資源少，父母選擇適切治療要小心，也要爲孩子加油！

KidBuddy

近年有自閉症、過度活躍症等發展障礙的兒童愈來愈多，醫管局接獲的求診數字每年上升近一成。不過，公立醫院的資源卻沒有因而大幅增加，以致兒童診症要大排長龍。有家長向本刊反映，輪候正規的政府精神科治療排了一年、做訓練又要等兩年半。家長茫然數着一年又一年過去，擔心孩子成長錯失治療黃金時機，惟有盲舂舂在坊間尋找服務，卻令魚目混珠者有機可乘，推出各種各樣收費不菲的「治療」服務，但政府卻無規管，家長分分鐘花費冤枉錢，孩子卻未必能在成長路上衝破障礙。

四十三歲的劉太，幾年前與丈夫計劃生小朋友，事前做足檢查，夫婦身體健康，一一年順產誕下兒子康康（化名），初生時眼仔碌碌，非常精靈，但劉太有個教了十年幼稚園的親戚留意到，只有數個月大的康康，去到陌生地方會大發脾氣，表現不尋常。劉太在康康一歲時，要求母嬰健康院轉介兒子到衞生署的兒童體能智力測驗中心做評估，結果康康被診斷出有自閉症，她才意識到，孩子的成長將會一步一艱辛。

康康來自基層家庭，爸爸在大陸做業務員養活一家三口。劉太像一隻盲頭烏蠅，為患病的康康四出奔走，一邊排隊睇政府精神科醫生，一邊輪候社署及關愛基金資助的治療訓練。小朋友做完評估後，測驗中心給家長的指示只是一紙文件，「全部都係剔剔剔，剔咗要睇精神科、驗眼、驗耳、做語言訓練等。」劉太要自行為孩子「執藥」，但「藥量」幾多她卻不清楚，「唔知訓練要幾密集，全部都係自己去摸索，靠『斷估』。」

康康由一歲零三個月開始排隊，等了十個月，終於有關愛基金資助的認知及感覺統合訓練：認知訓練包括配對、分類、數目、排序等，訓練理解物體概念、邏輯分析、抽象思考等能力；感統訓練則包括玩吊環、打鞦韆等，以訓練視覺、聽覺、觸覺、前庭覺及肌肉關節動覺的整合處理能力，但一星期只有一節。而康康排期見公立醫院的兒童及青少年精神科醫生，原定等到一五年十二月。不過，康康兩歲半時，行為問題變得嚴重，會搣人、咬人，周街𦧲地。一般小朋友歲半就懂得說「媽媽」等日常詞彙，但他仍未有任何語言能力。劉太於是獲安排提早一年半見醫生。與此同時，卻要長時間輪候俗稱「S位」的社署資助特殊幼兒中心（Special Child Care Centre），接受較密集的訓練。

密集訓練苦等兩年

入小學之前（即零至六歲），是自閉症兒童接受治療的關鍵時期，但康康等到社署的S位密集訓練已將近四歲，服務卻是截至六歲，換言之，康康只能接受約兩年治療就要升小學，劉太擔心孩子錯過黃金期，「以前以為入咗S位就一勞永逸，唔使再東奔西跑，但唔係，原來好多嘢都唔夠。」

劉太解釋，S位特殊幼兒中心提供的認知及語言訓練，原來每個月只有各一節，感統訓練甚至一年才有三節，其餘時間都是群體活動，令她非常擔心訓練不足，「如果你唔理佢，有啲小孩喺S位三年都戒唔到片，可以嚴重到咁。」

由於劉太每四個月至半年才有機會見精神科醫生查詢，她惟有參考其他家長的經驗，「叻嗰啲媽咪會比較四、五間機構，再決定用邊間嘅服務，我會跟佢哋，想行少啲冤枉路。」她聽過很多家長會試針灸、音樂治療等，「我都心郁，但知道成效有待證實，而且全部都好貴，我唔敢試。」劉太曾經貪平，團購坊間一百三十元一堂的感統班，康康上了幾堂後，有次出手打同學，導師向劉太反映，她才知道那個感統班並非針對自閉症孩子，導師沒有接受過相關訓練。

新症年增一成

有自閉症、專注力失調／過度活躍症等發展障礙的小朋友，近年愈來愈多。衞生署兒童體能智力測驗中心，去年為接近一萬六千人做評估，比一三年錄得的一萬四千幾人，增幅近9%。新增個案中，過度活躍症有二千八百幾宗；自閉症有約二千宗。公立醫院、社署同樣錄得愈來愈多新症，而輪候時間都起碼一年。很多家長都像劉太，愈等愈心急，怕耽誤治療時機，於是自行為孩子安排訓練，但可能藥石亂投。

撰文：吳婉英

資料來源：http://nextplus.nextmedia.com/news/latest/20160909/425353

lulumelody

原帖由 KidBuddy 於 16-09-09 發表
近年有自閉症、過度活躍症等發展障礙的兒童愈來愈多，醫管局接獲的求診數字每年上升近一成。不過，公立醫院 ...

其實就算Ｓ位，單對單３Ｔ訓練好少。不過，其實有Ｄｓ位小朋友可以轉ｉ位，仍然羈佔Ｓ位，但Ｓ位主任根本唔可以做任何事。