教育王國
標題: 我的英國公立學校日記 [打印本頁]
作者: KIMLIFEINUK 時間: 20-10-27 16:57 標題: 我的英國公立學校日記
大家好！
之前有啲事冇上網。所以冇覆到一些留言。十分抱歉。
之前整理咗我女嘅一些日記。關於佢初到英國，第一次返英國公立學校。同埋學校既情況等等。答應左會係度到大家分享一下。呢啲全部係我阿女自己嘅個人經歷，可能喺唔同嘅學校遇上唔同嘅老師、同學會有唔同嘅經歷，不過呢個系佢第一次喺英國（今年九月），初初上中學時候嘅情況。佢而家已經順利過渡咗第一個係英國既學期.
8月初:
今日要去買校服。因為肺炎情況, 間校服店已經唔係日日開，所以要特登約時間去試校服。本來唔試都得，不過又驚校服太大件。今日去到舖頭時原來已經有幾個人喺度等緊試校服。好彩一早打電話約咗時間。原來啲校服都比較大件。鋪頭嗰個人叫我買最細碼。即係有少少覺得我唔夠高。結果試校服其實都唔係太需要，衹要買最細碼就ok喇。件校服好靚喎, 成套返工套裝咁，件校褸好靚，跟住條裙亦都好靚，學校做要求間鋪頭幫我哋每個人嘅initials 繡上去嗰個衫度。因為學校仲有netball 同埋足球學，所以我哋仲要買埋波鞋同埋護膝。 咁前後都已經用咗300幾磅校服加埋所有其他嘅accessories.
最好笑係我後面試衫嗰個女仔, 到佢試衫嘅時候,間鋪頭攞佢學校嗰個校服比佢試, 因為一間鋪頭其實係做好幾間唔同學校嘅校服嘅。 嗰個女仔竟然當眾喊咗出嚟。佢話點解佢間學校個校服竟然係橙色。超級難睇。所以佢即場喊左出嚟！佢阿媽唯有喺側邊氹下佢，跟住我睇下佢件校服。又真係幾橙喎！好彩唔係我件校服嗻！怪唔得佢喊啦。
校服鋪頭嗰個女人非常之好喎，本身我淨係買最細碼已經可以，但係佢都幫我不停喺度試下度下，然後又建議下我應該要點樣配搭，買幾多件恤衫加幾多件褲，仲有又建議有d可能買少啲有啲又要買多啲換。
買好曬校服之後，我就專心等開學，心情十分之緊張但係又好擔心。
另外仲有書包，學校規定一定要深色嘅書包。 唔可以七彩或者鮮豔顏色。好彩我都喺香港買咗個書包帶過嚟。
跟住學校有問我哋需唔需要訂午餐，但係佢話因為而家肺炎情況，所以將唔會有熱食提供，只會售賣三文治又或者我哋可以自己帶。噉我就揀左自己帶三文治，反正三文治容易整，如果買佢啲三文治，好似淨係得火腿同芝士，噉又太單調。
臨返學之前，我哋不停查下邊一架車可以直接到到學校，有好多唔同嘅巴士都可以去到，但係我哋又要睇返停站嘅時間，同埋嗰條線有冇兜路，所以都用咗好長嘅時間去睇。主要係儘量睇下啲巴士路線唔好停咁多間學校，否則嘅話間間學校都上同一架巴士，可能就會比較爆。雖然冇位坐都可以，不過最好有啦。
另外返學之前，可以買個全年嘅學生交通證。噉就成年搭任何交通工具都唔需要再另外畀錢。都係3000幾蚊港幣。除咗返學可以搭校車，同埋可以搭任何交通工具之外。其實成年內，包括放假任何時間，都係可以憑嗰張證免費搭任何交通工具。所以第一時間就即刻去買。
作者: KIMLIFEINUK 時間: 20-10-27 17:40
9月
聽日就正式要返學。結果成晚都冇瞓唔著，到到半夜好耐先至可以瞓著。竟然六点鐘就太緊張起左身。一直之前幾日，都諗到底口罩點算呢？戴好定唔戴好呢？如果只係得我戴，會唔會人人望住我呢？最起碼我見到街上面就冇人帶喇！
跟住我屋企人同我講，噉你帶定去囉到時候睇下情況如何，可以帶就帶，如果真係好唔可以帶或者覺得好難受嘅話，噉就收埋佢喺書包度。
但係我喺香港嘅時候，日日都戴口罩，就算行出門口都戴口罩，如今叫我唔戴口罩出去，仲一大堆人喺學校度，我自己實在覺得有啲唔適應！
開學日
今日開學，一大清早，好多學生都等巴士，我先至發現其實人人都喺同一度等，即係原來附近所有的學校都係停埋嗰個站。跟住我等到我個校巴嚟，一堆人一齊上校巴其實都好多人喎！不過好彩我有位坐！喺巴士站嘅時候，其實好容易搵到同你一間學校嘅同學，一睇個校服就知同你一間學校，好自然地，你同埋一間學校嘅校服就會企埋一齊喎！於是我見到有其他五、六個女仔都係我一樣校服。噉於是我哋就自然企埋一齊。但係我哋雖然企埋一齊，大家都好怕醜，冇人同任何人講嘢祇不過眼望望噉。反而家長們就不停喺度講嘢，話巴士幾時嚟吖？到時間未呀？有冇見到巴士嚟呀？跟住家長們仲即刻交換埋電話！不停噉互相問對方巴士呢？巴士呢？反而我哋學生嘅，一句野都未講過！
上咗校車之後，我同一個女仔講左兩句嘢。問下佢叫做乜嘢名，同埋住喺邊呀。佢於是又係問返我呢個問題啦。跟住又唔知講乜好。佢又唔知講乜。於是我哋一齊坐，就一齊望住個窗。
話咁快就到咗學校門口喇。 因爲我哋呢架校車其實都停兩間學校，因爲我學校同埋另一間學校其實喺隔籬，所以先停另一間學校先，跟住先再停我哋個學校，噉我哋就係最後一批落車。
第一日開學嘅時候，人人都要排喺門口嗰度，首先登記咗個名然後就會入去，由於系第一日開學所以我哋新學生都會喺門口度集合然後去hall度。聽下學校介紹。
估唔到聽完介紹之後就開始上堂。我仲以為第一日有得玩下添。不過噉講我第一日上英文堂，發現英文老師其實都係同大家瞭解下，並冇正式開始教啲乜嘢內容。
跟住我哋再上咗啲唔同嘅堂。都係主要老師介紹下佢自己係乜嘢人，嗰科大致上會學啲乜嘢。對大家有啲乜嘢要求，同埋嗰科將來學嘅嘢同大家有乜嘢關係之類。
到左午餐時候大家就開始嘗試搵下有冇啲朋友可以傾下偈。因爲我自己係英國係第一次上學。完全唔識任何人。我見到有啲學生，本身有係同校嘅學生係同一間小學一齊升上嚟，佢哋由於以前小學已經係朋友，所以佢哋好自然地午餐時候就一齊坐埋。
噉我午餐嘅時候諗住自己一個人坐啦，因為又唔識任何人。又驚佢一路食野，一路噴D口水俾我，於是我就搵到個角落頭，就攞曬自己嘅三文治同埋飲嘢出嚟。噉就開始食自己個三文治啦。唸住咁樣實好安全啦！
點知道有一班女仔走過來話，一齊坐啦。就係今朝一齊坐車嗰堆。跟住我同佢講，唔使喇我三文治都攞埋出嚟，跟住又要執啲嘢過嚟，咁麻煩。噉就拒絕咗佢哋喇！
點知跟住又有個女 miss 經過。佢話點解你自己一個人坐呀？冇人同你一齊坐啊？我幫你去搵D人同你一齊坐啊？跟住佢就好好心機噉,嘗試瞭解下我會唔會有任何情況需要幫忙。佢就係噉不停問我 are you all right？噉我就不停噉答佢 i am ok ！由於佢係噉問, 我開始懷疑其實我係唔係唔ok？
跟住我三文治仲未食到一半。又再有第三批人叫我同佢一齊坐。跟住我好禮貌噉拒絕咗佢。我覺得啲嘢都已經攞開曬出嚟，行嚟行去咪好麻煩囉。但係佢哋竟然堅持我一定要過去同佢一齊坐。佢話我一個人坐會好悶喎！最後我唔想再有第四批人問我點解一個人坐，於是我就走去同佢哋一齊坐。
就係咁，我哋就成為左一group好朋友喇。佢哋好好笑啊。又講下屋企嘅, 跟住又八卦下人地其他事....
就係咁，我嘅第一個上課日午餐就係佢地笑聲中完滿結束了！
作者: hiddenhero 時間: 20-10-27 17:45
KIMLIFEINUK 發表於 20-10-27 17:40 
9月
聽日就正式要返學。結果成晚都冇瞓唔著，到到半夜好耐先至可以瞓著。竟然六点鐘就太緊張起左身。一直 ...
哇！ 阿女好乖， 寫日記！ 
多謝你分享， 好睇！
作者: KIMLIFEINUK 時間: 20-10-27 18:00
hiddenhero 發表於 20-10-27 17:45
哇！ 阿女好乖， 寫日記！
多謝你分享， 好睇！
係啊。其實佢係英文,不過我而家譯返做中文。
我諗住想畀有興趣去英國讀公立學校嘅家長，知道下大致上嘅生活係點樣。
作者: KIMLIFEINUK 時間: 20-10-27 18:15
本帖最後由 KIMLIFEINUK 於 20-10-27 18:19 編輯
first school day (continue)
一個複雜嘅午餐時間過去之後。我哋上數學堂。老師竟然係第一日上堂嘅時候就同我哋講。你哋聽日會有英文同埋數學考試。每個考試大約一個半小時！
點解？！咁殘忍！
老師話因為暑假過咗咁耐，所以想用個考試嚟睇下大家程度如何，作為一個評分基準，你哋唔需要擔心，唔需要溫書，考試會比11plus 容易，所以唔需要緊張架。
即刻大家起哄，不停噉講，又考試，點解考試呀！即刻考試！嘩好突然哦！好擔心啊！
我身邊有個女仔話佢唔會話畀阿媽知聽日有個考試，佢話如果唔係，今晚一定捉佢溫書。我決定左話俾阿媽知，並且今晚去溫書！我覺得好大壓力同好擔心，唔知點算！
好快又放學，我只係不停唸住聽日果評分試！
作者: Yanamami 時間: 20-10-27 18:25
本帖最後由 Yanamami 於 20-10-27 19:01 編輯
其实初黎埗到，拒絕人唔係太好，人地都要鼓起勇氣去撩你｡
作者: hiddenhero 時間: 20-10-27 18:43
KIMLIFEINUK 發表於 20-10-27 18:15
first school day (continue)
一個複雜嘅午餐時間過去之後。我哋上數學堂。老師竟然係第一日上堂嘅時候就 ...
阿女讀幾多班？ 佢同你感情一定好好， 會share 俾你聽考試。 當然仲有日記。
作者: KIMLIFEINUK 時間: 20-10-27 18:48
Yanamami 發表於 20-10-27 18:25
其实初黎埗到，拒絕人唔係太好，人地都要鼓起勇氮去撩你｡
呢個係佢既個人選擇，自由社會，全校既學生都唔戴口罩，亦要學習接受。即使醫院日日有人死。法例規定公共交通要戴口罩，一樣無人理！也是要學習妥協。
佢有個朋友既小學同學，以前係男仔，未升中學已經變性做左女仔，都廣為接受。也沒有人judge佢。
我想法係大家如果想去英國讀書或生活，必須要勇於接受不同事物，也嘗試不要將自己的想法或做法加在別人身上。
第一天上學，同唔同人坐係佢自己既選擇，正如我一開始講，呢個只係佢自己的個人經歷，唔同既學校，已經係另一班唔同既學生同老師。既然自己唔想，點解唔敢say no
作者: KIMLIFEINUK 時間: 20-10-27 19:01
hiddenhero 發表於 20-10-27 18:43
阿女讀幾多班？ 佢同你感情一定好好， 會share 俾你聽考試。 當然仲有日記。
...
佢今年九月year 7.之前考左11 plus.
其實我原本估計佢升中已經係一個新開始，仲要係新地方，一定唔容易！
但出奇地比我想像中簡單，由學校既安排，到英國同學們的相處與課程，都十分妥當理想，令我十分驚訝！我有些朋友都好擔心如果去英國讀公立學校，又係第一次去，會好難適應，作為父母，當然不停有好多野擔心，於是我想分享一下我地既真實情況，俾大家參考下！
作者: Yanamami 時間: 20-10-27 19:05
又唔洗太激动話我去judge尐乜野，见应該会有其他家長參考，亦俾佢地从另－个角度諗下啫，自己唔喜歡既話當然唔好逆來順受啦~
作者: hiddenhero 時間: 20-10-28 08:44
KIMLIFEINUK 發表於 20-10-27 19:01
佢今年九月year 7.之前考左11 plus.
其實我原本估計佢升中已經係一個新開始，仲要係新地方，一定唔容易！ ...
佢自己過去讀？ 咁住host？ 11 歲佢好叻， 好多野慢慢就會適應， 佢地適應力比我地強。 做父母慢慢guide住佢就得。
作者: Yeahp 時間: 20-10-28 09:32
KIMLIFEINUK 發表於 20-10-27 17:40
9月
聽日就正式要返學。結果成晚都冇瞓唔著，到到半夜好耐先至可以瞓著。竟然六点鐘就太緊張起左身。一直 ...
你囡囡好獨立好成熟好叻 
祝她有一個愉快的學校新生活 
作者: 甜思思 時間: 20-10-28 09:57
好叻女呀！自己乜都可以handle (emoji)(emoji)
作者: 6x6=36 時間: 20-10-28 12:58
KIMLIFEINUK 發表於 20-10-27 17:40
9月
聽日就正式要返學。結果成晚都冇瞓唔著，到到半夜好耐先至可以瞓著。竟然六点鐘就太緊張起左身。一直 ...
仲有你翻譯佢好叻女又乖女，會同你講有考試，又比日記你睇，仲會勇於表達自己意見
作者: longlokma 時間: 20-10-28 13:39 標題: 回覆樓主:
想請問樓主講嘅公立學校，係指state school定public school?
作者: KIMLIFEINUK 時間: 20-10-28 14:08
longlokma 發表於 20-10-28 13:39
想請問樓主講嘅公立學校，係指state school定public school?
係 state school, 政府既免費學校，即係而家bno 去可以免費入讀果種
作者: KIMLIFEINUK 時間: 20-10-28 15:32
9月中
開學已經數個星期。學校實行咗單向流動法，即係所有嘅路只可以一個方向噉行，儘量減少細菌感染。
我就成為學校唯一一個戴口罩嘅人。總有人行過嚟問我你做乜戴口罩呀？又有老師同我講，如果你覺得唔舒服你唔需要帶架。跟住又有同學同我講，你用個口罩遮住左個面，我實在唔知你個樣係點。如果喺街度見到你，我一定認唔到你。我就心諗，如果你喺街度見到我，我都係戴住個口罩，亦都係唯一戴住口罩嘅人，噉你一定認到我！但係好彩大家對我戴口罩嘅呢一件事，只係覺得好奇，同埋只係覺得點會有人咁笨每日帶住個口罩咁辛苦，但係都冇抗拒我戴住個口罩。另外當我哋喺break時候,因爲我戴住個口罩講嘢唔大聲, 啲人成日聽唔到我講乜嘢, 我發覺佢哋講嘢好大聲，同佢地傾偈嘅時候, 我要嗌出嚟先得，事關我有口罩遮住, 有好多人都聽唔到我講乜。於是而家開始我講嘢好大聲。
終於過咗一段時間，大家開始習慣我係唯一一個戴口罩嘅人，亦都開始接受左我戴口罩嘅呢一個事實，甚至乎所有嘅老師都認得我因爲我係唯一一個戴口罩嘅人。反而因為噉樣，所有的老師都識我個名。開學先至兩個星期，已經有幾個人患了感冒冇返學。另外有一個老師話，佢疑似患了肺炎，但係叫大家唔使擔心，因為佢可能唔係真係患咗，而家等緊測試結果出。跟住過幾日結果出咗話佢唔係患左肺炎。跟住開始又不停有啲同學開始咳啊流鼻涕啊，但係佢哋依然都冇戴口罩，我自己就覺得戴左安全d，所以我決定我個口罩一定會日日帶住。
我哋轉班房上唔同課嘅時候，就真係好麻煩。有時我哋甚至乎要行曬成個學校先去到一個班房，因為你只可以向前行，今日有個女仔遲到咗英文堂。老師問佢點解遲，佢話因為佢行錯路，搵唔到個課室，又因為只可以向一個方向行，所以佢要重新行返出去，再轉咗一個圈，佢足足行咗15分鐘先至行到去個課室嗰度。噉老師都冇怪責佢。
其實初初返學嘅嗰一兩個星期，有好多地方我哋都唔係好熟，我哋嘅時間表只係寫住課室係邊一間房，但係冇話畀我哋聽點樣去，所以我哋個個成日行嚟行去，行到腳都軟，周圍試下搵下啲房喺邊，但係又冇人話到比我哋知。
雖然係第一個星期上堂，但係老師已經話畀我哋聽下個禮拜將會有兩個test, 唔係當初嘅評分試咁長，喺一個短test.
呢度嘅功課絕對比我香港嘅學校多。每一科一個星期都會比一樣功課我哋做。所以一個星期計落，其實都有六、七樣功課做。而每一個功課，都唔少於半個鐘以上。有啲我甚至做咗成晚！噉我放學返嚟，執啲嘢又食啲嘢，跟住我就開始睇下啲功課點做，跟住又要食晚飯，食完晚飯就要做功課，噉我發現我一個星期，日日都喺度做功課，晚晚都做功課。可能之前我係香港既學校冇乜功課，所以而家我就覺得好多功課。跟住一個星期總有兩科測驗。噉跟住又要溫測驗，一星期中間有兩至3日要不停溫習預備測驗。
另外我哋同學之間有一個whatsapp group, 唔同班嘅人都會join, 而家已經有好多人, 不過好多人我都唔知佢係邊個, 因爲佢哋可能係隔籬班嘅！ 有個我同班嘅同學, 佢係騎馬嘅, 佢自己有一隻馬，佢成日將佢啲相發出嚟，隻馬好靚，超級靚，仲有佢騎馬跨欄既相， 人人都好羡慕佢。佢有時候一放學就著住校服，就去搵隻馬。我諗佢養隻馬一定要好多錢啊！另外其他同學就send返佢哋狗仔相出嚟。
作者: KIMLIFEINUK 時間: 20-10-28 15:59
九月尾
今日我同朋友影咗張selfies畀我屋企人睇。我屋企人問我，你又話你啲同學冇戴口罩嘅？點解佢哋又有口罩戴住影相嘅。其實係佢哋因為想就返我個look, 所以一齊喺書包度攞個口罩出嚟帶返一齊影相。笑死我！
第一次既數學測驗結果，超級差！老師又話，只係問下啲數字，正負數之類問題。點知出埋文字題，仲問埋份數。結果我因為冇溫度嗰啲。所以考得好差。另外時間又唔夠，好多人都未做曬，佢就已經要落堂收卷。根本份卷都做唔切。其實唔夠一堂時間已經收咗。今次慘喇。
終於我哋學校已經有兩個高年班學生確診咗。於是佢同級嘅所有同學，同埋老師就一齊自我隔離14日。亦因為噉，啲同學開始睇搭車嘅時候戴返口罩。同埋啲老師都開始有帶返啲面罩。
我最近發現，我玩開嘅呢一班朋友，我同佢哋好似冇乜共同話題。第一佢哋成日都講啲英國歌星，但係佢哋講嗰啲我全部唔識。跟住佢哋就會好驚訝，嘩你噉都唔識？呢個你都唔識？跟住佢就開始講，呢個明星鍾意嗰個歌星，但係嗰個應該唔係真嘅。係謠言嚟啫。其實佢係鍾意第二個多啲。有時成個午飯時候，就係聽下邊一個歌星其實係真係鍾意邊一個，而邊一個又唔值得邊一個鍾意之類。我開始覺得真係冇乜嘢好講，第一，我又唔知邊個係邊個，第二，邊個鍾意邊個，同我有乜關係。於是呢幾日我就開始搵咗第二班friends坐，佢哋就講下關於屋企人嘅嘢，同埋佢哋自己細個啲嘢。噉樣可能好似好啲，起碼我又可以講下我自己啲嘢。或者講下動物之類。
我哋嗰一班都有一個drama queen, 佢唔單止日日喺度認叻，講嘢好誇張，仲突然大大聲咁狂笑。仲不停有好多是是非非。我諗呢啲就係叫做drama queen.
另外我的friend有D都好高。有啲仲高過我阿媽。普遍嚟講，佢哋都好開心，大聲噉笑亦都大聲噉喊，同埋佢哋情緒好高漲，有時會勁開心，有時又會突然喊出嚟。一陣又會再笑返。
另外今日我有個同班同學個筆袋俾人偷咗，佢好嬲搵嚟搵去都搵唔到。佢個筆袋一路放咗喺個課室裏面，但係就唔見左！之後一直都再無出現過喇。
作者: KIMLIFEINUK 時間: 20-10-28 16:38
回覆 KIMLIFEINUK 的帖子
九月尾
我發現咗喺學校，原來因爲我唔係英國人，所以好似特別受歡迎。唔好問我點解！我都唔知點解！唔單止佢哋覺得我冇英國口音好特別。仲話我口音好聽添。最奇嘅係，竟然有人話我個口音清楚過英國口音！噉都得？！
竟然有好多人走過嚟，同我打招呼，有啲我都唔識佢嘅，但係佢都知道我個名係乜嘢，唔知係因爲我唔係英國本土人，所以特別容易認出？定還是因爲我戴口罩，所以出名D？
我覺得香港嘅學生同英國嘅學生最唔同嘅地方就係，英國嘅學生好天真，香港嘅學生反而思想成熟啲。多嘢諗的。英國嘅細路仔係好直接，唸嘢都好簡單。我覺得噉樣都好，開心啲！
上普通話堂嘅時候，我就覺得特別好笑！因爲佢哋讀個音讀出嚟係好古怪嘅。係唔係正常個音，好似有啲古怪嘅口音。同埋全部係外國人喺度學普通話，其實祇有我一個係識少少普通話，佢哋個個都係第一次學。唔知佢哋覺唔覺得難呀，但係佢哋就好似冇乜嘢概念。跟住做功課之類，就個個問我點樣做，於是我就好似補習老師咁。係 teams 度不停教人做功課！其實啲功課好簡單，祇不過有一句嘢，然後叫你譯返做英文，例如，你今日食咗乜嘢呀？你屋企有幾多人呀？之類！我真係第一次中文會咁高分。
之後我哋開始功課多，同埋老師講嘅instruction 唔係太清楚。人人就開始喺teams 同whatsapp group 度問功課。我阿媽叫我唔好成日嘥時間，喺度答人哋啲問題，佢話日日望住個手機，同埋成日上網chat，唔係一件好事。我阿媽話咁會手機上網成癮！
但係人哋問到,冇理由唔答佢嘅嘛，噉咪好冇禮貌囉！所以我繼續答人，不過我都有聽阿媽講答短少少。因為之前人哋問我功課點做，我用好長篇去講解畀佢聽點做，跟住佢又話唔識做，我又再用好長篇講解畀佢聽，其實個理論係點樣，跟住講完之後最後佢都係問我，噉其實答案係乜？
所以我阿媽話，噉你就唔好打咁長嘅嘢啦。仲成晚喺度不停噉答嚟答去。結果我電話又長期無電。但係你要知道喎，如果人哋問你，你唔答人哋咪嬲囉！ 唉
結果我變成咗班裏面嗰幾個成日答人哋點樣做功課嘅人，但係噉都好，好多同學因為噉，就好鍾意我，就覺得我可以幫到佢，
同埋以為我叻添！
我哋第二次數學測驗已經派咗成績返嚟。老師因為唔想收我哋啲部，去逐個登記分數，覺得噉樣會傳染病菌。所以老師叫所有同學自己大聲講自己個分數出嚟畀佢寫低。有個女仔得到10/22，因為成績太差，所以佢就喺度喊。我哋於是個個行埋去安慰佢，我哋個個都講，其實今次唔好，下次可能會好啲呢！如果你盡左力嘅話，噉都唔好擔心啦！下次再努力啲啦！
第二次測驗我個分就好高喇！因為今次我已經做咗充足嘅準備，溫書亦都溫曬所有要測驗嘅範圍。今次嘅測驗係algebra！人人都覺得特別深。algebra 唔係咁受歡迎！我自己都唔鍾意。
終於我哋學校嘅飯堂，有番熱食供應喎！我阿媽問我會唔會考慮訂熱食，唔帶凍三文治。
不過我都係決定咗唔幫襯。因爲我哋又有第三個case了！學校又係講，大家唔使擔心，相關有接觸嘅人已經會去自我隔離14日，所以大家係冇危險嘅。於是一切生活如常。
今日我同學同我講話佢要移民返去愛爾蘭。所以佢將會退學。我真係好傷心啊！只係識左佢一個月，同埋佢係我個好朋友嚟，點解咁快就走？我哋都好唔捨得佢，我送咗張卡俾佢同埋件小禮物，就係噉，佢就離開咗我哋學校！
佢走咗之後，唔夠一個星期之內，就有個新同學補上左佢個位。
作者: KIMLIFEINUK 時間: 20-10-28 16:45
6x6=36 發表於 20-10-28 12:58
謝謝你囡囡的分享仲有你翻譯佢好叻女又乖女，會同你講有考試，又比日記你睇，仲會勇於表達自 ...
係啊！佢雖然而家先啱啱11歲，但係我覺得而家啲細路，唔知係咪成熟過以前？我覺得以前我11歲好似細路仔D。我覺得以前我11歲好蠢添。
所以我覺得佢其實好似一個小型版大人！
可能上咗中學個人就真係會成熟左掛。
作者: ghosta618 時間: 20-10-28 16:49
回覆 KIMLIFEINUK 的帖子
謝謝分享！
作者: CCCK1234 時間: 20-10-28 21:27
回覆 KIMLIFEINUK 的帖子
囡囡好叻，堅持帶口罩
作者: etoile 時間: 20-10-29 10:27 標題: 回覆樓主:
好似睇緊青春劇咁！
你囡囡適應力好強！你都要加油！
作者: elysemama 時間: 20-10-29 12:02 標題: 回覆樓主
多謝妳分享呀！妳囡囡適應得咁好，只有11歲，已好有獨立思考能力，可想而知、爹哋、媽咪平日教導有方，真替妳高興
你們的文筆令我們好似在學校親歷其景咁
作者: ruudi82 時間: 20-10-29 12:31
反而更加想睇返英文原文
作者: Mrspan 時間: 20-10-29 16:47
多謝Kim
作者: KIMLIFEINUK 時間: 20-10-29 21:17
本帖最後由 KIMLIFEINUK 於 20-10-29 21:31 編輯
九月尾
今日學校發生咗大件事。我哋班有個女仔。之前因為偷偷影老師上堂。個video仲放埋上whatsapp group 度，今日唔知點解，終於俾老師發現。仲畀老師發收埋佢個電話！以後佢上堂嘅時候,就要收咗個電話，到放學先至會畀返佢。佢好唔開心。同埋佢要同老師承諾，話佢以後都唔會再咁做。條片都已經delete咗喇。不過老師重新講，上堂係唔可以偷影老師，老師係有私隱嘅。偷影人係唔可以既。
其實我之前都知道，咁樣做係唔得嘅喇。聼講隔籬學校有個女仔偷影咗老師一張相，然後放係whatsapp group。就即刻俾人踢咗出校。所以喺學校我都唔敢影相，除左影自己同埋啲friend之外。其實手機根本係唔凖上堂攞出黎！
我地音樂堂開始要學彈琴，我以前又未學過，屋企又無琴，真係好難，想練下手指，但係又無琴鍵，我D friends 都話難！老師真係求其，叫我地返屋企自己練手指位，我地全班只有一個女仔屋企有琴，因為佢一直係有學開琴，我唸我應該肯定唔合格！我試下上網睇下人地教彈琴嗰啲短片。但係我發現，如果我冇一個鋼琴，我都係冇辦法學到。因為啲手指係唔可以擺喺張枱度扮彈琴。又唔知個位喺邊。
電腦堂教我地整excel, pdf file, 同埋點 save 個file, 咁淺架！我隔離個女仔有D難度，唔知係咪未用過電腦，佢將個mouse係咁移，一直移左幾張枱！我同佢講唔駛將個mouse係咁向右走，仲走過幾張枱，我叫佢攞起個mouse一下再郁，佢仲發脾氣，話我整唔見佢個monitor上面個cursor, 而家揾唔返？！我想試下幫佢搵， 但係跟住佢發嬲係咁拍個mouse！ 激死人！我於是唔再理佢！跟住成堂，佢隻手同個mouse就係我張枱度不斷高速遊走，我真係唔好彩，要坐係佢隔離！
食lunch既時候，我地又開開心心咁傾下呢樣果樣，我又讚下佢地，佢地又話我叻！真係開心！好彩揾左班新 group, 佢地講D野有內容D，我有個friend, 日日都有薯片請人食，我地一齊坐既friend, 每人可以分到一塊, 通常我都儘量忍住唔要，日日食薯片好似唔係咁健康！我又係惟一一個食三文治既人，佢地既午餐通常係餅干+薯片+生果，學校先前又停左熱食，無乜野買，到而家有返，但疫情嚴重，好多人都係自己帶嘢食，阿媽問我，我D friend 想唔想share d 野食？駛唔駛帶多件三文治？我話，絕對無咁既需要！因為佢地話我既lunch係最boring lunch！三文治又乾、又難食，又悶喎！佢地通常share餅干、薯片。所以絕對唔想試我既三文治！
我好懷念以前係香港中午有得食飯既日子！以前我地個個帶飯！唔係戴口罩！
而家因為要分開年級食飯，以免互相感染，所以我地連枱都無，枱比左高年班用，又只得三十分鐘，因為要行出去出面open area 食，所以時間短左！如果再食飯應該唔夠時間！阿媽話三文治簡單快手！我其實都無見過有人係學校食飯或者帶熱食！
作者: KIMLIFEINUK 時間: 20-10-29 21:18
ruudi82 發表於 20-10-29 12:31
反而更加想睇返英文原文
haha可以出書了
作者: katrinafu 時間: 20-10-29 21:26
KIMLIFEINUK 發表於 20-10-29 21:17
九月尾
今日學校發生咗大件事。我哋班有個女仔。之前因為偷偷影老師上堂。個video仲放埋上whatsapp group ...
你女兒好乖好叻 ， 又寫日記 可以記錄一下， 讓你們也知一二 ， 真係好好呀。
又令我回想阿女 早幾年前11歲時去英國讀Y7 時情景 ， 但她沒寫日記 ， 好多時只是靠她打電話比我咋。 所以好欣賞你的女兒 ， 加油呀 ⋯⋯⋯我會繼續追看！
作者: KIMLIFEINUK 時間: 20-10-29 21:38
katrinafu 發表於 20-10-29 21:26
你女兒好乖好叻 ， 又寫日記 可以記錄一下， 讓你們也知一二 ， 真係好好呀。
又令我回想阿女 早幾年前11 ...
你阿女都係11歳去呀！你一定都好似我咁，最初有啲擔心。
其實我叫阿女記錄低佢嘅學校生活，主要係我自己想知佢喺學校發生乜嘢事。我又擔心佢喺學校如果有乜事發生我唔知。又擔心佢如果唔適應，唔知會唔會有情緒問題？！
我又覺得好難成日問佢，咁你ok嗎？開唔開心呀？
如果佢自己記錄下來，咁我容易D知道佢係學校做過D乜
作者: connie_51 時間: 20-10-29 23:14 標題: 回覆樓主:
你女好叻女 ，表達得好好
作者: 6x6=36 時間: 20-10-29 23:32
ruudi82 發表於 20-10-29 12:31
反而更加想睇返英文原文
作者: 6x6=36 時間: 20-10-29 23:40
KIMLIFEINUK 發表於 20-10-29 21:18
haha可以出書了
作者: 6x6=36 時間: 20-10-29 23:47
KIMLIFEINUK 發表於 20-10-29 21:17
九月尾
今日學校發生咗大件事。我哋班有個女仔。之前因為偷偷影老師上堂。個video仲放埋上whatsapp group ...
作者: longlokma 時間: 20-10-30 08:30 標題: 回覆樓主:
喺Amazon買個電子琴畀佢啦， 雖然手感同真正鋼琴有分別， 但攞嚟練習總好過冇
作者: ruudi82 時間: 20-10-30 09:01
希望可以一直更新落去, 呢度睇家長分享得多, Y7小朋友分享點樣適應生活第一次睇.....好好睇
我自己都好有得著
作者: etoile 時間: 20-10-30 10:28 標題: 回覆樓主:
好似追劇咁。
作者: hiddenhero 時間: 20-10-30 14:30
KIMLIFEINUK 發表於 20-10-29 21:17
九月尾
今日學校發生咗大件事。我哋班有個女仔。之前因為偷偷影老師上堂。個video仲放埋上whatsapp group ...
練琴可以唸唸呢d
圖片附件: myimage.jpg (20-10-30 14:30, 500.98 KB) / 下載次數 3
/forum.php?mod=attachment&aid=MzU2MzA3fDg0MGEwOTJmfDE3MTc4NTE2MDV8MA%3D%3D
圖片附件: myimage.jpg (20-10-30 14:30, 507.23 KB) / 下載次數 4
/forum.php?mod=attachment&aid=MzU2MzA4fDU2MmE5YmQwfDE3MTc4NTE2MDV8MA%3D%3D
作者: KIMLIFEINUK 時間: 20-10-30 14:58
hiddenhero 發表於 20-10-30 14:30
練琴可以唸唸呢d
嘩！感激哂！好靚喎！而家真係乜野都有！真係要買番個，如果阿女唔練，我自己可以攞嚟玩下！
作者: kinder17 時間: 20-10-30 17:27
KIMLIFEINUK 發表於 20-10-30 14:58
嘩！感激哂！好靚喎！而家真係乜野都有！真係要買番個，如果阿女唔練，我自己可以攞嚟玩下！
作者: KIMLIFEINUK 時間: 20-10-30 18:08
今日上science,老師畫咗隻amoeba出嚟。叫我地估下係乜野，我即刻認出amoeba好似煎蛋咁既外型。所以舉手答老師，似乎其他人都唔知乜野係amoeba！老師問我點識amoeba, 我答佢係discovery channel 睇過，有個節目講amoeba, 仲講佢如果入腦可以致命！老師於是讚我，我好開心！
我地有一科奇怪既科目叫 Personal Finance, 我地初初仲以為教我地點賺錢！仲好期待！聽個名好似好高深咁！我媽仲話咁好，咁細個教你地 finance！點知原來係教我地計數，計下支出之類！唔係教我地點賺錢或者點慳錢！我地一班人即刻無晒興趣！
我最鐘意係science同design technology, 係DT堂，我地學切割膠片，初初上堂嘅時候老師話要我哋特別小心。佢話嗰啲刀好危險，可以成隻手指切咗。我都好擔心。我哋個個都好驚，因爲我哋未用過刀。一次過見到咁多刀，好似恐怖片！
今次我哋個project 係要整條膠魚出嚟。噉要儘量切割成一個魚嘅形狀。然後仲要學下點樣包裝條魚。加埋 recycle logo 上去。
老師將嗰個包裝要求喺 teams 度寫咗出嚟。但係冇人明佢寫乜。我哋一班人反復睇過好多次，都唔明！係whatsapp group 度不停討論，都唔得！結果我問我阿媽，點知佢仲唔明過我！我用咗好耐時間解釋畀佢聽！講極佢都唔明！好激氣！我最後發覺，同佢講咁耐仲浪費我做功課既時間，我實在無時間教佢, 同埋同佢理論，於是我叫佢唔好理我，但阿媽就係咁追住我鬧我態度唔好！
下一個上課日，我地決定去揾老師問下，我約左2個同學去佢課室揾佢，我地係門口等左好耐，佢都唔出嚟，最後終於出左嚟，但係已經就嚟要上堂，我地問佢個題目唔明，佢就發嬲，講仲乜你地上堂唔問？我地好驚，於是一齊走左，因為已經差不多到左上堂既時候！最後，我地又自己一堆人係whatsapp group 再度討論，並且達成一致結論應該點整個包裝！最後都ok交左功課。我發現個DT老師幾懶，係teams唔答學生問題，有時我會幫手答下，但佢從來唔答人！
不過十月中DT會轉為cooking,我地好期待，每次經過cooking既課室都好香噴噴！我朋友話有一次見到佢哋整pizza好似好好味噉。 我真係好想快啲可以上cooking堂。
作者: Osiana 時間: 20-10-30 20:02
KIMLIFEINUK 發表於 20-10-27 18:00
係啊。其實佢係英文,不過我而家譯返做中文。
我諗住想畀有興趣去英國讀公立學校嘅家長，知道下大致上嘅 ...
作者: Mrspan 時間: 20-10-30 22:44
好搞笑
阿女明知俾你睇都寫埋同你嗌交果段XD
作者: KIMLIFEINUK 時間: 20-10-31 13:13
Osiana 發表於 20-10-30 20:02
Hello, 你有無返英國陪女呀？
就快
作者: KIMLIFEINUK 時間: 20-10-31 13:36
Mrspan 發表於 20-10-30 22:44
好搞笑
阿女明知俾你睇都寫埋同你嗌交果段XD
係呀！唔多公平，佢當我好似都係有上過堂咁，問我時又唔解釋清楚！再問又無耐性，現今D細路真係缺少耐性，講多兩講仲話我浪費時間！激鬼死我，然後叫我 forget it，leave me alone! 鬼咁勞氣，咪真係要鬧佢態度唔好！
佢學校俾左每人一本 diary, 要佢地寫低交功課既deadline, 咁人人都要準時交功課。
佢地交功課係先 scan左，然後再係 teams度 upload, 我覺得而家學校真係同我當年唔同，佢地好似人地返工做 project 咁，係 teams度又分唔同科目有 discuss group, 每科又分老師自己有個 page. 佢地做功課有乜野唔識，又可以自己上網揾資料，變左唔係再完全靠老師，甚至自己可以自學！可能係咁樣己經一段時間，不過我仍然覺得驚訝，而家D細路如果肯努力，應該可以好叻！
真係一代同一代既巨大分別，唔知再下一代既學校會變成點！
作者: hiddenhero 時間: 20-10-31 13:58
KIMLIFEINUK 發表於 20-10-31 13:36
係呀！唔多公平，佢當我好似都係有上過堂咁，問我時又唔解釋清楚！再問又無耐性，現今D細路真係缺少耐性， ...
我發現佢地既不耐煩係對父母而已， 你睇佢對朋友講解功課其實好有耐性
作者: KIMLIFEINUK 時間: 20-10-31 20:35
hiddenhero 發表於 20-10-31 13:58
我發現佢地既不耐煩係對父母而已， 你睇佢對朋友講解功課其實好有耐性
...
係喎！真係唔公平！反而我對其他人無乜耐性，但對阿女就儘量有耐性D添！
作者: hiddenhero 時間: 20-10-31 21:37
KIMLIFEINUK 發表於 20-10-31 20:35
係喎！真係唔公平！反而我對其他人無乜耐性，但對阿女就儘量有耐性D添！
我唸因為我地太愛佢地， 愛到一個點佢地將呢份愛take if for granted。 
作者: Mrspan 時間: 20-11-1 23:26
KIMLIFEINUK 發表於 20-10-31 20:35
係喎！真係唔公平！反而我對其他人無乜耐性，但對阿女就儘量有耐性D添！
其實自己後生都係對父母少耐性過對朋友 
你女對學習好認真 真係生性
作者: KIMLIFEINUK 時間: 21-2-2 08:29
本帖最後由 KIMLIFEINUK 於 21-2-2 08:33 編輯
大家好，有些時間沒有 update, 報告一下新情況！自從學校改為網上教學之後，我女就可以一邊食下零食，一遑上課，好開心。但固然成日 stay home, 真係幾悶！
佢地同學之間成日有短訊，有時討論下功課，有時係D傾下計，影下自己每日食D乜咁！
直到現時為止，佢都好鍾意學校，同級的朋友圈己成型，各人有自己的朋友圈，偶而又會跨圈傾兩句！
佢己經派左第一個 term 成績表，我都幾滿意，反而佢自己唔滿意！有D科目佢認為自己應該係top成績，但唔係，所以有點失望！
佢成績表係幾抽象既！只分為［好好，幾好，中位，非常唔好］，派成績那天，同學仔就周圍互相問，你有幾多個「好好」，又互相認叻！老師仲特登註明成績表係參考，唔駛太緊張。。。
之後老師係全級每一科選出：一位成績優異獎，一位努力付出獎。咁既係全級每科只有一個學生有 top score 獎！真係名額太少！
我女得到了其中一科的優異獎，但不是佢心想的那科！不過我做阿媽好開心，算是為港增光吧？！反而佢又失望唔係佢想果科！佢close friends 攞唔到獎，唔開心左一日！佢同我女講，點解你攞獎都唔開心呀！
作者: KIMLIFEINUK 時間: 21-2-2 08:46
阿女同D friends 會互相幫助 佢地會係 test 之前互相攞住本書，互相考下對方，問問題，其實佢D同學仔真係唔錯，人人功課交足，如果遲交功課，老師會俾個類似「缺點」俾你，所以人人都準時。
我見阿女 test 前自己做 note 溫習，都幾乖，但係有時我覺得佢寫得唔夠詳盡，溫馨提示下佢，佢就發嬲！呀而家D細路咁唔好脾氣既咩！
佢地上網學習，基本上跟番以前個 timetable, 早上8:45-3:00, 全部live lessons, 有 teaching, class work. 仲有 test！差不多每個星期有一個test, 另外有功課要交！project 要做！咁雖然lockdown都唔會太得閒！
作者: KIMLIFEINUK 時間: 21-2-2 09:10
我覺得佢啲同學其實都係肯讀書嘅人。阿女話佢哋而家都開始做note預備test. 大家仲會互相比較下有冇寫漏野。
我覺得而家呢個年代嘅學生其實比以前進步咗好多。例如佢地會用powerpoint 做 project, 將功課 scan 做 pdf 交，上個星期佢音樂老師就叫佢哋開始作曲，全部都喺電腦度做。我開始覺得自己以前讀書好似好簡單同埋好out！
只係一間學校其實唔可以話所有學校都係噉，但係so far 阿女喺學校裏面真係冇乜覺得自己唔係英國人嘅感覺，又唔覺得自己同其他人有乜嘢分別。佢D同學仔都唔覺得佢有任何特別既地方，似乎佢地幾nice！
上星期阿女講我知個好消息，佢被選到做班代表！佢超開心。原來選班代表嘅過程都幾長，首先你要自己向班老師報自己個名話想選做班代表。跟住老師會畀大約一個星期時間大家去投票，每人都可以投一次票 ，但係叫你唔好自己投自己票。跟住票數最高嗰個就可以做班代表。
噉原來都搞咗幾個星期，不過阿女竟然唔話我知，佢話如果選到先講，驚我失望。有三個學生參選，阿女就得票最高，之後仲有friend恭喜佢，佢又係group度謝票，互相誇獎一番，真係搞笑！
因為呢次事件，阿女於是發覺原來佢喺班裏面都有幾多朋友喎。所以我基本上覺得，其實佢學校既同學仔都接受佢。唔覺得有歧視之類。不過我唔知其他學校如何，呢個只係佢個人嘅親身經歷而已。
作者: KIMLIFEINUK 時間: 21-2-2 09:27
本帖最後由 KIMLIFEINUK 於 21-2-2 09:32 編輯
同大家講下一件事吖
話說啱啱開始網上學習嘅時候。佢哋大約一個星期有七樣功課左右。跟住佢有一個同學喺自己個whatsapp度講，佢已經啱啱寫咗封email比班主任，話功課太多,每個星期放左學之後, 就要不停噉做功課, 星期六日都係成日做功課，冇曬自己私人時間, 覺得壓力好大。希望學校會減少啲功課。
當時我就諗, 你作為一個學生, 寫一封噉嘅電郵畀老師, 又唔係家長寫, 我相信老師都唔會理你。
我記得以前佢喺香港讀國際學校嘅時候，我都有建議話某d科嘅功課太少，（少既意思係一至兩個月只有一張紙功課，完全唔識，無進度）希望老師額外畀一啲功課阿女做，同埋我有啲有建設性嘅提議， 講咗幾年都冇人理我，學校亦都冇回應。
所以我同阿女講，我話我敢肯定老師一定唔會理佢。
點知一個星期之後，級主任就發咗封電郵出嚟，講及因為有學生覺得功課太多，壓力太大，所以而家開始會減低D功課量。由一個星期大約有七樣功課減至大約4-5樣左右。另外會多做啲堂上功課，即時講解同埋對答案，等佢哋唔需要落堂之後再做。
咁我都有D驚訝，學校竟然真係聽學生意見！
作者: etoile 時間: 21-2-2 12:28 標題: 回覆樓主:
好開心見到你update! 健康平安就好！
阿囡同同學相處融洽，學業上又自動自覺，真係求之不得！
作者: KIMLIFEINUK 時間: 21-2-2 21:49
etoile 發表於 21-2-2 12:28
好開心見到你update! 健康平安就好！
阿囡同同學相處融洽，學業上又自動自覺，真係求之不得！
...
謝謝！其實早前都好擔心，因為學校唔停課，確診數字好高，真係好似睇你好唔好彩咁，就算而家，除左規定商店內要戴口罩，街道D人依然唔會戴口罩，所以都擔心，好彩阿女係學校一早自律戴口罩，之前佢隔離位既同學全家確診，我地都無事，能夠戴好口罩，用酒精搓手，原來已經可以好好預防擴散，可惜係英國人實在沒有香港人既耐性同警覺性。
作者: KIMLIFEINUK 時間: 21-2-4 06:08
本帖最後由 KIMLIFEINUK 於 21-2-4 06:10 編輯
聽日阿女有chemistry test, 後日又有physics test.
不過而家test都係online test, 咁好大引誘有D學生可能會參考下書本同notes！佢地test 計入去總成績。另外就係assignments. 有D科會有project做。
我見佢而家喺度溫書。希望聽日順利啦。不過有時候佢緊張起嚟會睇錯題目。
另外有個好笑嘅嘢講畀大家知。佢哋而家呢度好興韓國歌星。於是佢啲同學以爲我阿女個樣好似韓國明星。其實爭好遠喎！
今日上堂有個女仔唔記得閂咪。佢阿媽好大聲噉問佢今晚要食乜餸，全班都聽到！仲要係佢答係食尋日隔夜嘅mashed potatoes, 笑死人！
作者: ganbatei 時間: 21-2-4 18:05
回覆 KIMLIFEINUK 的帖子
作者: Koala_Chu 時間: 21-2-8 12:51 標題: 回覆樓主：
本帖最後由 Koala_Chu 於 21-2-8 12:51 編輯
本帖最後由 Koala_Chu 於 21-2-8 12:51 編輯
樓主,
多謝你分享女兒學習日常事情
我有意幫小女兒申請公立中學, 不過會在蘇格蘭就讀
希望英國疫情緩和, 可以繼續面授, 及繼續睇你女兒的校園分享
作者: KIMLIFEINUK 時間: 21-2-14 07:36
Koala_Chu 發表於 21-2-8 12:51
本帖最後由 Koala_Chu 於 21-2-8 12:51 編輯
樓主,
你好！謝謝，我之前都上過去蘇格蘭旅行幾次，風景很美！
作者: etoile 時間: 21-2-14 13:07 標題: 回覆樓主:
樓主：請問英國打針情況如何？之前我guardian話高危人士今年打，健康嘅就出年先有得打，咁學生係咪冇
得打住？
作者: KIMLIFEINUK 時間: 21-2-14 21:12
etoile 發表於 21-2-14 13:07
樓主：請問英國打針情況如何？之前我guardian話高危人士今年打，健康嘅就出年先有得打，咁學生係咪冇
得打 ...
學生未聽到有消息，但七十歲以上已經打哂，醫護優先打，好似話研究下老師應唔應該優先打。
而家開始打六十五歲或以上。
學生好似無提過
作者: etoile 時間: 21-2-14 21:26
KIMLIFEINUK 發表於 21-2-14 21:12
學生未聽到有消息，但七十歲以上已經打哂，醫護優先打，好似話研究下老師應唔應該優先打。
而家開始打六 ...
唔該曬！
作者: KIMLIFEINUK 時間: 21-2-15 12:15
本帖最後由 KIMLIFEINUK 於 21-2-15 12:27 編輯
而家己經開始放 half term, 學校得三數樣簡單功課俾學生們，雖然將會好得閒，但疫情下其實都無處可去。
學校因為怕學生們無乜目標，整左幾個比賽，有係屋企煑野食，畫畫創作，或者拍片比賽，學校既比賽都有D人參加，阿女話，就算贏左，都係得個名，無實質「獎品」咁話，我就鼓勵佢去參加下創作比賽，放假2星期，都可以消磨下時間。結果佢決定參加畫畫比賽。
學校仲特意 send 個 email 俾所有家長，如果係放假期間，小朋友如果有情緒間題，可以搵學校支援，又俾左D熱線電話。也許今次 lockdown, 又會有部份小朋友難以過渡，希望佢地搵到支援。
早兩日我去超市買野，又見成街係無一個人戴口罩的，我自己有戴，但我己經唔記得左其他人要戴口罩這件事，直至我見到一個類似亞洲人男子戴住個白色囗罩，我先意識到原來全街係無人戴口罩的。
上星期落雪，天氣凍左好多，我見到2隻好得意既大雀仔，此 love birds 我舊年都見過，又係呢個時間，我幾肯定佢係舊年果2隻雀。因為女既個隻，不停一路行一路大声叫，女既行先，男個隻雀儍下儍下，跟住隻女雀仔後面，男既唔會邊走邊叫喎。如果男雀太落後，隻女既就好大聲「喝」佢，佢即刻跑住去。
咁搞笑既love birds, 行為同去年一樣，真係好搞笑！
跟住佢去返舊年個塊落地玻璃前，不停咁嘗試attack 玻璃上佢自己既倒影！
我地企係度睇2隻雀既奇怪行徑近2O分鐘，似乎此2雀係天作之合，婦唱夫隨，真係 lockdown 下惟一好笑既事！
作者: KIMLIFEINUK 時間: 21-2-15 12:26
作者: KIMLIFEINUK 時間: 21-2-15 12:47
本帖最後由 KIMLIFEINUK 於 21-2-15 12:52 編輯
......總有迷惘既時候
作者: KIMLIFEINUK 時間: 21-2-15 12:49
本帖最後由 KIMLIFEINUK 於 21-2-15 13:09 編輯
但就唔好.....執迷不悟
作者: MandyMakST 時間: 21-2-23 17:50
我想請問報考11 一定要Year 5 summer 經學校報？如果我地7月先到步Uk 再經council報9月既11 exam 係咪唔得？
作者: Amychannn 時間: 21-2-23 18:49
好好睇! 支持你!
作者: KIMLIFEINUK 時間: 21-2-24 00:47
本帖最後由 KIMLIFEINUK 於 21-2-24 00:52 編輯
MandyMakST 發表於 21-2-23 17:50
我想請問報考11 一定要Year 5 summer 經學校報？如果我地7月先到步Uk 再經council報9月既11 exam 係咪唔得 ...
"通常" 11+ 考試係 year 5 果年一月至七月尾上網報，至於邊個月截止，要睇邊個 council 而定，我之前係七月中左右截止，但每個地方唔同。
你 search 你去果區既 Council 網站，再揾secondary admission 應該會有。
你自己可以上網報，唔需要經學校，你係要先知道自己果區係如果安排，有D區可能學校自己搞個 test, 有D由 Council 搞，通用果區所有學校。
如果七月之後先報，都好遲，要自己留意下個 deadline。
作者: KIMLIFEINUK 時間: 21-2-24 01:01
Amychannn 發表於 21-2-23 18:49
好好睇! 支持你!
Thanks!!
作者: KIMLIFEINUK 時間: 21-2-24 06:46
Half term 己過，快樂既日子如好夢一場，始終要醒！
阿女又上 online school 了！星期一剛開始開課，數學老師就預告今個星期尾測驗！只有努力執番假期前既回憶返嚟！
上PE home school 時，老師俾左好多唔同既運動組合，叫學生們自己係屋企做，另外計時，同埋記錄低自己做到幾多下。寫係個課堂報告到。
阿女話因為咁，產生左好多異品運動員出嚟！體格精奇！例如有D人係十分鍾內，寫自己一次過做左百幾下掌上壓，本來唔係絕對一定唔得，但果位女仔平日係「一動不如不動」既人，竟然一大朝早，突然神力無限，唔駛停，一次過連做百幾下！ 其他沒有突異基因既「普通人」多數都係二十多下左右！
昨天，政府公佈了三月八日會開番學校，學校會進行分級批次檢疫，另外家長將來亦會在屋企自己做檢疫，希望咁會安全D
作者: katrinafu 時間: 21-2-24 13:02
KIMLIFEINUK 發表於 21-2-24 06:46
Half term 己過，快樂既日子如好夢一場，始終要醒！
阿女又上 online school 了！星期一剛開始開課，數學 ...
阿女寫日記真乖， 也讓家長了解她學習
作者: MandyMakST 時間: 21-2-24 14:27
回覆 KIMLIFEINUK 的帖子
Thank you
作者: laijenny99 時間: 21-2-24 18:56
好睇支持，你阿女好乖
作者: Zenia 時間: 21-2-25 03:07
KIMLIFEINUK 發表於 21-2-24 06:46
Half term 己過，快樂既日子如好夢一場，始終要醒！
阿女又上 online school 了！星期一剛開始開課，數學 ...
其實個 self-swab 幾恐怖。
[youtube]9WayjX6vCdk[/youtube]
作者: KIMLIFEINUK 時間: 21-2-26 02:45
Zenia 發表於 21-2-25 03:07
其實個 self-swab 幾恐怖。
咁如果自己係屋企做，未必人人做啱方法喎！
作者: KIMLIFEINUK 時間: 21-2-27 23:39
Full Moon last night
作者: KIMLIFEINUK 時間: 21-2-27 23:40
HaHa baby kingdom logo just happened to be on the moon!!
作者: KIMLIFEINUK 時間: 21-3-1 01:37
Top set or not?
阿女話佢哋出年開始會分set, 即係根據你嘅學習能力而分開唔同嘅班次。可能分好幾班， top set 即係最好成績。 Bottom set 即係成績比較弱。
老師同佢哋講話出年開始要分班嘅時候，大家心情都好似好緊張，都一齊話“吓“。
最好笑嘅系佢班裏面有一個女仔，平日都比較上係吱吱喳喳嗰類型。細細個已經好叻，唔單止同同學不停帶頭搞一啲聚會，而且亦都帶頭同老師互動或領班。已經好似一個小領袖或者政治家噉。受到所有人愛戴, 佢成績亦都係非常之好。
但係佢今次可能太真情流露，衝口而出，佢話， Oh! I am gonna miss you all so much! I don't wanna leave you!
如果你諗真下，佢嘅意思即係話我將會去 top set, 而你哋就留喺度！
跟住我問阿女，噉其他人乜嘢反應呀。佢話，冇人出聲，冇人答佢，亦都冇人理佢。
好搞笑，政客都有失言既一日！
作者: KIMLIFEINUK 時間: 21-3-18 07:56
本帖最後由 KIMLIFEINUK 於 21-3-18 07:57 編輯
轉眼間已經返番學校個多星期，而家政府要求學生做 covid測試，一個星期每個 year 2 次，自己撩喉嚨同個鼻孔，大多數學生第一次做，覺得好核突喎！測試結果會發短訊通知，如果係positive 就自己係屋企隔離十天。
啱啱返番學，好嘆下，功課一星期只有一樣，亦無任何test. 所以生活仍然是幾清閒！
之前online learning 時竟然有家政班，叫學生自己係屋企跟佢指示做個 cottage pie, 老師自己錄段片映佢自己做，然後叫學生係屋企跟住做，做完 upload 張相交功課！我聽到要整個 pie, 就擔心，唸根本即係叫我整！佢平日唔煮野，點整個 pie from scratch?
點知阿女話老師叫人人要自己試，所以佢叫我唔駛幫手，佢自己可以！
點知原來個 pie 係真係啱佢地既能力範圍, 估唔到竟然成功左！唔駛我煩！我比較懶，無唸過原來唔難！真係好正！
春天開始，樓下鴨仔竟然生左幾隻BB，佢貌似新手母親，好似儍下儍下，佢B係咁追住佢，真係得意！
而家佢 physics 教緊 space, 要背哂所有 planets 既遠近次序，阿女不停講我知，而家我都認得D。
開左學校之後，家政就唔煑野，變左裁剪，最近個堂唔知要用針聯D特別針法，問我都唔識！
作者: Zenia 時間: 21-3-18 21:45
KIMLIFEINUK 發表於 21-2-15 12:49
但就唔好.....執迷不悟
Egyptian goose.
作者: KIMLIFEINUK 時間: 21-3-18 22:59
本帖最後由 KIMLIFEINUK 於 21-3-18 23:03 編輯
Zenia 發表於 21-3-18 21:45
Egyptian goose.
OMG you are good!!! How do you know!!
Thanks!! Learn something new today!
作者: KIMLIFEINUK 時間: 21-3-18 23:02
作者: Zenia 時間: 21-3-19 16:03
KIMLIFEINUK 發表於 21-3-18 22:59
OMG you are good!!! How do you know!!
Thanks!! Learn something new today!
多謝你分享女兒的學校生活。
作者: KIMLIFEINUK 時間: 21-3-20 22:21
本帖最後由 KIMLIFEINUK 於 21-3-20 22:21 編輯
開番學既頭2個星期，學校都幫學生係校內做 covid fast test.
不過由而家開始就會係家長自己係屋企幫學生做，一個星期做2次測試，然後再上網報告結果。
好彩個 test 唔難，有哂 instruction, 應該無問題，不過學校建議早上做，我就驚可能時間趕D！
作者: Zenia 時間: 21-3-22 21:19
KIMLIFEINUK 發表於 21-3-20 22:21
開番學既頭2個星期，學校都幫學生係校內做 covid fast test.
不過由而家開始就會係家長自己係屋企幫學生做 ...
學生嘅屋企人都要做，你試咗未?
作者: KIMLIFEINUK 時間: 21-3-23 05:50
Zenia 發表於 21-3-22 21:19
學生嘅屋企人都要做，你試咗未?
只係發左每星期2次 test kit，學生既 test, 屋企人無喎！
作者: Zenia 時間: 21-3-26 00:55
KIMLIFEINUK 發表於 21-3-23 05:50
只係發左每星期2次 test kit，學生既 test, 屋企人無喎！
屋企人係可以自己 order 郵寄去屋企或者响 local 嘅 testing site 攞。
https://dfemedia.blog.gov.uk/2021/03/24/five-things-you-need-to-know-about-home-testing/?fbclid=IwAR2TJrTDq2d2xAlxsuc47yJFTOzbAqq8C7p8MBVvvtPRqwVLXBPFLj6xPlw
https://www.gov.uk/order-coronavirus-rapid-lateral-flow-tests
作者: KIMLIFEINUK 時間: 21-3-26 02:15
Zenia 發表於 21-3-26 00:55
屋企人係可以自己 order 郵寄去屋企或者响 local 嘅 testing site 攞。
Thank you very much, you are most helpful!!!!
I should go and get it this week!!
作者: Apple_Orange_T 時間: 21-3-27 20:50
KIMLIFEINUK 發表於 20-10-27 16:57
大家好！
之前有啲事冇上網。所以冇覆到一些留言。十分抱歉。
之前整理咗我女嘅一些日記。關於佢初到英國， ...
我想請問：
如果就讀公立學校，中學及小學，請問有沒有法文讀，可以揀的？謝謝資料！
作者: KIMLIFEINUK 時間: 21-3-28 06:40
本帖最後由 KIMLIFEINUK 於 21-3-28 06:45 編輯
Apple_Orange_T 發表於 21-3-27 20:50
我想請問：
如果就讀公立學校，中學及小學，請問有沒有法文讀，可以揀的？謝謝資料！
...
有呀！英國政府中學有 modern languages 可以選, 多數係法文，德文，或西班牙文，也有 mandarin, Latin, Arabic, Russian, Japanese, Urdu等等.
要睇個別學校有乜野外語可揀！唔係間間都有你所想學的，但通常都有法文，如果你打算想讀法文，學校既網頁會講有乜外語司以 offer
作者: KIMLIFEINUK 時間: 21-3-28 06:42
In 2019 there were approximately 122.8 thousand high school students in the UK taking French at GCSE level, compared with 96.8 thousand taking Spanish and 41.2 thousand taking German.
Most popular choice in 2019
1 French
2. Spanish
3. German
作者: Apple_Orange_T 時間: 21-3-28 08:26
Very good sources thank you!
May I ask you there is any government website showing the certain info. I would study it in depth.
Thank you very much for your advice
作者: Poyau 時間: 21-3-28 10:14
Apple_Orange_T 發表於 21-3-28 08:26
Very good sources thank you!
May I ask you there is any government website showing the certain info. ...
GCSE MFL 趨勢
法文 ↓ 西班牙文↑ 德文2020
Coronavirus and languages GCSEs, 2020
http://www.alcantaracoms.com/coronavirus-and-languages-gcses-2020/
作者: Apple_Orange_T 時間: 21-3-28 13:00
Poyau 發表於 21-3-28 10:14
GCSE MFL 趨勢
法文 ↓ 西班牙文↑ 德文2020
French & German 都好，
可能英國公立學校多啲有法文，德文少啲，如果錯，請更正
作者: KIMLIFEINUK 時間: 21-3-28 22:56
我見有 news話脫歐後少左人學法文
作者: KIMLIFEINUK 時間: 21-3-28 23:02
本帖最後由 KIMLIFEINUK 於 21-3-28 23:03 編輯
Apple_Orange_T 發表於 21-3-28 13:00
French & German 都好，
可能英國公立學校多啲有法文，德文少啲，如果錯，請更正
...
學法文既人數比德文多好多，根據數字，咁應該係，我阿女間學校有法文及西班牙文，但無德文提供
作者: KIMLIFEINUK 時間: 21-3-29 17:39
本帖最後由 KIMLIFEINUK 於 21-3-29 18:01 編輯
Grammar school 的迷思
阿女同D同學傾開，佢地大多數都對 11 plus 既考試印象深刻！!以下係一些節錄。
*有個女仔話佢係家族第一個入到 grammar school 既人，super proud.
*有個女仔話，自從佢阿哥早幾年入左間grammar school 之後，佢阿媽就突然覺得入 grammar school唔係夢，於是係咁幫佢操個考試，叫佢要入到。
*有個女仔係考試年半前佢阿媽先知有個咁既試，所以遲左開始溫習，不過好彩得左，而家佢個妹今年五歲，佢阿媽決定佢要早D開始預備 11 plus, 仲打算send 佢去 prep school!
*有一個女仔話佢由 year 4 開始，佢阿媽己經home school 佢 11 plus 既 workbook and technique.
* 有個女仔話佢以為自己一定 fail, 因為張卷尾有好幾題唔識，放 result 果日，佢阿媽仲嚇佢，同佢講 fail左，佢話咁以為入硬另一間choice, 點知佢阿媽係咁笑，原來佢係同佢講笑，佢話嚇死佢！
*有個女仔話放 result 果日，佢阿媽開心到喊！
作者: KIMLIFEINUK 時間: 21-3-29 17:58
阿女由九月開學至今己經轉眼半年，可以話係一半係學校，一半係屋企。
短短既日子裡，學校既朋友圈已經有不少變動！開學初期，有2個女仔特別friend, 成日一齊玩，但最近佢地就反左面！連係走廊行過見到都當對方透明，但係無人知佢地反面既原因！
另外有2個本來都一齊玩既女仔，唔知因為乜野事，係學校大打出手，竟然互扯頭髮，最後去左見校長！仲喊住行出校長室！ 之後又係互相當對方透明，又係無人知點解！
之前有個女仔，由開學到近期都係一個人，佢無朋友，食午餐時間都係自己一個人，但近期有另一個女仔同佢組左一個朋友圈，事源因為果個女仔又同佢既 friend 反左面，所以佢就「立」左呢個single girl 做 friend.
我就唸唔到其實佢地有乜野會反面致此，而家年青人就係夠直率。
作者: KIMLIFEINUK 時間: 21-3-29 18:21
放復活節假期之前既呢個星期，有數學和英文test, 總結一下學校開番所教過既 topics.
我見阿女既英文科，其實已經冇教任何文法或者串生字之類。我相信上左中學之後。可能就已經唔需要教呢啲。我覺得如果喺香港過嚟嘅小朋友。可以過嚟之前儘量打好個文法基礎。因為上咗中學實在再無呢方面嘅教學。我見佢而家最多係睇文章，分析文章嘅寫作風格，同埋嘗試各種唔同嘅創意寫作。
其實我覺得啲細路仔喺香港嚟真係好叻，英文程度可以咁快追得上。如果係我當年，我相信我自己就唔得。
| 歡迎光臨 教育王國 (/) |
Powered by Discuz! X1.5 |