放榜
1. 七月頭係放榜之大日子，無論你有冇報讀直資，自行成唔成功，呢日都要一早返小學攞結果。
2. 其實學校放榜日之前已收到結果，有啲學校會早一晚打電話俾派得唔好之學生暗示作好叩門準備(其實學校係唔可以咁做)。
3. 無論學校會唔會暗示，家長都應該放榜前為叩門作好準備:
- 放榜前一星期，選定叩邊幾間，然後打電話查詢有冇得叩門，免得白走一趟。
- 有啲學校要求你自行同抽獎都選做第一志願，先有得申請，所以自行選校時可能要考慮呢一點。
- 有啲學校會要求主科全部A加埋操行要B或以上先可以攞申請表。所以六年級期終試都唔可以鬆懈，五、六年級要聽話啲，如果操行B-就好難叩門。
- 決定叩邊幾間後，要準備學生個人履歷同叩門信(部分學校網有叩門表格下載，無須叩門信)。帶備白信封、郵票、証件相、萬字夾、支票簿、身份証/出世紙副本等有用物品備用，派位証可能要影印。
- 要擬定路線，最好搵定人做司機，方便四處叩門。
- 有啲學校係即日通知筆試、面試，所以一日未必去到好多學校，但第一日係最緊要嘅，所以最想叩門之學校應去叩先。
- BAND1英中比較難叩門，家長亦可以叩BAND1中中，希望入到英文班。
4. 如果叩門尚未成功，家長記得一定要去派位中學先註冊，最多日後叩門成功再取回派位証。即使開咗學，學校仍然有機會通知學生被取錄，所以家長最好唔好咁快買晒書同做校服，買咗書都唔好咁快寫名。
5. 無論結果如何，家長都唔好俾小朋友覺得間學校唔好，應該隨遇而安，否則小朋友會唔鍾意間學校，冇心機讀書。如果真係想轉校，中二可以再報插班。
6. 個人認為讀書要靠小朋友自己努力，唔可以完全倚賴學校。依家啲名校都冇咩功課，好靠小朋友自發去學習，反而啲普通學校想做好成績，老師仲更加有心機教小朋友。
7. 中一入學前香港學科測驗(即分班試)對師弟師妹升中好重要，唔好咁自私，諗住自己已經過咗海就係神仙，就是但考咗就算。有啲學校上年同今年BAND1%相差超過10%，令啲BAND1生跌咗落BAND2都唔知，結果累到啲家長四圍撲學校，所以為人為己，要認真地考分班試。
8. 暑假期間，好多學校會舉辦中一預備班，如果要外遊，最好先打聽上課日期。
想知詳細升中資料，可瀏覽教育局網頁http://www.edb.gov.hk/index.aspx?nodeID=1565&langno=2
[ 本帖最後由 khmama 於 10-3-25 20:33 編輯 ] | 
發表於 09-9-6 23:10
