Feature Image

喺教養嘅過程,作為家長經常都會遇到好多矛盾,「又要馬兒好,又要馬兒不吃草。」呢句對白真係老是常出現,想佢成績好,又唔想佢有太大壓力,想加強佢嘅自理能力,又怕佢受傷,喺種種矛盾中,要尋覓一個平衡點,都確係唔簡單!

最近就有JM問到應該幾多歲開始比仔女話事,從而培養佢哋嘅自主性,而普遍嘅JM們其實都偏向尊重仔女決定,細細個就比佢揸晒fit,不過喺揸fit背後,最怕就係佢哋變成過於自我,變成人見人怕小霸王!

「我女識講嘢就比佢諗食乜、著乜、學校就中學先輪到佢揀。」

「學咩樂器、玩咩運動、叫咩英文名,都係佢自己揀,一路到大個,所以我咩都要問過佢先。」

「要了解佢背後個原因先,如果係合情合理就會比佢話事。」

「我嗰啲就上小學前全部都係我話事,上小學後喺學校食嗰餐飯就佢自己揀,其他嘢都係我揸主意,上中學後就慢慢開始俾佢揸主意,完全放晒手俾佢自己應該係中四開始。」

討論區熱話:仔女幾多歲先俾佢哋揸主意 ?

討論區熱話:仔女幾多歲先俾佢哋揸主意 ?

喺家長角度,當然希望仔女乖乖聽話,但係過於順從、依賴,又會唔會影響佢日後嘅人際同生活?若然要喺當中搵個平衡,又應該點樣培養仔女獨立自主嘅個性,同時亦懂得尊重別人呢?

1. 唔好預設「標準答案」

教導仔女嘅時候,應該從多方面了解現況,唔好單憑成人嘅思想去判定事件,以身教畀小朋友明白應該用廣闊嘅心去接納唔同嘅意見。

有啲家長雖然話畀仔女話事,但其實心入面已經有「標準答案」,若果「揀錯」就會千方百計,令仔女揀返自己理想嘅「標準答案」,咁樣一嚟會令仔女思想產生混淆,久而久之,仲會限制佢哋嘅思考能力。

2. 從互相尊重開始

講到自主,其實都係希望仔女有自己嘅思考同判斷能力,而非同世界為敵,所以凡事都應該從互相尊重開始。

引導佢哋喺作出決定嘅時候,都應該考慮到呢個決定其實會唔會影響到其他人,明白咩叫將心比心,令仔女知道每個人都可以擁有唔同嘅想法,你鍾意,唔代表其他人都一樣鍾意,學習互相尊重同體諒,而遇到意見分歧嘅時候,應該從不同嘅聲音入面,搵出雙方都舒服嘅解決方案。

3.  訓練仔女分辨是非嘅能力

上面講到仔女如果過於「自主」,或者會忽略咗其他人嘅感受,但若然太過「順從」又會有咩壞處呢?過度順從、耳仔軟嘅小朋友,或者對父母嚟講係聽聽話話,但呢個聽話同時亦發生嘅朋輩身上,若然欠缺獨立思考能力,變成人哋做乜我做乜,同學出貓我又跟住出貓,問題就嚟喇,所以教導仔女分辨是非,擁有個人判斷同思考能力就嚟得相當重要!

父母要提醒仔女凡事都應該從多方面去求證,考慮事情嘅後果,自己係咪可以承擔得到,順從係基於尊重,同時了解當中原由,亦非習慣性盲從。

 

【編按:以上內容為作者之個人意見及立場】