教育王國

標題: 為家人擔心 [打印本頁]

作者: Joanwatson 時間: 14-3-1 00:17 標題: 為家人擔心

細佬的兒子步入18個月，不懂望人，跟母親外的人沒眼神接觸，完全聽不懂指令，用手比劃叫他望其他方向他完全沒反應，不懂手指指，到玩具店問他喜歡哪個不望人不回應也不懂指哪一個，按按扭扭的玩具懂得玩，但最喜歡不停來來回回跑動，把物件重複拋擲，從未試過拎住奶樽自己飲，不會拎匙食野，學的意慾都沒有，咁大個換片還是東扭西扭發脾氣，著褲都唔識企定遞高隻腳比你著，語言還是不知真懂非懂的mamamadadadad的bb話，長輩已經提出過擔心，但弟婦一聽到別人講佢小朋友即時會起晒槓，話年紀仲咁細，未學識就是未學識，遲早一定識，完全唔覺得小朋友有問題，本人非專業人士不懂下判斷，想請問過來人的媽媽們，小朋友似有自閉症嗎？

作者: chowqv 時間: 14-3-1 03:58 標題: 回覆：為家人擔心

得18個月，又真係好難知。
有自閉症既，就連阿媽都唔會有眼神接觸。
不過快2歲，你不如鼓勵弟婦俾阿b讀下b班。一返到學校，有事老師自然講。

作者: Joanwatson 時間: 14-3-1 09:48 標題: 引用：得18個月，又真係好難知。有自閉症既，就

原帖由 chowqv 於 14-03-01 發表
得18個月，又真係好難知。
有自閉症既，就連阿媽都唔會有眼神接觸。
不過快2歲，你不如鼓勵弟婦俾阿b讀下b ...

謝謝你的回覆，姪兒已面試了四五間，沒一間取錄，弟婦話唔讀就下年讀，皇帝唔急太監急，看來我們只有用時間去等待吧

作者: Lang晴朗天 時間: 14-3-1 11:36

三歲前的黄金時間仲要用来等！若真是有問题排的政府服务都要2年！訓練效果多少打的折！過来人，后悔都冇用！

作者: Joanwatson 時間: 14-3-1 12:55 標題: 引用：三歲前的黄金時間仲要用来等！若真是有問题

原帖由 Lang晴朗天 於 14-03-01 發表
三歲前的黄金時間仲要用来等！若真是有問题排的政府服务都要2年！訓練效果多少打的折！過来人，后悔都冇用 ...

謝謝你的意見，弟婦一向自己同bb去健康院，我們從無得知姑娘點講，請問如果見姑娘發現小朋友有問題會否主動轉介醫生/評估？男人對小朋友發展無概念講得多，細佬覺得針對佢仔，認定佢有病左右做人難

作者: chowqv 時間: 14-3-1 17:41

Joanwatson 發表於 14-3-1 09:48
謝謝你的回覆，姪兒已面試了四五間，沒一間取錄，弟婦話唔讀就下年讀，皇帝唔急太監急，看來我們只有用時間 ...

大伯，個仔係人地既，你點急都無用。由佢啦。
再唔係，搵下有無同齡既小朋友去一齊玩。
一班小朋友一齊，一睇就知分別。

作者: pocoyo123 時間: 14-3-1 23:39

你自己本身有無小朋友, 如果有說服力比較強D, 佢可能會聽得入耳, 相反, 佢會覺得你都係聽人講, 唔信你.

就算去健康院, 好多時都係會觀察先, 再等2歲返去睇, 發現徵狀多左, 先會排期見醫生, 你不防兩歲時同佢一齊去健康院, 或者會清楚知道情況, 不過, 如果小朋友父母好介意, 相信你都唔可能免強人

作者: Chaochao 時間: 14-3-1 23:46 標題: 回覆：Joanwatson 的帖子

提示: 作者被禁止或刪除內容自動屏蔽

作者: Joanwatson 時間: 14-3-2 11:45 標題: 引用：你自己本身有無小朋友,+如果有說服力比較強

原帖由 pocoyo123 於 14-03-01 發表
你自己本身有無小朋友, 如果有說服力比較強D, 佢可能會聽得入耳, 相反, 佢會覺得你都係聽人講, 唔信你.

就 ...

我得一個仔十歲了細時都唔係咁我父母開頭無咩但係bb漸大佢地話同細佬一家一齊落街飲茶行街就發現bb從來未試過同人（包括家人）打招呼人地叫佢係零反應眼尾都唔望，座頭阿叔仲講笑話bb so cool唔睬人，街坊阿姨撩撩下都唔撩，我父母問弟婦你仔咁樣有沒有問題，佢仲話佢個格生得串遮，我開頭未看此forum曾借意問小朋友聽力點，佢話一早檢查左啦兩邊都正常。

作者: Joanwatson 時間: 14-3-2 11:58 標題: 引用：健康院通常到2歲都唔識講嘢或唔識簡單的指

原帖由 Chaochao 於 14-03-01 發表
健康院通常到2歲都唔識講嘢或唔識簡單的指令，會refer去CAC,比醫生再判斷。但若果早發現自己睇私家醫生，唔 ...

謝謝你的意見，不懂，我們跟bb本不會溝通，因為我們如何喊他的名字十幾遍都沒反應，他媽就可能叫十次他就望一眼咁，揮手，拜拜，手指指皆不懂，比玩具佢就識伸手拿住，指令簡單如比塊餅我地，比比，媽媽係邊佢都零反應，佢自己永遠一個人玩，唔同我仔玩，落到公園見到其他bb行埋黎佢都無反應人地想同佢玩佢會推開人或表現出漠不關心。我媽叫我地做中間人，但細佬兩公婆滿不在乎，講多幾句仲起晒槓話讀書少搵的少唔似得我地搵得多食飽飯搵佢個仔黎彈，可能個個都叫我由佢第時自己受返，我就係接觸左呢度知道三歲黃金期先至忐忑不安始終係自己個姪我父母個孫，唉。

作者: siufung 時間: 14-3-2 15:03 標題: 回覆：為家人擔心

18個月的小朋友，不要講超叻那些，基本hi，bye，請請，比野，回應人等等係正常發展應該做到的東西。不管你弟和弟婦是駝鳥政策拖字訣等奇蹟，還是執意認為BB冇問題，他們這樣拖對件事一d幫助都冇。害了孩子也害苦自己和家人...如果他們不聽勸告，去健康院姑娘一定指出有問題，或許專業的意見他們才相信。身爲親人，思不到坐視不理是很正常的，試下和你弟弟單獨傾，可能弟婦要面子不肯接受意見。盡量提點他們，得罪也冇辦法，因為你是想小朋友好、家人好。加油！

作者: hv245 時間: 14-3-2 15:59

提示: 作者被禁止或刪除內容自動屏蔽

作者: siufung 時間: 14-3-2 16:30 標題: 回覆：為家人擔心

這裏的媽咪都好想幫手，明知小朋友需要注視而不被注視是很可惜的....我有個朋友她的小朋友10幾個月時愛玩車轆，愛自轉，但不誇張，比正常小朋友多d；她已好緊張，積極幫他，去上政府社交、語言治療，而家剛4yr，考了入呂郭幼稚園K1(都好難考)，已讀了一個學期行爲改善左，學校稱他融入得好好，是個好學生。所以早注視，大人小朋友也早得益！

作者: apple~y 時間: 14-3-2 22:23

本帖最後由 apple~y 於 14-3-2 22:50 編輯

其實唔好怪你細佬唔接受 ,
講真有邊個父母一開始接受到自己小朋友有問題
望都望只係小朋友仲細大大就識,都唔想望係自閉
你唔好迫佢去接受,小朋友徵狀甘明顯現實係殘酷,連老人家都覺有問題
你係到留言都估到係自閉
佢應該內心都知有問題,
但係你地面前死頂,比時間佢,個個父母都要經歷呢個關口

作者: apple~y 時間: 14-3-2 22:46

本帖最後由 apple~y 於 14-3-2 22:48 編輯

我諗現在可以做盡量令佢同你地有眼神接觸
個小朋友無反應唔望人,甘佢對咩有反應?食物?玩具
如果係食物,用食物引佢注意,將食物放近你塊面,引到佢望你
次次叫佢名"xx,有0野食",
佢唔so你,可以表情誇張d,"嘩,xx真係好好食",
你平常心同佢玩甘輕鬆d,唔好比你細佬壓力
比時間佢面對,經歷,消化同接受

作者: Joanwatson 時間: 14-3-3 00:09 標題: 引用：這裏的媽咪都好想幫手，明知小朋友需要注視

原帖由 siufung 於 14-03-02 發表
這裏的媽咪都好想幫手，明知小朋友需要注視而不被注視是很可惜的....我有個朋友她的小朋友10幾個月時愛玩車 ...

多謝你的回覆，因為身邊無呢個病的小朋友，我父母都對自閉這個名詞好含糊他們老人家會將自閉唐氏智商低過度活躍等混淆我打算把搜集到的資料如病徵是三大障礙等好好打印出來註明出處跟家人討論完再平心跟細佬細談。

作者: Joanwatson 時間: 14-3-3 00:11 標題: 引用：Quote:Joanwatson+發表於+14-3-2+11:58+謝

原帖由 hv245 於 14-03-02 發表
其實即使去健康院, 如果父母同姑娘講小朋友無問題, 一般都話睇定D. 你有無一D 朋友有類似CASE或做幼兒教育, ...

多謝！我只知道他們今天不面對，他日上學被迫接受現實時打擊一定更大，所以一家人決定稍後開心見誠了

作者: Vichang 時間: 14-3-3 00:14 標題: 回覆：Joanwatson 的帖子

你第一段所講嘅就係我個仔18個月時情況。佢喺20個月評為自閉症，而家過多2個月就三嵗，最近呢幾個月先有單字同識拜拜、恭喜咋。a 仔真係有排教，教「俾」都教好耐。想當年我堅持認為阿囝有問題，周圍嘅人都覺得我多疑，同你弟婦掉轉諗法！

作者: Joanwatson 時間: 14-3-3 00:16 標題: 引用：+本帖最後由+apple~y+於+14-3-2+22:50+編輯

原帖由 apple~y 於 14-03-02 發表
本帖最後由 apple~y 於 14-3-2 22:50 編輯

其實唔好怪你細佬唔接受 ,

Apple你說得太100%似他們了！弟婦成日話阿邊個細時都係三歲先講野，隔離阿邊個又話男仔係會遲，唔使擔心之類，只選佢自己鐘意聽到的，謝謝你的意見，我已打算把有用的資料整理一下打印出來給他們自己看，希望文字的力量比我口述來得有用。

作者: legolas625 時間: 14-3-3 00:28

我個仔的情況類似，14個已寫醫生信轉介，16個月見cac醫生，話有自閉症狀，發展慢，之後上訓練，而家快18個月，幾日前再見醫生，望人有改善，開始手指指。

作者: legolas625 時間: 14-3-3 00:40

其實我一直懷疑我個仔有問題，我有時都覺得自己係咪多疑，但因為我的堅持，先幫到阿仔，而家比之前有好大進步。其實咁細個，醫生都可以話佢一定係，要2歳後才磪定，不過慢過人係客觀事實，父母要正視，我同老公學左點同阿仔訓練，阿仔真係好左，咪當學教仔。同埋政府服務要排，可以先排住等，阿B好左可以唔要，錯過黃金時間，會害左小朋友

作者: Joanwatson 時間: 14-3-3 00:42 標題: 引用：你第一段所講嘅就係我個仔18個月時情況。佢

原帖由 Vichang 於 14-03-03 發表
你第一段所講嘅就係我個仔18個月時情況。佢喺20個月評為自閉症，而家過多2個月就三嵗，最近呢幾個月先有單 ...

原本家事不想多講，細佬兩公婆都做野返工時間長，姪兒滿月起就是跟家傭揍大，他們放假我媽上過佢地屋企，媽話佢兩公婆自顧自打機/呢係房，個仔就同工人係廳，再唔係落街食野都唔帶仔落，兩公婆仲掉低過個仔幾次去旅行，開頭以為小朋友無人教就會係咁，我漸漸上網睇得多先發現係病癥，你講得對，我試過教姪兒擺/比來回數十次加示範他都是不為所動的，看罷你的留言我更相信自己的懷疑沒錯，你有先見之明令小朋友得到合適治療，實在是一位觀察入微的媽媽！謝謝你的意見！

作者: Joanwatson 時間: 14-3-3 00:50 標題: 引用：我個仔的情況類似，14個已寫醫生信轉介，16

原帖由 legolas625 於 14-03-03 發表
我個仔的情況類似，14個已寫醫生信轉介，16個月見cac醫生，話有自閉症狀，發展慢，之後上訓練，而家快18個 ...

Legolas聽到你兒子的情況很鼓舞，短短時期已經有進步，那請問兩歲是否再次再接受評估，去確定是否屬自閉症？請問你是否主動去接觸健康院姑娘轉介？

作者: jjcow 時間: 14-3-3 00:52

legolas625 發表於 14-3-3 00:40
其實我一直懷疑我個仔有問題，我有時都覺得自己係咪多疑，但因為我的堅持，先幫到阿仔，而家比之前有好大進 ...

係呀，你講得好啱，慢咗就係慢咗，唔好理最後係唔係。小朋友發展係有里程碑嘅，尤其係三歲前，係發展最快速嘅，達唔到里程碑就係有問題。「每個小朋友發展都唔同，唔好同人比較」＜＜呢句說話真係害人不淺！

作者: jjcow 時間: 14-3-3 01:02

Vichang 發表於 14-3-3 00:14
你第一段所講嘅就係我個仔18個月時情況。佢喺20個月評為自閉症，而家過多2個月就三嵗，最近呢幾個月先有單 ...

係呀，千祈唔好理身邊人點講，自己感受先最真確。我仲衰啦，個仔歲半 test 樣樣都過唔到，同健康院姑娘講話佢表哥歲半都唔係咁，點知比佢用好不屑嘅語氣同我講：「你將自己個仔同人地比較呀？」
後尾我個兒科寫紙比我自己去排 CAC，我直情打電話返健康院同佢講：我唔會再返嚟，依家有 CAC 同我跟！

作者: legolas625 時間: 14-3-3 01:13

1歲時執唔到小物件，14個到健康院覆診時，主動向醫生提出，醫生見我擔心，肯寫cac轉介信，話要排6至9個月，我好彩因有人改期，未到16個月就見到cac醫生，因我情況特別，未到18個月再見醫生，之後到今年尾再見醫生，先叫診斷性評估，到時阿仔23個月，因為而家太細，但已排了E和S位。

作者: legolas625 時間: 14-3-3 01:19

醫生話發展可以有6個月誤差，而家未識bye，應名，太慢了。
教仔一定要勤力，仲好辛苦，尤其係A仔，要不停同阿仔玩，講野，教指令，認物件，可能要一個動作要教幾個月，父母太懶，當然唔會識，BB天生不會bye

作者: legolas625 時間: 14-3-3 01:29

我的感受係，做父母一定要主動，先幫到阿仔。我叫老公自己搵自閉資料，佢都覺得似阿仔的問題，好接受到，仲一齊同阿仔上堂

作者: siufung 時間: 14-3-3 02:01 標題: 引用：Quote:legolas625+發表於+14-3-3+00:40+其

原帖由 jjcow 於 14-03-03 發表
係呀，你講得好啱，慢咗就係慢咗，唔好理最後係唔係。小朋友發展係有里程碑嘅，尤其係三歲前，係發展最快速 ...

“每個小朋友發展都不同，不要比較“某程度可以係啱的，但有d野，off得緊要一定要注視....BB的發展係有標準的，我女當年是典型:“七坐八爬九出牙“.......之後有d野稍一跟慢左(例如自己用杯飲水較遲掌握)，我便努力跟進番個task

作者: siufung 時間: 14-3-3 02:02 標題: 引用：我的感受係，做父母一定要主動，先幫到阿仔

原帖由 legolas625 於 14-03-03 發表
我的感受係，做父母一定要主動，先幫到阿仔。我叫老公自己搵自閉資料，佢都覺得似阿仔的問題，好接受到，仲 ...

你囝囝好好好幸福！！有積極正面的父母，他一定會好快進步！！

作者: siufung 時間: 14-3-3 02:37 標題: 引用：Quote:原帖由+Vichang+於+14-03-03+發表你

原帖由 Joanwatson 於 14-03-03 發表
原本家事不想多講，細佬兩公婆都做野返工時間長，姪兒滿月起就是跟家傭揍大，他們放假我媽上過佢地屋企，媽 ...

其實他們有你這樣的大伯已好幸福了！你自己有自己家庭，亦有孩子要教，爲了不誤姪子多番搜集資料，希望能幫一把...老實講，得罪一句，你弟弟和弟婦如果仍堅持這種態度教養孩子，莫講是A仔，就算是天賦異稟的天才，也養不了成才；萬一孩子真是A仔，所需父母投放的愛心耐性時間金錢將比培育正常小朋友多無數倍，如持續“放逐“態度對待，這有如置孩子於永無翻身的萬丈深淵！小朋友好可憐，父母將來更會視之如包袱。這並不是“自己受番“咁簡單，因為小朋友將來是一個獨立個體，他也要面對社會、面對自己，到時他沒能力自處，只埋怨父母又有何用？現在首要是父母面對問題，積極幫忙小朋友；其實幫孩子也是幫自己！

作者: pokey 時間: 14-3-3 07:18 標題: 回覆：為家人擔心

從來干涉人教仔都會失感情，即使係多年好友，你一講人地個仔點，或者佢地教法點，即刻反面都有可能。所以我都避免講太多，有啲野提一兩次佢都唔理就算了。另外再旁敲側擊咁囉。例如你介紹佢去playgroup，唔駛日日喺屋企悶幾好喎，等老師同佢講個問題。例如你facebook同其他朋友討論下社會上的幼兒問題。

作者: 琪寶 時間: 14-3-3 08:50

我好明白你弟婦的心情，以我為例，我嫂個仔係典型a仔，在我女還是bb時已經常提點我要留意什麼什麼，我當時一點也不上心。到我女兩歲多語言發展仍很慢時，她就多次叫我要帶阿女去評估，說她可能都是a的，當時我覺得很煩厭，心想為什麼你總認為我女和你兒子有同樣問題。我覺得我女除了語言慢和怕陌生人之外，其他都很正常，跟你兒子很不同。
到之後，連我女的老師都說她語言真的很慢，我才帶她評估，才發現她是自閉傾向，雖然到現在我都不太接受這個結果，因我覺得心理學家的解說很含糊(她說我女兒是踩界，剛剛跌入自閉傾向這個範圍，若在我們中心上三個月課程，必會有很大進步)，我覺得他是為做生意居多。
我覺得真的需要有專業人士(如老師)出口說，你弟婦才會醒覺有問題，你侄兒有上playgroup嗎？如有，可問下導師的意見，如沒有，可提出讓小朋友上playgroup，等你弟婦親眼見下兒子和其他小朋友的分別。

作者: Vichang 時間: 14-3-3 09:03 標題: 回覆：Joanwatson 的帖子

突然間諗起，如果弟婦未幫囝囝買保險，快d買，任何懷疑個案一入左file 保險公司唔承包！

作者: bearclub 時間: 14-3-3 10:14 標題: 引用：得18個月，又真係好難知。有自閉症既，就

原帖由 chowqv 於 14-03-01 發表
得18個月，又真係好難知。
有自閉症既，就連阿媽都唔會有眼神接觸。
不過快2歲，你不如鼓勵弟婦俾阿b讀下b ...

唔一定。有啲自閉症小朋友眼神接觸唔錯，有啲就局限於親人。

作者: Joanwatson 時間: 14-3-3 11:47 標題: 引用：從來干涉人教仔都會失感情，即使係多年好友

原帖由 pokey 於 14-03-03 發表
從來干涉人教仔都會失感情，即使係多年好友，你一講人地個仔點，或者佢地教法點，即刻反面都有可能。所以我 ...

全對基本上講過一次，見面氣氛已有不同，如果不是怕婆媳爆發我媽都不會要我開口吧，playgroup也是好提議，但私營機構不知道見小朋友有問題會否作出建議提醒，但起碼是一個學習機會，謝謝你的建議！

作者: Joanwatson 時間: 14-3-3 11:48 標題: 引用：突然間諗起，如果弟婦未幫囝囝買保險，快d

原帖由 Vichang 於 14-03-03 發表
突然間諗起，如果弟婦未幫囝囝買保險，快d買，任何懷疑個案一入左file 保險公司唔承包！

...

姪兒出生我父母已經幫bb買左，不知道將來確診會否影響受保？謝謝你的提醒！

作者: Joanwatson 時間: 14-3-3 12:02 標題: 引用：醫生話發展可以有6個月誤差，而家未識bye，

原帖由 legolas625 於 14-03-03 發表
醫生話發展可以有6個月誤差，而家未識bye，應名，太慢了。
教仔一定要勤力，仲好辛苦，尤其係A仔，要不停同 ...

謝謝你的分享，看到你們為小朋友的付出令小朋友日漸進步，希望家人也盡快接受，好好幫助小朋友，雖然弟兩公婆說什麼搵食艱難返工壓力是真的，家家都有，但我認為教養小朋友父母是責無旁貸的，小朋友比大人更無辜，有病加上白紙一張，什麼命運就是看父母如何去對待。

作者: llam1210 時間: 14-3-3 12:36 標題: 回覆：Joanwatson 的帖子

試問一些有特殊教育經驗的機構例如心橋，循道。希望幫到你。加油。唉看你描述真同我女兒那時一樣

作者: Vichang 時間: 14-3-3 13:24 標題: 引用：Quote:原帖由+Vichang+於+14-03-03+發表突

原帖由 Joanwatson 於 14-03-03 發表
姪兒出生我父母已經幫bb買左，不知道將來確診會否影響受保？謝謝你的提醒！

...

如果買左危疾有自閉症，確診后可能有得賠。

作者: legolas625 時間: 14-3-3 13:38

我都建議你叫弟弟夫婦帶阿B去參加playgroup，要揀同班差唔多年紀大細既，咪話當係玩囉，帶佢見多d人都係好事，因為佢要知道要同人溝通，唔係困在自己世界，一家有好無壞。

我都是因為參加後，覺得阿仔好多方面比其他小朋友差(我絕不係怪獸家長)，唔到我唔認，因為無理由差太遠、慢太多。我地兩公婆都有返工，為個仔撲黎撲去都辛苦架，我有時好累會喊，但學我老公話齋:"辛苦都要做架。"，好彩佢好支持捱過。就算阿仔其實係唔係a仔，我地一定係幫緊佢，幫佢接觸、適應呢個世界，同人溝通。

呢度好多媽媽都好戥你個姪心急，加油呀

作者: pocoyo123 時間: 14-3-3 14:19

樓主你真係一個好人, 只是佢地暫時感受不到.

想當年, 亞仔評估有問題時, 我也有幾個月不能面對自己囝囝, 那種自責, 傍徨, 無助, 有時係好難去面對.

回想我都係有家人支持先可走出這困局, 希望, 你都可以幫助佢地一家人走出去, 努力面對

作者: cvpigpig 時間: 14-3-3 15:27 標題: 引用：Quote:原帖由+pokey+於+14-03-03+發表從來

原帖由 Joanwatson 於 14-03-03 發表
全對基本上講過一次，見面氣氛已有不同，如果不是怕婆媳爆發我媽都不會要我開口吧，playgroup也是好提議， ...

老師唔會明顯講，但係當一班年齡差不多的小孩在一起玩時，就會好明顯見到分別。

作者: Joanwatson 時間: 14-3-7 22:15 標題: 回覆：為家人擔心

不好意思浪費了大家的關心結局是壞消息，事情發展到今天家庭聚會，我趁父母揍孫時拉細佬兩公婆談自閉傾向的詳情，兩公婆沒有動氣，弟婦話找過做幼教之類的朋友問過，佢朋友話無擔心需要，因為自閉兒必定會玩車輪，轉轉物體而姪兒沒有，繼而話溝通方面，話姪兒六七個月大前都懂得與人眼神接觸發出bb話與人溝通，而家同人無eyecontact無語言手指指發展慢係家傭造成，我想插咀也不行，最後他們話，月底到健康院檢查就算姪兒發展未達標也不會擔心，因為指標泛指一般小朋友，不能概全，而且佢地話姪兒懂行懂走爬上爬落玩具識玩，沒有智力問題，反叫我們唔好想太多杞人憂天，聽到此心有點痛不知他們天真還是鴕鳥，看著姪兒整晚三小時的家中來回同一路線跑動，自笑自玩皮球（不也是圓，會轉的嗎）真希望是大伯伯娘看錯。

作者: Anan3388 時間: 14-3-7 22:43

勸親人真係好唔易。我都試過。要堅持，同埋同佢哋講，當買個保險，評咗無事咪得個安心，好過第日後悔自己無早些幫個仔，因為排服務都要一兩年！

當年我咁勸親人，佢哋都唔肯即時去貴嘅評估，先去咗協康做幼師評估(當年600)，係知無得排服務嘅。評出嚟係知有問題，我再勸佢哋，花多少少錢排住隊先，到時排到無用咪唔要，好過誤咗個仔。因評咗第一次都接受多咗，就去另一間有得排嘅做評估。最後，都係自閉，都排年多有服務，但好在當時有排到，否則仲耐。

排到之前佢哋都開始接受到，轉到個思想係點盡早幫個仔，所以未排前有密集。現在相比佢當初，孩子好大進步嘞！

我當時無兩公婆一齊傾的，我選擇同至親那個單獨傾，始終面子問題。所以我建議你同細佬再私下傾多次，再鼓勵佢哋去評估呀！

其實當初我都好怕親人覺得我多事，但我同我親人講，你怨我多事我都要堅持勸你，因為訐咗一場虛驚，最多咪俾你話我大驚小怪？我出發點都係當孩子係親人想幫佢。但萬一我唔提出，遲咗先去評而又真係有事，誤咗孩子黃金期，我真係好唔安樂㗎！

到今日，我無後悔過我堅持，仲覺得好彩我堅持，孩子進步我都有功勞㗎！

作者: legolas625 時間: 14-3-8 12:06

雖然我未見過你的姪仔，但你姪仔的情況似乎比我阿仔差，我阿仔大肌肉無問題，得bb話，俾人評為有自閉症狀、整體發展慢，但無沉迷轉車輪、亦無同一路線來回跑。自閉有好多症狀，要綜合黎睇，問題行為亦要睇程度，我覺得叫名唔應、無眼神仲嚴重過玩車轆，因為這樣係唔理人。

如果以前有眼神，而家無左，即係倒退，亦更加要留意，小朋友應該而家大左應該識同人溝通交流、表達自己，醫生話A仔的症狀會慢慢浮現，愈大愈明顯。無錯，發展指標指標是根據統計所訂，小朋友有快有慢，但誤差是6個月，而家好明顯係慢過誤差期。

如果你弟弟夫婦抱住咁的心態，聽唔入耳，去健康院都咁堅持，加上遇上d求其的姑娘、醫生，話觀察下，又會拖到2歲再去健康院，又遲左，排cac又遲左，排服務又遲左。

咁如果佢地認為個仔係咁，係因為工人照顧造成，佢地有咩有打算?　點樣教番好佢? 無人教佢唔會識架，小朋友如果繼續習慣咁既行為模式，會好難改變，2歲無書讀又算，咪繼續自我世界。

作者: legolas625 時間: 14-3-8 12:09

你弟弟夫婦已經無動氣，可能開始接受，大伯繼續努力~~

作者: Joanwatson 時間: 14-3-8 15:57 標題: 引用：我好明白你弟婦的心情，以我為例，我嫂個仔

原帖由琪寶於 14-03-03 發表
我好明白你弟婦的心情，以我為例，我嫂個仔係典型a仔，在我女還是bb時已經常提點我要留意什麼什麼，我當時 ...

謝謝您的回覆事到如今我都希望對佢地有正面影響潛移默化他們去接受去評估看到私人評估的價錢我想他們不會捨得

作者: Vichang 時間: 14-3-8 23:30 標題: 引用：Quote:原帖由+琪寶+於+14-03-03+發表我好明

原帖由 Joanwatson 於 14-03-08 發表
謝謝您的回覆事到如今我都希望對佢地有正面影響潛移默化他們去接受去評估看到私人評估的價錢我想他們 ...

可以排住政府先，有排排啊。

作者: wballp 時間: 14-4-28 09:46 標題: 引用：我好明白你弟婦的心情，以我為例，我嫂個仔

原帖由琪寶於 14-03-03 發表
我好明白你弟婦的心情，以我為例，我嫂個仔係典型a仔，在我女還是bb時已經常提點我要留意什麼什麼，我當時 ...

你嫂個仔即你哥哥個仔，遺傳的機會很大，所以佢果時提醒你好正常

作者: kennyrita 時間: 14-4-28 10:05

回覆 Vichang 的帖子

e d 保險都包? 包d 物? 訓練?

作者: yicbc 時間: 14-4-28 12:53

只要你姪兒返幼稚園, 老師就一定睇得出.
你話冇學校肯收已係警號.
相信佢地其實心中有數, 只係唔想咁快接受.
你已經做晒你可以做既事了.
比D空間佢地, 慢慢接受, 過程真係好痛苦.

作者: Vichang 時間: 14-4-28 15:14 標題: 引用：回覆+Vichang+的帖子 e+d+保險都包?++包d+

原帖由 kennyrita 於 14-04-28 發表
回覆 Vichang 的帖子

e d 保險都包? 包d 物? 訓練?

如果有買危疾，患了自閉的小朋友可能有得賠，因為自閉症係危疾一種。

作者: MissCarley 時間: 14-4-30 13:41

沒有眼神接觸、語言遲緩、沒有溝通動機，這些都是自閉症徵狀，建議早日進行評估及訓練。父母的確較難接受，但也要明白早日接受治療/訓練方能解決問題

作者: prettyporky 時間: 14-4-30 14:59 標題: 回覆：為家人擔心

「從未試過拎住奶樽自己飲，不會拎匙食野」...

我細仔依家8個月都識啦！
你姪仔未必係自閉，但可能係發展遲緩，都係唔ok，要正視

作者: LeeCC 時間: 14-4-30 22:20

chowqv 發表於 14-3-1 03:58
得18個月，又真係好難知。
有自閉症既，就連阿媽都唔會有眼神接觸。
不過快2歲，你不如鼓勵弟婦俾阿b讀下b ...

我个仔9个月大時，有幼稚園老師親戚話阿仔除了父母外，其他人冇眼神接觸，叫我留意
5歲評估輕微asd

作者: Jolly 時間: 14-5-13 11:08

睇樓主一路以來講嘅野，我都同樣有感受。
我自己有可愛a君一隻，見到弟婦大兒子出生，一路成長，我地都會在whatsapp中談論。因我在外國，她在香港，我冇時刻跟佢兒子程況。
十八個月時姪兒去健康院已是唔合格，姑娘話兩歲再睇。
剛兩歲了，再回健康院，姑娘說認知唔合格。
這些都是在whatsapp講。我知姪兒說話都有迉緩，所以幾為佢擔心。
我同弟婦感情好，我本身三姐妹加弟婦係whatsapp常有吹水，所以我常說我家a君嘅情況。
但friend還friend, 弟弟跟弟婦教仔自有一套，自成一角。我地明白教仔方法五花八門，冇咩錯同對，咁所以就算佢仔家下兩歲有這些迉緩，我都係勸唔郁佢去正視。
我都似樓主一樣，愛莫能助。
我唔知弟婦你有否在這區看，有的話，別生氣我在此說你，你知我千萬個唔願姪兒也是a君，只想你同弟弟正視情況，姪兒現在只係迉緩，就要做點教育功夫。

作者: Joanwatson 時間: 14-6-20 09:25 標題: 回覆：為家人擔心

謝謝各位的關心這件事我們已不多過問了同弟弟兩公婆之間多了層隔膜幾次都是從母親處得知姪兒情況歲半檢查不及格要見醫生最終排了半年至九個月做評估而且這段日子更安排聽力及腦波檢查我母親不解什麼腦波我上網也找不到資料請問有有經驗的媽媽嗎？

作者: idak 時間: 14-6-20 10:46 標題: 引用：謝謝各位的關心+這件事我們已不多過問了+同

原帖由 Joanwatson 於 14-06-20 發表
謝謝各位的關心這件事我們已不多過問了同弟弟兩公婆之間多了層隔膜幾次都是從母親處得知姪兒情況歲半檢 ...

其實你都唔洗唔開心，如我所知有得做聽力測試，檢查腦波（可能係照磁力共振），我個女果時係CAC做評估後做的，有兒科醫生跟緊，如你真係想幫佢地，可以上去協康或楊震之類地方，摞d訓練手册比新手家長，有書好過你慢慢揾資料！

作者: shareholder 時間: 14-6-20 12:24

都極大機會是自閉, 不過父母都唔急, 唔好厚多士, 廢事俾人爆你啦

作者: shareholder 時間: 14-6-20 12:32

那些教育專家, 唔想得罪你, 咪話佢無問題囉, 其實做過爸爸媽媽的都一定知啦, 點可能唔係自閉呀

作者: pokey 時間: 14-6-27 23:05 標題: 引用：謝謝各位的關心+這件事我們已不多過問了+同

原帖由 Joanwatson 於 14-06-20 發表

既然有健康院跟進，你地就唔駛再提了。好彩現在有得去評估，唔駛你乾著急

作者: hahatao711 時間: 14-8-12 21:39 標題: 回覆：Joanwatson 的帖子

有没有机会是只有你爸妈凑住个孙，弟弟弟妇返工，这样你及你爸爸妈妈就可以独自带个姪/孙去协康会做评估。做评估大概三个小时，总之把握机会约好协康会就可以，我都是用这个方法瞒夫过海的。评估不便宜，要5800元，当作给个孙买一年保险啦！

作者: samantha_yuen 時間: 14-8-13 00:11 標題: 引用：+本帖最後由+apple~y+於+14-3-2+22:50+編輯

原帖由 apple~y 於 14-03-02 發表
本帖最後由 apple~y 於 14-3-2 22:50 編輯

其實唔好怪你細佬唔接受 ,

認同！我仔將要揀小一，我自己知自己事，都是特殊小學適合！都是慢慢面對這痛苦的事實！

作者: DENNIS201 時間: 15-3-20 16:39

想問下現在情況如何呢?

歡迎光臨教育王國 (/)