眼點是自己的孩子，只要能跟學校溝通有關自己孩子的事，已足夠，其他的，他們也理不到。

心想，千里之路，始於腳下，一個會不會突然走出來，也不會一開始便萬事俱備，大家都要摸索，讓它一年一年的轉變成更適合又一村學校及其家長的。但不知是否真的要順天應命，做一件事，如果沒有天時，地利，人和，可能真的不能勉強。

我不期望所有家長和學校都認同，但是希望有心的家長可以走在一起，是否是一個會不重要，這班有心的家長如果可以在孩子還在又一村時，能一起為學校作出點點的貢獻，在孩子離開又一村時還能保持聯絡，在孩子小學，中學期間，互通消息，互相幫助，另外，我相信，如果是認同又一村教育理念，和有心的家長，想法其實應該差不多，如果可以維持，這班家長的孩子也可以有一班背景和想法差不多的同學仔，一同成長。

想還是想組織下去，但是否成組成，則要看學校的態度和家長間的共識了。

原帖由 Sailo 於 09-6-24 12:15 發表
很高興有這麼有心的家長, 很難得, 因為, 義務工作, 真的需要有很大的熱誠及那份心!

我很同意, 亦見得您的意見很全面及絕對關顧學生及家長層面出法! 這是理想的! 有些學校, 真的提供正如您所講的支援給予學生及家 ...

作者: ChongChong28 時間: 09-6-24 16:10

我認同hcshiu對家長會的定位.理念.功能性,有承担的家長都是從愛孩子愛學校而出發,希望yyc更進步更上一層樓,讓校園不只有綠樹清風,更能桃李滿門...孩子在沃土中成長!!!!

作者: ChongChong28 時間: 09-6-24 17:14

Good News!!!!

( from the school web site )

各位家長：

因教育局在6月11日宣布全港幼稚園、幼稚園暨幼兒中心及小學(包括私立獨立學校、國際學校及英基學校)，以及特殊學校(只設中學部的群育學校除外)由6月12日(星期五)至6月25日(星期四)停課14天。鑑於近日人類豬型流感在本港的發展，本土個案趨升，病毒在社區活躍度明顯增加，大量年幼學童長時間聚集在校園會增加爆發風險，而幼童染病的後果比較嚴重，教育局經與衛生當局審慎研究後，宣布上述學校於本學年將不會有復課安排。

就有關人類豬型流感繼續停課事宜，本校茲作出安排如下：

1.半日班已繳交之七月份茶點費，於6月26日(星期五)退回家長。

2.半日班已繳交之七月份校車車費，於6月26日(星期五)退回家長

3.本年度高班畢業聚餐將會取消，有關聚餐費及DVD費用，於6月26日(星期五)退回家長，請家長當天到校務處辦理有關手續。

4.各班幼兒之暑期作業、文具及用品，於6月26日(星期五)派回家長，但因物品數量較多，請家長自備環保袋或手抽袋一個。

5.全日班須於7月6日(星期一)前將學費存入銀行作自動轉賬(學費$3,350，扣除學券$916，金額為$2,434)，而七月份之午膳及雜費則無須繳交。(學券資助會照常發放)。

6.2009年度學費將不作調整：
半日班學費全年為 $22,300(分十期繳交)，另每月茶點費 $160；
全日班學費全年為 $40,200(分十二期繳交)，另每月午膳雜費 $450；
2009年度學券資助金額為 $12,000。

7.2009年度開課日期暫定不變，但須留意教育局最新公布：
升 K2/K3 全日班8月4日(星期二)，一時正放學。
升 K2/K3 半日班9月1日(星期二)，照常放學。

8.本校按教育局指引，為減低流感感染之機會避免大型聚集，因此，2009年8月27日及8月28日升K2及K3之家長會分班在課室進行，至於所屬班別及課室，老師會於開課前一星期致電通知家長。

9.在全日班繼續停課期間，由現時至7月20日(星期一)，學校會安排適量的教職員當值，家長如暫時未能安排親友照顧子弟，歡迎致電本校 23812949 或電郵 [email protected] 聯絡，本校會盡力協助安排幼兒10人一班（兩人一組）在課室閱讀或觀看益智影片。
惟因校車及午膳已停止提供服務，為方便家長起見，本校只安排簡單午膳，在此停課期間家長無須繳交午膳及雜費，但家長必須自行接送貴子弟回校，學生亦必須穿著整齊校服及戴上口罩方可進入學校，而家長每天亦須替子女探熱。
(倘若回校之學生染上人類豬型流感或傳染病，屆時本校將會根據衛生署指引停課14天，假如對新學年復課是有所影響，本校會於網上或電話知會各家長。)

10.由7月21日(星期二)至7月31日(星期五)此停課及全日班暑假期間，本校會進一步消毒校舍以保障新學年幼兒之健康。

如家長有任何需要或協助之處，本校定當盡力為各位效勞，歡迎致電與本校聯絡。

[ 本帖最後由 ChongChong28 於 09-6-24 17:18 編輯 ]

作者: hcshiu 時間: 09-6-24 20:44

今日接囡囡離校，老師提我要看學校網頁。這個通告交代得很好很好。

原帖由 ChongChong28 於 09-6-24 17:14 發表
Good News!!!!

( from the school web site )

各位家長：

因教育局在6月11日宣布全港幼稚園、幼稚園暨幼兒中心及小學(包括私立獨立學校、國際學校及英基學校)，以及特殊學校(只設中學部的群育學校除外)由6月12日(星 ...

作者: joaneschan 時間: 09-6-24 22:56 標題: 各位家長請注意

首先要多謝Kabobo對我的回應，我都係返學校嘈返嚟o嫁。
chongchong28，你都幾攪笑，copy返份通告叫good news。聽講今日全部家長都接到電話知道啦！
呢間學校最差係個校長，因為最後所有決定都係佢。
今日出嘅通告裏面，我覺得最好係第9點"在全日班繼續停課期間，由現時至7月20日(星期一)，學校會安排適量的教職員當值，家長如暫時未能安排親友照顧子弟，歡迎致電本校 23812949 或電郵 [email protected] 聯絡，本校會盡力協助安排幼兒10人一班（兩人一組）在課室閱讀或觀看益智影片。惟因校車及午膳已停止提供服務，為方便家長起見，本校只安排簡單午膳，在此停課期間家長無須繳交午膳及雜費，但家長必須自行接送貴子弟回校，學生亦必須穿著整齊校服及戴上口罩方可進入學校，而家長每天亦須替子女探熱。(倘若回校之學生染上人類豬型流感或傳染病，屆時本校將會根據衛生署指引停課14天，假如對新學年復課是有所影響，本校會於網上或電話知會各家長。) "如果響政府宣佈停課嗰日或第二日有呢個安排，我諗D家長應該唔會咁頭痛。
佢哋以上嘅安排係我19/6上學校同校長嘈佢先有咁嘅安排，所以我星期一己經帶仔仔返學；好彩重有兩個小朋友所以先無咁悶。但係我都有同校長講叫佢要通知其他家長，亦希望重點話"真係無人照顧同有需要先好返"。同埋一定要無病先好返學。但係我都希望各位唔好抱住驚蝕抵嘅心態返學。
至於通告內容我都有再向校長提出等緊回覆。我覺得學費一定要交，當日你選擇呢間學校嘅時候己經知道要交十二個月學費，所以呢D無為同佢拗。至於車費同膳食我向學校要求退回六月份一半費用；老實講按日子我哋D家長都蝕D o嫁。開頭佢哋重解釋，後來先話商量吓。
呢間學校講就話非牟利，其他就牟利到嘔。齋講來年留位費：其他學校家長肯訂課本同交雜費己經OK，就算去到D牟利嘅幼稚園最多要家長交多半個月學費。又一村呢間好似長期要等錢周轉咁。
另外有一個家長回應話"其實學校D安排都有兩手準備"。你就錯啦。我嗰日同佢講"政府一定唔會復課，你會有乜安排？"個校長淨係識攞份教育局指引畀我睇，左解釋右解釋。又話要等孫明揚決定咗先開會都唔知做乜。
其實我問過晒好多朋友，佢哋話有一D幼稚園完全無浪費家長所交嘅費用。例如：
學之園:佢哋一早為停課準備。叫家長準備一支USB，由12/6開始叫乘搭校車嘅家長去返上車同落車點交收每日功課同USB。而無乘搭校車嘅家長就收E-mail。咁樣校巴車費又可以用返，校巴公司收入又唔洗惨。而USB內容係老師每日會錄影小片段，教一D小勞作、講短故事或唱歌。咁樣又可以畀D小朋友每日都見到老師，又畀家長覺得唔會浪費咗D學費。
聖公會荊冕堂士德幼稚園:佢哋第一日經己通知家長，每個課室只可以容許5位小朋友，必須帶口罩。同埋睇返嗰位小朋友本身屋企係唔係真係無人照顧。
我都係收集各間學校做法再返又一村講。你哋話呢間學校有幾好。如果唔係我個仔係D坐唔定鍾意走嚟走去，同佢好鍾意間學校好大、好多車，我今年升K2就想轉校。
最後我想問有無家長識得響Facebook到建立組群。因為我唔識呀！我希望可以響facebook到建立一個"又一村學校家長"組群，等以後可以聯絡或者電話聯絡就好，唔洗要打咁大篇嘢呀！

作者: ChongChong28 時間: 09-6-24 23:37

joaneschan,

下午我偶然上yycs的網頁,(當時仍未收到老師的電話),"發現"了新通告,詳閱後感覺校方的新措施相當妥善,因為在首段停課期間校方的安排未能盡如人意,但今次新措施的確頗能平衡到家長,學生及校方的需與求,所以才把通告copy,並post在這裡~~以good news跟各家長通傳分享,然而卻被你定性為 "幾攪笑",心裡有難受之感!!!

hcshiu已在facebook建立了又一村學校家長
組群.

[ 本帖最後由 ChongChong28 於 09-6-25 00:04 編輯 ]

作者: hcshiu 時間: 09-6-25 03:44

首先，我覺得joaneschan其實都係有心人，所謂愛之深，責之切。所以當你見到學校的安排未盡如人意，你就好嬲。覺得點解其他幼稚園做到，點解又一村想不到，必定是校長問題。

我只可以講，而家個社會變得很快，有很多突如其來既事，校長身為一間學校之首，佢集合左帶領學校的教育方針，學校運作的負任在一身，教育方針是長期的，而學校運作有時則很突發，有時校長和老師們未必能對這些突發事件，一開始便能做一個很周到，全港最好的決定。校長最初的決定，只能根據政府的指引來做，政府既指引，從來都不是從家長既角度去想，政府只想到要減少中招既機會，無去諗停左課對一個家庭，對學生既學業有幾大影響。政府如果可以預先講定如果香港一有本地感染，就會立即小學幼稚園停學，停學期間學校要照開，照顧沒有人在家照顧孩子，比定預告比學校，學校就有足夠時間同家長預先講，問定有幾多家長會比學生回校照顧，同埋有無其他意見。我自己則會覺得，大部份的責任是停得太急，學校（包括校長同老師）同家長都來不及反應。

停課期間，有家長打電話回校問，講意見，到昨日，出左個安排得很好的通告。我相信各位有心既家長，必定給學校很多意見，而學校亦從善如流，因應各家長的要求，去做了一些很好的決定。

也許當初我們各位家長在這裡講的意見，一開始便以電郵告訴學校，學校可以快點知到各位有心既家長既意見，又或者一開始便有有心既家長回到學校和校長開會，講下家長的顧慮，學校便可以早點作出周到既決定，咁就唔洗話要到番去嘈咁樣。所以始終係一個溝通問題。

至於轉校與否，我則覺得是家長以學校的教學理念，環境，師資等條件來決定，這些是長期既野，今次停課只是突發個別事件，不應因此決定學校是否值得讀落去。

點都好，都要感激joaneschan對今次停課咁肉緊，比左咁多意見，我相信，有很多有心既家長，都默默地比左好多意學，否則學校未必能作出咁周到既安排。如果學校可以同家長有良好既溝通，學校可以安排好D，家長又定必會放心D。

原帖由 joaneschan 於 09-6-24 22:56 發表
首先要多謝Kabobo對我的回應，我都係返學校嘈返嚟o嫁。
chongchong28，你都幾攪笑，copy返份通告叫good news。聽講今日全部家長都接到電話知道啦！
呢間學校最差係個校長，因為最後所有決定都係佢。
今日出嘅通告裏面，我覺得最 ...

[ 本帖最後由 hcshiu 於 09-6-25 05:14 編輯 ]

作者: hcshiu 時間: 09-6-25 05:49

chongchong28,

不要介意，不同人對不同事都有不同既反應。但我得多謝你提我去睇通告，我帶囡囡離校老師說過，我都唔記得去看，見到你個訊息，我便記起跟著去看。

通告上停課安排很好，很周到，對有需要既家長來說，幫助真的很大。而最令我感動的是，之前說過沒有午餐，是政府指引云云，我在附近工作，我得自己拿東西去給囡囡吃，在正中午去，太陽在頭上，一來一回步行半小時，很辛苦，老師很客氣說，只有菜，肉和飯，如不介意，可以讓孩子一同吃。簡單便是美，夫復何求。

學校安排得好，我相信當停課越來越耐，尤其全日班的家庭根本沒有想過有個咁長既暑假，開始時請下假來陪孩子，可能慢慢都照顧不來，因為讓孩子讀全日班的其中一個原因，為的是因為自己工作上有需要，不能照顧孩子，也請不到這麼多假，所以我相信越來越多家長感到壓力，要找學校來幫一幫照顧，也即可能越來越多學生會回到學校去，但我相信，又一村一向在衛生方面做得很足的，所以我也不擔心。反而在暑假讓孩子一星期每日在不同的暑期班和不同的小朋友玩，受傳染的機會還更大。昨天接了囡囡離校後去了科學館，也許是免費日，我是從來沒有見過這麼多人的，大家在接觸不同的展品，要中招，機會都很大。

去到最後，也許每個人只能做的便是，做好個人衛生，經常洗手，少去多人地方，到那時，停也停不了，社會仍要運作，學生還要上學學習。在家上網學習， Home Office，在香港，似乎還未接受到。

原帖由 ChongChong28 於 09-6-24 23:37 發表
joaneschan,

下午我偶然上yycs的網頁,(當時仍未收到老師的電話),"發現"了新通告,詳閱後感覺校方的新措施相當妥善,因為在首段停課期間校方的安排未能盡如人意,但今次新措施的確頗能平衡到家長,學生及校方的需與求,所 ...

作者: kabobo 時間: 09-6-25 07:50

joaneschan

我之不過認為大家溝通是好這方面！

我倒相信退不退費，或是那些…有菜有肉的簡單午膳，不是可以嘈返嚟的，令家長有感動的話，相信是有心人。

每間學校都有不同辦事方式，否則，你咁唔開心，不如快D轉咗間學校就唔使咁煩啦！

作者: ChongChong28 時間: 09-6-25 09:04

hcshiu,

謝謝你的回應

我是明白"不同人對不同事有不同反應",但心裡是有不好的感受.

因而我再道明因何以校方通告作good news此舉.

原帖由 hcshiu 於 09-6-25 05:49 發表
chongchong28,

不要介意，不同人對不同事都有不同既反應。但我得多謝你提我去睇通告，我帶囡囡離校老師說過，我都唔記得去看，見到你個訊息，我便記起跟著去看。

通告上停課安排很好，很周到，對有需要既家長來說，幫助真的很大。 ...

作者: joaneschan 時間: 09-6-25 20:33

首先要回應chong chong28，我只不過講吓笑；無諗過令你唔開心。Sorry！衷心嘅。

作者: joaneschan 時間: 09-6-25 20:45

首先要回應chong chong28，我只不過講吓笑；無諗過令你唔開心。Sorry！衷心嘅。

作者: joaneschan 時間: 09-6-25 21:27

再回應Kabobo：教育子女係要身教，同教佢做個有用嘅人，至少有問題要大家解決；並唔係逃避。我同學校嘅問題唔只一次啦，每次都要人講先識做，但做之前重要一大堆解釋(點樣唔得)。我只不過係一個中五程度嘅媽咪；有無可能我都諗到或者其他學校都諗到嘅嘢，呢間學校嘅校長同老師會諗唔到(大學生嚟o嫁)，只係佢哋費事做；因為無人話有問題呀嗎？
我每次同學校嘈都唔會帶埋我嘅小朋友；因為我嘅小朋友佢好愛呢間學校同老師。我唔會因為怕麻煩而轉校咁逃避，因為我知道我嘅提出得益唔係淨係我個小朋友一個囉。而且我個小朋友經己四歲，有自已主意。如果轉校佢會問"點解呢？係唔係我唔乖呢？"我要顧及我小朋友嘅感受。而且當初我選擇呢間學校，因為近屋企；有又成個山咁大嘅校舍；同有全日班。我個小朋友就係鍾意有咁大嘅地方活動；我諗全港幼稚園亦只有佢有。
Kabobo，今日己經有一個好好嘅例子。如果D差人唔去遊行去爭取，你認為政府會知咪。政府亦唔係佢哋肚裏面絛蟲。或者咁講，D差人裏面有一個係你個仔女；咁你係唔係會叫你個仔女，唔好煩啦，辭職唔好做？
我個仔之前都有讀Pre-school，我都同學校提出意見等佢哋去改善；而家我個仔離開咗學校之後，我而家同佢D老師職員關係重好好。而家有其他小朋友入去讀呢間Pre-school，佢哋己經可以受為到我之前提出嘅意見啦。

[ 本帖最後由 joaneschan 於 09-6-26 01:53 編輯 ]

作者: joaneschan 時間: 09-6-25 22:19

再回應hcshiu：我唔明點解你咁幫學校諗。我講過啦，成間學校D設施、老師同課程都好；只係個校長嘅問題。最終決定同負責都係佢。首先講膳食：我提意停課期間，學校煮碗粉都可以有一個午餐啦；咁樣D家長經己唔洗咁辛苦，擔心午膳啦。但係佢嘅答案係"唔得"，唔夠營飬，我再解釋：對於我嚟講一餐半餐係無所為，因為呢個世界無可能十全十美。學校可以照顧己經好好。所以膳食呢part真係拗返嚟o嫁。我呢幾日問我個仔，真係清茶淡餸o嫁。
至於你話突然停課：其實當豬流感發生初期，政府己經好重視小學同幼稚園。直至五月初己經話有可能全港停課；你話咁呢D叫突然呀；定學校完全無留意新聞同教育局嘅報告呢，而唔作好準備。更何况，停課己經唔係第一次。舊年小學同幼稚園唔係都因為流感而放多兩星期復活節假期咩，Do you remember？只係當時無一個好係我咁勇唔怕死嘅媽咪姐。
我身邊D朋友包括我老公都話："你咁樣嘈，以後個仔響學校嘅日子會好難過。"但係我可以咁樣同大家講，反而我個仔嘅照顧好咗，全面咗。但係並唔係佢百厭；佢錯；老師會唔講，反而同我多溝通咗。因為佢哋明白我想教好我嘅小朋友，並唔係好似有D家長咁唔接受自已嘅小朋友會百厭；而同老師拗"我個小朋友唔係咁！"呢D說話都係老師話返畀我知，我先知有D咁嘅家長。
都係嗰句啦，呢個校長都係個D唔踢唔會做嘅人嚟；又唔識轉吓彎，淨係識攞住指引嚟做嘢。佢同明愛醫院D人無分別，嚟到醫院門口都叫你call十字車！就係要跟指引囉。

[ 本帖最後由 joaneschan 於 09-6-26 01:52 編輯 ]

作者: hcshiu 時間: 09-6-26 00:15

其實我都好認同joaneschan你真的好有心，而你所提議既野最終學校都從善如流。我只可以講，設想你自己係校長，你可能唔可以講得咁輕鬆，做每一個決定，作為校長都係最終問責。

例如，你話要午饍，學校只得幾個學生，當然不能依餐單來煮，如果我係校長，我會諗我平日提供既午餐，有專人睇過無問題先比Ｄ學生食，而家無餐單，真係同Ｄ老師有粥食粥，有飯食飯，所以學校一定要同家長講，午餐係好簡單，長時間（例如停一個月）日日咁食，營養方面學校不能保證，必須要家長方面接受，才可以這樣給學生吃。你接受這個安排，但校長則要想是否所有讓學生回校的家長都接受。而家校長係做緊一Ｄ政府方面不同意既事，無事則可，如果有事，校長要負很大的責任，而不是你我一句，好簡單啫，無理由想不到。我有時會想，當你想得越深入，越想到很多問題，做決定就更要小心，不能隨隨便便。

其實我真的覺得學校方面真的很照顧家長同學生，學校大可以跟足指引，完全沒有責任問題，正所謂唔幫你係道理，幫你係人情，但是校長聽了你的意見，還是選了可能要負責的風險，來提供更周到的照顧給學生，我自己則為此更敬重校長。

原帖由 joaneschan 於 09-6-25 22:19 發表
再回應hcshiu：我唔明點解你咁幫學校諗。我講過啦，成間學校D設施、老師同課程都好；只係個校長嘅問題。最終決定同負責都係佢。首先講膳食：我提意停課期間，學校煮碗粉都可以有一個午餐啦；咁樣D家長經己唔洗咁辛苦，擔心午膳啦。 ...

作者: joaneschan 時間: 09-6-26 01:46 標題: 回應hcshiu

"道不同不相為謀"我諗響你心目中全香港只得"又一村"呢間學校要負責呢D風險；同響你心目中全香港只得"李校長"要負呢個責任。其他學校都要負責同負呢個風險。
響我心目中呢間學校只有老師係直得我去敬重；其實由我小朋友開始讀Pre-school開始我已經覺得老師可以話同父母一樣咁偉大。
至於你話午膳"學校只得幾個學生，當然不能依餐單來煮，如果我係校長，我會諗我平日提供既午餐，有專人睇過無問題先比Ｄ學生食，而家無餐單，真係同Ｄ老師有粥食粥，有飯食飯，所以學校一定要同家長講，午餐係好簡單，長時間（例如停一個月）日日咁食，營養方面學校不能保證，必須要家長方面接受，才可以這樣給學生吃。"但係如果我係校長，我(肯做去提意)D簡單午膳；我諗如果個家長係明事埋嘅，都會接受同明白"針無兩頭利"，可以有適當嘅照顧己經好好。而且香港其他全日制嘅幼稚園都無停膳食，教育局亦無指引話要停。
hcshiu其實你係老闆做你員工都幾幸福，因為你嘅員工唔做嘢或者唔諗辨法解決問題；你會幫佢揾幾廿萬個解釋.......解釋.......同解釋。

[ 本帖最後由 joaneschan 於 09-6-26 01:51 編輯 ]

作者: hcshiu 時間: 09-6-26 02:35

放鬆點吧。我想再每一件事去討論校長做得好唔好，我覺得義意不大，你可以堅持去找別人做得不好的地方，和其他人比較，跟著加以批評，要找錯處，一定找到。同一件事，你可以批評做得不好，而我則可看為美事一件。

最後我只說，你可以繼續對校長不滿，有事時覺得佢實做唔到野，自己走番去教校長點做，但你心裡必定覺得很不開心，很無奈要比個仔係到讀，因為佢鍾意；而我則抱著欣嘗的心態，首先讓校長去做，聽其言，觀其行，有意見再跟校長說，每天都好放心的讓囡囡回到學校，心想校長和老師必定好好照顧囡囡，有事她們就會立即通知我，我又可以放心去做自己的工作。

怎說也好，大家都是想孩子好，只是角度做法不同，世上也沒有絕對的對和錯。

（我對我下屬不會姑息，但這已離題很遠了。）

原帖由 joaneschan 於 09-6-26 01:46 發表
"道不同不相為謀"我諗響你心目中全香港只得"又一村"呢間學校要負責呢D風險；同響你心目中全香港只得"李校長"要負呢個責任。其他學校都要負責同負呢個風險。
響我心目中呢間學校只有老師係直得我去敬重；其實由我小朋友開 ...

作者: Sailo 時間: 09-6-26 17:52

要明白, 這次停課, 人人都不想, 牽連當中所有人(包括學校, 老師, 家長, 學生等等....)都被逼面對不同的困難, 大家應該互相包容, 互相支持, 這樣才是解決困難的態度, 在這個時刻很難以平常的做法去處理. 更不能去跟別人的做法左比較, 右比較, 在困難的時刻, 人人的情緒必然受到考驗. 每方都首次面對這次停課經歷, 就容許當作一次學習經驗吧! 請問心自己有沒有受到負面對待, 事實這次停課沒有人會覺得帶來方便的, 個人覺得, 身處困難時, 有其他人嘅遭遇比自己更差, 自己比上不足, 比下有餘, 就已足夠. 若是看見別人比自己好的, 就當下覺得自己待遇不好. 是永遠不會得到滿足的. 所謂知足常樂. 時常處於不快是有原因的.

受人恩惠的確是幸福的, 不是必然的. 但要懂得珍惜, 基本都要說聲多謝!

[ 本帖最後由 Sailo 於 09-6-26 17:58 編輯 ]

作者: ChongChong28 時間: 09-6-26 23:09

知道你是無心的,那我就寬心了~~^^

原帖由 joaneschan 於 09-6-25 20:33 發表
首先要回應chong chong28，我只不過講吓笑；無諗過令你唔開心。Sorry！衷心嘅。

作者: teacherkg 時間: 09-6-27 00:39

作為一個校長,要負責的事的確很多,如果小朋友在學校出了什麼事,那最後都是校長負上全責的!

此校校長辦學多年,我相信你所想到的,她都一定想得到,只是校長比你要顧慮的東西更多,不是你想出來的東西,便一定可以實行!

如果要和其他學校這樣比較,我覺得真的沒有什麼意思,我知道有些學校比又一村的安排更差更不足,那為什麼不拿這些學校去比,讚賞一下又一村校長的努力?

[ 本帖最後由 teacherkg 於 09-6-27 01:20 編輯 ]

作者: bb媽0米 時間: 09-6-27 20:52

原帖由 joaneschan 於 09-6-25 22:19 發表
再回應hcshiu：我唔明點解你咁幫學校諗。我講過啦，成間學校D設施、老師同課程都好；只係個校長嘅問題。最終決定同負責都係佢。首先講膳食：我提意停課期間，學校煮碗粉都可以有一個午餐啦；咁樣D家長經己唔洗咁辛苦，擔心午膳啦。 ...

之前一直我都只係睇留言,冇回應,但睇完呢一篇,我覺得我都有d野想講lor!

因為停課期間,我都有請學校暫託,我亞仔都有返過學校多天,的確,學校某些安排的確唔太完善,但你所提出的煮碗粉都可以當一餐,呢樣我又唔同意,因為我亞仔唔鐘意食粉,只可以食飯,食粉佢就會嘔!食飯的話又唔可以冇送,咁點算?

所以呢,你覺得好的提議,其他家長又未必接受,所謂甲之熊掌,乙之砒霜,你直接又勇敢地向校長嘈,我覺得冇問題亦唔關我事,但你講的東西又係0米真係好好呢?係0米所有家長都認同先?校長未問過其他家長點睇,佢點敢去做?佢唔跟你指示去做,就係佢做得唔好啦wo?

上面有家長話"比上不足,比下有餘"我覺得好岩呀,又一村的安排我諗同某d學校比係冇咁全面,不過我已經覺得ok了,講真全校幾百個學生,真係得你一個上黎嘈話呢到唔好0個到唔好,唔通除左你之外,冇人敢上黎講咩?我諗唔係卦....

而且,我覺得人都係自私的,我諗個個家長都係著重自己的子女多d架啦,我唔信有人咁偉大連自己個仔都唔理,走去理人地d野wo,如果校長真係咁衰,我諗唔止你一個覺得卦?真係得你一個夠膽去嘈?唔關自己事的就話jei,你試下如果學校對我個仔唔好,我敢唔敢返學校投訴呀啦!!

唔好講到你係我地幾百個家長的代言人咁,我地個個都唔敢出聲怕死,得你一個咁西利咁夠膽咁勇敢返去嘈,為我地呢班冇膽家長謀福利wo,你覺得校長點衰學校安排點唔好係你自己的觀點,唔代表其他人都咁諗架!例如我啦,我覺得學校已經ok了,仲有咩好嘈呢?你0既意見唔代表其他家長的意見呀!

我地唔係唔敢去講,只係覺得學校雖然唔係十全十美,不過尚可接受,我好欣賞校長同老師的付出啦!

你覺得自己返左去嘈之後,學校對你個仔的照顧全面左?不過我諗冇一個老師會鐘意d成日返學校嘈呢嘈路的家長卦?可能老師係留意你個仔多d,但目的可能係怕你再黎嘈jei!!不過,留意多左等唔等於錫呢?你個仔會唔會已經成為左老師們的眼中釘呀?睇野唔可以睇表面wo,老師心入面點諗冇人知架!

校長當然要跟教育局指引去做野啦,唔通跟你0既指引去辦學咩?你叫佢做乜佢就走去做呀?一陣出左咩事點算呀?係0米你狽晒上身,負晒責任先?校長唔係咁易做架,決定一件事之前都要有周詳的計劃,唔係求求其其,人云亦云架麻!

話時話,你講到校長咁衰間學校咁差,我建議你真係唔好再留響到啦,你個仔仲要讀多2年,冇謂留響到受多2年氣,要勞煩你咁辛苦教埋校長點做啦!

作者: joaneschan 時間: 09-6-28 10:08

回應bb媽咪：呢位媽咪真係唔該晒你D意見。唔該你由"停課，點算？"呢個topic由第一篇開始睇清楚D內容。我當然唔係你哋嘅代言人啦；只係由第一日停課開始；我由babykingdom呢到見到D家長係咁叫慘，話學校得一個老師返學，我有同感所以先返學校講。首先我第一時間返學校問"點解只可放響辨事處，唔可以入課室。"呢位校長第一句經己話"唔得"，我小朋友嘅班主任由第一日停課，我問佢會點樣處理D全日班嘅小朋友。佢答我"只可以留響辨事處，唔可以入課室，活動範圍都只係辨事處。"如果你係家長你忍心咁樣對小朋友咩。我由頭到尾無要求校長要做到同其他學校一樣，同其他學校比較。只係覺得活動範圍同照顧小朋友唔應該只留辨事處。呢個先至係我由始至終嘅不滿。當26號出咗通告；第 9點"在全日班繼續停課期間，由現時至7月20日(星期一)，學校會安排適量的教職員當值，家長如暫時未能安排親友照顧子弟，歡迎致電本校 23812949 或電郵 [email protected] 聯絡，本校會盡力協助安排幼兒10人一班（兩人一組）在課室閱讀或觀看益智影片。惟因校車及午膳已停止提供服務，為方便家長起見，本校只安排簡單午膳，在此停課期間家長無須繳交午膳及雜費，但家長必須自行接送貴子弟回校，學生亦必須穿著整齊校服及戴上口罩方可進入學校，而家長每天亦須替子女探熱。(倘若回校之學生染上人類豬型流感或傳染病，屆時本校將會根據衛生署指引停課14天，假如對新學年復課是有所影響，本校會於網上或電話知會各家長。)"呢個point出咗，如果呢個point響12號通知家長；佢哋經己有咁嘅安排，根本唔會有呢D家長響到叫惨。不過呢D家長都勁，26號通告出咗之後就話個校長好學校好。完全唔記得咗之前如果個小朋友返學校，"只可以留響辨事處，唔可以入課室，活動範圍都只係辨事處。"
至於你個仔"唔鐘意食粉,只可以食飯,食粉佢就會嘔!食飯的話又唔可以冇送,咁點算?"我己經講過"針無兩頭利"，可以有適當嘅照顧己經好好。但係如果我係校長，我(肯做去提意)D簡單午膳；我諗如果個家長係明事埋嘅，都會接受同明白。更何况學校無叫你一定要食，因為佢哋之前都講咗無膳食提供，呢個網站D家長話好辛苦要買午膳，又話要為小朋友準備午膳(但又話學校無微波爐)等等。你可以嘅話自已辛苦D買午膳畀你個仔囉。
你所講嘅唔，何己覺得你個仔嘅老師佢呢？

[ 本帖最後由 joaneschan 於 09-6-28 10:13 編輯 ]

作者: kabobo 時間: 09-6-28 15:43

bb媽咪

你知唔知吖，其實喺「重要消息五」11/6巳經講明：『在停課期間，學校會配合校內的實際需要，安排適量的教職員當值，處理校務及回答家長查詢，亦會清潔校園及消毒。如有家長暫時未能安排親友照顧子弟，請和本校聯絡(電話 23812949)，以便安排貴子弟回校。惟因校車及午膳已停止提供服務，家長需自行安排貴子弟午膳及接送貴子弟上學，也請促請貴子弟戴上口罩。並須穿著校服按正常上課時間回校。在校期間，本校教職員會提供課外讀物或安排貴子弟觀看益智影片等。原定於2009年6月26日（星期五）舉行的家長日將會如期舉行，（家長無須帶子女回校），如教育局沒有延長停課時間，學生則可於6月29日（星期一）照常上課，詳情請留意教育局宣布及本校網頁之「重要消息」。』

第一次停課，人哋晨早喺「重要消息五」咪巳經講清楚可以返學校點、點、點攞，第二次停課都好快通知啦，有人唔睇咋。

蝦！如果喺你要退$$$比幾百人，重要喺咁種多種款項，會唔會問都唔問吓上頭先做？定抑或先斬後奏好呢？其實咁做就可以快過孫明陽唔使比人X啦！

各位，問到當日嘅目擊人士，證明原來有人作估嫁，其實有人去學校當著學生、老師同埋職員面前喺咁拍抬拍凳X人，好似X婦XX。見到嘅人都怕怕，出年要教寶貝豬豬，執包服好過無哂尊嚴，相信大家喺度搞咗咁多嘢終於都安樂哂，飲得杯落囉！

作者: joaneschan 時間: 09-6-28 17:14

咦，你咁講"問到當日嘅目擊人士"咁即係唔係你親身目擊啦。你所講嘅X人，真係唔知你係乜嘢意思，唔通係粗口。首先你要問清楚你所講嘅"當日目擊人士"，校長D解釋同態度係點先？所有嘢係相向嘅，而我當日就響現場，家長只得我一個；而我亦無講粗口同你所講嘅作嘢，我將內容已post咗上嚟，只可惜無錄影片姐。如果你係在場，知道內容我估你係當日其中一位老師同職員。你所講"第一次停課，人哋晨早喺「重要消息五」咪巳經講清楚可以返學校點、點、點攞，第二次停課都好快通知啦，有人唔睇咋。"我有睇，但係佢無寫話"只可以留響辨事處，唔可以入課室，活動範圍都只係辨事處。"由始至終我係唔開心個安排地點姐。而呢位家長，唔知你知唔知學校辨事處有幾大呢，可以容許幾多位小朋友呢？至於退款，對我唔影響，一直以來係其他家長話要退款同話點解重要交學費。由選擇呢間學校開始，己經知道要交幾多個月學費啦。Anyway，希望你嘅小朋友響呢間學校真係得著。再討論落去係無意思，大家再去睇吓以後再發生事時，學校會點樣處理同有無改善就知啦。

[ 本帖最後由 joaneschan 於 09-6-28 18:40 編輯 ]

作者: bb媽0米 時間: 09-6-28 20:04

原帖由 kabobo 於 09-6-28 15:43 發表
bb媽咪

你知唔知吖，其實喺「重要消息五」11/6巳經講明：『在停課期間，學校會配合校內的實際需要，安排適量的教職員當值，處理校務及回答家長查詢，亦會清潔校園及消毒。如有家長暫時未能安排親友照顧子弟，請和本校聯絡(電話 ...

嘩乜攪到咁複雜咁0既?我其實唔太明你講乜野呀!

不過唔緊要啦,講真作為家長0既,都係緊張自己個小朋友架啦,只要我個仔係又一村讀得開心,學到基本知識同禮貌等呢d,我已經好滿意架啦!

暫時黎講,又一村的安排我都覺得幾好呀,校長盡責,老師又真係好有耐性同愛心,家長同學校之間要互相體諒先得0既,下下返去嘈都唔係辦法!

所以我覺得與其咁唔鐘意呢間學校,咁憎個校長,不如真係轉校啦,講真香港有咁多間幼稚園,實有一間符合家長的要求架麻,唔需要留響到咁勞氣啦!成日返去嘈實會影響學校同家長的關係,而老師又唔知會唔會遷怒於自己的小朋友(我唔知又一村d老師會唔會呀,不過人同此心,成日俾人鬧都一定唔鐘意架啦係0米?),我真係覺得冇謂lor!

我地呢d家長其實都冇咩要求0既,只要學校照顧得自己個小朋友好,小朋友學到野,讀得開心,老師會適時打電話黎同我溝通下,我已經覺得ok架啦,其他幼稚園有d乜點樣好法都唔太關我事啦,我選擇左入黎讀就要信任呢到,要比較都係未讀k1前比較左啦!我揀呢到就係因為覺得又一村好岩自己個仔,咁當然呢到唔係十全十美架啦,但我唔會介意呀!

如果學校真係做得唔好,同校長反映下意見都冇問題,但就真係唔好嘈lor,大家都係斯文人,起碼讀過下書先啦,作為家長0既都唔識禮貌,點教自己個小朋友要有禮貌先?唔通真係靠晒老師教咩?大家有商有量咁傾下計,我相信如果校長覺得真係有問題,一定會接受同改善0既!

就好似停課安排咁啦,學校真係有改善架wo,之前要小朋友留係校務處呢樣我知呀,我有打俾學校問過,侯生都有同我提過,我都知因為d課室要消毒所以唔俾d小朋友入去!!我見係咁我都冇帶亞仔返去,等學校消毒好晒先帶佢返!

所以呢,家長都要有責任打電話返學校了解情況,如果自己接受唔到0米唔好返lor,如果自己一早知道,又要帶小朋友返去,返完又走去嘈呢樣就真係唔好啦!不過學校其實應該係網上出張notice俾家長0既,呢樣係學校做得唔好的地方!

咩野執包袱呀?係校長定老師呀?唔好嚇我wo....

總之大家都唔好咁勞氣啦,都係0個句啦,唔鐘意又一村0既0米轉校lor,勉強冇幸福麻,選擇留低0既就即係信任呢間學校會做到最好啦,家長覺得有問題可以同老師傾,大家多d溝通同包容0米冇事lor!

[ 本帖最後由 bb媽0米於 09-6-28 20:09 編輯 ]

作者: hcshiu 時間: 09-6-28 20:16

其實我見到有件值得開心既事，就係好多家長都係好關心學校，對學校有所期望，而且都係理智既。我見到家長之間的討論，我覺得係大家既期望，同埋表達既方法不一樣而己。

係停課呢件事上，我覺得問題其實只在溝通上，校長有講過學生回到學校只可以留在校務處，而我囡囡的確第一日，就只得佢一個人留係校務處到半天。而後來伍姑娘同我講，之前因為課室正在消毒，不能入內，所以只能留在校務處內，這個解釋我接受，之後就可以回到課室去。如果當時學校同我講，消毒之後就可以回到課室去，我又會覺得好Ｄ。Joaneschan回到學校去講，都係溝通既一種，當時情況怎樣，則是另一件事。我知道很多家長都有打電話回學校，各自同學校講左不同既要求，跟著學校又可能講左唔同既野，所以又是溝通問題，如果回覆有所不同，家長間又會有厚此薄彼既感覺。K3的家長著眼點是畢業禮的安排，他們又自行同學校溝通。

所以我會想，為什麼我們這班有心既家長，不一早組織起來，有事的時候，家長代表可以一開始就同學校開會，講下家長的想法，學校又可以有一個統一的回覆。唔好話要有個別家長回到學校爭取，學校才從善如流，令現在家長之間有這麼爭論。

怎說也好，大家都是為學校，為孩子好，凡事以和為貴。

原帖由 joaneschan 於 09-6-28 17:14 發表
咦，你咁講"問到當日嘅目擊人士"咁即係唔係你親身目擊啦。你所講嘅X人，真係唔知你係乜嘢意思，唔通係粗口。首先你要問清楚你所講嘅"當日目擊人士"，校長D解釋同態度係點先？所有嘢係相向嘅，而我當日就響現場，家長只得我一個；而我 ...

作者: joaneschan 時間: 09-6-28 20:33 標題: 回覆 63# hcshiu 的文章

我都好希望你可以建立都家長會，大家唔洗勞氣。加油。

作者: hcshiu 時間: 09-6-29 10:08

多謝支持。

今日送囡囡回學校，如果上星期的學生都同樣回到學校，今日最少應該有至少十個學生回去，由K1到K3都有了。不知今天是否需要開多一個課室，放學我會問下囡囡，再告訴大家。

原帖由 joaneschan 於 09-6-28 20:33 發表
我都好希望你可以建立都家長會，大家唔洗勞氣。加油。

作者: Sailo 時間: 09-6-29 10:18

我小朋友今日都有返呀!

學校幫我解決到呢段期間照顧我小朋友的問題, 令我安心上班, 我沒其他要求了!

[ 本帖最後由 Sailo 於 09-6-29 10:25 編輯 ]

作者: ChongChong28 時間: 09-6-29 12:18

I sent my daughter to school this morning, the teacher told me there are around 20 students at school!!

hope they will enjoy the school time!!!

作者: tym327 時間: 09-6-29 13:21

請問有帶小朋友回校的家長, 有無人遲過四點去接小朋友走o架?
我問過學校最遲只可以照顧小朋友到四點!
但我五點幾先放工喎!!! 點可能四點接到佢呢?

作者: hcshiu 時間: 09-6-29 15:10

我有時趕到去都是遲了少少，例如五至十分鐘。但如果你要再遲一點，例如你五點才放工，去到學校要幾多點呢？我覺得你可以打電話回學校，同學校或校長談一談。如果到時只得你個小朋友留在學校，其他都有人接了，老師也有事做，不能留在課室陪一個小朋友，你可以問一問可不可以留小朋友在校務處（那裡幾時都應該有人在那裡，但職員只能看著學生，學生要自己看書或做自己Ｄ野），同埋你最遲可以幾時來接，再作安排吧。

原帖由 tym327 於 09-6-29 13:21 發表
請問有帶小朋友回校的家長, 有無人遲過四點去接小朋友走o架?
我問過學校最遲只可以照顧小朋友到四點!
但我五點幾先放工喎!!! 點可能四點接到佢呢?

作者: hcshiu 時間: 09-6-29 15:12

嘩咁多小朋友，如果超過二十個，差不多可以開三個課室，如果仲可以分年級入課室，咁老師就可以更方便照顧學生了。

原帖由 ChongChong28 於 09-6-29 12:18 發表
I sent my daughter to school this morning, the teacher told me there are around 20 students at school!!

hope they will enjoy the school time!!!

作者: hcshiu 時間: 09-7-13 10:45

今天早上送囡囡回校，在門口老師跟我說，下星期一開始，學校會大清潔，所以如果家長可以照顧到學生，咁就不要帶回學校，但如果真的不能自己照顧，仍可以照樣帶回學校，但在學校時，因為課室輪流清潔，所以學生留在學校內活動的課室可能會轉。

學校有這樣的安排，我也會去看看我能否自己找到活動給囡囡，或自已照顧囡囡。

原帖由 hcshiu 於 09-6-29 15:12 發表
嘩咁多小朋友，如果超過二十個，差不多可以開三個課室，如果仲可以分年級入課室，咁老師就可以更方便照顧學生了。

作者: hcshiu 時間: 09-7-15 11:11

今天早上送囡囡回學校，老師跟我補充說，下星期學生如有需要，可以照回學校，但學校不會提供午饍。學校在這次停課已幫了有需要的家長很多，所以我覺得學校如果這樣建議，應有他們的考慮點的。

原帖由 hcshiu 於 09-7-13 10:45 發表
今天早上送囡囡回校，在門口老師跟我說，下星期一開始，學校會大清潔，所以如果家長可以照顧到學生，咁就不要帶回學校，但如果真的不能自己照顧，仍可以照樣帶回學校，但在學校時，因為課室輪流清潔，所以學生留在學校內活動的課室可能會 ...

作者: anitamama 時間: 09-7-15 23:00

我個仔今年係呢間學校K.3 升小一, 因停課同老師溝通過, 再睇晒D POST, 分享如下 :
1. 6月11日老師打電話話停課, 我問我個仔可以返學校嗎? 老師話唔係全部老師返, 只有少量, 冇車, 冇午膳, 夜D老師再打嚟,大條道理 - 教育局指引!! 連功課都話可以幫我影印, 要收番我影印費 - D功課向來都係影印再貼落功課簿啦 !! 我一早交晒雜費啦!!
2. 6月23日老師再打嚟因為再停課, 佢地話唔好安排小朋友返嚟, 因為冇小朋友返, 只得少量教師... 仲有唔攪畢業禮, 表演取消, D表演服飾同畢業聚餐會退錢, 6月份全日班午膳雜費會退錢
3. 6月26日家長日, 老師比番表演服飾我地, 冇提退錢, 都冇提6月份午膳雜費退錢, 但畢業禮照舉行.
4. 當中我問過老師, 校方會否考慮7月份收1/2學費 - 因為學校要家長唔好安排小朋友返學校, 得少量老師係學校, 呢樣冇嗰樣冇, 學校會唔會共渡時艱, 收1/2學費呢, 咁我再搵人湊仔就唔駛咁重負擔 + 我個班主任話你地最好係交番學費, 我地有支出架嗎!! although冇小朋友返, 但我地要清潔....

佢地POST係網上面嘅info係跟足指引 - 要寫得好好睇睇, 唔好失禮. 但老師同家長講 : 你地唔好返... 不過後來就改咗口風 - 學校有少量都師咋, 會安排簡單膳食... 學校會舉行畢業禮... 等等係怕你地唔交7月份學費, 咪有d service 囉!!

我問過老師如果d家長唔交學費你都冇辦法啦 - 點知發現佢我個仔張畢業証係校務署, 因為有資料要搵校務署, 所以去到校務署佢比番張証我 - 因為7月10日嘅畢業禮係7月8日而cfm我交咗學費!!

呢間學校近年換老師比較密, 小朋友係度讀唔可以有個老師跟你成長, 都唔知你係點...唔可以好理解個小朋友陪住佢成長... 間學校之前唔係咁差, 係因為h1n1攪到我睇到多d嘢.如果你地可以成立家長會, 好似好d, 但, 只係讀3年嘅幼稚園生活...有d人會覺得...點呢.

anyway, 希望係呢間學校六嘅小朋友, 開開心心讀落去, 派間好學校 !!

作者: Fei-Duck 時間: 09-7-18 13:03

我個女將於8月返呢間學校K1，近日睇晒大家對這間學校停課安排及其他方面的post，令我有很多的不安心及懷疑自己為女兒選擇這間學校是否正確。

當初，選擇這間學校是因為校園很大，英語時間較多，聽過很多小朋友在這裡讀書都很開心。但現在......開始有點兒擔心，很怕學校安排不好、女兒會不開心。

我個女現在於另一間幼稚園讀緊N1，老師很細心，而且因學校規模比較細，各老師職員與學生(甚至是家長)的關係很close，再加上在學校處理停課安排及於停課時減學費方面，都較我預期的為好。這更加使我懷疑替女兒轉校是否做得對！

做父母的壓力真的很大，每個父母都想為子女作出最好的安排，但事實結果是否如願?

原帖由 anitamama 於 09-7-15 23:00 發表
我個仔今年係呢間學校K.3 升小一, 因停課同老師溝通過, 再睇晒D POST, 分享如下 :
1. 6月11日老師打電話話停課, 我問我個仔可以返學校嗎? 老師話唔係全部老師返, 只有少量, 冇車, 冇午膳, 夜D老師再打嚟,大條道理 - ...

作者: teacherkg 時間: 09-7-19 00:00

原帖由 Fei-Duck 於 09-7-18 13:03 發表
我個女將於8月返呢間學校K1，近日睇晒大家對這間學校停課安排及其他方面的post，令我有很多的不安心及懷疑自己為女兒選擇這間學校是否正確。

當初，選擇這間學校是因為校園很大，英語時間較多，聽過很多小朋友在這裡讀書都很 ...

雖然此校某些政策非十分完善,但我覺得一間學校最主要的是考慮老師的質素,可以肯定的是又一村學校有很多很好很細心和盡責的老師,小朋友在此校就讀應該會很開心的!

其實學前教育,只要小朋友讀得開心,又學懂照顧自己和學術上的簡單知識便可以了,其他不會影響小朋友的東西,家長又何需太過擔憂呢?

如有不滿,家長可向老師反映,但請不要大吵大鬧,因為這樣是沒有用的,家長都想老師是真心愛錫自己的小朋友,而不是因為家長愛投訴,芝麻小事都回校嘈,迫使老師對自己的小朋友"高度關注"吧?這和錫是兩碼子的事呢!

總之,不要因某些留言而立刻對學校失去信心,每間學校都一定有人鬧,有人讚,當初你選擇此校,當然是因為此校有其可取之處吧,不要因為單單一些留言打擊自己的信心啊!而且,這裡又不是又一村學校的官方討論區,並非代表所有家長的意見呀!我相信,一定有很多家長覺得此校很好,很滿意的呢!

希望你的小朋友讀得開心,有一個愉快的學前生活吧!只要家長和校方互相尊重,不會有什麼問題的,放心吧!

作者: hcshiu 時間: 09-7-19 16:04

其實由政府停課到現在，我們這班家長都在看著事態的發展，現在我們回望，也許會覺得有很多事可以做得更好，而我自己在想，如果我在那個時空身為校長，我會怎樣做？我會如何決定怎樣處理呢？

在最初停課開始，政府宣報停兩個星期，即是說，幼稚園就一定停兩個星期，但之後，可能會復課，可能繼續停課。如果復課，去年因流感停課也有在星期六補堂，所以今次學校也許會決定要補上停了的課，而最好的補課時間，便是在原先的暑假，對半日班，即推遲暑假，對全日班，即原先暑假便要上堂，更可能要在星期六上堂。既然要補堂，老師要在原先的暑假和星期六要上班，學校便會想先讓老師放些假，等到時補課時不用補假給她們；所以結果是學校在停課期間，讓老師放假，甚至包括廚師，而不是要他們照常上班，所以學校的老師少了，又因學校少了老師，而且豬流感初期，大家都覺得好嚴重，可能會死人，學校又要消毒，所以學校便宣報，要家長最好不要帶孩子回來，就算回來，也沒有廚師準備午餐。那時覺得豬流感會死人，政府又叫人不要聚集，所以學校便取消了所有校內活動，包括高班的畢業禮，這也無可厚非，學校裡的不是醫生，只是老師，她們根本不可能決定保留那些活動，責任太大了。

到停課兩星期後，其實很明顯不會復課，但部份家長已不能自己照顧自己的孩子，尤其那些全日班的家長，學校見到越來越多家長詢問學生回校的事，所以也因應而安排，讓有需要學生回到學校去，照顧太好，又怕很多學生回校，照顧不周，又對回校的學生不好，很高調叫家長帶回學校，又怕家長想學校定是怕家長不交學費，所以叫家長帶學生回校，等家長更願意去交學費。其實到最後，又有午饍，放學又好像平日會排隊唱歌，我覺得學校真的可以幫家長的，都已做了。但因為之前那些問題，學校的做法不斷在變，令人覺得學校有點進退失據，有種幽柔的感覺。至於，學費和校車費等，我相信在聽到家長的意見之後，學校已做了很好的安排。

也許今天回看，家長可能會覺得不用停課，畢業禮可以照常去舉行，但是那時誰都不能確定沒有事，如果有人在活動中染病，責任可以是很大。但去到最後，聽說高班的學生還是回了學校，舉行了小型的畢業禮，我相信是學校聽了家長的意見後，因應當時情況而作出平衡安全和家長學生期望的決定。

在這件事上，我的感受是學校處理突發事件時，有不足之處，但我會以理解和體諒的態度去看，因為始終有潛在危險，現在豬流感好像不嚴重，意見自然便多是覺得學校做得不夠周到，但如果豬流感是很嚴重，意見便會偏向讚學校做得保守是好的。所以，我對於整間學校的信任程度沒有改變，因為我覺得讓孩子入讀這間學校，是因為學校的理念，老師細心的照顧，廣闊的環境等等，而不是個別突發事件。到最後，我只希望學校可以增加和家長的溝通，（但我不是說要班主任更多去打電話給家長，加重老師的工作量，方法可以是其他的，例如更多用互聯網），和增加校政的透明度，當家長更明白學校的考慮點時，家長就會更明白學校的決定背後的原因，那便會更放心孩子在這裡就讀。

原帖由 anitamama 於 09-7-15 23:00 發表
我個仔今年係呢間學校K.3 升小一, 因停課同老師溝通過, 再睇晒D POST, 分享如下 :
1. 6月11日老師打電話話停課, 我問我個仔可以返學校嗎? 老師話唔係全部老師返, 只有少量, 冇車, 冇午膳, 夜D老師再打嚟,大條道理 - ...

作者: sweetcouple 時間: 09-7-25 10:00

提示: 作者被禁止或刪除內容自動屏蔽

歡迎光臨教育王國 (/)