教育王國

標題: Early Times [打印本頁]

作者: btty 時間: 08-5-23 12:41 標題: Early Times

早幾個月參加一間叫Early Times嘅playgroup(响謝斐道Workingfield Comm. Bldg.), 唯一的負責人兼導師(外籍女士)話參加佢個playgroup要俾$1000按金, 其後每堂$120每次上完堂俾.

在第二次上堂我俾咗$1000按金佢, 問佢攞收據佢話即時冇, 會下一堂俾, 過咗幾堂都未俾, 我再追佢, 終於在之後一個星期發咗張冇公司名嘅收據(即係文具店可買到的)俾我.

响四月中我地決定幫bb轉去另一間playgroup, 落堂俾錢果陣同佢講我地唔會再黎上堂, 佢同意會寄支票退回按金俾我, 等咗幾個星期都未收到, 打去Early Times次次都冇人聽, 留言亦冇回覆, 後來响Early Times個website搵到佢個手提電話先聯絡到佢, 佢話唔會全數退回按金俾我, 因為我地冇俾兩至三個星期通知就退學. 我問佢唔會全數退回按金即係點解, 佢話佢會俾番50%按金我, 但佢承認”50%按金”退款係同我講電話時決定, 因為從來未試過.

佢從來冇同我地講過要兩至三個星期通知先可以全數退回按金, 佢地website上面冇寫, 填報名表時都冇. 佢堅持佢有講但我地唔記得, 我反問佢點解响我地退學當日, 佢同意寄支票退回按金俾我地時唔講, 佢話當時唔記得, 我再問佢點解一直都唔聯絡我地同回覆我地, 佢話佢好忙.

佢嘅態度仲好差, 仲話問過佢律師完全唔駛退錢俾我地, 但當佢知道我向消委會同社署(負責監管3歲以下幼兒服務)投訴後, 佢終於同意全數退款(態度都仲係好差), 不過佢話要6月30日先可以俾支票我地, 所以收唔收到都未知.

希望大家遇到同類情況都要留意.

另外, 响投訴過程中, 發現絕大部份playgroup都冇同社署申請, 但教統局又話3歲以下幼兒服務唔關佢地事, Early Times就係其中一間. 原來社署要求照顧3歲以下幼兒服務機構位處不可高過地面12米(基於消防考慮), 即係話地址4樓以上既都冇申請. 社署個職員話有好多灰色地帶, 如果所有小朋友都有監護人陪上堂既中心, 未必係佢地監管範圍. 所以都幾冇保障.

[ 本文章最後由 btty 於 08-5-23 12:46 編輯 ]

歡迎光臨教育王國 (/)