教育王國

標題: 轉唔轉校好? [打印本頁]

作者: Lovely媽咪 時間: 08-4-23 14:13 標題: 轉唔轉校好?

仔仔依家3年級,佢好鐘意讀依家間學校,因功課唔多,2次測驗同2次考試,完全無壓力,所以佢讀得好開心.
但因一些原因可能會搬屋,到時新屋同依家間學校就大約30分鐘左右車程,因新屋附近都有幾間小學,所以有諗過不如轉校,但試過問佢,佢即刻話唔好,另一方面佢上學期既成績麻麻,而那幾間都是教會學校,課程好似比依家的學校深,同埋會比較嚴,一來我估轉得成功既機會唔大,二來如果轉到又驚仔仔會適應唔到,會讀得唔開心.
大家可唔可俾啲意見我呀

作者: yanpama 時間: 08-4-23 14:44

原文章由 Lovely媽咪 於 08-4-23 14:13 發表
仔仔依家3年級,佢好鐘意讀依家間學校,因功課唔多,2次測驗同2次考試,完全無壓力,所以佢讀得好開心.
但因一些原因可能會搬屋,到時新屋同依家間學校就大約30分鐘左右車程,因新屋附近都有幾間小學,所以有諗過不如轉校,但 ...

如果你對現在讀緊的學校沒有不滿, 我想還是不轉校較好.

原因:

好處- 近家,每天省一小時 (30+30)

壞處 - 仔仔要離開讀得好好地的學校,老師和同學, 他會不開心.
現在成績麻麻, 到了更深更嚴的學校, 可能會更差

30分鐘的車程對三年級的小朋友來說,是可以接受. 反而他讀得開心和可以進步更重要.

作者: kitbebe 時間: 08-4-23 14:56

如果有校車坐的話, 我會唔轉.

作者: tingchichi 時間: 08-4-23 15:03

Lovely 媽咪,
既然妳仔仔話讀得好開心, 如果係我, 我會選擇俾佢 keep 在原本學校就讀. 況且 30 分鐘車程唔算好耐.
我識得一個媽咪, 之前又係因為搬屋, 於是幫仔仔轉了學校, 但阿仔讀了一個學期左右, 就喊住話好唔開心, 要讀番之前果間學校. 好彩舊果間學校肯收返佢返去讀書. 因為 quota 問題, 唔係間間學校都可以俾走咗既學生之後返去讀 (因為個位有可能已經比咗第 2 個人) . 所以好像 yanpama 話頭, 如果妳對現在讀緊的學校沒有不滿, 還是不轉校較好.

作者: Lovely媽咪 時間: 08-4-23 15:39

就係因依家間學校啱啱轉咗校長,開始一路有改變,仲好似幾好tim,所以先心大心細轉唔轉.
但就驚仔仔日日要搭車返學放學會辛苦,因今年唔轉,5年級就更加唔會轉,所以先難決定

作者: Umi 時間: 08-4-23 16:36

Lovely 媽咪,

我上個月同樣有你呢個問題, 我想同佢轉, 但係其實佢唔係咁想, 後來佢都妥協講話轉, 不過, 過無幾耐老師打電話比我, 話我個囡係學校好似唔係幾開心, 同埋點解銳角和鈍角都唔識, 我就好差異喇, 因為就快測驗, 同埋我知佢應該識架喎. 所以我叫班主任同佢傾吓計, 原來佢都係唔想轉校但又唔想我唔開心, 最後我同C6傾完, 決定唔轉喇, 費時佢一轉無回頭, 到時成績一落千丈, 咁我就喊都無謂喇, 現在唯有每天駕車車佢, 我仲要係九龍車去荃灣呀. 不過, 算喇, 車多幾年佢上中一既時候再幫佢轉返出九龍囉.

仲有, 各位媽咪, 請問升中派位係跟小學網定居住網呢?

作者: mrsanthony 時間: 08-4-23 17:08

升中派位係跟小學網呀! 不過有跨網選的.

派左先轉返出 (叩門) 九龍 d 中學得唔得?

作者: Skywan 時間: 08-4-23 22:14

Lovely 媽:

因小兒就是 P.4 轉左校時了, 兩間小學的程度根本就不同, 雖然佢現在那間學校D老師好過之前個間, 但佢似中心系舊校嗰度, 同新同學又吾系好夾, 所以佢空閒時間都會打電話同以前的同學傾電話, 談下近況。佢仲話想升中時去返以前的校網, 同番以前的朋友一齊讀中學。
雖然今日不知明日事, 不過佢吾開心連成績都下跌.....咗.....

所以真的想清楚才決定。

作者: Lovely媽咪 時間: 08-4-24 11:26

原文章由 mrsanthony 於 08-4-23 17:08 發表
升中派位係跟小學網呀! 不過有跨網選的.

派左先轉返出 (叩門) 九龍 d 中學得唔得?

荃灣出九龍會比較難啲,要成績好好先有機會.

作者: Lovely媽咪 時間: 08-4-24 11:33

原文章由 Skywan 於 08-4-23 22:14 發表
Lovely 媽:

因小兒就是 P.4 轉左校時了, 兩間小學的程度根本就不同, 雖然佢現在那間學校D老師好過之前個間, 但佢似中心系舊校嗰度, 同新同學又吾系好夾, 所以佢空閒時間都會打電話同以前的同學傾電話, 談下近況。 ...

我就係驚仔仔都會有咁既情況出現,所以唔知點決定,因為轉咗就好難返轉頭.另外就係我返工既地方同依家間學校近啲,同我識既朋友多數係哂呢區,如果有咩特發事都容易處理,但如果轉校,一係我就唔做嘢全職湊佢,但我驚到時係我頂唔順

作者: tswpig 時間: 08-4-24 14:23

如果你沒有對舊校不滿,仔仔又讀得開心,不論他的成績好或壞,我還是建議不要轉,環境很影响小朋友學習心情,可能大人會辛苦些,如果朋友喜歡某一樣野,他們不會覺得辛苦的.
例子:有一朋友的仔仔完成小2,轉去另一間小學升小3,原因媽咪話新學校接觸英文多,小朋友在原校成績不太差,事前亦有問過仔仔,他說沒所謂,現過了半學期,有一天仔仔對補習社另一舊同學說,還是不轉校好,表現後悔!小朋友在新校成績不見大躍進,亦不見太差,但我諗他心中是有些不開心的.
小朋友除了在校成績要緊外,學校生活亦同樣重要,在他們生命中佔有很重要的回憶.想想,小朋友在家時間和學校時間的比重,等同大人在公司時間,如果大人在公司不開心是何等辛苦!

原文章由 Lovely媽咪 於 08-4-23 14:13 發表
仔仔依家3年級,佢好鐘意讀依家間學校,因功課唔多,2次測驗同2次考試,完全無壓力,所以佢讀得好開心.
但因一些原因可能會搬屋,到時新屋同依家間學校就大約30分鐘左右車程,因新屋附近都有幾間小學,所以有諗過不如轉校,但 ...

作者: 咖啡奶茶 時間: 08-4-24 14:59

同意tswpig.
只是路程的問題, 不應轉.

作者: ydoris 時間: 08-4-24 15:11

如果新學校可係太突出既，小朋友又吾係太好成績既，同區吾洗轉都得啦。
我而家都要為小女轉校煩緊。佢又係小三，今年吾轉好難轉架。我既ＣＡＳＥ係工人吾做走左，我吾敢再請工人啦。但又要返工同有個讀緊Ｋ２全日既細女要照顧。佢成績中上，我而家要做好多家務，少左時間同佢地溫習。咁而且天水圍既英中學額，今日登報紙都睇到啦，你１０點幾爭一個位。但我轉出去香港，係２。９爭一個位。咁俾老爺湊，我可以專心Ｄ湊細女。而且我老爺係大學畢業，專教全家族既細路，阿女既堂姐，係大陸來讀書，舊年全級第一。。所以我想應該博得過既。。

作者: nathandaddy 時間: 08-4-26 01:07

其實每個人都有歸屬感，熟識的環境、同學、老師都對孩子心理有好強烈影響。即使大人轉工都會有恐懼感，一旦孩子心理有恐懼感便怕同逃避，不再信任父母和不願分享心事，心理病有排醫，建議不轉校，應多從孩子思想出發想~

歡迎光臨教育王國 (/)