每個家長都想比最好嘅嘢小朋友，而喺揀學校嘅過程亦都唔例外，最近就有JM講到，喺小朋友就讀K1之後，會唔會為小朋友轉校呢個問題，其實呢個疑問，相信每年都發生緊，有啲情況甚至係讀緊都會考慮再考其他學校做插班生；特別係今年，受住疫情影響，K1、K2嘅小朋友返咗半個學年就開始「放暑假」，一來擔心小朋友根本無咩學到嘢，二來學咗都可能比返晒老師，噤到底應唔應該幫佢哋選擇選校又或者重讀呢？

「其實K1 好似冇返過學，轉校冇話好唔好，只睇學術上有冇幫助。」

「我覺得今年無影響，K1無返過學咁濟，同學仔啲名都唔太記得。」

討論區熱話：有冇媽媽比小朋友K2轉校？

討論區熱話：有冇媽媽比小朋友K2轉校？

撇除疫情問題，頭先都講到每年都有家長因應唔同原因為小朋友選擇重讀或者轉校，當中可能關係到課程進度、小朋友自理問題，甚至係小朋友返得開心與否，而基於以上種種理由，轉校無疑對小朋友都有一定程度嘅影響，至於係好定壞嘅影響，亦要視乎情況而定。

講到決定是否轉校，其實大前題都要有心儀學校收先有得諗咖，話說回頭，又唔會無啦啦有間學校走埋嚟問你小朋友需唔需要轉校，所以家長當日帶得小朋友再去考其他學校，唔多唔少都有心理準備要轉，而嚟到呢刻，或者家長自己都心裡有數，小朋友係咪有需要轉校，至於點樣界定，對小朋友有無咩唔好嘅影響，鯊魚太就認為要睇睇以下幾點：

1.  釐清轉校原因

千祈唔好人報你又報，都考到之後，人轉你又轉，再次檢閱為小朋友計劃轉校原因係好重要，如果話基於小朋友喺原本學校讀得唔開心，又或者考慮到返學車程太遠，唔太適合小朋友，咁決定轉校未嘗唔係一個好方法，總括而言，要以「小朋友為本」去做決定嘅根本。

2. 孩子情緒與性格

其實成日都講每個小朋友都係獨立個體，好難完全去判定「K2轉校」對小朋友有無壞影響，之但後如果小朋友本身就比較慢熱，喺開始返K1嘅時候，已經花咗好大氣力先可以適應到，轉個頭又話要重頭嚟，咁可能就要多加考慮喇！

另外，觀察小朋友喺現時學校開心與否，又或者有無歸屬感都係一個方法，唔好以為「佢咁細個，識啲咩呀！」小朋友單純又簡單，鍾意就係鍾意，唔鍾意就係唔鍾意，其實喺再次報讀學校嘅過程，或者都可以留意到佢鍾唔鍾意將要轉讀嘅學校，若然佢事後表現抗拒，或者就唔應該強行要小朋友隨家長心意去轉校喇！

3. 課程銜接

最後，其中一個令家長考慮轉校原因，相信都關乎到學校課程深淺問題，擔心輸咗喺起跑線就點補都補唔返，但呢個講法，都只在於家長單方面希望，而小朋友呢？你想佢讀深啲，佢又其實適唔適應到？一下子由較淺嘅K1，跳到較深嘅K2，又會唔會令小朋友喺幼稚園階段就要承受讀書壓力呢？

有人話：「想揀間課程深啲嘅學校。」，而其實讀嘅始終都係小朋友，呢個家長個人希望嘅「深啲」對於小朋友嚟講，真係未必一時三刻應付得到；鯊魚太絕對明白，作為家長可能會諗，我往後目標係想小朋友入到更好嘅小學，基礎唔好點去考學校，但都係嗰句，與其成日講為小朋友將來好，咁不如著眼目前。