大學面試踢拖 著卡通衫扣分 學務長﹕家長陪同反映欠獨立

elbar

http://news.mingpao.com/20130727/gha1h.htm


大學面試近日相繼展開，有大學學務長及教員提醒，過往有學生穿人字拖、短褲、特大卡通圖案衫現身，顯得不成熟；有人則面試時不斷整理衣衫，過分拘謹；另有學生公式化堅持與教員握手，或由父母陪同赴會，這些細節都會被扣印象分。考官想選出熱愛該課程的學生，但有面試者直言報讀該科只為「試吓囉」，亦有人在輔導機構模擬面試扮有熱誠，但終經不起「盤問」招認撒謊。

在新學制之下，不少競逐學額的考生試成績分數相近，大學面試變得相對重要。科技大學學務長譚嘉因表示，去年有學生「踢人字拖」面試，予人不尊重場合之感。另有家長陪同子女面試，等候時表現坐立不安，「行嚟行去，又周不時伸個頭裝吓入面」，他指出，家長過分緊張反映學生不夠獨立，更會騷擾面試。

態度應對最重要

身兼應用社會科學系講師的理大學生輔導網絡主任崔日雄指出，去年有學生穿短褲、大公仔印花T恤出席面試，與場合不符，亦顯得不成熟，印象分大打折扣。崔補充，社工課程強調人性化，面試時毋須過分隆重，不一定要穿套裝，「個個恤衫西褲都黑色、白色，就好似去靈堂咁」，曾有學生因氣氛太凝重，緊張得不時整理衣衫，面試全程不專注。

要有禮貌 尊重別人

他又提醒，面試最着重學生的態度及應對，切勿「有你講無人講」，亦不要做公式化行為，「有學生堅持一定要同教員握手，唔係唔捨得走」。

浸會大學教務長蘇國生提醒，面試時不要穿校服，「係咪想標籤自己來自什麼學校，定係名校呢？」女生亦切忌穿得過分暴露或化濃妝。他說，學生可配合所報學科穿著，如體育相關課程面試可穿「波鞋」，亦有報讀視覺藝術科的學生被要求帶同作品面試，「有人直接著咗作品上身」。蘇國生提醒，個人面試較注重禮貌，學生可於面試前跟考官打招呼；小組討論中，表達自己意見的同時要尊重他人意見。

當「水泡科」「冇得留低」

部分學生因欠誠意遭「叮走」，城市大學創意媒體學院助理教授楊嘉輝透露，曾有面試者被問及為何對該課程有興趣，先是支吾以對，再稱：「冇呀，試吓嚟interview囉。」明顯把該科當成「水泡」，當然「冇得留低」。

學友社學生輔導中心資深督導蔡浩麟表示，有學生參與模擬面試時，扮作對所報讀的課程很有興趣，卻解釋不到原因﹕「問多幾問，佢就認其實係講大話。」他提醒考生，面試前應蒐集相關課程資料，以及思考該課程與自己生活的關係。

                                                                                                                                                                                                                                                                                

elbar

刁難測EQ 虛心勿黑面

http://news.mingpao.com/20130727/gha2.htm


大學面試時，若考官吩咐你買早餐、或直斥你「英文咁低分」，你會如何應對？原來部分學系會故意留難面試者，測試其情緒智商（EQ）。有中學特設模擬面試刁難學生，鼓勵他們要有鬥心，被批評時仍要講得起勁；專家提醒學生勿「面黑」或失信心，並要虛心解釋自己的觀點。

面對批評 虛心回應

理大學生輔導網絡主任崔日雄表示，部分考官會即興問一些刁鑽問題，考學生反應，如﹕「我吩咐你買早餐，你會點做？」他估計，有人會質疑﹕「點解我要買早餐畀你？」又或想取悅對方：「咁你想食乜早餐？」崔稱，有關問題沒既定答案，但學生不應很「倔」地回應。

學友社學生輔導中心資深督導蔡浩麟說，曾有學生參加酒店管理課程面試時遭批評：「你英文咁低分，我哋全部用英文上堂，你跟唔跟得上？」該學生即時面色一沉、不敢再多說話。他建議考生被批評時虛心回應：「我會將勤補絀，補習英文。」勿「死撐」：「只係考試一時失手。」

問愈多 對你愈有興趣

馬錦明慈善基金馬可賓紀念中學為裝備考生應付考官刁難，該校校長蘇振威稱，校方故意在又嘈又熱的環境中作模擬面試，即使學生答得好，也質疑其答案：「睇佢哋會唔會面黑，或者問多兩句就嫌煩。」

「考官」又故意挖苦面試者：「參加製服團隊，冇時間讀書，唔怪得你成績唔好。」蘇振威說，部分學生會因此失信心，但其實可謙虛解釋：「參加活動係想平衡發展。」他提醒：「問得你愈多，就係愈對你有興趣，要盡量發揮、有鬥心，人哋咁批評你，你仍然講得起勁！」

說話膚淺失分

蘇又提醒，面試時不宜作「曬冷式」自我介紹：「數一大堆技能，同人鬥多咩？你寧可講點樣從考八級鋼琴中學習到堅持。」說話膚淺亦會失分：「淨係識講參加課外活動『好開心』就已經衰咗，應該講從中有咩反思。」

Bluegene

人字拖、短褲.  超正.  史上最強.

ANChan59

原帖由 Bluegene 於 13-07-27 發表
人字拖、短褲.  超正.  史上最強.

加染髮及男生穿鼻環！死未！

神科就好些。

Bluegene

中學生唔准著校服去面試？唔怪得我唔掂！原來有考官會咁谂, 以為個個都請假去面試或有專車接送.

Yanamami

難以置信~~

nintendo

其實點解會有人著人字拖、短褲去面試？
一般高中老師，唔會係教下學生，大學面試，工作面試 (假如選擇不升學)，應該點做，應該點穿衣？
如果有教，即係呢 d 學生真係好冇誠意
就算老師冇教，其實用下個腦諗，都唔應該會咁著


個學生有得面試，即係個分數係達到 minimum requirement，即係應該成績唔會太差
假設老早有更好 offer，唔在乎，咁不如唔好去面試啦

又要去面試，又咁求奇，根本係浪費時間，學生諗乜？

nintendo

Bluegene 發表於 13-7-27 13:12
中學生唔准著校服去面試？唔怪得我唔掂！原來有考官會咁谂, 以為個個都請假去面試或有專車接送.

可以帶定一套衫去換

小彬彬

"穿人字拖、短褲"
正常冇咁離普, 估計是揀科排錯位, 只好博大學唔收, 可以進入排位低d的課程

Bluegene

原帖由 nintendo 於 13-07-27 發表
可以帶定一套衫去換

我覺問題係著校服會被人話標籤, 咁好奇怪.  考官唔會唔知黎面試學生嘅基本資料, 點會唔知係邊間學校嘅學生. 除非Admission Office cut 曬有校名的資料, 以確保無名校效應. 但係基本無人得閒咁做, 所以我話著校服係炫耀好有問題.

nintendo

Bluegene 發表於 13-7-27 15:18
所以我話著校服係炫耀好有問題.

我都覺得咁講唔公道

ANChan59

原帖由 Bluegene 於 13-07-27 發表
我覺問題係著校服會被人話標簽, 咁好奇怪.  考官唔會唔知黎面試學生嘅基本資料, 點會唔知係邊間學校嘅學生. ...

我在EK見大部份人建議升中著校䏜，到大學反而覺得標籤。大學看公開試成績選人作面試，理應問題不大。

真有趣！

ANChan59

我奇怪，現在不用上課，不用穿校服，帶多套衣服是不需要，穿甚麼衣服，是自己選擇而已。

在面試前，我跟兒子討論 Dress code, 他傾向Business causal, 我傾向 Business formal. 他接受我的建議，第一次formal 些，然後調整。第二次開始一樣西裝，改了白恤衫，加條校𧘹，似乎老嚟開就不變。

西裝皮鞋早些買，穿多幾次先到正式面試，會自然好多。

liloNstitch

ANChan59 發表於 13-7-27 19:50
我奇怪，現在不用上課，不用穿校服，帶多套衣服是不需要，穿甚麼衣服，是自己選擇而已。

在面試前，我跟兒 ...

"穿多幾次先到正式面試，會自然好多"

good point, 小朋友著晤慣,真係好晤自然, 尤其是呢牌天氣甘熱, 著幾層衫, 晤慣真係好難受,
如經濟許可, 比佢坐的士到試場, 不用行到身水身汗, 影響表現

ohnono

「我吩咐你買早餐，你會點做？」同佢買又話擦鞋，質疑佢又話黑面。我都好想知點答先好。係未應該叫阿sir拿拿林面試完一齊去食早餐，抑或索性叫阿sir移師去飯堂面試，一路食，一路面試好呢！

vincher

回復 ANChan59 的帖子

出乎意料之外！不過，通常你叫子女大學面試穿校服，他們怕瘀，吾会着！！！

fion6406

原帖由 vincher 於 13-07-29 發表
回復 ANChan59 的帖子

出乎意料之外！不過，通常你叫子女大學面試穿校服，他們怕瘀，吾会着！！！ ...

我記得我n 年前大學面試都無人著校服，但已經唔記得當年有無在著唔著校服呢個問題上苦惱過。

judy

我見到嘅情形是個個着套装，悶死人冇命賠嗰隻。